1-2. Xeeni makristau anilikana aya ni empa ele yoorakama? (1 aKorinto 15:58.)

 WANIKISA wa mwaakha wa 1970, yaahitekiwa epereetiyu aahiiso empa yoorakamela osulu elapo ya oTóquio, oJapão. Epereetiyu eyo yaarina antare 60, eyo piiyo, saahiilanyeriwa ipa 60. Okhala wiira epooma ele sinnikhumela itetere sinceene, atthu yaaweha empa ele, yaaniikoha akhala wiira khiyaarowa omora. Masi khahiyo ti yeeyo yiiraneyale. Makristau anoolikana ni empa ele yoorakama. Xeeni ninhimya ahu siiso?

² Mukristau oohaana okhala oohittikinyeya ni oowiixaakuviha. Oohaana okhala oolipa ni oohittikinyeya, okathi onaakiherya awe aahiiso wiiwelela Malamulo a Yehova. (Mmusome 1 aKorinto 15:58.) Nave owo ohaana okhala ‘oowaakuva wiiwelela’ ni oheemererya etthu ekina emwiirihaka oturuka muupuwelo. Nave-tho, owo ohaana okhala ‘oowaathokorerya akina’ khula okathi vanreerela aya. (Yak. 3:17) Mukristau orina mikhalelo iya, khivanrowa omuxankiha okhalana mikhalelo sikina. Mwaha ola, nnooweha moota ninrowa ahu okhala oolipa ni oohittikinyeya. Nave, nnooweha itthu 5 Satana onirumeela awe wiira onikhulumule nave nnooweha moota nikhale ahu oosyaka.

3. Malamulo xeeni a Yehova ari Miteko 15:28, 29?

³ Yehova paahi, torina ediretu yookumiherya malamulo wiira arumeyi awe yeetteleke. Malamulo awo khanvila wiiwelela. (Yes. 33:22) Mwa ntakiheryo, nikhuuru noolamulela na okathi wa makristau oopacerya, naahitthokiherya inamuna tthaaru mukristau okhanle awe oohihiya okhala oolipa: (1) okhootta waakokhorela amuluku eethiru, masi omukokhorela Yehova  paahi, (2) wiiwelela malamulo a Yehova voohimya sa ephome ni (3) wiiwelela malakiheryo ni malamulo a mbiibiliyani voohimya sa orupihana woohiloka. (Musome Miteko 15:28, 29.) Nuupuwelaka inamuna iya tthaaru, makristau olelo-va anrowa owerya sai omwiiwelela Yehova?

4. Ninrowa wooniherya sai wiira nimmukokhorela Yehova paahi? (Wiisupulula 4:11.)

⁴ Ninnikhootta waakokhorela amuluku eethiru, nimmukokhorela Yehova paahi. Yehova aahaaruma aisarayeli wiira amukokhoreleke Yena paahi. (Otum. 5:6-10) Okathi Satana aamweeherenrye awe Yesu ohimyaka wiira aahaana omukokhorela yena, Yesu aakhunle wiira Yehova paahi torina ediretu ya okokhoreliwa. (Math. 4:8-10) Nimutakihaka Yesu, khaninkokhorela ilatarato nnakhala khannaakokhorela apinaatamu. Mwa ntakiheryo, khinnaathokorerya ntoko muluku ahooleli a itiini, a ipoliitika ni atthu oovuwa. Masi nimmukokhorela Yehova paahi, yoowo ‘opattunxe itthu sootheene’. — Mmusome Wiisuupulula 4:11.

5. Xeeni nniiwelela ahu nlamulo na Yehova voohimya sa okumi ni ephome?

⁵ Ninniiwelela malamulo a Yehova voohimya sa okumi ni ephome. Mwaha wa xeeni? Mwaha woowi Yehova aahihimya wiira ekumi ya khula etthu, ephome aya. Eyo yoovaha yuulupale enikhuma wa Yena. (Onam. 17:14) Okathi Yehova aawemerenrye awe apinaatamu okhuura enama, owo aahaaruma wiira ahikhureeke ephome ya enama eyo. (Maph. 9:4) Okathi Yehova aavanhe awe aisarayeli nlamulo na Moise, aahitthikela-tho waaleela yooruma ele. (Onam. 17:10) Orumeelaka nikhuuru noolamulela na okathi wa makristau oopacerya, Yehova aahaatumererya makristau ootheene wiira yaahaana ‘okhoottaka . . . ephome’. (Mit. 15:28, 29) Hiyo ninniiwelela moolipa murima yooruma eyo, okathi ninthanla ahu enamuna yoolooliwa. b

6. Nisyakeke exeeni naaphavelaka wiiwelela malamulo a Yehova?

⁶ Ninniiwelela malamulo akumiheriwe ni Yehova. (aHeeb. 13:4) Murummwa Paulo oonitumererya wiira niive soophavela soohiloka sa erutthu ahu. Eyo entaphulela wiira nihaana wiimananiha vanceene, wiira nimala-malihe soophavela sootheene soohiloka. Nave-tho, eyo entaphulela wiira nihaana osyaka itthu sootheene saarowa oniiriha ophavela orupiha woohiloka. (aKol. 3:5; Yob. 31:1) Okathi nneehereriwa ahu opaka etampi, nihaana okhootta moowaakuveya, okhale muupuwelo aahiiso opaka etthu yaarowa ohonona waataana wahu ni Yehova.

7. Exeeni ninreerela ahu opaka ni mwaha wa xeeni?

⁷ Yehova oniphavela wiira ‘nimwiiweleleke ni murima ahu wootheene’. (aRom. 6:17) Khula etthu Yehova onnivekela awe opaka, oniirela mureerelo ahu, nave hiyo khaninwerya oturuka malamulo awe. (Yes. 48:17, 18; 1 aKor. 6:9, 10) Hiyo ninniimananiha omuhakalaliha Yehova nimutakihaka nasalimo aalempe so: “Kinnitthuna otthara otthuna wanyu, wira okhaleke ntthuvelo naka”. (Esal. 119:112) Satana onniimananiha wiira onihiihe wiiwelela malakiheryo a Yehova. Enamuna xeeni onirumeela awe wiira opake eyo?

8. Satana onirumeela sai olupatthiwa wiira onihiihe wiiwelela malamulo a Yehova?

⁸ Olupatthiwa. Diabo, onnirumeela olupatthiwa ni otakhala wiira onihiihe wiiwelela malamulo a Yehova. Owo onnipaka eyo ophavelaka ‘onikhuura’, eyo piiyo, ohonona  ompatthani ahu ni Yehova. (1 Ped. 5:8) Makristau oopacerya yaanilupatthiwa, omaniwa ni akina yaahiiviwa mwaha woowiiwelela malamulo a Muluku. (Mit. 5:27, 28, 40; 7:54-60) Nave olelo-va, Satana onnirumeela etthu emosa-ru. Eyo ti etthu makhulupale a oRússia ni a ilapo sikina aniwiiriha aya anna ni arokora. Tthiri anna annilupatthiwa mwa inamuna soovirikana.

9. Ntakiheryo na munna Bob nnooniherya sai wiira Satana onnirumeela olavilavi?

⁹ Sooweeha sa olavilavi. Ohiya paahi orumeela olupatthiwa, Satana onnirumeela “miteko sa olavilavi” wiira onituphele. (aEef. 6:11) Nrowe nthokorerye ntakiheryo na munna Bob, yoowo aapaxanri ospitaali ophavelaka wooperariwa. Owo Aahaaleela mameediku wiira kheemererya khula enamuna ya olooliwa erumeeliwaka ephome. Nto meediku ole aaheemererya omooperari ohirumeelaka ephome. Ohiyu omosa ohinatthi wooperariwa, meediku mukina aahivaanela ni Bob nuumala amusi awe okhuma. Meediku ole aahimuleela munna Bob wiira khaarowa oheleliwa ephome, masi akhala wiira amphavela, yaahikhala. Okhala wiira amusi awe khiyaakhanle vaavale, meediku ole aakupali wiira Bob aamuturuka muupuwelo awe. Masi moolipa murima, Bob khaaturunke muupuwelo awe, nave aahitthikela omulela meediku wiira khoneemererya khula enamuna ya olooliwa erumeeliwaka ephome.

10. Xeeni miyuupuwelo sa atthu a olumwenku ola siri aya sootakhala? (1 aKorinto 3:19, 20.)

¹⁰ Muupuwelo wa atthu ahiniiwelela malamulo a Yehova. Akhala wiira nnuupuwela ntoko atthu a mulaponi, hiyo pooti opaceryaka okhootta wiiwelela malamulo a Yehova. (Mmusome 1 aKorinto 3:19, 20.) “Ankhili a olumwenku ola”, anniwiiriha atthu anceene ohimwiiwelela Muluku. Makristau makina a oPeergamo ni oTiyatira, yaahihapuxiwa ni atthu yaattamanne aya, yaawo yaarupihana voohiloka ni yaakokhorela ilatarato. Nto Yesu aahaapwapwela anna a miloko iye, maana awo yaanaahiya atthu akina arupihanaka voohiloka. (Wiis. 2:14, 20) Olelo-va, atthu anceene anninikhanyererya weemererya soophavela soohiloka sa olumwenku ola. Nave amusi ahu wala ale nnaasuwela ahu, pooti ohimyaka wiira khahiyo vootthekeya ohiiwelela malamulo makina a Yehova. Mwa ntakiheryo, awo pooti ohimyaka wiira khivantthekeya opaka ele muniphavela anyu, maana malakiheryo a mbiibiliyani ta khalai ni khanivareleya muteko olelo-va.

11. Exeeni nihinreerela ahu opaka?

¹¹ Ikwaha sikina, hiyo pooti wuupuwelaka wiira malakiheryo ninvahiwa ahu ni Yehova, toovila wiiwexexa. Nave ikwaha sikina hiyo pooti weehereriwaka wiira ‘nihitthareke itthu silempwale paahi’. (1 aKor. 4:6) Ahooleli a itiini okathi wa Yesu, yaaniwiiriha atthu wuupuwelaka etthu ela. Awo yaanipaka eyo akumiheryaka malamulo aya wiira yincererye nlamulo na Moise, nto eyo yaaniwiiriha atthu akina woonaka ovila wiiwelela. (Math. 23:4) Masi Yehova onninivaha malakiheryo ookhweya wiiwexexa omurumeelaka Biibiliya ni mutthenkeso awe. Khivanreerela wuncererya etthu malakiheryo awo. (Mir. 3:5-7) Tthiri nihaana otthara ele elempwale, nave nihikumiheryeke malamulo ahu wiira anna akina atthareke.

12. Satana onirumeela sai “miyuupuwelo sa ethiru”?

¹² Miyuupuwelo sa ethiru. Satana onnirumeela “miyuupuwelo sa ethiru” ni “miruku sa olumwenku”, wiira aahaapuxe ni waakawanya apinaatamu. (aKol. 2:8) Okathi wa arummwa, miyuupuwelo sa ethiru ni miruku sa olumwenku, saahela muhina moolumo oowoototha  a apinaatamu. Nave saahela muhina soowiixuttiha sa ayuda, seiyo sahaavarihana ni nlamulo na Moise ni saawiiriha aisarayeli ohitthara Miruku sa Yehova. Olelo-va, Satana onnirumeela inamuna soovirikana ntoko redes sociais, wiira omwara-mwarye itthu soowoothiwa sinilaleiwa ni ahooleli a ipoliitika. Eyo yaaniiraneya ikwaha sinceene okathi wa Koronaviiru. c Masi Anamoona a Yehova yaanitthara malakiheryo yaavahiwa ni mutthenkeso ahu, nave yaanaakhaliherya ale yiiwa itthu iyo soowoothiwa. — Math. 24:45.

13. Xeeni ninreerela ahu ovahaka ephoole itthu sooxeleliha?

¹³ Itthu sooxeleliha. Nihaana othanlelaka “itthu sootepa oreerela”. (aFil. 1:9, 10) Ikwaha sikina itthu sooxeleliha pooti oniiyeryaka ikuru sahu ni okathi naakhanle ahu oorumeelaka wiira nivare itthu sootepa oreerela. Itthu iyo sinihela muhina eyoolya, yoowurya, matthekulelo ni muteko, vakhala wiira nnoovaha efaita yinceene mookumini mwahu. (Luka 21:34, 35) Ohiya-vo, khula nihiku ninniiwa aahiiso ninniweha ikereve ni itthu soohiloka sinilaleiwa ni ahooleli a ipoliitika. Nto nihaana ovahaka ephoole yinceene wiira itthu iyo sihinixelelihe. Naahiire siiso, hiyo pooti opaceryaka waakhaliherya atthu akina, masi nnaanyokha akina. Satana onnirumeela itthu niromonle ahu wiira onihiihe omuroromela Yehova. Nrowe niwehe moota nikhanle ahu ooxintta sooweeha iyo ni ohihiya okhala oororomeleya.

14. Exeeni enrowa onikhaliherya ohihiya omurumeela Yehova?

¹⁴ Muupuweleke etthu ewiirinheni wiivahererya wa Yehova ni opatisiwa. Muhiivahererya wa Yehova ni moopatisiwa maana mwaaphavela omurumeelaka. Munnuupuwela etthu yaawiirinheni okupali wiira moophwanya ekeekhai? Nuumala omusuwela Yehova, mwaahipacerya omphenta ni omuttittimiha ntoko Tiithi anyu a wiirimu. Mwaahincererya waamini wanyu ni mwaahittharuwa itthu soohiloka mwaapaka anyu. Omphenta wanyu waahiwiirihani ohiya opaka itthu  sahaamusivela, nto munapaka sinimusivela. Mwaahihakalala vanceene nuumala osuwela wiira Yehova ohoolevelelani. (Esal. 32:1, 2) Mwaahipacerya orowa omuthukumanoni ni owiixuttiha atthu akina itthu soohakalaliha mwiixutta anyu. Vano mwa mukristau wiivaherenrye ni opatisiwe, nave muneetta ephiro enroiha okumi woohimala. — Math. 7:13, 14.

15. Mureerelo xeeni nimphwanya ahu naamusomaka Biibiliya ni wuupuwelela ele ninsoma ahu?

¹⁵ Mmusomeke Biibiliya ni muupuweleleke ele munisoma anyu. Akhala wiira mwiri onnikhalana mitathari soowiixerya, mwiri owo onikhala woolipa. Mwa enamuna emosa-ru, vakhala wiira nnoosoma Nuulumo na Muluku ni wuupuwelela, waamini wahu onrowa okhala woolipa ni khaninrowa ohiya omurumeela Yehova. Niira siiso, ninnikupali wiira itthu Yehova onnivekela awe opaka, ti sooloka. (aKol. 2:6, 7) Muupuweleleke moota malakiheryo a Yehova ni malamulo awe yaakhalihenrye aya arumeyi awe a khalai. Mwa ntakiheryo, okathi aaloha awe, Ezekiyeli aahivaha ephoole vaavo nlaikha na Yehova naaphima aya etemplo. Etthu ele yaahimulipiha Ezekiyeli, nave enninuupuxerya wiira nihaana wiiwelela ni waakiherya okokhorela wa ekeekhai. d (Ezek. 40:1-4; 43:10-12) Nave ninnittottela mureerelo, vaavo ninsoma ahu ni wuupuwelela ikeekhai soovila wiiwexexa sa mbiibiliyani.

16. Olipa murima waamukhalihenrye sai munna Bob? (Esalimo 112:7.)

¹⁶ Mulipihe murima. Mwene Davidi aahihimya wiira khaakhala-khala ohiyaka omphenta Yehova. Eyo ti etthu yaamwiirinhe wiipa oriki: “Muluku! Mòniherye owerya wanyu onvikana erimu: ovuwa wanyu omwarele mulaponi mothene”. (Esal. 57:6) Nnoomutakiha mwene Davidi, vakhala wiira nnoomuroromela Yehova ni murima ahu wootheene. (Musome Esalimo 112:7.) Nrowe ntthikele wuupuwelela ntakiheryo na munna Bob nimulavunle ahu wanipacerya. Okathi meediku ole aahimmye wiira yaahikhala ephome vakhala wiira amphavelaka, moowakuveya owo aakhunle wiira: “Akhala wiira kinrowa olooliwa erumeeliwaka ephome, fatari kiroweke owaani”. Bob onitthokiherya so: “Kaahisuwela wiira ele yaari  etthu yooloka kaakhanle aka oopaka, nave nkoova etthu yaarowa okhumelela”.

17. Yoowiiraneya ya munna Bob enniixuttiha exeeni? (Nwehe efootu.)

¹⁷ Bob aahiwerya okhala olipa murima, maana aahipaka yoothanla ele ohinatthi orowa ospitaali. Etthu yoopacerya, owo aaniphavela omuhakalaliha Yehova. Ya nenli, owo aahisoma myaha saalavula sa okumi ni ephome mbiibiliyani ni iliivuru sinimutthokiherya Biibiliya. Ya neeraru, aahisuwela wiira wiiwelela malakiheryo a Yehova, yaamumphwanyiha mireerelo. Hiyo nnoowerya okhala oolipa murima hata siniphwanyaka mixankiho sinceene.

18. Ntakiheryo na Baraki ninniixuttiha exeeni voohimya sa omuroromela Yehova? (Nwehe eteseenyo ya ekaapa.)

¹⁸ Mmuroromeleke Yehova. Nwehe moota Baraki aareelihiwe awe mwaha woomuroromela Yehova. Okathi ole aisarayeli khiyailokihenrye wiira yawane ekhotto, nnakhala khiyaarina ikaruma sa ekhotto. Masi Yehova aahimuruma Baraki orowa owana ni mukhulupale a anakhotto a oKanani iitthaniwa Sisera, yoowo aarina ikaruma sinceene sa ekhotto. (Makh. 5:8) Deebora, yoowo aari profeta, aahimuleela Baraki wiira orowe muttetthe woowaataleya wa omiyakoni, wiira akumane ni Sisera vamosa ni anakhotto awe yaarina ikaaro 900 sa ekhotto. Opuro ole khiwaarowa waaxankiha akaanani owana ekhotto, hata vari siiso, Baraki aahiiwelela. Okathi anakhotto a Sisera yaakhuruwa aya omwaako Tabori, Yehova aahiiriha orupa epula yinceene. Nto okathi yaarupa aya epula ele, ikaaro sootheene sa Sisera saahiphara munttopheni. Yehova aahimukhaliherya Baraki waaxintta awanani awe. (Makh. 4:1-7, 10, 13-16) Ntoko siisaale Yehova aamukhalihenrye awe Baraki, owo onoonikhaliherya akhala wiira nnoomuroromelaka ni wiiwelela malakiheryo onnivaha awe orumeelaka mutthenkeso awe. — Otum. 31:6.

19. Xeeni ninreerela ahu ohihiya okhala oohittikinyeya?

¹⁹ Okhala wiira nlelo ninkhala olumwenku ola wootakhala, nihihiye okhala oolipa ni oohittikinyeya. (1 Tim. 6:11, 12; 2 Ped. 3:17) Nihikhala-khale neemereryaka wiira olupatthiwa, sooweha sa olavilavi sa Satana, soowiixuttiha soowoothiwa sa atthu, itthu soohiloka sinilaleiwa ni itthu sooxeleliha siniirihaka ohiya omuroromela Yehova ni otthara malakiheryo awe. (aEef. 4:14) Niira siiso, khaninrowa ohiya okhala oolipa, oohittikinyeya, omphenta Yehova ni omwiiwelela. Nave nihaana okhala atthu ahinthipelela moonelo ahu. Mwaha onittharelana ninrowa oweha moota Yehova ni Yesu ari aya ntakiheryo nooloka na atthu ahinthipelela moonelo aya.