ALE ANITHIPA mapuro yaakhaliwa khalai, aaphwanya itixolu sinceene soowooxiwa oBabilonia wa khalai saarumeeliwe wiira etekiwe epooma ele. Moovarihana ni mulipa-oothipa mapuro yaakhaliwa khalai, Robert Koldewey, itixolu iyo saapakiwe ifoornu saari “ota wa epooma, opuro yoowo oloko waari aya wooreera . . . ni wahaareere aya”.

Anamatokosa awo, aaphwanya itthu sinooniherya wiira makhulupale a oBabilonia, yaanirumeela ifoornu iyo wiira apake itthu sootakhala. Paul-Alain Beaulieu, prusoore a itthu siiraneyale wAsiria wa khalai, a oniversidade ya oToronto, ohimmye so: “Soolempwa sinceene sa oBabilonia wa khalai, sinihimya wiira atthu yaale yahaamwiiwelela aahiiso yaahaattittimiha itthu sooniwa okhala soowaarya, mwene aaniruma wiira apahiweke nfoornuni mmo”. Mwa ntakiheryo, edukumento elempwale mahiku a mwene Nabukodonosori yaahimya so: “Mwaapwetexe, mwaapahe, nwooxe, . . . nfoornuni ntoko mutthu onaapeya . . . mwaahiye akhweeke ni mwiixi aya wooneyeke”.

Eyo enninuupuxerya etthu elempwale eliivuru ya Daniyeli ekapiitulu 3, moovarihana ni yoowiiraneya eyo elempwale mbiibiliyani, mwene Nabukodonosori aahirumiha opakiwa elatarato yuulupale ya eweero opuro woowaataleya wa oDura, ota wa epooma ya oBabilonia . Okathi amiravo aheeberi, Xadraki, Mexaki ni Abedi-Nego yaakhoottale aya okokhorela elatarato ele, Nabukhodonosori aahinanariwa vanceene, nave aahiruma wiira opattihiwe mooro nfoornuni “ovikana imara thanu na pili” ntoko yaalimaleliwa aya. Masi nlaikha noowerya naahiwoopola. — Dan. 3:1-6, 19-28.

Itixolu iye saaphwanyiwe oBabilonia sinnooniherya wiira itthu Biibiliya onihimya awe ti sa ekeekhai. Itixolu sinceene sookhalana moolumo anninvuwiha mwene. Etixolu emosa elempwale so: “Nabukhodonosori, mwene a oBabilonia . . . Epalaasio yeeyo miyo mwene muulupale kitenke aka . . . Kinnilipelela wiira osuulu aka onoolamulela wa mahiku ootheene”. Moolumo ala annivarihana ni ale alempwale Daniyeli 4:26, Biblia Solempwa Sowarya. Yaawo mwene Nabukhodonosori aaxinnuwiha awe ohimyaka so: “Moneke oBabilonia, muttetthe mulupalexa ni wovuwa. Miyo koteka muttetthe ola wira okhaleke muttetthe mulupale w’omwene aka: koteka n’ikuru saka sulupale, wira okhale nthonyeryo n’owerya waka n’ovuwa waka”.