Etthu yuulupale yoonihenrye wira Yesu oothanliwa okhala Mukhulupale Aanamukuttho, yiiraneyale okathi aapatisiwe awe mwaakha 29. Ninsuwela sai? Okathi Yesu aapatisiwe awe, owo aahooniherya wira aaniphavela ovaha okumi awe yoowo onithoonyerya altari wira opake ‘yotthuna’ ya Muluku. (aGal. 1:4; aHéb. 10:5-10) Altari oomunepani opacenrye okathi Yesu aapatisiwe awe, nave vanikhala ntoko wira etemplo yuulupale ya omunepani epacenrye okathi ene yoowo. Etemplo eyo yuulupale ya omunepani, enithoonyerya mareheryo Yehova opanke awe wira nimukokhoreleke mwa enamuna yooloka moovarihana ni mukuttho wa Yesu. Tthiri altaari tori mpantta muulupale wa etemplo.—Math. 3:16, 17; aHéb. 5:4-6.

Nuumala opacerya etemplo yuulupale ya omunepani, aahaana okhala mukhulupale a anamukuttho. Nto Yehova aahimuthanla Yesu “n’ikuru s’eroho yowarya” wira okhale mukhulupale aanamukuttho. (Mit. 10:37, 38; Mar. 1:9-11) Nto ninsuwela sai wira Yesu aahithanliwa wira okhale Mukhulupale Aanamukuttho ohinatthi wiiviwa ni ohihimuxiwa? Ntakiheryo na Aroni ni makhulupale aanamukuttho yaathanliwe nuumala Aroni, nnoonikhaliherya waakhula nikoho nno.

Nlamulo Yehova anvanhe awe Moise naahimya wira mukhulupale aanamukuttho paahi taakela Nipuro Nowaaryexa na etabernaakulu, nuumala-vo aanikela Mpantta Wowaaryexa wa etemplo. Ekortiina ti yaavalaanyiha Nipuro Nowaaryexa ni Noowaarya. Nto mukhulupale aanamukuttho aanivira ekortiina eyo Nihiku na Oleveleliwa Itampi paahi. (aHéb. 9:1-3, 6, 7) Aroni ni anamukuttho yaamuranttenle yaanithanliwa wira akhale mukhulupale aanamukuttho ahinatthi ovira ekortiina wira akele Nipuro Nowaaryexa. Mwa enamuna emosaru, Yesu aahithanliwa wira okhale Mukhulupale Aanamukuttho ohinatthi wiiviwa, nuumala-vo ‘ahivira mukuwoni, eyo p’iyo, mwerutthuni mwawe’ wira okele wiirimu. (aHéb. 10:20) Tivonto murummwa Paulo aahimmye awe wira Yesu aahirwa ntoko “namukuttho mulupale” ni aahivira “Nipuro Nowaryexa [nihipakiwe] n’atthu”, ni ‘okele wirimu’.—aHéb. 9:11, 24.

Khokhanle ovirikana eriyari ya okathi nilipihiwa aya nivarihano na naanaano ni okathi nipacenrye aya ovara muteko. Mwaha wa xeeni? Okathi Yesu aronwe awe wiirimu ovahererya erutthu awe yoomalela wira apinaatamu yoopoliwe, owo aahipaka nivalo noopacerya wira olipihe nivarihano na niinaano. Nave aahipaka mavalo makina wira nivarihano na niinaano nipacerye ovara muteko. Mavalo xeeni aapanke awe?

Noopacerya, Yesu aahirowa wa Yehova. Na nenli, owo aahinvahererya Yehova esisapo ya mukuttho awe ni nookiserya, Yehova aaheemererya esisapo ya ephome wala mukuttho wa Yesu. Ohinatthi Yesu opaka mavalo awo, nivarihano na niinaano khinaavara muteko.

Biibiliya khonihimya oratteene okathi ene Yehova eemerenrye awe mukuttho wowoopola wa Yesu. Nto khanikhanle oohimya mooluluwanya okathi nivarihano na naanaano naalipihiwe aya. Masi, ninnisuwela wira Yesu aawenle wiirimu ahalaka mahiku 10 wira niphiye nihiku na Pentekoositi. (Mit. 1:3) Vanikhala ntoko wira okathi owo vakhaani, Yesu aahinvahererya Yehova esisapo ya ephome awe ni Yehova aaheemererya. (aHéb. 9:12) Ninnisuwela eyo, mwaha wa etthu yaakhumelenle nihiku na Pentekoositi. (Mit. 2:1-4, 32, 33) Nave nivarihano na naanaano naahilipihiwa ni opacerya ovara muteko.

Olavula mookwasa, nivarihano na naanaano naahilipihiwa ni naahipacerya ovara muteko nuumala Yehova weemererya esisapo ya mukuttho wowoopola wa Yesu. Nuumala-vo, nivarihano naahipacerya ovara muteko ni Namukuttho Muulupale Yesu Kristu, yoowo Onnivekelela wa Muluku.—aHéb. 7:25; 8:1-3, 6; 9:13-15.