YOWIIRANEYA YA MWEEKUMINI
Kivanre Muteko Kaarina Aka Ovara
MWA iyaakha 30, Donald Ridley aari advogado aawaakiha Anamoona a Yehova otribunaali. Owo aanaakhaliherya vanceene atthu akina ntoko mameediku, matotoro ni aphuki osuwela wira nookhalana ehakhi ya okhootta oheleliwa ephome. Owo ohaakhaliherya vanceene Anamoona a Yehova okhalana erasawu itribunaali sinceene sa wEstados Unidos. Axipatthani awe anceene Don, yaanimusuwela okhala mutthu oowiimananiha, oowiiyeviha ni oohiikompela.
Mwakha wa 2019 Don aahiphwanyaniwa oretta wa mmuru wooxankiha ni ohinivoniwa. Oretta ole waahaakuva wunnuwa, nto okhwiiye 16 a Agosto a 2019. Ela yowiiraneya awe ya mweekumini.
Kiyariwe mwaakha wa 1954 oSão Paulo, Minnesota, wEstados Unidos. Anamuyari aka khahiyo yaari atthu oothaaciri ni khahiyo yaari atthu ootepa ohaawa, nave otheene ahu neettela Ekerexa Katoolika. Niri anamwane 5, nto miyo ka nenli. Okathi kaari aka mwaana kaanirowa exikola ya Ekerexa Katoolika, nave kaari mmiravo aamukhaliherya paatiri okathi wa miisa ni miteko sikina mukerexa. Hata vaari siiso, nkaamusuwela oratteene Biibiliya. Nnaamwi kaasuwela wira Muluku topattunxe itthu sotheene sikhanle, nkaakupali wira Ekerexa Katoolika yaamukikhaliherya omukokhorela Muluku.
WIIXUTTA EKEEKHAI
Mwaakha woopacerya kaasoma aka exikola eniwiixuttiha madvogado, Anamoona a Yehova yaahiphiya owannyaka. Nihiku nne kaahiluttuweliwa vanceene okattha, nto mooreerela murima, anamathelana ale yaaheemererya otthika okathi mukina. Nihiku yaatthikale aya, kaahaakoha makoho manli: “Xeeni atthu ootakhala murima anikhala aya saana waavikana atthu ooreera murima?” ni “Atthu anrowa owerya sai ohakalala mwekeekhai?” Awo yaahikivaha eliivuru A Verdade Que Conduz à Vida Eterna ni Tradução do Novo Mundo da Bíblia Sagrada, Biibiliya yoowo aarina ekaapa, ekoore ya ntikwa. Nave kaaheemererya osomihiwa Biibiliya. Yoosoma ele yaahikitthukula muru. Kaahihakalala vanceene osuwela wira Omwene wa Muluku, ekuvernu enrowa waalamulela mwa xariya apinaatamu valaponi. Kaahoona wira olamulela wootakhala wa apinaatamu, khonikumiherya mireerelo masi onincererya owereya, ohaawa, ohixariya ni ihasara.
Kiivaherenrye wa Yehova wanipacerya wa mwakha wa 1982 ni kipatisiwe mwaakha ene yoole okathi wa kongresu aarina muru oni: “A verdade do Reino”, yoowo aapakiwe muttetthe muulupale wa oSão Paulo. Isumana vakhaani saattharelana kaahaana otthikela epooma ya oMinnesota wira kapake isaame sa madvogado. Wanipacerya wa mweeri wa Outubro, kaahileeliwa wira kaahipasari, nto kaarowa ovaraka muteko ntoko advogado.
Okathi wa konkresu “A verdade do Reino”, kaahimusuwela Mike Richardson yoowo aarumeela eBetheli ya oBrooklyn, owo aahikileela wira eseedi ahu ya olumwenku wotheene yaahikhala eskritoorio ya malamulo. Kaahuupuwela moolumo a mulopwana oohuliwa a wEthiyopia ari Miteko 8:36, ‘Exeeni enkikhoottiherya orowa orumeela Eskritoorio eyo ya Malamulo?’ Nto kaahilepa eformulaario wira karumeeleke oBetheli.
Anamuyari aka khiyaasiveliwe miyo okhala Namoona a Yehova. Paapa aka aahikikoha akhala wira muteko aka oBetheli waamukiphwanyiha mireerelo ntoko advogado. Nto kaahimuleela wira kaarowa ovara muteko wowiivahererya. Nave kaahimuleela wira kaarowa ovahiwaka idoolari $75 khula mweeri, musurukhu yoowo yaavahiwa aya mabethelita otheene.
Okhala wira kaaheemererya orowa ovara muteko otribunaali, nkaarowa opacerya orumeela oBetheli moowaakuveya, nto kaapacenrye orumeela eBetheli ya oBrooklyn, oNova York mwaakha wa 1984. Miyo kaathanleliwe ovara Eskritoorio ya Malamulo. Muteko kaavara aka otribunaali waahikhaliherya, mwaha wa itthu saarowa okhumelela muhoolo.
OLOKIHERIWA NIPURO NAAPAKIWA ITEATRU OSTANLEY
Nipuro naapakiwa Iteatru Stanley okathi waathummwale aya
Nipuro naapakiwa iteatru oStanley, epooma ya Jersey City, oNova Jersey, waathummwale Novembro a 1983. Anna yaahivekela wira yeemereriwe olokiherya mpantta wa maluuxu ni maasi. Okathi anna ale yaathukumanne aya ni makhulupale a muttetthe ole, yaahaaleela wira yaaphavela orumeela nipuro nne naapakiwa Iteatru oStanley wira sipakiweke mithukumano sa Anamoona a Yehova. Nto eyo yaahikumiherya muxankiho. Moovarihana ni malamulo a moota saatekiwa aya ipa epooma ele, ipreetiyu sa okokhorela saahaana otekiwa paahi mpairo. Masi nipuro naapakiwa Iteatru oStanley naari nipuro neettiwa nakoso eriyari ya epooma, nto mwaha wa yeeyo, makhulupale ale khiyaaweemerenrye anna opaka itthu iye yaaphavela aya. Anna ale yaahaavekela makhulupale ale wira atthikele othokorerya mwaha ole, masi nlelo yaahikhootta oweemererya.
Esumana aka yoopacerya orumeela oBetheli, mutthenkeso waahikuxa mwaha ole aroiha otribunaali. Okhala wira kaamalinhe niinaano iyaakha piili kivaraka muteko otribunaali oSaint Paul, oMinnesota, kaanisuwela oratteene milattu ntoko iye. Mulopwana mmosa aari advogado ahu aahihimya wira nipuro nimpakiwa Iteatru oStanley naanirumeeliwa wira sipakiwe mithukumano soovirikana ohela muhina wooniheriwa ifilme ni atthu aniipa muusika oniihaniwa rock. Nto xeeni vaahimmwa aya wira vaari voohiloka opaka mithukumano sa itiini opuro ole? Vano, etribunaali yaahithokorerya mwaha ole yoona wira etribunaali ya oJersey City yaahitthekela ehakhi ahu ya okokhorela. Nto etribunaali ele yaahihimya wira makhulupale ale yaahaana olepa epaphelo aweemereryaka anna ale opaka itthu yaaphavela aya. Okathi ole kaahipacerya woona moota Yehova onireeliha awe mutthenkeso awe ni muteko wa edepartamento eniphuka myaha sa mutthenkeso ahu. Nto kaahihakalala vanceene wiirela mpantta.
Moohipisa anna yaahipacerya olokiherya opuro ole, 8 a Setembro a 1985, ohinatthi ovira mwaakha okhuma vaavale yaapacenrye aya olokiheriwa opuro ole, vaahiweryaneya opaka muthukumano wa ekratuwasau ya eturma 79 ya oGileadi. Yaari eparakha yuulupale okhaliherya mutthenkeso, okeleliha ohoolo miteko sa Omwene kivaraka ekiipa enivarihana ni malamulo. Ohakalala kiphwannye aka woovikana itthu sotheene sikikhumelenle okathi kaari aka advogado kihinatthi orowa orumeela oBetheli. Miyo nkaasuwela wira Yehova aamukirumeela wira kiphuke myaha sikina.
OWANELA EHAKHI YA OLOOLIWA NIHIHELELIWAKA EPHOME
Iyaakha sa 1980, matotoro ni mameediku khiyaattittimiha Anamoona a Yehova vaavo yaavekela aya olooliwa ahiheleliwaka ephome. Eyo yaanitepa waaxankiha athiyana oorupala, mwaha woowi aphuki yaahimya wira athiyana oorupala khiyaarina ehakhi ya okhootta oheleliwa ephome. Maana yuupuwela wira yaari etthu yoohiloka mwaana wunnuwa ohirina maama awe, mwaha woowi aahikhootta oheleliwa ephome, nto khukhwa.
Nihiku 29 a Dezembro a 1988, murokora Denise Nicoleau, aanikhuma ephome yinceene nuumala oyara. Yaahikhuma ephome yinceene mphaka ohalana hemoglobina 5.0, nto meediku aahinvekela murokora ole wira omweemererye omuhelela ephome. Masi murokora Denise aahikhootta. Vano nihiku naattharelana, exiripitaali ele yaahivekela otribunaali wira yeemereriwe omuhelela ephome murokora ole. Voohimuleela murokora ole, nnakhala omuleela iyawe, aphuki yaahiweemererya mameediku omuhelela ephome.
Vano Namathanu 30 a Dezembro, ekiipa ele ya mameediku yaahimuhelela ephome murokora Denise. Awo yaahipaka eyo, nnaamwi iyawe ni amusi awe murokora ole yahaaphavela wira oheleliwe ephome. Ohiyu ole, amusi awe anceene murokora Denise ni axitokweene anli yaahitthukweliwa mukhatteya. Awo yootheriwa wira yaahirukurerya ekhaama ya murokora Denise wira akhoottihe oheleliwa ephome. Vano Esaabadu voosiisu, 31 a Dezembro, otthukweliwa wa anna ale waahilaleiwa muxornaalini, TV, araadiyu a oNova York ni oLong Island.
Kiri ene ni Philip Brumley nri ene amiravo
Segunda-Feira voosiisu, kaahilavula ni mphuki a etribunaali yuulupale iihaniwa Milton Mollen. Kaahimuleela itthu sotheene siiraneyale sa mwaha ole ni kaahittittimiherya wira mphuki eemerenrye wira murokora ole oheleliwe ephome khaamukonhe mutthu. Nto mphuki ole Mollen aahikivekela wira kitthikele oskritoorio wawe okathi mukina wira nithokorerye malamulo yaavarihana ni mwaha ole. Vano ohiyu, miyo ni muhooleli aka a edepartamento Philip Brumley, naahirowa eskritoorio ya mphuki Mollen. Nave mphuki ole aahimulattula advogado a exiripitali ele wira okhale okathi naarowa ahu ovaanela. Ovaanela iwe waahiviha vanceene. Okathi mukina nivaanelaka, munna Philip aahilepa enoota yaamukhaani okileelaka wira “nvole murima vakhaani”. Iye saari miruku sooloka, mwaha woowi kaahipacerya onyoonyiheya kinaphavela omooniherya advogado ole a oxiripitali wira aahivonya.
Okhuma moono woothiyana orowa woolopwana: Richard Moake, Gregory Olds, Paul Polidoro, Philip Brumley, miyo, ni Mario Moreno—naari ekrupu ya madvogado yaaronwe Etribunaali Supremo EUA wira naaphuke mwaha wa Watchtower/Muttetthe wa oStratton.—Nwehe erevista Despertai! 8 de Janeiro, 2003, myaha sini: O início da controvérsia, A Suprema Corte aceita o caso, Primeira etapa: sustentação oral perante a Suprema Corte, A Suprema Corte decide a favor da liberdade de expressão
Nuuvira ewoora ntero nivaanelaka, mphuki Mollen aahihimya wira ole waarowa okhala mwaha awe woopacerya aarowa awe othokorerya nihiku naattharelana voosiisu. Okathi naakhuma ahu oskritoorio wawe, mphuki Mollen aahimmye so: “Advogado a oxiripitali ookhalana muritti muulupale meelo”. Eyo yooniherya wira advogado ole a oxiripitali aahaana otthokiherya nthowa naya murokora ole aakhanyereriwe awe oheleliwa ephome. Okathi ole kaahoona wira Yehova aanileela wira vanweryaneya okanyari mwaha ole. Yaari etthu yoohakalaliha woona moota Yehova aanirumeela awe wira opake yootthuna awe.
Kaahiimananiha vanceene ohiyu ole olokiherya moota naarowa ahu wiixaakiha nihiku naattharelana. Okhala wira etribunaali yaahikhuveela oBetheli ya oBrooklyn, anna anceene a edepartamento ahu yaaheetta mpakha ophiya otribunaali. Aphuki axexe yaahiwa mwaha ole, ni yaahinvaha erasau murokora Denise. Awo yaahimmye wira mphuki ole oopacerya khaareerela weemererya okhanyereriwa murokora ole oheleliwa ephome ohinatthi waawiriyana atthu akina. Nave mphuki ole aahivonyola malamulo a ekostituisau ya elapo ele.
Nuuvira okathi vakhaani, Etribunali Supremo ya oNova York, yaahihimya wira murokora Denise aahikhalana ehakhi ya olooliwa ohiheleliwe ephome. Nuumala mwaha wa murokora ole, kaahikhalana eparakha ya wiirela mpantta myaha miraru naakanyanri ahu sinivarihana ni ehakhi ahu ya okhootta oheleliwa ephome, seiyo saaphukiwe ni itribunaali suulupale. (Nwehe ekaaxa eni: “ Okanyari Myaha Itribunaale Suulupale”.) Miyo kihiirela mpantta ni madvogado makina a oBetheli myaha sikina sinivarihana ni waahuwa anamwane, omwalana ni sinivarihana ni malamulo a orumeela etthaya ni oteka ipa.
OTHELA NI OKHAPELELA ETTHOKO AKA
Kiri ene ni mwaaraka, Dawn
Okathi kaamusuwenle aka mwaaraka oniihaniwa Dawn, owo aahimwalaniwa. Nave aahuwa mekhawe anamwane araru ni aari pioneera. Dawn aahikhalana mixankiho sinceene mookumini mwawe, nto waanikisivela vanceene woona wiimananiha wawe ohihiya omurumeela Yehova. Mwaakha wa 1992, naahimurowela Konkresu aarina muru oni: “Portadores de Luz” oNova York, nto kaahinvekela wira ninamorariki. Dawn yoovaha enikhuma wa Yehova. Owo aari oolipa momunepani ni muthiyana oophenta ni khonaakuva oviruwa. Ohimya ekeekhai, Dawn aari mareeliho maalupale okathi wotheene naakhala ahu vamosa.—Mir. 31:12.
Okathi kaamuthenle aka, anaawe Dawn yaarina iyaakha 11, 13 ni 16. Nto miyo kaaphavela okhala tiithi aya ooloka, nto kaahisoma oratteene itthu iliivuru sahu sinihimya aya voohimya sa anamwane oowaaphwanya. Yoolakela ya emusi ahu waari waahiya anna ni aniihu okhala ootaphuwa vatthokoni vahu. Vaari voohakalaliha waaweha amiravo anceene ahakalalaka.
Mwaakha wa 2013, miyo ni Dawn naahithaamela oWisconsin wira naakhapeleleke anamuyari ahu maana yaahuuluvala. Kaahihakalala osuwela wira muteko aka oBetheli khiwaarowa omala. Kaahilattuliwa wira kikhaliheryeke mutthenkeso myaha sinivarihana ni malamulo.
MARUKUNUXO NAHAALIPELELA AHU
Mweeri wa Setembro 2018, kaahoona wira kaanikothomola ikwaha sinceene kihinatthi opacerya olavula. Meediku ahu aahikivarerya, masi khoonale etthu yaakiiriha okothomola. Muhoolo mwaya, meediku mukina aahikileela wira kaahaana omwaavya meediku oniloola makhalelo a muru (neurologista). Nto Janero a 2019, neurologista ole aahikileela wira kaahikhalana oretta wooxankiha, oniihaniwa paralisia supranuclear progressiva (PSP).
Nuuvira mahiku mararu, kaahirowa othweela vageeluni ni kaahihorokonya ntata noolopwana. Kaamakela otthweela vageeluni okumi aka wotheene ni kaahilimalela. Nto kaahoona wira nkaawerya okasoopa oratteene mitika saka. Okhuma nihiku nne, oretta aka waanitepa wunnuwa moowaakuveya. Kaahipacerya ohilavula oratteene, oheetta oratteene ni nkaawerya omirya etthu oratteene.
Kinnoona okhala eparakha yuulupale, orumeela makhalelo aka ntoko advogado wira kikhaliherye Omwene. Nave kaahikhalana eparakha ya olepa irevista sinilavula myaha sa atthu a vameekhaaya ntoko matotoro, madvogado, aphuki, ni opaka iseminaario sinceene olumwenku wotheene ni atthu ntoko awo. Okathi owo, kaahaakiherya ehakhi ya atthu a Yehova ya othanla enamuna ya olooliwa ni wooperariwa ehirumeeliwaka ephome. Hata vari siiso, kinnikupali ele Luka 17:10 onihimya awe oriki: ‘Miyo ki murumeyi pahi: kivanré miteko karina aka ovara’.
