Murummwa Paulo aanisuwela wira propaganda a Satana tootepa otakhala. Nto khahiyo wira maKristau otheene anniwerya omusyaka. Mwa ntakiheryo, onikhala ntoko wira maKristau makina a oKorinto, yuupuwela wira okhala wira yaahilipa mowaaminini khiyaarowa owokiwa ni Satana. (1 aKorinto 10:12) Tivonto, Paulo aaloponle awe wira: “Nto miyo kinnova wira, ntoko Hawa sotothiwawe n’ulavilavi w’enowa, siso anopahuliwa ankhili anyu, wira muhiye omutthara Kristu ni murima worera”.​—2 aKorinto 11:3.

Masu a Paulo annooniherya otthuneya waya ohiiroromela vanceene. Wira muxintte ekhotto ya mmuupuweleloni mwanyu, muhaana osuwela otakhala wa propaganda a Satana, nuumala-vo muhaana wiikhapelela wira muhiwokiwe.

Propaganda soohimmwa sowootha aahiiso soohiloka sinrumeeliwa wira awokiwe atthu aahiiso owiiriha otthara ele anileeliwa aya. Moovarihana ni eliivuru Propaganda and Persuasion [Propaganda e Persuasão], propaganda onitaphulela “ohuumala, otakhala ni ohixariya”. Nave atthu akina anihimya wira, propaganda onitaphulela “wootha, owoka, ohiroromeleya, ni weettiha muupuwelo wa atthu akina”.

Propaganda tootakhala okhala wira vakhaani-vakhaani onnihapuxa muupuwelo ahu nihisuwelaka. Hiyo pooti omulikanyiha propaganda ni eveneno ehinooneya ni ehininkha. Musomi mmosa oniihaniwa Vance Packard onihimya wira propaganda onniwiiriha atthu opaka “itthu sootepexa otakhala”. Nave musomi mukina ohimmye wira propaganda onniwiiriha atthu okhalana mweettelo woohiloka, opaka itthu sootakhala ni wiivanana (wa atthu a nikhuli aahiiso nloko noovirikana), nave onnikumiherya ikhotto ni olupatthana mwaha wa ovirikana nikhuli aahiiso etiini.​—Easily Led—A History of Propaganda.

Tthiri akhala wira atthu anniwerya oniwoka ni propaganda aya, nto Satana onootepa. Satana onnisuwela mweettelo wa apinaatamu okhuma okathi apattuxiwa aya. Nave okhala wira “elapo yothene enniweriwa” ni Satana, nto onnirumeela khula etthu ya olumwenku ola wira omwara-mwarye wootha wawe. (1 Yohani 5:19; Yohani 8:44) Omurumeelaka propaganda awe, Satana “òttiyela miruku” sa atthu anceene, nave-tho ‘onniwototha atthu othene’. (2 aKorinto 4:4; Wisupulula 12:9) Nto munrowa omusyaka sai propaganda a Satana?

Yesu ooniixuttiha enamuna yoomusyaka propaganda vaavo aahimmye awe wira: “Munosuwela ekekhai, vano ekekhai yeyo enimokhalihani òtaphuwa”. (Yohani 8:31, 32) Okathi wa ekhotto, nakhotto ohaana osuwela opuro onikhuma aya soohimmwa sekeekhai, okhala wira nwanani awe pooti omwara-mwara itthu sowootha wira onvare. Nto munrowa ophwanya woowi soohimmwa sekeekhai? Yehova onninivaha omurumeelaka Biibiliya. Tivonto, Biibiliya onnihimya moota woowanana propaganda a Satana.—2 Timótheyo 3:16, 17.

Tthiri Satana onnisuwela eyo. Ti maana aya, onirumeela awe olumwenku wira onikhulumule ni oniiriha ohikhalana okathi woomusoma ni omwiiwexexa Biibiliya. Nto muhikhalakhale nwokiwaka ni “Satana n’ulavilavi awe”. (aÉfeso 6:11) Khoniphiyerya paahi osuwela soowiixuttiha soopacerya sa Biibiliya. Masi, nihaana wiimananiha wira nincererye osuwela wahu ekeekhai. (aÉfeso 3:18) Prusoore mmosa Noam Chomsky onihimya wira: “Khuuvo mutthu onrowa ohela ekeekhai mmuupuweleloni mwahu. Eyo etthu enitthuneya anyu ophwanya aahiiso opaka mmensinyu”. Tivonto, wira “mphwanye mmensinyu” muhaana ‘nihiku ti nihiku osoma Solempwa sa Muluku’.​—Miteko 17:11.

Satana oniphavela wira muhiiwexexeke ni wuupuwelela saana ekeekhai. Mwaha wa xeeni? Mwaha woowi propaganda “onnikhumela saana” vaavo atthu “anikhulumuliwa aya wira ahuupuweleke saana”. (Media and Society in the Twentieth Century) Khivanikhweya okupali khula etthu yiiwale ahu nihinatthi wuupuwelela saana etthu eyo. (Miruku 14:15) Muluku oohoovahani “ankhili” a wuupuwelela wira mwaarumeeleke ni mulipihe waamini wanyu.​—Miruku 2:10-15; aRoma 12:1, 2.

Anakhotto yootothiwe ni propaganada annoova ni annikhumuwa ahinawerya owana. Nave propaganda pooti owiiriha owana yaaworu aahiiso wiivalaanya ni anakhotto akhwaaya. Moovarihana ni German, kumantanti a wAlemanha, propaganda ti nthowa niirinhe elapo ya wAlemanha oxinttiwa okathi wa Ekhotto Yoopacerya ya Olumwenku Wotheene. Nave onihimya wira atthu ale yaahiwokiwa ni propaganda anakhala ntoko yaaroovahuwa. Olelo-va, Satana onnirumeela inamuna ntoko iyo wira ohonone wuuraana wa maKristau ekeekhai. Mwa ntakiheryo, Satana oniphavela okumiherya ohiiwanana eriyari ya anna. Nave oniphavela wira muhiye mutthenkeso wa Yehova, muupuwelaka wira mutthenkeso owo onnipaka itthu soohixariya ni soohiloka.

Tivonto muhikhalakhale nwokiwaka! Mutthareke malakiheryo a Nuulumo na Muluku ni nvikaniheke okhala oowiiraana ni anna. Mwa ntakiheryo, Biibiliya onnintumererya ovikaniha ‘olevelelana imara sothene nintthekelanahu’ ni waakuvela ophuka ohiiwanana. (aKolosi 3:13, 14; Matheyo 5:23, 24) Nave Biibiliya onninlopola wira nihiivalaanyeke ni muloko. (Miruku 18:1) Mwiilokiherye wira nwerye omusyaka propaganda a Satana. Nto mwiikoheke so: ‘Okathi wookiserya munna aahiiso murokora okiveehale awe, kiireke kaapanke etthu enimusivela Muluku aahiiso Satana?’​—aGalasia 5:16-26; aÉfeso 2:2, 3.

Nakhotto ohinimuroromela muhooleli awe khonrowa owana saana. Maana awanani awe pooti omurumeela propaganda wira ahonone waaroromela waya ahooleli aya. Nto akhala wira ahooleli awo annipaka etthu yoohiloka, awanani aya pooti orumeela etthu eyo, ahimyaka wira: “Muhaaroromeleke ahooleli anyu!” ni “Awo animookumiheryani maxakha!” Nave Satana onipaka etthu emosaru. Satana oniphavela wira muhaaroromeleke ale Yehova onaarumeela awe wira yaahooleleke atthu awe.

Nto munrowa wiikhapelela sai? Nvikanihe okhala mmutthenkesoni mwa Yehova. Nave muroromeleyeke ni mwaakhaliheryeke ale anaahoolela atthu a Muluku nnaamwi ari ene oohimalela. (1 aTesalonika 5:12, 13) Anammwareya ni anawoothe aniphavela otuphela mutthenkeso wa Yehova. (Tito 1:10) Hata itthu anihimya aya sikhalaka ntoko sekeekhai, “muhukhuwé vowakuveya” aahiiso waakuvela owokiwa ni atthu awo. (2 aTesalonika 2:2) Nto mutthareke miruku Paulo anvanhe awe Timootheyo oriki: “Mulipiheryeke sothene sixuttalyanyu” ni nwuupuweleke “atthu yoxuttihaleni”. (2 Timótheyo 3:14, 15) Muupuweleke itthu sinooniherya wira muhaana omuroromela murumeyi oororomeleya ni a ankhili, yoowo Yehova onimurumeela awe mwa iyaakha 100 sivinre, wira oniixuttiheke ekeekhai.​—Matheyo 24:45-47; aHéberi 13:7, 17.

Nave Satana onnootuphelani mwa inamuna sooluluwanya wira oohapuxeni. Okathi mukina oniphavela wira mooveke. Eliivuru Easily Led—A History of Propaganda enihimya wira: Woopopiha ti “propaganda onirumeeliwa okhuma khalai”. Nave prusoore a wInglaterra Philip M. Taylor, olempe so: Asiria yaahirumeela woopopiha ni propaganda wira awerye waaxintta awanani aya. Mwa enamuna emosaru, Satana pooti orumeela woova, owoova atthu, woova olupatthiwa ni woova okhwa wira owiiriheni ohiya omurumeela Yehova.​—Yesaya 8:12; Yeremiya 42:11; aHéberi 2:15.

Muheemererye muraakho owo wa Satana woohapuxakani! Yesu ohimmye wira: “Muhiwoveké ale anìva erutthu, numalá ehinawerya-tho wira etthu”. (Luka 12:4) Mukupaliki wira Yehova onrowa ommaliherya natiri awe a wookhapelelani, nave onrowa woovahani ‘owerya wulupalexa’ ni onrowa wookhaliheryani omuxintta Satana.​—2 aKorinto 4:7-9; 1 Pedru 3:14.

Tthiri okathi mukina pooti otteettheya aahiiso woova. Masi muupuweleke masu oolipiha Yehova aamulenle awe Yoxuwa oriki: “Mwilipiheke, mukhalane nthiti. Muhithukumeleké, nnákhala muhoveké, okhala wira Apwiya Muluku anyu anokhala ni nyuwo mapuro othene anrowanyu okhalaka”. (Yoxuwa 1:9) Akhala wira munnixanka, mwaakuveleke onvekela Yehova nikhaliheryo. Mukupaliki wira “murettele wa Muluku, onvikana osuwela wa mutthu, onosuka mirima sanyu n’iroho sanyu”. Nto munookhalana ikuru wira mmuxintte propaganda a Satana.​—aFilipi 4:6, 7, 13.

Niireke munnimuupuwela propaganda a Asiria aahiiso moolumo Rabsake aarumenle awe wira owoopopihe atthu a Muluku? Owo aaphavela waakupaliha wira nnakhala Yehova hata mutthu mukina khaawerya owoopola mmatatani mwa aSiria. Nave aahimmye wira aarummwale ni Yehova wira anyaanye muttetthe ole. Nto Yehova aahimmye exeeni? Owo aahimmye so: Miyo kihiiwa moolumo “a makhulupale a mwené a wAsiria akiruwanalyaya. Muhové mwaha wa itthu iyo sahimyalyawe”. (2 Mamwene 18:22-25; 19:6) Nuumala-vo, Yehova aahiruma nlaikha nenno naawiivale anakhotto a wAsiria 185.000, ohiyu omosa!​—2 Mamwene 19:35.

Niireke mootoko oweha eviidiyu yeeyo mutthu mukina ohinsuwela awe wira onoowokiwa? Tthiri nyuwo munniphavela omuleela wira: ‘Muhimukupali! Owo onimoowokani!’ Nto vano muupuwele nlaikha nooleelakani wira: “Muhihiye nwokiwaka ni Satana”!

Tivonto muhikhalakhale munwiriyanaka propaganda a Satana. (Miruku 26:24, 25) Tthiri munwiriyaneke Yehova ni mmuroromeleke okathi wotheene. (Miruku 3:5-7) Yehova onnoophentani, tivonto onooleelaweni wira: “Mwan’aka, nwetteleke ankhili: siso miyo kinotteliwa murima”. (Miruku 27:11) Tthiri mwapaka eyo, munooxintta ekhotto ya mmuupuweleloni mwanyu!