Nuumala omaliha waanyiherya waka, kaahikhala pioneero, nuumala-vo, Yehova aahihula mikhora suulupale kihuupuwela aka. (aÉf. 3:20) Eyo yiiraneyale sai? Mukihiye kootthokiheryeni moota itthu sipacenrye aya.

Kiyariwe myeeri vakhaani nuumala opacerya Ekhotto ya Nenli ya Olumwenku Wotheene 12 a Dezembro 1939 oBerlin, wAlemanha. Mwaakha wa 1945, vaavo ekhotto yaahala aya omala, iviyau saanitepa ovonyerya ibomba oBerlin. Nihiku nimosa, ibomba iyo saahivonyeriwa ephiro naakhala ahu, miyo ni emusi aka naanitthyawela opuro naakhapeleleya ahu okathi saavonyiwa aya ibomba. Muhoolo mwaya, nahoona wira naahaana otthyawela wErfurt opuro yoowo maama aka aayariwe awe.

Maama aka aaniphavela osuwela ekeekhai. Owo aahikhalana iliivuru sa mafiloosofu, aanitokosa itiini soovirikana, masi hata vari siiso khaaphwannye ekeekhai. 1948, Anamoona a Yehova anli yaahirwa owaani. Maama aka aahaalattula ni aahaakoha itthu sinceene. Ehinatthi ovira ewoora emosa, owo aahikileela miyo ni murokoraka wira: “Koophwanya ekeekhai!” Moohipisa, miyo, maama aka ni murokoraka naahipacerya orowela mithukumano wErfurt.

1950 naahitthikela okhala oBerlim, nto naari muloko wa oBerlim-Kreuzberg. Nuumala othaamela muttetthe mukina, naari muloko wa oBerlim-Tempelhof. Nuuvira okathi, maama aka aahibatiziwa, masi miyo kaanoovelela obatiziwa. Mwaha wa xeeni?

Kaanipisa okela vahoolo momunepani mwaha woowi kaanoova ni kaanuuliwa muru. Nnaamwi kaarowa olaleerya mwa iyaakha piili, kaanoova olavula ni atthu. Nto kaahipacerya waataana ni anna ni arokora yaawo yaari oolipa murima ni yoonihenrye omphenta waya Yehova. Akina a yaawo yaahitthukweliwa mapuro yaavariwa muteko wookhanyereriwa wa maNazista, wAlemanha Oriental. Akina yaaniileva aroihaka iliivuru sahu elapo ele. Nto ntakiheryo naya nooloka nookikhaliherya vanceene. Kaahipacerya wuupuwela, akhala wira anna ale yaahileva okumi aya mwaha  wa Yehova ni anna, nto kaahoona wira kaahaana opaka etthu wira kixintte woova waka.

Nivalo noopacerya kaapanke aka wira kixintte woova waka waari okhaliherya ekampaanya yoolaleerya yaapakiwe 1955. Ekarta yaakumiheriwe Informante, * Munna Nathan Knorr aahimmye wira ele yaarowa okhala ekampaanya yuulupale yoopacerya ya mutthenkeso ahu. Nave aahimmye wira akhala wira anamalaleerya otheene yaamwiirela mpantta, “ole waarowa okhala mweeri wa vameekhaaya wa muteko woolaleerya”. Tthiri eyo ti etthu yiiraneyale! Moohipisa nuumala ekampaanya ele, kaahiivahererya wa Yehova, kibatiziwa vamosa ni paapa aka ni murokoraka mwaakha wa 1956. Moohipisa, kaahaana opaka yoothanla ekina yuulupale.

Mwa iyaakha sinceene, kaanisuwela wira opioneero waari muteko wooloka. Wanipacerya kaahilakela wiixutta moota woomweetta nakoso ilapo sikina sa oBerlim. Moottharelana kaahiimananiha osuwela oratteene omweetta nakoso kihinatthi okhala pioneero. Nto 1961 kaahiphwanya muteko oHamburg, epooma yuulupale ya wAlemanha. Vaavo kaatepa aka osiveliwa muteko ole, kaamutepa ohiyererya okhala pioneero. Munnisuwela etthu kaapanke aka?

Kinnimuxukhurela vanceene Yehova mwaha wookivaha anna ophenta yaawo akikhalihenrye ohela nipuro noopacerya itthu somunepani. Apatthani aka anceene yaahikhala mapioneero, nto aakivaha ntakiheryo nooloka. Ohiya-vo, munna Erich Mundt yoowo aatthukweliwe mapuro anivariwa muteko mookhanyereriwa aahikitumererya omuroromela Yehova. Owo aahikileela wira anna ale yahaamuroromela Yehova mapuro ale waavariwa muteko mookhanyereriwa, muhoolo mwaya waamini waya waahivukuwa. Masi ale yaamuroromela Yehova ni murima wotheene, yaahivikaniha ororomeleya ni yaahilipiha muloko.

Etthu ekina yaakikhalihenrye yaari moolumo a Martin Poetzinger, yoowo aari a Nikhuuru Noolamulela. Wira okilipihe, munna ole aahimmye so: “Olipa murima muhakhu muulupale mutthu onireerela awe wiithukumanyerya!” Nuumala wuupuwelela moolumo ale, moohipisa kaahihiya muteko aka kipacerya okhala pioneero, Junyo a 1963. Tthiri ele yaari yoothanla yootepa oloka kaapanke aka! Nuuvira myeeri miili kihinatthi opacerya waavya muteko mukina, kaahilattuliwa okhala pioneero a vameekhaaya. Iyaakha vakhaani muhoolo mwaya, Yehova aahikireeliha mwa enamuna kihuupuwela aka. Kaahilattuliwa wiirela mpantta eturma 44 ya oGileadi.

Etthu yuulupale kiixuntte aka oGileadi, otepexa wene ni munna Nathan Knorr ni Lyman Swingle, tiila: “Muhaakuveleke ohiya yoothanleliwa anyu”. Awo yaanintumererya ovikaniha ovara muteko nthanleliwe ahu, hata nivirihaka mixankiho. Munna Knorr aamakela ohimya wira: “Exeeni munrowa anyu owehexexaka? Mapuro oohiloka, apwilimwithi, ohaawa? Wala munrowa owehexexaka miri, ifilori ni ithoi soohakalala? Muhaana wiixutta waaphenta atthu!” Nihiku nimosa Munna Swingle aahihimya etthu eniwiiriha anna akina waakuvela ohiya yoothanleliwa aya. Owo khaareere oriipiwa murima mpakha omoroxa maithori. Nto ahihiya olavula mwaha okathi vakhaani mpakha okhala saana. Etthu ele yaahikivara murima vanceene ni yaahikikhaliherya olakela ohimunyoonyiha Kristu ni axinnawe.​—Math. 25:40.

Okathi naavahiwe ahu soothanleliwa sahu, anna akina yaarumeela oBetheli yaaninikoha opuro naaroihiwe ahu. Awo yaanilavula itthu sooloka sa ilapo naarowa ahu. Masi okathi kaahimmye aka wira kinrowa “oCongo (Kinshasa)” awo yaahimala, nuumala-vo khuhimya wira: “Eekhuu oCongo! Yehova okhale ni nyuwo!” Okathi ole, ijornaali saalavula paahi sa ekhotto yaawaniwa oCongo ni wiivakasiwa atthu. Masi nkaaliyanle etthu kiixuntte aka oGileadi. Moohipisa nuumala ogratuwari, Setembro a 1967, miyo, Heinrich Dehnbostel ni Claude Lindsay naahirowa oKinshasa ekapitaali ya oCongo.

Nuumala ophiya oKinshasa, naahiviriha myeeri  miraru nisomaka eFrancês. Nuumala-vo, naahiwela eviyau nnaarowa oLubumbashi, weiwo wiihaniwa wElisabethville. Epooma ele, enikhala okuusini wa oCongo waattamela omukanoni ni oZâmbia. Hiyo naakhala empa ya mamisionaario yaari eriyari ya epooma.

Mipantta sinceene sa oLubumbashi kisaalaleeriwe. Naahihakalala vanceene okhala atthu oopacerya yaalaleerya atthu a elapo ele. Moohipisa, naahipaceriha soosoma sinceene sa Biibiliya, nnakhala khinaakhalana okathi woowaasomiha atthu otheene. Nave naanaaleerya makhulupale a guvernu ni mapoliisia. Atthu anceene yaanittittimiha vanceene Nuulumo na Muluku ni muteko ahu woolaleerya. Okhala wira atthu anceene anilavula eSwahili miyo ni Claude Lindsay naahiixutta nttaava nno. Nto moohipisa naahithanleliwa muloko wa eSwahili.

Nnaamwi naarina sookumanana soohakalaliha, naahikhalana mixankiho. Okathi mukina naanikumana atoropa akunxe ene ikapwitthi ahapaliwe ene ni mapoliisia yaawo yaanootherya itthu sinceene. Nihiku nimosa, naapaka mithukumano empa ya mamisionaario. Moohipisa egrupu emosa ya mapoliisia akunxe ene ikapwitthi yaahinivara khuniroiha okumanto. Mapoliisia ale yaahinikilaathiha vathi mpakha 22 oora, nuumala-vo yaahinitaphula.

1969 kaahithanliwa okhala mutokweene a esirkwiitu. Esirkwiitu aka yaahela muhina itakhwa sa wÁfrica, eyo enooniherya wira nahaana weetta mikwaha soorakama niviraka mapuro oowaatta mattophe, itakhwa suulupale ni owela itturuuru sinceene. Muttetthe mmosa kaaxukurya aka aahikhala mwalyakhu aarupa ni axaana awe vathi va ekhaama aka. Nkinkhala-khala kiliyalaka  moota aakivenxa awe mooreerela murima vaavo aanyakula awe vahinatthi oxa oratteene. Onnikisivela vaavo kinuupuwela aka okathi anna ohiyu yaavaanela aya myaha sa mBiibiliyani yooraka mooro.

Muxankiho muulupale waari waavilela atthu ale yaihimya okhala maKristau akhaliheryaka egrupu Kitawala. * Masi anna ni arokora anceene khiyaawokiwe ni “maluku anikhumelela”. (Yuta 12, Waataana wa Naanaano) Nuuvira okathi, Yehova aahaakumiha mmulokoni atthu ale otheene, nto atthu anceene yaahiixutta ekeekhai.

1971 kaahithanleliwa orumeela eBetheli ya oKinshasa, nto kaanivara miteko sinceene ntoko edepartamento ya muteko, edepartamento ya iliivuru, ya musurukhu wa miloko ni myaha saavarihana ni muteko woolaleerya. Orumeela oBetheli wookiixuttiha moota wootthokiha muteko ahu elapo yuulupale ehirina ipa sinceene sa mutthenkeso ahu. Myeeri sikina, eBetheli yaaniroiha ikarta mmilokoni ni iviyau nto okathi mukina saanipisa ophiya. Muxankiho mukina okhala wira iviyau iyo saanihela ikarta mukalawani ni ikalawa iyo saaniphara mmalaxini anikhala mmaasini. Hata vaari siiso, anna a oCongo aakiixuttiha oxintta mixankiho iyo ni sikina.

Etthu yaakihakalaliha yaari waaweha anna yaapakaka akongresu aalupale hata ahirina musurukhu munceene. Awo yaanipaka eplataforma nipuro noottukhuwa arumeelaka mithala ni mukerekhere mwaya anahela murekele. Ibanko saya saakhala irece sa malaxi. Nave yaanirumeela mithala wira apake nipatho ni meesa. Nto okhala wira khiyaarina ipereku awo yaanithokola miri anarumeela. Waanikisivela waaweha anna ni arokora moota yaaxintta aya mixankiho mwa enamuna yooloka. Nto kaanaaphenta vanceene anna ni arokora ale. Nuumala ovahiwa yoothanleliwa ekina kaaninkheliwa vanceene anna ale.

1974 kaahithaamiheriwa eBetheli ya oNairóbi, oQuênia. Waahikhala muteko munceene woovara, mwaha woowi eBetheli ya oQuênia yaanikhapelela muteko woolaleerya ilapo 10 saattamenle, masi ilapo sikina muteko ahu waanikhoottihiwa. Ikwaha sinceene kaahithanliwa orowa oxukurya ilapo iyo, otepexa wene wEtiópia. Okathi ole, anna ni arokora a elapo ele yaanilupatthiwa vanceene, nto yaahikhalana mixankiho. Anna akina yaanihasuliwa, akina yaaniriheliwa mukhatteya, hata akina yaaniiviwa. Nnaamwi yaarina mixankiho, anna ale yaari oororomeleya ni aakhalana waataana wooloka ni Yehova ni anna akina.

1980, yaahikhumelela etthu yoohakalaliha vanceene, kaahimuthela Gail Matheson. Gail ta oCanadá, nave naari eturma emosa oGileadi. Hiyo naavaanela nirumeelaka ikarta. Gail aarumeela ntoko misionaaria oBolívia. Nuuvira iyaakha 12, naahikumana-tho oNova York. Nto nuuvira okathi vakhaani kaahimuthela oQuênia. Etthu yootepa okisivela okhala wira Gail okhalana moonelo wooloka wa omunepani ni okathi wotheene onnihakalala ni itthu orina awe. Owo onnivikaniha okikhaliherya mwa enamuna ya vameekhaaya ni kinnimphenta vanceene.

1986, miyo ni Gail naahithanleliwa muteko wooweetteetta ni kaarumeela ntoko memburu a Ekomisau ya Efiliyaali. Hiyo nooxukurya ilapo sinceene saakhapeleliwa ni eBetheli ya oQuênia.

Kinnuupuwela okathi naamulokiherya ahu kongresu wAsmara (olelo-va wEritreia). Mwakha wa 1992, elapo ele muteko ahu khiwaakhoottihiwa. Mooriipiha murima, opuro naaphwannye ahu wira nimpake kongresu yaari alumasiya aahiiso armazém oonanara, muhina aahitepa onanara ovikana ota. Nihiku nimosa na kongresu, kaahihakalala woona moota anna yaawenrye aya orattela muhina mwa alumasiya ale okhala nipuro nooreera omukokhorela Yehova. Imusi sinceene saahiruuha ikuwo sooloka wira akhuneele mapuro otheene yahaareera oweha. Ole aari kongreso oohaakalaliha okhala wira yaahikhala atthu 1.279.

Muteko wooweetteetta waari murukunuxo muulupale okhala wira khula esumana mapuro  naamaka ahu yaanivirikana. Okathi omosa, naahimaka empa yooreera waattamela ophareya. Okathi mukina, naahimaka empa yaamukhaani ya yuuma opuro yaakhala aya anamuteko, nto ixoworo saya saarakamenle imeeturu 100 ni ipa. Masi mapuro naarumeela ahu khahiyo yaari ootepa otthuneya. Itthu nihinliyala ahu muteko woolaleerya naavara ahu ni mapioneero ni anamalaleerya ooluttuweliwa. Okathi naavahiwa ahu yoothanleliwa esya, naanaahiya apatthani naaphenta ahu ni naaninkheliwa vanceene.

Wanikisa wa iyaakha sa 1980 ni wanipacerya wa iyaakha sa 1990, muteko ahu waahilepihiwa ilapo sinceene saakhapeleliwa ni eBetheli ya oQuênia. Mwaha woolepihiwa, saahipakiwa iskritoorio sinceene ilapo iyo. Nto 1993 kaahithanleliwa ovara eskritoorio wEtiópia yeeyo yaakhala wAdis-Abeba. Mwa iyaakha sinceene naanimurumeela Yehova moohisuweliwa, masi waahiphiya okathi anna yaalepinhe aya muteko ahu.

Yehova onnivikaniha oreeliha muteko woolaleerya wEtiópia. Anna ni arokora anceene annirumeela ntoko mapioneero. Okhuma 2012, anna anivikana 20 pursento annirumeela ntoko mapioneero ookilaatheya. Ohiya-vo, anna anceene ahiixuttihiwa ni ixikola sa Omwene ni mutthenkeso ahu wooteka Ipa sa Omwene sinivikana 120. Vano, 2004, emusi ya oBetheli yaahithaamela opuro musya. Nto opuro eri aya eBetheli yookhala Esalau ya Asembeleya, eyo ennaakhaliherya vanceene.

Iyaakha iya sinivira, miyo ni Gail nootepa waataana ni anna ni arokora a wEtiópia. Hiyo ninnaaphenta mwaha woowi toothokorerya ni ooreera murima. Masi iyaakha vakhaani sivinre, noopacerya okhalana mixankiho sa okumi nto noothaamiheriwa eBetheli ya wEuropa Central. Anna a elapo ela anninikhapelela vanceene, nave ninninkheliwa apatthani ahu a wEtiópia.

Nihoona wira Yehova onninnuwiha aahiiso oreeliha muteko awe. (1 aKor. 3:6, 9) Mwa ntakiheryo, okathi kaalalenrye aka atthu anthipa maluku oowaarya oRuanda yaawo yaari oCongo aphavelasaka ekoobiri, khaakhanle nnakhala namalaleerya mmosa. Olelo-va, elapo ele aakhala anamalaleerya 30.000. Mwaakha wa 1967, oCongo yaahikhala anamalaleerya 6.000. Masi olelo-va, oCongo aakhala anamalaleerya anivikana 230.000 ni atthu anivikana emilyau emosa yaahirowa wuupuwelela okhwa wa Yesu 2018. Nummuru na anamalaleerya a ilapo sotheene saakhapeleliwa ni eBetheli ya oQuênia ahincerereya mpakha ovikana 100.000.

Iyaakha sinivikana 50 sivinre, Yehova ookivaha anna akikhalihenrye okela muteko wa okathi wotheene. Nnaamwi olelo-va kihitepaka woova, kihiixutta omuroromela Yehova ni murima wotheene. Itthu sotheene sikikhumelenle wÁfrica sookikhaliherya okhala oopixa murima ni ohakalala ni itthu kirina aka. Miyo ni Gail ninnaaxukhurela anna ni arokora yaawo ari ntakiheryo nooloka na owaakhela aletto, ovilela mixankiho ni omuroromela Yehova ni murima wotheene. Tthiri kinnimuxukhurela vanceene Muluku mwaha wa oreera wawe murima. Moohaanyiherya Yehova ookireeliha ovikana kuupuwela aka.​—Esal. 37:4.