1-2. (a) Moovarihana ni moolumo a Yesu ari Matheyo 28:18-20, muteko xeeni muulupale wa muloko wa eKristau? (b) Mwaha ola, ninrowa othokorerya makoho xeeni?

ARUMMWA khiyaareere ohakalala. Mwaha woowi, nuumala Yesu ohihimuxiwa aahaaleela wira yahaana orowa othukumana ni yena omwaako. (Math. 28:16) Woonasa wene, waari okathi yoole Yesu iixoonihenrye awe “okathi omosá w’atthu òwamini yavikanne miloko miloko mithanu [500]”. (1 aKor. 15:6) Xeeni Yesu ohalaka opaka muthukumano ole ni awiixutti awe? Aaphavela waavaha muteko wootthuneya wira avareke. Owo aalenle so: “Murowé, mwawixuttiheke atthu a maloko othene”.​—Mmusome Matheyo 28:18-20.

² Awiixutti yiiwale moolumo ale a Yesu yiirela mpantta muloko wa eKristau, iyaakha 2.000 sivinre. Muteko muulupale muloko ole waavahiwe aya, waari waapaka awiixutti a Kristu. * Olelo-va, sookhala miloko 120.000 sa maKristau eekeekhai olumwenku wotheene, nto miloko iyo sotheene sinivara muteko mmosaru. Mwaha ola, ninrowa othokorerya makoho maxexe: Xeeni muteko wowaapaka awiixutti ori aya wootthuneya? Waapaka awiixutti onihela muhina exeeni? Niireke maKristau otheene annikhaliherya muteko wowaapaka awiixutti? Xeeni vanreerela aya opixa murima okathi ninvara ahu muteko owo?

3. Moovarihana ni Yohani 14:6 ni 17:3, xeeni waapaka awiixutti ori aya wootthuneya?

³ Waapaka awiixutti muteko wootepa otthuneya. Mwaha woowi  ale aniphavela okhala apatthani a Muluku ahaana okhala awiixutti a Yesu. Ohiya-vo, atthareli a Yesu annikhalana okumi wooloka vano ni annilipelela ophwanya okumi woohimala muhoolo. (Mmusome Yohani 14:6; 17:3.) Moohaanyiherya Yesu oonivaha muteko wootepa otthuneya. Masi muteko owo khaninvara mekhihu. Murummwa Paulo ohimmye wira otheene ahu “ninvara vamosá . . . [ni] Muluku”. (1 aKor. 3:9) Tthiri eyo eparakha yuulupale Yehova ni Yesu anivanhe aya hiyo apinaatamu oohimalela!

4. Yowiiraneya elavuliwe ni Ivan ni Matilde, enniixuttiha exeeni?

⁴ Muteko wowaapaka awiixutti, onniniphwanyiha ohakalala wuulupale. Nwehe ntakiheryo na Ivan ni mwaarawe oniihaniwa Matilde anikhala oColômbia. Awo yaahimulaleerya mmiravo oniihaniwa Davier, yoowo aahimmye so: “Miyo kinniphavela opaka marukunuxo mookumini mwaka, masi nkinwerya”. Mmiravo ole aawana ebooxi, aanilya mirette soohapala, aari namuhapaliwa ni aakhala ni namoraada awe oniihaniwa Erika. Vano Ivan onihimya so: “Naahipacerya omusomiha Biibiliya hata aakhala muttetthe mwaamukhaani ni woorakamela owannyihu. Wira niphiye owannyawe, nahaana weetta iwoora sinceene ni bisikleta ephiro yowaatta mattophe. Okathi Davier aapacenrye awe opaka marukunuxo, Erika aahipacerya wiirela mpantta yoosoma ya Biibiliya”. Nto nuuvira okathi, Davier aahihiya olya mirette soohapala, owana ebooxi, ohapaliwa ni aahimuthela Erika. Vano Matilde onihimya so: “Okathi Davier ni Erika yaabatiziwe aya 2016, kaanuupuwela moolumo a Davier aahimmye awe wira: ‘Miyo kinniphavela opaka marukunuxo mookumini mwaka, masi nkinwerya’. Naahihakalala vanceene mpakha opacerya omoriha maithori”. Tthiri eyo, enooniherya wira waakhaliherya atthu okhala awiixutti a Kristu onnihakalaliha vanceene.

5. Wira naapake awiixutti, etthu xeeni yoopacerya ninreerela ahu opaka?

⁵ Etthu yoopacerya nikhanle ahu oopaka wira naapake awiixutti, ori waaphavelasa atthu yaale aniphavela wiixutta itthu voohimya sa Yehova. (Math. 10:11) Vaavo nimpaka ahu eyo, ninnooniherya wira na Anamoona a Yehova eekeekhai. Nave ninnooniherya wira na maKristau eekeekhai vaavo nniiwelela ahu yooruma ya Kristu ya olaleya ihapari sooreera.

6. Nihaana opaka exeeni wira nikhumele saana naalaleeryaka?

⁶ Okathi ninlaleerya ahu, nnimwaaphwanya atthu aniphavela wiixutta itthu sa mBiibiliyani, nave nnimwaaphwanya atthu anikhala ntoko wira khaniphavela ele nnaalaleerya ahu. Nto nihaana waavya enamuna ya waavara murima. Wira nipake eyo, nihaana wiilokiherya oratteene. Mphavelaseke myaha sinrowa waasivela atthu munaalaleerya anyu. Nuumala-vo, mwaavyeke enamuna yoopaceriha olavulana.

7. (a) Munrowa opaceriha sai ovaanela ni atthu? (b) Xeeni munoona anyu wira ti vooloka waawiriyana saana atthu akina ni ottittimiha moonelo aya?

⁷ Mwa ntakiheryo, nyuwo pooti omuleela mwaneene etthoko wira: “Kaaphavela osuwela muupuwelo anyu voohimya sa mwaha mmosa. Olelo-va, atthu otheene olumwenku wotheene sinnaaphwanya mixankiho simosaru. Munoonela sai, wira simale mixankiho iyo sotheene niireke khivanireerela okhala eguvernu emosa paahi olumwenku wotheene?” Nuumala-vo, mmusome Daniyeli 2:44. Enamuna ekina mukhanle anyu oorumeela tiila, nyuwo pooti omukoha so mwaneene etthoko: “Munoonela sai, enamuna xeeni yooloka ya waahuwa anamwane?” Nuumala-vo mmusome, Otumererya 6:6, 7. Moohicikha mwaha muthanlale anyu, wanipacerya muhaana owuupuwela atthu munrowa anyu waalaleerya.  Mmananiheke wuupuwela mireerelo anrowa aya ophwanya mwaha wowiixutta ele Biibiliya onihimya awe. Okathi munivaanela anyu ni mutthu, nvaheke ephoole ele onihimya awe wira musuwele moonelo awe ni mmuttittimiheke. Opaka eyo enimookhaliheryani vanceene ni enoomwiiriha woowiriyanani saana.

8. Xeeni vanireerela aya ovikaniha opaka mikwaha sootthikela oxukurya?

⁸ Woonasa wene, mutthu ohinatthi weemererya yoosoma ya Biibiliya, nihaana wiimananiha vanceene opaka mikwaha sootthikela oxukurya. Nthowa xeeni? Nthowa noowi, pooti wira okathi ninrowa ahu waaxukurya khannaaphwanya aahiiso okathi owo khamphavela oniwiriyana. Nave pooti wira nihaana omuxukurya ikwaha sinceene ohinatthi mwaneene etthoko woona wira ohaana weemererya omusoma Biibiliya. Muupuweleke wira, mwiri pooti wunnuwa akhala wira onimakela okhuwariwa. Moolikanasa, pooti wira omphenta wawe Yehova ni Kristu onimunnuwa akhala wira nnoomuxukurya ikwaha sinceene nimuleelaka myaha sa mBiibiliyani.

9-10. Xeeni ohimyaka wira khula namalaleerya onnikhaliherya waaphwanya atthu aniphavela ekeekhai?

⁹ Khula namalaleerya onnikhaliherya waaphwanya atthu aniphavela ekeekhai. Muteko ahu, pooti olikanyiha ni muteko woomwaavya mwaana orimenle. Mwaha wa xeeni? Nkahaya nwehe yowiiraneya ela yekeekhai: Mwaana mmosa mwaamulopwana a iyaakha 3 aahikhuma vatthokoni va anamuyari awe khurimeela. Atthu 500 yaahiivahererya omwaavya mwaana ole. Nto nuuvira iwoora 20, mwaana ole aarimenle aahiphwanyiwa ni mutthu mmosa oowiivahererya waattamela ematta ya nakhuwo. Mulopwana ole oowiivahererya khaaphavenle ottottopeliwa mekhawe mwaha womphwanya mwaana ole. Owo aahimmye so: “Vaatthuneya  wiimananiha wa atthu anceene wira nimphwanye mwaana ola”.

¹⁰ Olelo-va, atthu anceene anoolikana ni mwaana ole aarimenle. Awo anoona wira aarimeela ni kharina nlipelelo, nto nihaana waakhaliherya. (aÉf. 2:12) Otheene ahu nniirela mpantta egrupu ya atthu imilyau 8 aaniimananiha owaavya atthu aniphwanelela. Woonasa wene, vannoovilani omphwanya mutthu wira mmusomiheke Biibiliya. Masi anna akina anilaleerya muttetthe owo pooti omphwanya mutthu oniphavela wiixutta ikeekhai siri mBiibiliyani. Nto vaavo munna aahiiso murokora onimphwanya awe mutthu oniphavela, muhoolo mwaya onakhala mutthareli a Kristu, otheene ale yiimananinhe omwaavya mutthu owo ahaana ohakalala.

11. Hata muhimusomihaka mutthu Biibiliya, mwa inamuna xeeni munrowa anyu okhaliherya waapaka awiixutti?

¹¹ Akhala wira khamunimusomiha mutthu Biibiliya, nyuwo pooti okhaliherya waapaka awiixutti mwa inamuna sikina. Mwa ntakiheryo, vaavo munaaweha anyu ale anoopacerya orweela mithukumano Empa ya Omwene, muhaana waakhomasa ni waakhaliherya. Maana vaavo anoona aya wira ninniphentana, anoosuwela wira na maKristau eekeekhai. (Yoh. 13:34, 35) Ohiya-vo, muhaana wiimananiha okomentari mmithukumanoni. Ikomentaario sanyu, hata sikhalaka saamukhaani sinimwaakhaliherya ale a niinaano okhalana waamini ni nttittimiho. Nave nyuwo pooti orowa olaleerya vamosa ni namalaleerya a niinaano wira mmukhaliherye omurumeela saana Biibiliya okathi onaalaleerya awe atthu. Opaka eyo, munoomukhaliherya omutakiha Kristu.​—Luka 10:25-28.

12. Niireke nihaana okhalana mikhalelo sa vameekhaaya wira naakhaliherye atthu akina okhala atthareli a Kristu? Mutthokiherye.

¹² Khuuvo mutthu onireerela wuupuwelaka wira ohaana okhalana mikhalelo sa vameekhaaya wira aakhaliherye atthu akina okhala atthareli a Kristu. Nthowa xeeni? Nwehe ntakiheryo na murokora Faustina, yoowo onikhala oBolívia. Okathi aapacenrye awe waataana ni Anamoona a Yehova, owo khaasuwela osoma. Masi olelo-va, owo ohiixutta osoma vakhaani. Vano owo oobatiziwa ni onniwiixuttiha atthu akina Biibiliya. Nto khula esumana, owo onniiriha soosoma sa Biibiliya 5. Atthu anceene Faustina oniwiixuttiha awe Biibiliya annisuwela osoma saana onvikana yena. Masi hata vari siiso owo owiixuttiha atthu 6 mpakha ophwanelela obatiziwa.​—Luka 10:21.

13. Hata naatteliwaka miteko, mareeliho xeeni nimphwanya ahu mwaha wowaapaka awiixutti?

¹³ MaKristau manceene annaatteliwa miteko soovara. Masi hata vaari siiso, awo anniphavelasa okathi wira yiirihe soosoma sa Biibiliya nto annihakalala vanceene. Mwa ntakiheryo, nwehe yowiiraneya ya Melanie onikhala epooma yaamukhaani ya wAlasca. Owo aamuhuwa mwanawe mwaamuthiyana a iyaakha 8 mekhawe, aanivara muteko nihiku notheene ni onimukhapelela  paapa awe yoowo oniwereiwa kanser. Melanie mekhawe tori Namoona a Yehova, epooma yaamukhaani onikhala awe. Owo aaniphavela omphwanya mutthu wira omusomiheke Biibiliya. Nto Melanie aaninvekela Yehova wira omukhaliherye ovilela oriirya wira alaleerye. Nihiku nimosa, owo aahimulaleerya muthiyana mmosa oniihaniwa Sara ni aahimwiixuttiha wira Muluku ookhalana nsina. Nto Sara yaahimusivela etthu iiwale awe, nuuvira okathi aaheemererya yoosoma ya Biibiliya. Vano Melanie onihimya so: “Khula Namathanu ohiyu kaamakela okhulumuwa, masi hata vaari siiso, miyo ni mwanaka naanirowa omusomiha Biibiliya Sara. Nto eyo yaanikikhaliherya vanceene. Waaninsivela otokosa itthu sa mBiibiliyani wira naakhule makoho a Sara ni naanihakalala woona wira Sara aanikhala mpatthani a Yehova”. Moolipa murima, Sara aahivilela olupatthiwa, vano oohiya ekerexa awe ni oobatiziwa.

14. (a) Xeeni muteko wowaapaka awiixutti onlikana aya ni ototha ihopa? (b) Masu a Paulo ari 2 Timótheyo 4:1, 2, aniwiixuttihani exeeni?

¹⁴ Akhala wira munuupuwela wira muteko anyu woolaleerya khonikumiherya mireerelo, muhikhulumuwe. Muupuweleke wira Yesu oolikanyiha muteko wowaapaka awiixutti ni ototha ihopa. Ale antotha ihopa pooti oviriha okathi munceene ahivanre nnakhala ehopa emosa. Okhala wene, alipa oototha ihopa annirowa ovara muteko aya ohiyu eriyari ni oxaka nave okathi mukina annirowa mapuro oorakamela. (Luka 5:5) Nave-tho, muteko wowaapaka awiixutti onoolikana ni ototha ihopa. Anamalaleerya akina anniviriha okathi munceene ‘atothaka’ moopixa murima mapuro ni okathi woovirikana. Mwaha wa xeeni? Mwaha woowi, aniphavela waaphwanya atthu anceene. Wiimananiha iwo  onnikumiherya mireerelo, mwaha woowi anamalaleerya awo annaaphwanya atthu aniphavela owiriyana ihapari ninlaleya ahu. Woonasa wene, muttetthe anyu wookhala okathi, nihiku ni mapuro vanikhweya aya waaphwanya atthu. Munoonela sai olaleerya okathi, mahiku ni mapuro awo?​—Mmusome 2 Timótheyo 4:1, 2.

15. Xeeni vanireerela aya opixa murima okathi nniiriha ahu soosoma sa Biibiliya?

¹⁵ Xeeni vanireerela aya opixa murima okathi nniiriha ahu soosoma sa Biibiliya? Nthowa nimosa, okhala wira muritti ahu khahiyo paahi waakhaliherya atthu osuwela ni ophenta itthu Biibiliya oniixuttiha awe. Nihaana waakhaliherya omusuwela ni omphenta mwaneene Biibiliya, Yehova. Nave, ti vooloka waasuweliha ale nnaasomiha ahu ele Yesu aarumme awe awiixutti awe ni waakhaliherya osuwela moota wowiiwelela yooruma eyo. Nihaana waapixerya murima naakhaliheryaka ovarihela muteko ele aniixutta aya mBiibiliyani. Atthu akina nnaasomiha ahu Biibiliya, pooti waakuva oturuka muupuwelo aya ni ohiya soolema soohiloka. Masi atthu akina pooti oviriha okathi munceene.

16. Yowiiraneya ya Raúl ewiixuttinheni exeeni?

¹⁶ Yowiiraneya ya misionaario mmosa a oPerú enninikhaliherya woona wira vannireerela opixa murima. Owo onihimya so: “Kaahimusomiha iliivuru piili mulopwana mmosa oniihaniwa Raúl. Masi nlelo aahikhalana mixankiho suulupale. Mwa ntakiheryo, aahikhalana mixankiho sinceene mukasamentoni mwawe, aari mutthu aalavula moolumo oohiloka ni vanaavila anaawe omuttittimiha. Masi khaacompela mithukumano. Tivonto nkaahiyale omukhaliherya Raúl ni etthoko awe. Masi nuuvira iyaakha tthaaru okhuma okathi kaapacenrye aka omusomiha, owo aahibatiziwa”.

17. Mwaha onittharelana, ninrowa woona exeeni?

¹⁷ Yesu onirumme wira: “Murowé, mwawixuttiheke atthu a maloko othene”. Wira nimalelihe yooruma ela, ikwaha sinceene nihaana ovaanela ni atthu arina muupuwelo woovirikana ni wawihu. Atthu awo anihela muhina ale ahirina etiini naale ahinikupali wira Muluku ookhala. Mwaha onittharelana, ninrowa woona moota nikhanle ahu oowaalaleerya atthu awo.