1. Moovarihana ni aFilipi 2:3, exeeni enrowa onikhaliherya okhalana waataana wooloka ni atthu akina?

WIIYEVIHA onninikhaliherya weemererya malamulo a Yehova. Nave onninikhaliherya woona wira okathi wotheene Muluku oniphavela mureerelo ahu. (aÉf. 4:22-24) Wiiyeviha onninikhaliherya ohela nipuro noopacerya yootthuna ya Yehova ohiya yawihu ni waathokorerya atthu akina okhala aalupale onivikana hiyo. Niira siiso, nnookhalana waataana wooloka ni Yehova vamosa ni anna ni arokora.—Mmusome aFilipi 2:3.

2. Etthu xeeni murummwa Paulo aasuwela awe? Mwaha ola, ninrowa woona exeeni?

² Akhala wira khanniivaha ephoole, nnoohapuxiwa ni atthu oowiixinnuwiha ni oowiitthuna * a olumwenku ola wa Satana. Vanikhala ntoko wira eyo yahiwiiraneela maKristau makina a eseekulu yoopacerya, maana murummwa Paulo aahaalepela aRoma wira: “Kinohimeryani nyuwo othene, mutthu ti mutthu wira: ahikhalé onìsona ovikana simphwanelawe, nto mwisupuwele muttharihaka miruku”. (aRom. 12:3) Paulo aanisuwela wira ti vooloka wiivaha efaita. Masi nihaana okhalana moonelo wooloka. Nto wiiyeviha tonrowa onikhaliherya okhalana moonelo owo wooloka. Mwaha ola, ninrowa woona wira wiiyeviha onoonikhaliherya ohiixinnuwiha mipantta miraru: (1) mukasamentoni, (2) iparakha ninvahiwa ahu mmutthenkesoni mwa Yehova ni (3) okathi nnaarumeela ahu redes sociais.

3. Xeeni sinikhumelela aya mixankiho mukasamentoni, atthu akina aneererya sai ophuka mixankiho iyo?

³ Yehova oopaka ekasamento wira mulopwana ni muthiyana ahakalaleke. Musuweleke wira khuuvo mutthu ori oomalela, nto okathi mukina anamathelana pooti ohiiwanana. Eyo ti etthu yaamwiirinhe murummwa Paulo ohimya wira ale anithelana anoophwanya mixankiho. (1 aKor. 7:28) Anamathelana akina animakela onyakulihana ni ole athelanne aya. Nto eyo enniwiiriha wuupuwelaka wira ekasamento khelonke. Akhala wira anamathelana awo anootthara muupuwelo wa molumwenkuni, pooti woonaka wira mixankiho saya sinoomala akhala wira anoomwalana. Nave anrowa wuupuwelaka wira etthu yootepa otthuneya ohakalala, hata arowaka omwalana ehikhanle etthu eneemereriwa ni Biibiliya.

4. Nihaana osyaka exeeni?

⁴ Nihaana osyaka wuupuwela wira ekasamento ahu khelonke. Hiyo noosuwela wira etthu emosa Biibiliya onimweemererya awe mutthu omwalana ti orupihana woohiloka paahi. (Math. 5:32) Nto okathi sinikhumelela aya mixankiho seiyo murummwa Paulo olavunle awe, nihaana osyaka wiixinnuwiha oniiriha wuupuwela wira: ‘Kinoona wira ekasamento ela khenikiphwanyiha mireerelo ni khenikihakalaliha. Kinoona wira nkimphentiwa. Kinoona wira kinoohakalalaka akhala wira kinoomuthela wala otheliwa ni mutthu mukina’. Niireke muhoona etthu yoohiloka sirina aya miyuupuwelo iya? Okathi wotheene mutthu oniira: Kinoona wira. Ankhili a mulaponi anihimya wira muhaana opaka ele eniphavela murima anyu ni ophavelasa ohakalala, hata murowaka omwalana nihikhanle nthowa nneemereriwa ni Biibiliya. Masi ankhili a Muluku anihimya wira “khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”. (aFil. 2:4) Yehova oniphavela wira mukhaleke ni ole muthelanne anyu ni muhimwalane. (Math. 19:6) Nto okathi wotheene mpaceryeke omuupuwela Yehova ohiya wiisuupuwela mmensinyu.

5. Moovarihana ni aÉfeso 5:33, mulopwana ni muthiyana athelanne athokoreryaneke sai?

 ⁵ Mulopwana ni muthiyana athelanne ahaana ophentana ni ottittimihana vanceene. (Mmusome aÉfeso 5:33.) Biibiliya onniniixuttiha wira ti vooloka ovaha ohiya ovahiwa paahi. (Mit. 20:35) Mukhalelo xeeni onrowa waakhaliherya anamathelana ophentana ni ottittimihana vanceene? Wiiyeviha. Mulopwana ni muthiyana oowiiyeviha khoniphavela itthu sinimphwanyiha mureerelo mekhawe paahi, masi onniphavela “sinaphwanyiha oreriwa akhw’awe”.—1 aKor. 10:24.

6. Etthu ohimmye awe Steven ni Stephanie, ewiixuttinheni exeeni?

⁶ Wiiyeviha onnaakhaliherya alopwana ni athiyana maKristau athelanne ohakalala vanceene mukasamentoni mwaya. Mwa ntakiheryo, mulopwana oothela oniihaniwa Steven ohimmye so: “Muhaana okhala ntoko ekiipa, nvaraka vamosa, otepexa wene okathi wa mixankiho. Muhaana osyaka wuupuwela so: ‘Exeeni enrowa okiphwanyiha mureerelo?’, ohiya-vo muupuweleke so: ‘Exeeni enrowa oniphwanyiha mireerelo?’” Mwaarawe Steven oniihaniwa Stephanie orina muupuwelo mmosaru orina awe iyawe. Owo onihimya so: “Khuuvo oniphavela okhala ntoko nwanani a mukhwaawe. Nto okathi sinikhumelela aya mixankiho, hiyo ninniimananiha ophavela osuwela etthu enikumiherya mixankiho iyo. Nuumala-vo, hiyo ninnivekela, otokosa, ni ovaanela voohimya sa mwaha owo. Hiyo nimmananiha owanana muxankiho, ohiya owana mukina ni mukhwaawe”. Moohaanyiherya, mulopwana ni muthiyana ohintepa wiisuupuwela onnihakalala vanceene.

7. Munna onivahiwa iparakha ohaana okhalana moonelo xeeni?

⁷ Hiyo ninnoona okhala eparakha yuulupale omurumeela Yehova. (Esal. 27:4; 84:11) Akhala wira munna onniphavela eparakha ya vameekhaaya, etthu yooloka oniphavela awe. Biibiliya onihimya so: “Molumo ala t’èkekhai: akhalá omphavela muteko wo wettiha muthukumano, muteko worera t’umphavelawe”. (1 Tim. 3:1) Masi munna onivahiwa iparakha ohaana osyaka otepa wiisuupuwela ovikana vanreerela aya. (Luka 17:7-10) Yoolakela ya munna owo ehaana okhala waarumeela atthu akina moowiiyeviha.—2 aKor. 12:15.

8. Yowiiraneya ya Diotrefe, Oziya ni Absalomi, enniixuttiha exeeni?

⁸ Biibiliya onninivaha matakiheryo oohiloka a atthu yiisuupuwela vanceene ovikana vanireerela aya. Mwa ntakiheryo, Diotrefe khahiyo aari mutthu oowiiyeviha, maana ‘aphavela okhala nipuro nopajerya’ mmulokoni. (3 Yoh. 9) Wiixinnuwiha waahimwiiriha Oziya ovara muteko Yehova aavanhe awe anamukuttho paahi. (2 Wah. 26:16-21) Moolavilavi Absalomi aaniphavela wooniwa saana ni atthu akina ni aaphavela wiikhaliha mwene. (2 Sam. 15:2-6) Matakiheryo ala a mBiibiliyani annooniherya wira Yehova khonaaphavela atthu antthuna wiivuwiha. (Mir. 25:27) Muhiliyale wira wiixinnuwiha ni nrima ninnikumiherya maxakha.—Mir. 16:18.

9. Ntakiheryo xeeni Yesu onivanhe awe?

⁹ Moovirikana ni matakiheryo awo oohiloka, nwehe ntakiheryo nooloka Yesu onivanhe awe wira nitthareke. Biibiliya onihimya wira “Yesu uwo, okhanle Muluku khuluwi, khakhanyerenrye ottittimihiwa ntoko Muluku”. (aFil. 2:6, Biblia Solempwa sa Muluku) Nuumala okhulupale wa Yehova, mutthu ori nipuro na nenli ti Yesu. Hata vari siiso, owo khonitepa wiisuupuwela ovikana vanireerela aya. Yesu aahaaleela awiixutti awe wira: “Tthiri ule ori mwamukhanixa mwa nyuwo othene, yowo t’uri mulupale”. (Luka 9:48) Ti vooloka osuwela wira ninvara vamosa muteko wa Muluku ni mapioneero, arumeyi oorumeela, axitokweene ni axitokweene a esirkwiitu oowiiyeviha ntoko Yesu! Wiiyeviha wa arumeyi a Yehova onnikhaliherya muloko ophentana ni ophenta iwo onnisuwanyeiha  wira mutthenkeso wa Muluku.—Yoh. 13:35.

10. Muhaana opaka exeeni moonaka wira mixankiho mmulokoni mwanyu khasiniphukiwa?

¹⁰ Pooti wira muloko anyu sookhala mixankiho munoona anyu wira axitokweene khaniphuka saana. Nto muhaana opaka exeeni? Ohiya wiixinliha, mwiiyeviheke ni mwaakhaliheryeke ale annihoolela. (aHéb. 13:17) Ti vooloka wuupuwelela saana makoho ala: ‘Kiireke mixankiho kinoona aka ti suulupale sinreerela aya ophukiwa mowaakuveya? Niireke ola okathi wooreerela ophuka mixankiho iyo? Kiireke kivahiwe muritti woophuka mixankiho iyo? Kiireke kinnikumiherya murettele mmulokoni wala kiniphavela wiivuwiha?’

11. Moovarihana ni aÉfeso 4:2, 3, exeeni enikhumelela vaavo nimmurumeela ahu Yehova moowiiyeviha?

¹¹ Yehova onnivaha efaita yinceene wiiyeviha ovikana itthu ninsuwela ahu, nave wiiraana wookhalana efaita yinceene ovikana ovara saana miteko. Tivonto, nihaana wiimananiha omurumeela Yehova moowiiyeviha. Niira siiso, nnookumiherya wiiraana mmulokoni. (Mmusome aÉfeso 4:2, 3.) Muluttuweliweke olaleerya. Mphavelaseke inamuna mukhanle anyu oowaarumeela atthu akina ni waareerela murima. Nave nwaakheleke atthu otheene, waahela muhina ale ahirina miritti sa vameekhaaya mmulokoni. (Math. 6:1-4; Luka 14:12-14) Vaavo munivara anyu muteko moowiiyeviha mmulokoni, atthu akina anrowa woonaka ohiya paahi wira munnisuwela ovara muteko, masi wira mwa mutthu oowiiyeviha.

12. Biibiliya onihimya exeeni sa okhalana apatthani? Mutthokiherye.

¹² Yehova oniphavela wira nikhalaneke okathi woohakalaliha ni apatthani ahu ni amusi ahu. (Esal. 133:1) Yesu aahikhalana apatthani ooloka.  (Yoh. 15:15) Biibiliya onnihimya mareeliho anikhumelela mwaha wookhalana apatthani ooloka. (Mir. 17:17; 18:24) Nave onnihimya wira khahiyo etthu yooloka wiivalaanya ni atthu akina. (Mir. 18:1) Atthu akina anuupuwela wira waarumeela redes sociais enamuna emosa yoowaaphwanya apatthani anceene ni ohiivalaanya. Masi nihaana okhalana ephoole vaavo nnaarumeela ahu redes sociais.

13. Xeeni atthu akina anaarumeela redes sociais akhanle aya oowaaphwanya omeekha wala oriipiwa murima?

¹³ Asomi akina anihimya wira atthu yaale aniviriha okathi munceene awehaka ifootu wala ikomentaario siheliwe redes sociais pooti waaphwanya omeekha wala oriipiwa murima. Mwaha wa xeeni? Vanikhala ntoko wira atthu anihela ifootu saya munternetini anihela okathi woohakalaliha wa okumi aya. Nave anithanla ifootu saya sooreerexa, sa apatthani aya ni mapuro oohakalaliha yaari aya. Nto atthu akina aniweha ifootu iyo, anniilikanyiha ni atthu awo, nto anoona wira makhalelo aya khalonke wala kharina efaita. Murokora orina iyaakha 19 onihimya so: “Kaahipacerya waakhalela nrima atthu otheene yaakhala wira yaanitthekula saana wanikisa wa esumana, miyo kiri ene owaani kihivaraka etthu”.

14. Miruku siri 1 Pedru 3:8, sinnikhaliherya sai waarumeela redes sociais ni ankhili?

¹⁴ Ekeekhai wira redes sociais pooti orumeeliwa wira mutthu opake itthu sooloka. Mwa ntakiheryo, pooti waarumeela wira mutthu ovaanele ni amusi wala apatthani. Niireke muhoona wira mpantta muulupale wa itthu atthu anihela aya munternetini aniphavela wiivuwiha? Vanikhala ntoko wira aniphavela ohimya wira: “Mukiweheke miyo”. Nave atthu akina annihela ikomentaario wala itthu sowuuliha muru aphavelaka okomentari ifootu saya wala sa atthu akina. Eyo yoovirikana ni ele Biibiliya onaatumererya awe maKristau wira ahaana okhala oowiiyeviha ni oothunku.—Mmusome 1 Pedru 3:8.

15. Miruku xeeni sa mBiibiliyani sinnikhaliherya osyaka wiixoona okhalana efaita waavikana akina?

¹⁵ Akhala wira munnaarumeela redes sociais mwiikoheke so: ‘Kiireke ifootu, iviidiyu ni ikomentaario kinhela aka munternetini sinooniherya wira kinimwiivuwiha? Kiireke sinoowiiriha atthu akina okhalela nrima?’ Biibiliya onihimya so: “Vekekhai,  itthu iye sothene sotakhala khasinkhuma w’Atithi: ntoko ophavela itthu sonanara, ophavela okhalana sothene sinònahu, ororomela ni wisona mwaha wa mihakhu sirinahu. Sothene iya sinkhuma mwa makhalelo òtakhala”. (1 Yoh. 2:16) Moolumo oowi “wisona mwaha wa mihakhu sirinahu”, aBiibiliya akina ataphuleliwe so: “Wiixoona okhala a faita waavikana akina”. MaKristau ahaana osyaka wiixoona okhalana efaita waavikana akina wala okhala ntoko oottittimiheya waavikana akina. Awo ahaana otthara miruku sa mBiibiliyani sinihimya wira: “Nihikhalé atthu òwisona: nihiroxané, nnákhala nihikhalelaneké nrima”. (aGal. 5:26) Wiiyeviha onoonikhaliherya ohihapuxiwa ni wiixinnuwiha wa atthu a mulaponi.

16. Xeeni vari aya voohiloka wiixinnuwiha?

¹⁶ Nihaana okhala atthu oowiiyeviha mwaha woowi mutthu oowiixinnuwiha khorina “miruku”. (aRom. 12:3) Mutthu oowiixinnuwiha omusivela onyakulihana ni onoona wira ookhalana efaita vanceene. Okhala wene, muupuwelo ni enamuna onipaka awe itthu ennimunyoonyiha ni onnaanyoonyiha atthu akina. Akhala wira mutthu owo khonituruka moonelo awe, Satana onoottiyela muupuwelo wa mutthu owo. (2 aKor. 4:4; 11:3) Masi, mutthu oowiiyeviha ookhalana miruku. Owo onniithokorerya mwa enamuna yooloka ni onnisuwela wira atthu akina taalupale mwa inamuna soovirikana. (aFil. 2:3) Nave onnisuwela wira “Muluku onnakhotta atthu òwisona, masi onnavaha eparakha atthu òwiyeviha”. (1 Ped. 5:5) Mutthu oowiiyeviha, khoniphavela okhala nwanani a Yehova.

17. Nihaana opaka exeeni wira nihihiye okhala atthu oowiiyeviha?

¹⁷ Wira nihihiye okhala atthu oowiiyeviha, nihaana ovarihela muteko miruku sa mBiibiliyani sinihimya wira ‘murule omutthu wa khalai ni miteko saya, nware omutthu wa nanano’. Wira nipake eyo nihaana wiimananiha vanceene. Nave nihaana osoma ntakiheryo Yesu onivanhe awe ni wiimananiha otthara oratteene. (aKol. 3:9, 10; 1 Ped. 2:21) Musuweleke wira opaka eyo etthu yooloka. Vaavo nniixutta ahu wiiyeviha, makhalelo ahu a vatthokoni anniloka, ninnikhaliherya muloko okhala wowiiraana ni ninnaarumeela redes sociais mwa enamuna yooloka. Ni etthu yootepa otthuneya, Yehova onninreeliha.