Paapa aka, aari pastoore a ekerexa Unida do Canadá, nto khula esaabadu, paapa aka aaniniruma wiira nroweke oskola ya okerexa yaapakiwe para anamwane, 11 ora naanirowa ni yena opaka miisa. Masi makaaripi, naanirowa Empa ya Omwene ni maama aka. Tthiri naaniwerya woona wiira itiini iye piili saari soovirikana.

Maama aka aahaaleela itthu aixutta awe apatthani awe yiitthaniwa Bob ni Marion Hutcheson, naawo-tho yaaheemererya ekeekhai. Mwaakha wa 1958, anamathelana awo ni anaaya araru, yaahikikuxa wiira kanwehe Asembeleya Internacional a mahiku 8 aapakiwe oNova York, aarina muru oni “Vontade Divina”. Olelo-va kinnoona wiira tthiri khivaakhweelale okikuxa ekwaha ele, masi asembeleya ole, khaareere okisivela.

Okathi kaari aka mwaana, opuro naakhala ahu naanihuwa inama, nave vaanikisivela vanceene okhapelela inama iyo. Kaanuupuwela osoma wiira kakhale veterinario aahiiso nfirimero a inama. Maama aka aahimulela etthu ele mutokweene mmosa a mmulokoni. Mutokweene ole moophenta, aahikuupuxerya wiira ninkhala “mahiku ookiserya”, nave osoma wuniversidade iyaakha sinceene, waamukiiriha ohonona ompatthani aka ni Yehova. (2 Tim. 3:1) Mwaha waivaavo, kaahithanla ohirowa osoma wuniversidade.

Nlelo kaanuupuwela etthu kaarowa aka opaka kamaliha osoma oskola sekuntaaria. Nnaamwi khula esumana kaarowa muteko woolaleerya, ohimya ekeekhai,  khiwaakisivela, nkuupuwela wiira kaamukhala pioneero. Masi paapa aka ni tiiyu aka, yaawo yahaakhanle Anamoona a Yehova, yaahikitumererya orowa ovara muteko okathi wootheene empereesa emosa yuulupale oToronto. Tiiyu aka aari xeefi empereesa ele, nto kaaheemererya orowa ovara muteko.

Okathi kaari aka oToronto, kaanivara muteko munceene, nave kaaniviriha okathi munceene kiri ene ni atthu yahaakhanle Anamoona a Yehova. Eyo yaahikiiriha opacerya ocompela muteko woolaleerya ni mithukumano. Wanipacerya kaakhala ni ataata, apapa aya apaapa, yaawo yahaari Namoona a Yehova, masi nuumala awo okhwa, kaahaana ophavelasa opuro mukina wookhala.

Munna Hutchesons ni mwaara awe, yaale yaakikunxe waasembeleyani mwaakha wa 1958, yaari ntoko anamuyari aka. Yaahikilattula wiira kakhaleke naawo, nto yaahikikhaliherya wuncererya omphenta waka Yehova. Mwaakha wa 1960, kaahipatisiwa vamosa ni mwanayasa iitthaniwa John. John, aahikela muteko wa opioneero, nto eyo yaahikikhaliherya ophavela wuncererya muteko aka woolaleerya. Anna a mmulokoni yaanoona wiira kaanirowa vahoolo, nto nuuvira okathi, kaahithanliwa wiira kikhale murumeyi a Eskola ya Orummwa Ahu wa Omwene. a

Mwaakha wa 1966, kaahimuthela Randi Berge, yoowo aari pioneera ooluttuweliwa ni aaphavela orowa mapuro oothowa anamalaleerya. Mutokweene a esirkwiitu ahu, aahinitumererya othaamela muloko wa Orillia, wOntário, wiira nakhaliheryeke. Naahilokiherya maala ahu, nnarowa.

Niphiyaka-ru wOrillia, kaahikela muteko wa opioneero vamosa ni mwaara aka Randi. Oluttuweliwa wawe, waahikiiriha ni miyo ophavela ovara muteko ole. Nuumala wiimananiha wiira kisiveliweke ni muteko wa opioneero, kaanihakalala vanceene mwaha woomurumeelaka Biibiliya wiira kaakhaliherya atthu wiixutta ekeekhai. Yaari eparakha yuulupale omukhaliherya mulopwana mmosa ni mwaara awe yaakhala elapo wOrillia, opaka marukunuxo mookumini mwaya ni okhala arumeyi a Yehova.

Ekwaha emosa naaxukurya ahu oToronto, kaahikumaana munna Arnold MacNamara, yoowo aari mmosa a anna yaahoolela oBetheli. Owo aahinikoha vakhala wiira naaniphavela orumeela ntoko mapioneero a vameekhaaya. Moowaakuveya kaahimwaakhula wiira: “Ninniphavela aayo! Masi ohiya oQuebec!” Miyo kaarina muupuwelo mmosa-ru woohiloka, yoowo yaarina aya atthu a oCanadá anlavula enkelexi, voohimya sa atthu anikhala eprovinsia ya oQuebec, weiwo enlavuliwa efransexi. Okathi ole, atthu yaanipaka manifestasao anvirikanyaka kuvernu, aphavelaka wiira eprovinsia ya oQuebec, ehiireleke mpantta elapo ya oCanadá.

Munna Arnold aahikaakhula wiira: “Mapuro eBetheli enaaroiha aya mapioneero a vameekhaaya nenna-va, oQuebec”. Nto kaaheemererya moowaakuveya. Nuumala-vo, kaahisuwela wiira mwaaraka aaniphavela vanceene ovara muteko elapo ele. Tthiri naahoona wiira ele yaari yoothanla yootepa oreera naapanke ahu mookumini mwahu!

Nuumala oviriha isumana 5 nisomaka efransexi, miyo, Randi, vamosa ni munna mukina ni amwaara awe, naahirowa okhalaka oRimouski, muttetthe yoowo mutthu oneetta awe ikilometuru 540, okhuma oMontreal. Hiyo nlelo khinaalavula saana efransexi, eyo yaahitepa wooneya nihiku nimosa okathi kaasoomaaka soohimmwa omuthukumanoni. Okathi kaamuhimya aka konkeresu naarowa ahu omwiira, kaaroovirikanyiha moolumo, ohiya ohimya wiira naarowa owaakhela anna yaakhuma wAustria, kaahimmye wiira naarowa owaakhela axipalame aniitthaniwa avestruz.

ORimouski, naahikhaliheriwa ni axirokora axexe ooluttuweliwa vanceene, ni munna Huberdeaus ni mwaara awe, nave yaahikhalana anamwane anli axithiyana. Munna Huberdeaus ni mwaara awe yaahaalukari empa emosa yuulupale, mwaaweryaneya aya okhala mapioneero ootheene. Nave mapioneero awo yaanikhaliherya oliva. Empa ele niitthana “Casa Branca”, maana empa yootheene yaapintariwe ekoore yootteela. Okhala wene empa ele naakhala atthu 12 wala 14. Okhala wiira naari mapioneero a vameekhaaya, miyo ni Randi, naanilaleerya voosiisu, othana ni makaaripi. Nto naanihakalala vanceene okhalana anna akina naarowana ahu muteko woolaleerya, hata ohiyu wooriirya vanceene.

Ompatthani naarina ahu ni mapioneero ale, vaakhala ntoko naari amusi. Mahiku makina naanikilathi nrukurenrye ene mooro, nave naanithanla nihiku wiira naapeye hoothe. Munna mmosa aanisuwela wiipa saana, nto isaabadu ohiyu, naanithukumana wiira niipeke ni wiina.

Atthu anceene oRimouski, yaanisiveliwa ikeekhai sa mbiibiliyani! Muhina mwa iyaakha 5 paahi, naahihakalala waaweha atthu anceene yaamusoma Biibiliya, yincereryaka omphenta waya Yehova, mpakha opatisiwa. Nave muloko ahu waahiphiya anamalaleerya 35.

OQuebec, naahaakhela malakiheryo a moota woolaleerya. Naahoona moota Yehova aanikhaliherya awe ni muteko ole, vamosa ni itthu saanithowa. Ohiya-vo, naahiixutta waaphenta atthu yaakhala muttetthe ole, yaawo yaalavula nttaava na efransexi, makhalelo aya, nave naahiixutta ophenta nttaava naya. Nave eyo yaahinikhaliherya waaphenta atthu a makhalelo makina. — 2 aKor. 6:13.

Moowaakuveya, eBetheli yaahiniruma othameela oTracadie, muttetthe waakhala waattamela ophareya oNova Brunswick. Opaka eyo khivaakhweyale, okhala wiira niira naalukanri ene empa niinaano, ohiya-vo kiira kimwaasinanri ene kontrato ni eskola emosa wiira kisomiheke iwoora vakhaani. Nave anaskola ahu a Biibiliya akina yiira akhanle ene anamalaleerya ohipatisiwa niinaano, nave niira nipaceryaka-ru oteka Empa ahu ya Omwene.

 Naahiviriha esaabadu ni edomingo ele yootheene, nivekelaka vanceene, nto naahilakela orowa oxukurya epooma ele ya oTracadie, nahoona wiira yaari yoovirikana vanceene ni epooma ya oRimouski, yeeyo yaari yoomaaleleya. Masi naahuupuwela wiira vakhala wiira Yehova taaphavela wiira nithaamele muttetthe ole, naahaana orowa. Naahimweererya Yehova, nto noona wiira aahikumiha itthu sootheene saanixankiha. (Mal. 3:10) Okhala wiira Randi aahikhalana ompatthani woolipa ni Yehova, ni aari oowiivahererya ni ootheiha, othaama iwe khiwaatempe onixankiha.

Muloko ahu ole musya, mutokweene aari mmosa paahi, iitthaniwa Robert Ross. Owo ni mwaarawe Linda, yaarumeela muttetthe ole ntoko mapioneero, nave yaahilakelasa ohithama nuumala omuyara mwaana oopacerya. Nnaamwi yaamukhapelela mwaana, awo khiyaahiyale onilipiha anaakheleka saana ni oluttuweliwa muteko woolaleerya.

Nuumala oviriha iyaakha piili niri ene mapioneero muttetthe wa oTracadie, naahithanleliwa-tho etthu ekina nahaalipelela ahu, orumeela ntoko mutokweene a esirkwiitu. Naahiviriha iyaakha 7 nrumeelaka isirkwiitu sinlavuliwa enkelexi, nuumala-vo naahithanleliwa orowa orumeelaka esirkwiitu enlavuliwa efransexi oQuebec. Mutokweene ahu a edistritu iitthaniwa Léonce Crépeault, b aamakela ottottopela myaha saka. Masi owo aamakela-tho okikoha so: “Moota xeeni myaha sanyu sikhanle aya ootepa waavara murima atthu?” Munna ole aahikikhaliherya olokiherya myaha saka wiira sitepeke waavara murima atthu ni sikhaleke soowiiwanyeya saana.

Muteko mmosa kaathanleliwe aka mpakha-va kihinliyala aka, muteko kaavanre aka mwaakha wa 1978, Okonkresuni Internacional waapakiwe oMontreal, waarina muru oni “Fé Vitoriosa”. Miyo kaavara edepartamento yaakawa eyoolya. Naanilipelela owaakhela atthu 80.000, nave niira naakhenle ene malakiheryo masya a moota woowaakhapelela atthu awo. Itthu sootheene saari isya: ikaruma soovarana muteko, eyoolya ni moota woowaapeya. Naahikhalana ikonxelatoore 20, masi ikwaha sikina khisaavara saana. Okhala wiira estaadiyu ele naarowa ahu ompaka konkresu saahipakiwa itthu sikina ntoko omaniwa boola, khinaawenrye ophiya vahinatthi, nto naahaana ophiya nihiku nenne noopacerya na konkresu ole wiira nilokiherye itthu. Naahaana ovihiha ifoornu nsuwa nihinatthi opatta, wiira nipake matabiixu! Khinaareere okhulumuwa, masi muteko ole muulupale wookiixuttiha itthu sinceene okathi kaawehaka ntakiheryo na anna  oowiivahererya ni oohakalala. Mpakha-va, naapatthani a anna akina naavaranne ahu muteko ole. Yaari etthu yoohakalaliha omwiira konkresu ole oQuebec, weiwo okhuma mwaakha wa 1940 mpakha 1960, annihu yaalupatthiwa vanceene!

Kihiixutta itthu sinceene ni anna yaahoolela idepartamento sikina okathi wa akonkresu, oMontreal. Waahikhala mwaakha munna David Splane, yoowo vano ori a Nikhuuru Noolamulela, aari awe muhooleli a konkresu. Nto konkresu aattharelana, kaahithanleliwa ovara muteko mmosa-ru yoole. David khaareere okikhaliherya.

Nuumala oviriha iyaakha 36 nivaraka muteko wa osirkwiitu, mwaakha wa 2011, kaahilattuliwa wiira kakhale prusoore a Eskola ya Axitokweene a Mmulokoni. Muhina mwa iyaakha piili paahi, miyo ni Randi naahirupela ikhaama 75 soovirikana, masi hata vari siiso vaahireera wiimananiha iwe. Wanikisa wa khula esumana axitokweene yaanihakalala vanceene mwaha wa woona moota Nikhuuru Noolamulela, naakhapelela aya ompatthani axitokweene awo arina aya ni Yehova.

Nuumala-vo, kaahithanliwa wiira kakhale prusoore a Eskola ya Anamalaleerya a Omwene. Ikwaha sinceene anaskola yaanixankiheya ni yaanikhulumuwa vanceene mwaha woowaatteliwa miteko. Awo yaakilaathi iwoora 7 khula nihiku, waapaka aTPC iwoora 3 khula makaaripi ni olokiherya ipantte 4 wala 5 yaathanleliwa aya khula esumana. Miyo ni prusoore mukina, naahaaleela anaskola ale wiira yaarowa owerya opaka itthu iye paahi akhaliheriwaka ni Yehova. Kimmakela wuupuwela moota anaskola ale yaahakalala aya, nuumala woona wiira vakhala wiira yaanimuroromela Yehova, yaaniwerya opaka itthu ovikana iye yuupuwela wiira yanwerya.

Mwaha wa maama aka waathokoreryaka saana atthu akina, yaahiiriha wiira anaskola awe a Biibiliya atepeke omphenta Yehova, nave yaahimwiiriha paapa aka ohiya onyokha ekeekhai. Nuuvira mahiku mararu nuumala maama aka okhwa, kaahihakalala onweha paapa aka owiriyanaka mwaha omuthukumanoni. Iyaakha 26 saattharelana, owo khaahiyale orowa omuthukumanoni. Paapa aka khaapatisiwe, masi axitokweene yaahikileela wiira owo taapacerya ophiya Empa ya Omwene khula esumana.

Nave-tho maama aka aahinivaha ntakiheryo nooloka miyo ni axirokoraka. Axirokoraka awo araru ni axiiyaya, annimurumeela Yehova moororomeleya. Anli anirumeela oBetheli, mmosa onirumeela eBetheli ya oPortugal, nave mukina onirumeela eBetheli ya oHaiti.

Vano, miyo ni Randi ninrumeela ntoko mapioneero a vameekhaaya oHamilton, wOntario. Okathi naarumeela ahu osirkwiitu, vaaninisivela vanceene waahola anamalaleerya akina ostuutuni waya ni orevisitani. Masi vano ninnihakalala okhalana soosoma sahu sa Biibiliya, ni waaweha anaskola ahu awo yincereryaka omphenta waya Yehova. Vano na apatthani a anna ni arokora a muloko ahu musya, nave ninnoona moota Yehova onaakhaliherya awe anna awo okathi wa mixankiho ni okathi wooreera.

Okathi nnuupuwelela ahu ottuli, ninnihakalala vanceene woona moota atthu anceene yaanithokorerya aya. Mwaha waivaavo, ninniimananiha waathokorerya atthu akina ni waalipiha wiira yincereryeke omphenta waya Yehova. (2 aKor. 7:6, 7) Mwa ntakiheryo, emusi emosa, maama ni anaawe anli, yaari mapioneero. Nto kaahimukoha paapa aya vakhala wiira aanuupuwela orumeela ntoko pioneero. Owo aakakhunle so: “Miyo kinaakhaliherya mapioneero mararu owaani nno”. Nto miyo kaahimukoha so: “Niireke moota munaakhaliherya anyu, onnivikana moota Yehova onaakhaliherya awe”? Nto kaahimuleela wiira yena anwerya ohakalala ntoko amusi ale akina yaahakalala aya. Nuuvira myeeri 6, owo aahipacerya orumeela ntoko pioneero.

Mpakha-va, miyo ni Randi khanihiyale ‘waalaleerya amiravo miteko sotikiniha’ sa Yehova. Nave ninlipelela wiira naawo-tho anoohakalala okathi anrowa aya onvarelaka muteko Yehova ntoko hiyo ninhakalala ahu. — Esal. 71:17, 18.