1. Exeeni amiravo anitthuneya aya opaka voohimya sa muhoolo? Exeeni enrowa ovukula oxanka waya? (Nwehe elatarato yoopacerya.)

NYUWO amiravo, waaniheryasa munneemererya wira mutthu onnimpaka palano ohinatthi weetta mukwaha awe. Okumi onlikana ni mukwaha, nto okathi ola muri anyu mmiravo muhaana ompaka palano a okumi anyu. Mwekeekhai, khivanikhweya ompaka palano owo. Mwali oniihaniwa Heather, ohimmye so: “Ompaka palano etthu yooxankiha, maana onitaphulela etthu enrowa weettiha okumi anyu wotheene”. Akhala wira munoona siiso, muupuweleke masu a Yehova ani: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani”.​—Yesaya 41:10.

2. Munsuwela sai wira Yehova oniphavela wira mwaapake apalano ooloka a muhoolo?

² Yehova onootumereryani wira mumpake mwa miruku palano anyu a muhoolo. (Musuweli 12:1; Matheyo 6:20) Owo oniphavela wira muhakalaleke. Ninnoona eyo okathi ninweha ahu, wiiwa ni olawiha itthu sipattuxiwe ni Muluku. Nave Yehova onninikhapelela mwa inamuna sikina. Onninivaha miruku ni oniixuttiha moota wookhala saana. Tivonto, Yehova khonisiveliwa vaavo atthu anikhootta aya miruku sawe. Owo onnaaleela ale ahiniphavela otthara miruku sawe wira: “Mothanla itthu sinkinanariha. . . . Arumeyi aka anotteliwa murima, nyuwo mùliwaka muru; awo anotthapa votteliwa murima”. (Yesaya 65:12-14) Vaavo nimpaka ahu soothanla sooloka, ninninvuwiha Yehova.​—Miruku 27:11

3. Apalano xeeni Yehova oniphavela awe wira mwaapake?

³ Apalano xeeni Yehova oniphavela awe wira mwaapake? Wira muhakalale mookumini mwanyu, muhaana omusuwela Yehova ni omurumeela. Nto Yehova onipattunxe wira nimurumeeleke. (Esalimo 128:1; Matheyo 5:3) Axinama muteko aya olya, owurya ni waayara axaana aya paahi. Masi Yehova oniphavela wira palano onimpaka anyu a okumi anyu oohakalaliheni. Maana Mpattuxa anyu ti ‘Muluku òphenta’ ni oohakalala, yoowo aapanke apinaatamu “aìlikanyihaka mmansawe”. (2 aKorinto 13:11; 1 Timótheyo 1:11; Maphattuwelo 1:27) Tthiri, munoohakalala akhala wira munoomutakiha Muluku ahu oophenta. Biibiliya onihimya wira: “Mulipa-òvaha onoreriwa [ohakalala] onvikana mulipa-òvahiwa”. (Miteko 20:35) Niireke mootoko woona eyo? Tthiri, eyo enniiraneya. Tivonto, Yehova oniphavela wira palano onimpaka anyu voohimya sa muhoolo, ooniheryeke wira munnimphenta yena ni atthu akina.​—Mmusome Matheyo 22:36-39.

4, 5. Exeeni yaamwiirinhe Yesu ohakalala?

⁴ Nyuwo amiravo, Yesu Kristu ohoovahani ntakiheryo nooloka. Nlelo ori ene mwaamukhaani, Yesu aanithweela moohakalala. Ntoko Nuulumo na Muluku ninhimya aya, wookhala “okathi . .  w’otteliwa murima” “n’ukathi wo wina”. (Musuweli 3:4) Nave osoma Soolempwa waahimukhaliherya Yesu omwaattamela Yehova. Vaavo aarina awe iyaakha 12, awiixuttihi a ikano yaahitikinihiwa maana “Yesu aniwiwa n’usuwela, anakhula ni miruku”.​—Luka 2:42, 46, 47

⁵ Nuumala Yesu wunnuwa, aanisiveliwa opaka yootthuna ya Muluku. Mwa ntakiheryo, Muluku aaphavela wira Yesu ‘àlalèrye alipa-òhawa’ ni ‘alipa-òhona ovonihiwa waya’. (Luka 4:18) Esalimo 40:9, ennooniherya moonelo wa Yesu eriki: “Muluku aka! Wira otthuna wanyu t’unkisivela”. Tthiri Yesu aanisiveliwa owiixuttiha atthu voohimya sa Tiithi awe. (Mmusome Luka 10:21.) Ekwaha emosa nuumala Yesu olavula ni muthiyana omuleelaka sa okokhorela wekeekhai, aahaaleela awiixutti awe wira: “Yoly’aka miyo, wettela otthuna wawe ole okirumme n’umaliherya miteko sawe”. (Yohani 4:31-34) Nto Yesu aanihakalala maana aahooniherya wira aanimphenta Muluku ni atthu akina. Nave, mwamutakiha Yesu, munoohakalala.

6. Xeeni vari aya vooloka waaleela akina apalano anyu voohimya sa muhoolo?

⁶ MaKristau manceene apacenrye orumeela ntoko mapioneero ari ene amiravo, annihakalala. Niireke munoolavula ni anna awo voohimya sa apalano anyu? Biibiliya onihimya so: “Mwahikoheru miruku, munimojela miteko sanyu: yattá anvaha miruku sorera, miteko iyo sinokelela oholo”. (Miruku 15:22) Anna ni arokora awo, woonasa wene animoolelani wira muteko wa opioneero onlikana ni exikola enrowa wookhaliheryani okumi anyu wotheene. Okathi Yesu aari awe ni Tiithi awe wiirimu, owo aahiixutta itthu sinceene. Nave ori ene valaponi, Yesu aahivikaniha wiixutta. Owo aanihakalala okathi aalaleya awe ihapari sooreera ni aahivikaniha ororomeleya hata okathi wooxankiha. (Mmusome Yesaya 50:4; aHéberi 5:8; 12:2) Nrowe noone moota onihakalaliha aya muteko wa Muluku wa okathi wotheene.

7. Xeeni amiravo anceene anihakalala aya mwaha wowaapaka awiixutti?

⁷ Yesu ooniruma waapaka anaxikola ni owiixuttiha atthu. (Matheyo 28:19, 20) Akhala wira munniphavela opaka muteko ola okhala wootepa otthuneya mookumini mwanyu, munoohakalala ni onvuwiha Muluku. Khula muteko, oniveka okathi wira mutthu iixutte saana. Munna oniihaniwa Timothy yoowo opacenrye okhala pioneero ori ene mmiravo, onihimya wira: “Okisivela muteko wa Yehova wa okathi wotheene, maana enamuna enirumeelaka wira kimooniherye yena omphenta waka. Wanipacerya, waanikivila omphwanya mutthu wira kimusomiheke Biibiliya, masi nuumala orowa muttetthe mukina kaahipaceriha soosoma sa Biibiliya sinceene mweeri mmosa. Mutthu mmosa kaamusomiha aka aahipacerya orowa Empa ya Omwene. Nuumala orowa Exikola ya Biibiliya ya Anna Oohithela, kaahiroihiwa opuro mukina, nto opuro ole kaahipaceriha soosoma xexe sa Biibiliya. Okisivela owiixuttiha atthu, nave kinnoona moota munepa wootteela onaakhaliherya aya opaka marukunuxo”. * (Nwehe enoota.)​—1 aTesalonika 2:19

8. Exeeni amiravo akina apanke aya wira yaalaleerye atthu anceene?

⁸ Amiravo akina ahiixutta nttaava nikina. Mwa ntakiheryo, Jacob, a wAmerica do Norte, olempe so: “Okathi kaarina aka iyaakha 7, amiravo anceene keettana aka oxikola yaari a elapo ya oVietnã. Kaaniphavela waalaleerya voohimya sa Yehova, nto kaahimpaka palano wira kiixutte nttaava naya. Nto kihiixutta nttaava nne kilikanyihaka irevista Owehaweha sa Enkelexi ni sa nttaava na oVietnã. Nave kaahikhalana apatthani a muloko wa nttaava na oVietnã naattamenle ahu. Okathi kaarina aka iyaakha 18, kaahikhala pioneero. Muhoolo mwaya, kaahirowa Exikola ya Biibiliya ya Anna Oohithela. Exikola ela yookikhaliherya vanceene maana egrupu ya nttaava na oVietnã, kinirumeela mekhaka ntoko mutokweene. Atthu anceene a oVietnã annitikinihiwa mwaha woowi kinnisuwela olavula nttaava naya. Awo annikilattula owannyeya, nto ikwaha sinceene kinnaasomiha Biibiliya. Akina aarowa vahoolo mpakha obatiziwa”.​—Mulikanyihe ni Miteko 2:7, 8.

9. Exeeni nniixutta ahu ni muteko wowaapaka awiixutti?

⁹ Tthiri muteko wowaapaka awiixutti, onimookhaliheryani olaleerya saana, ovaanela ni olavula mwa enamuna enooniherya wira munnikupali ele enihimya anyu. (Miruku 21:5; 2 Timótheyo 2:24) Masi muteko ola onnihakalaliha vanceene maana onnikhaliherya wooniherya wira ninnimukupali Biibiliya. Nave-tho, ninniixutta moota woovara vamosa ni Yehova.​—1 aKorinto 3:9.

10. Munrowa ohakalala sai mmuteko wowaapaka awiixutti hata muttetthe anyu ori ene wooxankiha?

¹⁰ Munoowerya ohakalala nvaraka muteko wowaapaka awiixutti, hata atthu a muttetthe anyu ahiphavelaka omusoma Biibiliya. Vanniweryaneya waapaka awiixutti okhala wira muloko wotheene onivara mowiiraana. Otheene ahu ninnihakalala vaavo munna aahiiso murokora mmosa oniwerya awe omusomiha mutthu mpakha obatiziwa, okhala wira ninvara vamosa. Mwa ntakiheryo, Brandon, yoowo onirumeela ntoko pioneero mwa iyaakha 9, muttetthe yoowo atthu anceene ahiniphavela aya omusoma Biibiliya, onihimya so: “Kinnisiveliwa olaleya ihapari sooreera okhala wira Yehova tokirumme. Kipacenrye okhala pioneero nuumala omaliha osoma oxikola. Okisivela waalipiha amiravo a muloko ahu ni woona orowa waya vahoolo momunepani. Nuumala Exikola ya Biibiliya ya Anna Oohithela, kaahithanleliwa orowa opuro mukina ntoko pioneero. Ekeekhai wira nkinatthi omwiixuttiha mutthu mpakha oBatiziwa, masi anna akina aapaka eyo. Kinnihakalala mwaha woothanla okhaliherya vanceene muteko wowaapaka awiixutti”.​—Musuweli 11:6

11. Inamuna xeeni sikina amiravo akhanle aya omurumeela Yehova?

¹¹ Sookhala inamuna sinceene sa omurumeela Yehova moomalela. Mwa ntakiheryo, amiravo anceene annikhaliherya muteko wooteka ipa sa omwene. Nave, sinnitthuneya imiya sinceene sa Ipa sa Omwene. Ipa iyo sinninvuwiha Yehova, nto okhaliherya oteka onimoophwanyihani ohakalala. Tthiri munoohakalala ovara vamosa ni anna ni arokora. Nave-tho munimwiixutta itthu sinceene sinrowa wookhaliheryani ovara saana muteko akhala wira munoowiiwelela ale anihoolela muteko owo.

12. Iparakha xeeni muteko wa opioneero oniphwanyiha aya?

¹² Munna oniihaniwa Kevin onihimya so: “Okhuma onamwane aka, kaaniphavela okela muteko wa Muluku wa okathi wotheene. Nto kaahipacerya orumeela ntoko pioneero kirina ene iyaakha 19. Wira kiphwanye yoolya, kaanivara okathi vakhaani ni munna aateka ipa. Kaahiixutta otthunyela ipa, ohela ixanela ni mikhora. Muhoolo mwaya, kaahiviriha iyaakha piili kiri ene ni anna yaakhaliherya atthu akhumeleliwe ihasara, nto kaaniteka Ipa sa Omwene ni sa anna. Vaavo wÁfrica do Sul yaatthuneya aya anna anisuwela oteka ipa, kaahilattuliwa wira kakhaliherye. Elapo ela ya wÁfrica, nuumala omaliha oteka Empa ya Omwene mwa isumana vakhaani ninnithaamela opuro mukina. Tthiri egrupu aka ya oteka eri ntoko emusi. Maana ninkhala vamosa, nimmusoma Biibiliya vamosa ni ninvara muteko vamosa. Nave kinnihakalala olaleerya ni anna a mapuro awo khula esumana. Nto apalano kaapanke aka kiri ene mmiravo, aakiphwanyiha ohakalala kahaalipelela aka”.

13. Xeeni amiravo anceene onaasivela aya orumeela oBetheli?

¹³ Anna akina yaari mapioneero, olelo-va anirumeela oBetheli. Orumeela oBetheli onnihakalaliha okhala wira khula muteko onivariwa ti wa Yehova. Nto emusi ya oBetheli ennikhaliherya opakiwa aBiibiliya ni iliivuru sikina, seiyo sinaakhaliherya atthu wiixutta ekeekhai. Bethelita oniihaniwa Dustin onihimya so: “Okhuma okathi kaarina aka iyaakha 9, yoolakela aka yaari ovara muteko wa Muluku wa okathi wotheene, nto kaahipacerya orumeela ntoko pioneero nuumaliha osoma. Nuuvira mwaakha mmosa nnimeya, kaahilattuliwa oBetheli weiwo kaixuntte aka orumeela maakina animpirimiri iliivuru, nave-tho kaavara muteko wa omprogramari komputatore. OBetheli okisivela wiiwa erelatoorio ya munnuwelo wa muteko woolaleerya olumwenku wotheene. Nave okisivela orumeela oBetheli, maana ele enipaka aka ennaakhaliherya atthu omwaattamela Yehova”.

14. Exeeni ekhanle anyu oopaka vano wira mukele muteko wa Muluku wa okathi wotheene?

¹⁴ Munrowa wiilokiherya sai wira mukele muteko wa Muluku wa okathi wotheene? Muhaana okhalana mikhalelo sa eKristau. Nave muhaana omusoma Biibiliya khula nihiku, wuupuwelela ele enisoma anyu ni okomentari omuthukumanoni. Okathi onisoma anyu oxikola, muhaana wiixutta moota woolavula wira mwaalaleeryeke akina ihapari sooreera. Nave mwiixutte waathokorerya saana atthu, waakoha moowaareerela murima ni mwaawiriyaneke okathi anaakhula aya. Nave-tho, pooti wiivahererya wira mukhaliheryeke miteko sa muloko, ntoko orattela ni olokiherya Empa ya Omwene. Yehova onnisiveliwa waarumeela atthu oowiiyeviha ni aniivahererya wira akhaliherye. (Musome Esalimo 110:3; Miteko 6:1-3) Murummwa Paulo aahimulattula Timootheyo muteko wa omisionaario maana “aKristu yakhala oListra ni wIkonio yanitthapela mwettelo awe”.​—Miteko 16:1-5.

15. Muhaana opaka exeeni wira mphwanye muteko, onrowa wookhaliheryani okathi wa opioneero?

¹⁵ Anna anceene anivara muteko wa Muluku aakhalana muteko. (Miteko 18:2, 3) Woonasa wene, munniphavela ompaka kursu a okathi vakhaani, onrowa wookhaliheryani ophwanya muteko wa okathi vakhaani mmuttettheni mwanyu. Nto munvekele mutokweene a esirkwiitu anyu aahiiso mapioneero makina wira yoovaheeni malakiheryo. Biibiliya onihimya wira: “Muhele mmatatani mw’Apwiya miteko sanyu sothene: khamunojela muteko anyu nnakhala mmosá”.​—Miruku 16:3; 20:18.

16. Moota xeeni muteko wa Muluku wa okathi wotheene, onrowa aya wookhaliheryani ovara saana miritti sikina muhoolo?

¹⁶ Mukupaliki wira Yehova oniphavela wira ‘mwithukumanyerye’ apalano anrowa woohakalalihani muhoolo. (Mmusome 1 Timótheyo 6:18, 19.) Muteko wa Muluku wa okathi wotheene onimookhaliheryani okhala muKristau oolipa vaavo munivara anyu ni arumeyi akina anivara muteko wa Muluku wa okathi wotheene. Nave, akina ahoona wira muteko wa Muluku wa okathi wotheene ohaakhaliherya nuumala othela. Ikwaha sinceene, ale anikhala mapioneero ahinatthi othela aahiiso otheliwa, annivikaniha okhala mapioneero nuumala othelana.​—aRoma 16:3, 4.

17, 18. Xeeni waapaka apalano onihela aya muhina murima anyu?

¹⁷ Esalimo 20:5 ennimuhimya Yehova eriki: “Apwiya yovaheni sothene simphavelaya murim’anyu: yiranihe otthokelela wanyu wothene”. Nto vaavo munaapaka anyu apalano anyu a muhoolo, muupuweleke ele eniphavela anyu opaka mookumini mwanyu. Muupuweleke ele Yehova ompaka awe olelo-va ni ele nyuwo muniphavela anyu opaka wira mukhaliherye muteko awe. Nuumala-vo mpakeke ele enimuhakalaliha Yehova.

¹⁸ Murumeeleke okumi anyu wira munvuwihe Yehova moomalela, nto munoohakalala vanceene. Tthiri “otteliwa wanyu murima olipihiwe mw’Apwiya: awo animoovahani sothene simphavelanyu”.​—Esalimo 37:4.