1. Itthu xeeni mwaaixuntte anyu okathi mwaapacenrye anyu osomihiwa Biibiliya?

 NIIREKE munnuupuwela itthu sootheene mwiixuntte anyu okathi mwaapacenrye anyu osomihiwa Biibiliya? Woonasa wene, vaahootikinihani osuwela wiira Muluku ookhalana nsina. Nave mwaahihakalala osuwela wiira Muluku khonaapaha atthu omooroni. Nave-tho mwaahihakalala osuwela wiira amusi anyu akhwiiye, anootthikela okhala akumi ni wiira munrowa okhalaka naawo mparayiisu valaponi.

2. Okathi mwaasomihawa anyu Biibiliya, itthu xeeni mwaapanke anyu? (aEefeso 5:1, 2.)

² Khula okathi mwaamusoma anyu Biibiliya, omphenta wanyu Yehova waanincerereya. Omphenta iwo, waaniwiirihani oovarihela muteko itthu mwiixutta anyu. Nto eyo, yaaniwiirihani opaka soothanla sooloka muttharaka malakiheryo a mbiibiliyani. Nave, yaaniwiirihani olokiherya mweettelo anyu ni mukhalelo anyu, maana mwaaphavela omuhakalalihaka Muluku. Ntoko siisaale mwaana onimutakiha awe paapa awe oophenta, nave nyuwo mwaaphavela omutakihaka Tiithi anyu a wiirimu, Yehova. — Mmusome aEefeso 5:1, 2.

3. Makoho xeeni ninreerela ahu wiikohaka?

³ Niikoheke so: ‘Kiireke omphenta waka Yehova nenna-va, ohincerereya ovikana kiiraka wiixutta-ru ekeekhai? Nuumala miyo opatisiwa, kiireke kinnuupuwela ni kinnipaka itthu ntoko Yehova oniphavela awe? Kiireke kinnaaphenta vanceene anna ni arokora?’ Masi moona wiira omphenta wanyu Yehova vamosa ni anna ni arokora woovukuwa, muhikhulumuwe, maana eyo yaahiiraneya ni makristau oopacerya. Nto hata eyo yiiraneyale, nlelo Yesu aniweemererya okhala awiixutti awe. Nave hiyo khonrowa onihiya. (Wiis. 2:4, 7) Yesu onnisuwela wiira vanniweryaneya  otthikela omphenta Yehova vamosa ni anna ni arokora ntoko niira ahu khalai.

4. Exeeni ninrowa ahu othokorerya mwaha ola?

⁴ Mwaha ola, ninrowa othokorerya moota nikhanle ahu owuncererya omphenta wahu Yehova vamosa ni anna ni arokora. Nave nnooweha mareeliho ninrowa ahu ophwanya, naahihiye omphenta Yehova vamosa ni anna ni arokora.

5-6. Mixankiho xeeni samphwannye Paulo okathi eetta awe mikwaha , nto exeeni yaamukhalihenrye ohihiya omurumeela Yehova?

⁵ Murummwa Paulo aanihakalala vanceene okathi aamurumeela awe Yehova. Masi ikwaha sikina saanimphwanya mixankiho. Okathi wa Paulo khivaakhweya weetta mikwaha, masi hata vaari siiso, owo aneetta mikwaha. Okathi Paulo eetta awe mikwaha aanikumana “itthu soowoopiha mmuro” ni “alatarau”. Nave ikwaha sikina, Paulo aanimaniwa ni awanani awe. (2 aKor. 11:23-27) Nave-tho, Paulo aaniimananiha waakhaliherya anna, masi awo khiyaaxukhurela itthu aapaka awe. — 2 aKor. 10:10; aFil. 4:15.

⁶ Exeeni yaamukhalihenrye Paulo ohihiya omurumeela Yehova? Nuulumo na Muluku, naahimwiixuttiha itthu sinceene Paulo voohimya sa mikhalelo sa Yehova. Nave mixankiho sawe iye saahimwiixuttiha etthu. Owo aanisuwela wiira aaniphentiwa vanceene ni Yehova. (aRom. 8:38, 39; aEef. 2:4, 5) Nto aahincererya omphenta wawe Yehova. Paulo aahooniherya omphenta wawe Yehova ‘aarumeelaka ni ohihiyaka waarumeela ale oororomeleya’. — aHeeb. 6:10.

7. Ninrowa wuncererya sai omphenta wahu Yehova?

⁷ Hiyo nnoowerya wuncererya omphenta wahu Muluku nimusomaka Biibiliya ni ephoole. Nto okathi nimmusoma ahu, niimananiheke woona etthu yoowiiraneya eyo ninsoma ahu, enniixuttiha aya voohimya sa Yehova. Mwiikoheke so: ‘Yoowiiraneya ela, enooniherya sai wiira Yehova onnikiphenta? Yoowiiraneya ela enincererya sai omphenta waka Yehova?’

8. Enamuna xeeni ekina enrowa onikhaliherya wuncererya omphenta wahu Muluku?

⁸ Enamuna ekina enrowa onikhaliherya wuncererya omphenta wahu Yehova, ori omutthukulela murima okathi nninvekela ahu. (Esal. 25:4, 5) Nikupaliki wiira Yehova onimwaakhula mavekelo ahu. (1 Yoh. 3:21, 22) Murokora mmosa a wAsia oniitthaniwa Kaila onihimya so: “Kaanimphenta Yehova maana kaaixutta voohimya sa yena. Muhoolo mwaya okathi koonaka moota Yehova aakhula awe mavekelo aka, kaahincererya omphenta waka. Eyo yaahikikhaliherya opaka itthu saamuhakalaliha”. b

9. Ninsuwela sai wiira Timootheyo aanaaphenta anna ni arokora?

⁹ Nuuvira iyaakha vakhaani Paulo ori ene mukristau, aahimusuwela mmiravo mmosa arina ntakiheryo nooloka iitthaniwa Timootheyo. Timootheyo aanimphenta Yehova vamosa ni anna ni arokora. Nto Paulo ahaalepela makristau a oFilipi oriki: “Nkirina-tho mutthu mukina oowiivahererya siisa, onrowa woothokoreryani vanceene”. (aFil. 2:20) Moolumo ala, Paulo khaaphavela ohimya moota Timootheyo aasuwela awe waahoolela anna aahiiso moota aasuwela awe olavula myaha. Masi Paulo aaphavela ohimya wiira aanisiveliwa vanceene ni Timootheyo maana owo aanaaphenta vanceene anna ni arokora. — 1 aKor. 4:17.

10. Murokora Anna ni iyawe, yoonihenrye sai wiira yaanaaphenta anna ni arokora?

¹⁰ Hiyo nave, nihaana waavyaka inamuna sa waakhaliherya anna ni arokora. (aHeeb. 13:16) Nrowe nthokorerye yoowiiraneya ya  Anna, nimulavunle ahu mwaha ovinre. Nuumala epheyo yuulupale, murokora Anna ni iyawe, yaahirowa oxukurya emusi emosa ya Anamoona a Yehova. Nuumala ophiya, awo yaahoona wiira empa ya emusi ele, yaahinyaanyiwa vasulu ni epheyo. Nto mwaha waivaavo, emusi ele khiyaarina ikuwo sooloka. Murokora Anna onihimya so: “Naahikuxa ikuwo sa emusi ele, nrowa nakattha naahittikiha siri ene sooreera ni sookhuniwa. Tthiri nne naari nikhaliheryo naamukhaani paahi, masi mwaha waivaavo, hiyo na apatthani a ekeekhai mpakha olelo-va”. Mwaha woowaaphenta anna ni arokora, Anna ni iyawe yaahipaka etthu wiira yaakhaliherye. — 1 Yoh. 3:17, 18.

11. a) Atthu akina anoonela sai okathi ninwooniherya ahu niphento? b) Moovarihana ni Miruku 19:17, Yehova onoonela sai okathi nnooniherya ahu niphento?

¹¹ Okathi nnaareerela ahu murima ni nnaathokorerya ahu anna ni arokora, awo annoona wiira ninniimananiha omutakiha Yehova. Woonasa wene, hiyo pooti ohisuwelaka moota awo anivaha aya efaita wiimananiha wahu. Kaila yoowo nimulavunle ahu ittima sivinre onniwuupuwelela ale yaamukhalihenrye. Owo onihimya so: “Kinaaxukhurela vanceene arokora yaawo yaakikuxa arowaka muteko woolaleerya. Awo yaanikirweela owaani, yaanikilattula wiira nalye hoothe ni yaanikittikiherya owaani moovareleleya. Olelo-va, kinnoona wiira tthiri ole waari muteko muulupale arokora ale yaavara aya. Nave awo yaanipaka itthu sootheene mwa niphento”. Ekeekhai wiira khahiyo atthu ootheene nnaakhaliherya ahu anoonixukhurelaka. Kaila olavulaka sa ale yaamukhalihenrye onihimya so: “Miyo kaaniphavela waaxukhurela ootheene ale yaakireerenle murima, masi nkinsuwela mapuro anikhala aya. Masi Yehova onnisuwela mapuro anikhala aya. Nnaamwi kihiweryaka waakhaliherya kinninvekela yena wiira aakhaliherye”. Kaila onihimya ekeekhai. Yehova onnisuwela khula etthu nimpaka ahu  wiira naakhaliherye atthu akina hata ekhalaka yaamukhaani. Tthiri owo, onnivaha efaita wiimananiha wahu, nave onithokorerya ntoko etthu nimukophinhe ahu wiira onilive muhoolo. — Musome Miruku 19:17.

12. Anna anrowa wooniherya sai niphento naya mmulokoni? (Nwehe efootu.)

¹² Akhala wiira nyuwo mwa munna, munrowa owooniherya sai niphento atthu akina ni waakhaliherya? Munna mmosa mmiravo oniitthaniwa Jordan, aahimukoha mutokweene etthu aakhanle awe oopaka wiira okhaliherye muloko. Nto mutokweene owo, aahimuttottopela Jordan mwaha wa etthu aawenrye awe opaka, nave aahinvaha malakiheryo a moota okhanle awe ookhaliherya vanceene muloko. Owo aahinvekela Jordan wiira aahaana ophiyaka omithukumanoni sihinatthi opacerya, wiira aakoheke ihaali anna ni arokora. Nave aahinvekela wiira aahaana okomentariki mmithukumanoni, okhuma muteko woolaleerya vamosa ni ekurupu awe ni ohaavya inamuna sikina sa waakhaliherya anna ni arokora. Nto okathi Jordan aatthara awe malakiheryo awo, owo aahoona wiira ohiya paahi wiixutta itthu isya, owo aahincererya waaphenta wawe anna ni arokora. Jordan ohiixutta wiira okathi mutthu onithanliwa awe okhala murumeyi ookhaliherya, khahiyo onoopacerya waakhaliherya atthu akina, masi onimuncererya. — 1 Tim. 3:8-10, 13.

13. Ophenta waamukhalihenrye sai munna Christian otthikela orumeela ntoko mutokweene?

¹³ Ankhi vakhala wiira khalai mwaari murumeyi ookhaliherya aahiiso mutokweene? Muhiliyale wiira Yehova onnuupuwela itthu sootheene nvanre anyu ni niphento naawiirihani ovara itthu iyo. (1 aKor. 15:58) Nave, owo onniweha ophenta munooniherya anyu nenna-va. Munna mmosa oniitthaniwa Christian, aahiriipiwa murima vanceene nuumala ohiihiwa okhala mutokweene. Hata vari siiso,  owo onihimya so: “Miyo kaahithanla opaka itthu sootheene wiira kimurumeeleke Yehova ni omphenta nnaamwi kahaarina miritti”. Nuuvira okathi, Christian aahitthikela okhala mutokweene. Owo onihimya-tho so: “Miyo kaanoova otthikela-tho orumeela ntoko mutokweene. Masi kaanoona wiira mwaha wa Yehova okireerela wawe murima, owo aaniphavela wiira miyo kikhale mutokweene nto ti etthu kaakhanle aka oopaka. Miyo kaahipaka eyo mwaha womphenta waka Yehova ni waaphenta waka anna ni arokora”.

14. Exeeni nniixutta ahu ni ntakiheryo na murokora Elena?

¹⁴ Arumeyi a Yehova annaaphenta atthu akina. (Math. 22:37-39) Mwa ntakiheryo, murokora mmosa a elapo ya oGeorgia oniitthaniwa Elena oniihimya so: “Wanipacerya, etthu yaakiiriha olaleerya, waari mwaha woophenta waka Yehova paahi. Nto okathi omphenta waka Yehova wancerereya aya, waaphenta waka atthu akina waanincerereya. Kaaniimananiha wuupuwelela mixankiho saaphwanya atthu ni etthu kaakhanle aka oolavula wiira yaavare murima. Wuupuwela moota ola, waanikiiriha ophavela vanceene waakhaliherya atthu akina”. — aRom. 10:13-15.

15-16. Ntoko enooniherya aya efootu, mareeliho xeeni anikhumela naahihiye waaphenta atthu akina?

¹⁵ Atthu akina anniphwanya mureerelo vaavo nnaaphenta ahu anna ni arokora. Nuumala opacerya koronaviiru, munna Paolo ni mwaarawe yahaakhaliherya anna anceene oowuuluvala  moota woowaarumeela atelefoni aya ni akomputatore wiira aweryeke olaleerya. Nto nuuvira okathi, murokora mmosa ahaasuwela orumeela ikaruma iyo, aahiixutta okathi wa koronaviiru. Orumeelaka ikaruma iyo, murokora ole aahaalattula amusi awe wiira awehe muthukumano wa wuupuwelela okhwa wa Yesu. Nto amusi awe oowiiraka 60, yaahiweha muthukumano wa wuupuwelela amurumeelaka video conferência! Tthiri wiimananiha wa munna Paolo vamosa ni mwaarawe, waahimukhaliherya murokora ole ni waahaakhaliherya amusi awe. Nuuvira okathi, murokora ole aahimulepela ekaarta Paolo ni mwaarawe ohimyaka so: “Kinnooxukhurelani mwaha woowaakhaliherya wanyu anna ni arokora oowuuluvala a mmulokoni. Nkinikhala-khala kiliyalaka moota Yehova onikhapelenle awe ni wiimananiha wanyu wiira munikhaliherye”.

¹⁶ Yoowiiraneya ela yoomwiixuttiha itthu sinceene Paolo. Owo ohiixutta wiira ophenta wookhalana efaita yinceene ovikana osuwela aahiiso owerya opaka itthu sinceene. Paolo onihimya so: “Kaarumeela ntoko mutokweene a esirkwitu. Ekeekhai wiira anna ni arokora khanuupuwela myaha kaalavulaka, masi awo annuupuwela itthu kaapanke aka wiira kaakhaliherye”.

17. Tani-tho anrowa ophwanya mareeliho okathi nnooniherya ahu niphento?

¹⁷ Okathi nnaaphenta ahu atthu akina, hiyo nave ninnittottela mureerelo mwa enamuna nahuupuwela ahu. Munna Jonathan, yoowo onikhala elapo ya oNova Zelândia onnikupali eyo. Nihiku nimosa saabadu othana, vavihaka vanceene, owo aahinweha pioneero mmosa olaleeryaka mekhawe. Nuumala-vo, owo aahilakela wiira aarowa olaleerya hoothe ni pioneero ole, esaabadu yaattharelana othana. Jonathan, khaasuwela wiira olaleerya hoothe ni pioneero ole, waamumphwanyiha mareeliho manceene. Owo onihimya so: “Okathi ole khiwaakisivela olaleerya. Nuumala oweha moota pioneero ole iixuttiha awe, ni mareeliho yaakhumelela, muteko woolaleerya waahipacerya okisivela. Ohiya-vo, naari apatthani aalupale, nave munna ole anikikhaliherya olipiha ompatthani aka ni Yehova, osiveliwa muteko woolaleerya ni ohihiya omwaattamela Yehova”.

18. Yehova oniphavela wiira nipakeke exeeni?

¹⁸ Yehova oniphavela wiira ootheene ahu, nincereryeke omphenta wahu yena vamosa ni atthu akina. Ntoko niwenha ahu mwaha ola, nnoowerya wuuncererya omphenta wahu Yehova, nimusomaka Biibiliya, nuupuwelelaka ele ninsoma ahu ni ninvekelaka khula okathi. Nave nnimuncererya waaphenta wahu anna ni arokora akhala wiira nnoopakaka etthu wiira naakhaliherye. Nto okathi ophenta wahu onincerereya aya, ninnitepa omwaattamela Yehova nave ninnitepa waataana ni anna ni arokora. Tthiri, naahihiye wuuncererya omphenta wahu Yehova ni anna ni arokora, nikupaliki wiira ompatthani ahu khonikhala-khala omalaka!