MBIIBILIYANI ninnisoma matakiheryo a alopwana ni athiyana yaarina moonelo “ntoko hiyo”. (Yak. 5:17) Mwa ntakiheryo, vannikhweya woona ele murummwa Paulo aaphavela awe ohimya ni moolumo ari aRoma 7:21-24, yaawo ani: “Kiphavelaka wira sorera, sotakhala t’inkumanaka . . . . Miyo nkirere otakhaliwa!” Moolumo ala toomaaliha vaavo ninwanana ahu soovonya, maana mulopwana owaamini ntoko Paulo aahikhalana moonelo owo.

Ohiya-vo, Paulo onnihimya moonelo awe mukina eliivuru ya aGalasia 2:20, oriki: Mwaana a Muluku “òkiphenta ni ohìvahererya wokhwani mwaha wa miyo”. Niireke murina moonelo mmosaru ntoko wa Paulo? Woonasa wene, masi khahiyo okathi wotheene.

Akhala wira ninniriipiwa murima mwaha wa itampi nipanke ahu khalai, pooti ohikupali wira Yehova onniniphenta ni oniphavela onilevelela itampi iyo. Nave eyo pooti oniiriha woonaka ovila okupali wira mukuttho wa Yesu yoovaha enikhuma wa Muluku. Niireke tthiri Yesu onnoona mukuttho awe ntoko yoovaha? Akhala wira ti siiso, eyo enrowa onikhaliherya opaka exeeni? Nrowe nithokorerye makoho awo manli.

Tthiri, Yesu oniphavela wira nooneke mukuttho awe ntoko yoovaha. Exeeni ennikupaliha wira mukuttho wa Yesu yoovaha? Nkahaya muupuwele yowiiraneya eri Luka 23:39-43. Mulopwana mmosa aahikhomeliwa vamwirini va nihaaxeryo waattamela aakhomeliwe awe Yesu. Mulopwana ole aaheemererya itthu soohiloka aapanke awe khalai. Ekrime aapanke awe yaari yootakhala mwaha woowi aahilamuliwa wiiviwa vamwirini va nihaaxeryo. Oxankale ene, mulopwana ole aahimuxonttela Yesu oriki: “Yesu! Mukùpuwele miyo, mwaphiyá Momweneni mwanyu!”

Yesu aamwaakhunle sai? Nkahaya muupuwele owereya Yesu oona awe vaavo aamananiha awe orukunuxa muru awe wira onwehe nakrime ole. Masi hata oona owereya, Yesu onnitheya vakhaani ni onnimulipiha oriki: “Kinohimeryani ekhweli wira: olelo. . . munookhala ni miyo” mParayiisu. Pooti wira vamphiyerya Yesu omuupuxerya mulopwana ole wira “Mwana a mutthu kharwenle orumeliwa: orwenlé warumela atthu n’uleva ekumi awe, wira awopole atthu othene”. (Math. 20:28) Ohiya opaka eyo, mooreerela murima Yesu aahimooniherya mulopwana ole wira aamuttottela mureerelo mukuttho aarowa awe ovaha. Yesu aahilavula moopatthaneya vaavo aahimmye awe wira “munookhala” ni “miyo”. Nave aahimuleela mulopwana ole wira aarowa okhalaka mparayiisu valaponi.

Tthiri, Yesu aaphavela wira mulopwana ole osuweleke wira aamuttottela mureerelo mukuttho aarowa awe ovaha moohipisa. Akhala wira Yesu aahimooniherya omphenta wawe nakrime ole ahaarina eparakha ya omukokhorela Muluku, tthiri eyo ennooniherya wira onnaaphenta maKristau yiivaherenrye khubatiziwa anamukokhorela Muluku. Exeeni enrowa onikhaliherya okupali wira mukuttho wa Kristu onniniphwanyiha mureerelo hata naapanke itampi suulupale khalai?

Okhala wira Yesu aahinvaha Paulo muteko woolaleerya, Paulo aahisuwela wira Yesu aamukhwenle yena. Moota xeeni? Paulo aahimmye so: “Miyo kinnimuxukhuru Yesu Kristu, Pwiy’ahu, yowo okilipinhe, okònne okhala òroromeleya, khukikhaliha murumeyi awe, yomi khalai kanveha Yesu yowo, kamulupattha, kamuhaxa”. (1 Tim. 1:12-14) Mwaha woovahiwa muteko woolaleerya hata aapanke itthu soohiloka khalai, Paulo aanikupali wira Yesu toomoriwa ikharari, oophenta ni aanithokoreriwa vanceene. Nave hiyo noovahiwa muteko woolaleerya ni Yesu Kristu. (Math. 28:19, 20) Niireke muteko woolaleerya nivahiwe ahu onninikhaliherya woona wira Yesu onikhwenle hiyo?

Albert aahikumihiwa mmulokoni oviriha iyaakha 34 ohinatthi otthikela wa Yehova. Vano owo ottikiheriwa mmulokoni okathi vakhaani ovinre, Albert onihimya so: “Nlelo nkinliyala itampi kipanke aka. Masi okathi kinlaleerya aka, ntoko Paulo kinnoona wira Yesu ookivaha muteko ola. Muteko ola onnikihakalaliha vanceene ni onnikikhaliherya okhalana moonelo wooloka voohimya sa okumi aka ni nlipelelo naka na muhoolo”.​—Esal. 51:5.

Ohinatthi wiixutta ekeekhai Allan aari nakrime ni ootakhala murima. Owo onihimya so: “Kinnivikaniha wuupuwela maxakha kaakumihenrye aka atthu akina. Nto okathi mukina eyo ennikiriipiha murima. Masi kinnisuwela wira Yehova onniweemererya anatampi ntoko miyo waalaleerya ihapari sooreera atthu akina. Vaavo kinaaweha aka atthu yeemereryaka ihapari sooreera, eyo ennikuupuxerya wira Yehova onnikiphenta. Nave kinnoona wira Yehova onnikirumeela wira kaalaleerye atthu yaapaka itthu soohiloka ntoko miyo”.

Vaavo ninlaleerya ahu, ninnipaka itthu sooloka ni ninnikhalana moonelo wooloka. Eyo enninikupaliha wira Yesu toomoriwa ikharari, oophenta ni onninroromela.

Mpakha okathi olumwenku wa Satana onrowa aya opwetexiwa mirima sahu sinoovikanihaka oniphukela mwaha wa itampi naapanke ahu khalai. Exeeni enrowa onikhaliherya owanana muupuwelo owo?

Jean yoowo aamakela wiivaha nthowa mwaha wa itthu soohiloka aapanke awe okathi aari awe mmiravo ohimmye so: “Okisivela wuupuwela wira ‘Muluku ti mulupale ovikana murim’ahu’”. (1 Yoh. 3:19, 20) Ntoko Jean ninnikhalana moonelo wooloka osuwela wira Yehova ni Yesu annisuwela wira na anatampi. Muhikhala-khale muliyalaka wira moophenta, awo aahaavaha yowoopola apinaatamu oohimalela yaawo anittharuwa itampi saya.​—1 Tim. 1:15.

Vaavo ninvekela ahu ni wuupuwela moota Yesu onaathokorerya awe apinaatamu oohimalela, onninikhaliherya okupali wira yowoopola yoovaha yuulupale. Nave onninikhaliherya omaleliha muteko woolaleerya nivahiwe ahu. Opaka eyo enimookhaliheryani omutakiha Paulo, yoowo aahimmye so: Yesu “òkiphenta ni ohìvahererya wokhwani mwaha wa miyo”.