1. Vaavo nniira ahu “ekeekhai”, nimphavela ohimya exeeni?

WOONASA WENE, mootoko okohiwa makoho ntoko ala: “Mwiixuntte sai ekeekhai? Niireke muyariwe etthoko ya Anamoona? Sivinre iyaakha kavi okhuma vaavale mwiixuntte anyu ekeekhai?” Wala mootoko omukoha mutthu mukina makoho ntoko awo. Nimphavela ohimya exeeni ni nuulumo noowi “ekeekhai”? Okhala wene vaavo ninlavula ahu wira “ekeekhai”, nimphavela ohimya itthu ninkupali ahu, ele nimpaka ahu wira nimukokhorele Muluku ni mweettelo wa mookumini mwahu. Atthu ale ari “mwekeekhayini” annisuwela sowiixuttiha sa Biibiliya ni anikhala moovarihana ni malakiheryo a mBiibiliyani. Nto awo khanikupali-tho itthu siniixuttihiwa ni itiini sowootha ni annihakalala hata akhalaka olumwenku ola wa Satana.—Yoh. 8:32.

2. Moovarihana ni Yohani 13:34, 35, etthu xeeni woonasa wene yaawiirinheni osuwela ekeekhai?

² Exeeni yaawiirinheni weemererya ekeekhai? Woonasa wene, mwaawenhe mweettelo wooloka wa Anamoona a Yehova. (1 Ped. 2:12) Aahiiso waari mwaha wa ophenta waya. Atthu anceene anirweela mithukumano ekwaha yoopacerya, annoona wira ninniphentana. Nto annitepa wuupuwela ophentana iwo ovikana itthu aniwiriyana aya. Eyo khennitikiniha mwaha woowi, Yesu aahimmye wira atthareli awe yaamusuweliwa mwaha wa ophentana waya. (Mmusome Yohani 13:34, 35.) Tthiri ophentana onninikhaliherya waasuwela arumeyi a Muluku. Masi wira nikhalane waamini woolipa, yookhala etthu ekina nikhanle ahu oopaka.

3. Exeeni enrowa okhumelela akhala wira waamini wahu onlipa paahi ni ophenta wa atthu a Muluku?

³ Waamini wahu khonlipa paahi ni ophenta wa atthu a Muluku. Mwaha wa xeeni? Akhala wira waamini wahu onlipa ni ophenta wa  atthu a Muluku, hiyo pooti ohiya waamini wahu. Mwa ntakiheryo, niireke munoohiya omurumeela Yehova akhala wira mutokweene wala pioneero onnipaka etampi yuulupale, mpakha okumihiwa mmulokoni? Ankhi akhala wira munna wala murokora onnipaka etthu enoowereyani? Aahiiso mutthu mukina onnipakeya nammwareya, onapacerya ohimya wira itthu ninkupali ahu khahiyo ekeekhai? Etthu xeeni nniixutta ahu? Akhala wira nimphavela okhalana waamini woolipa nihaana olipiha waataana wahu ni Yehova. Nave akhala wira nimmwaamini Muluku mwaha wa itthu atthu akina anipaka aya, ohiya mwaha wa waataana wahu ni Muluku, eyo yaarowa olikanaka ni oteka empa etereno ya mutthu mukina. Ekeekhai wira moota muniwoonela anyu atthu a Yehova onimookhaliheryani wuncererya waamini wanyu. Masi ti vooloka omusoma Biibiliya oratteene, wiiwexexa ele munisoma anyu ni otokosa myaha sa mBiibiliyani wira musuweleke akhala wira ele munikupali anyu voohimya sa Yehova ekeekhai. Muhaana okupali wira ele munisoma anyu mBiibiliyani ekeekhai.—aRom. 12:2.

4. Moovarihana ni Matheyo 13:3-6, 20, 21, atthu akina anipaka exeeni okathi waamini waya oneehereriwa aya?

⁴ Yesu aahimmye wira atthu akina yamweemererya ekeekhai “etteliwaka murima”. Masi waamini waya onnivukuwa okathi aneehereriwa aya. (Mmusome Matheyo 13:3-6, 20, 21.) Woonasa wene, awo khiyaasuwela wira ale animutthara Yesu anniphwanya mixankiho ni weehereriwa. (Math. 16:24) Nave yuupuwela wira yakhala muKristau khiyaarowa ophwanya mixankiho wala yuupuwela wira Muluku aarowa okumihaka mixankiho saya. Masi musuweleke wira olumwenku ola wootakhala ninkhala ahu, nnokumanaka mixankiho. Nave makhalelo ahu pooti oturukeya, nto eyo pooti ovukula ohakalala wahu.—Esal. 6:7; Mus. 9:11.

5. Anna ni arokora anceene anooniherya sai wira aaphwanya ekeekhai?

⁵ Anna ni arokora anceene annikupali wira aaphwanya ekeekhai. Moota xeeni? Awo khanihiya ekeekhai hata maKristau makina apakaka itthu soohiloka. (Esal. 119:165) Hata okathi anikhalana aya mixankiho, waamini waya onnilipa ohiya ovukuwa. (Yak. 1:2-4) Munrowa okhalana sai waamini woolipa?

6. MaKristau a eseekulu yoopacerya yaalipiha sai waamini waya?

⁶ MaKristau a eseekulu yoopacerya yaanilipiha waamini waya asuwelaka oratteene Soolempwa ni sowiixuttiha sa Yesu Kristu, eyo piiyo, “ekhweli y’ehapari yorera”. (aGal. 2:5) Ela ekeekhai ya itthu sotheene ninkupali ahu ntoko maKristau, ohela muhina mukuttho wowoopola wa Yesu ni ohihimuxiwa wawe. Murummwa Paulo aanikupali wira sowiixuttiha iyo ti sekeekhai. Mwaha wa xeeni? Mwaha woowi owo aahirumeela Soolempwa “àthonyeryaka wira Mòpoli ahana ohawa n’ukhwa, numalá ahihimuwe mokhwani”. (Mit. 17:2,3) Nave awiixutti a eseekulu yoopacerya yaaneemererya sowiixuttiha iyo. Maana yaaroromela ikuru sowaarya sa Muluku wira yiiwexexe Nuulumo na Muluku. Nto yaanitokosa wira yoone aakhala wira sowiixuttiha iye saakhuma Nuulumo na Muluku. (Mit. 17:11, 12; aHéb. 5:14) Awo khiyaalipiha waamini waya attharaka moonelo ni muupuwelo aya ni khiyaamurumeela Yehova mwaha woowaasivela okhala vamosa ni maKristau akhwaaya. Ohiya-vo, waamini waya waalipa ni ‘omusuwela waya Muluku’.—aKol. 1:9, 10.

7. Waamini wahu sowiixuttiha sa mBiibiliyani onnikhaliherya sai?

⁷ Nlelo ekeekhai ya mBiibiliyani kheturukeyale. (Esal. 119:160) Mwa ntakiheryo, eyo kheniturukeya hata maKristau makina aniveehaka wala apakaka etampi yuulupale. Nave ikeekhai  iyo khasiniturukeya hata nrina ene mixankiho. Nto nihaana osuwela oratteene sowiixuttiha sa Biibiliya ni okupali wira ele oniixuttiha awe ekeekhai. Tthiri akhala wira nnimwaamini sowiixuttiha sa mBiibiliyani, khaninrowa ohiya ororomeleya okathi wa mixankiho. Munrowa olipiha sai waamini wanyu wira moophwanya ekeekhai?

8. Ntoko onooniherya awe 2 Timótheyo 3:14, 15, exeeni yaamukupaliha Timootheyo wira aahiphwanya ekeekhai?

⁸ Timootheyo aanikupali wira aahiphwanya ekeekhai. Exeeni yaamukupaliha? (Mmusome 2 Timótheyo 3:14, 15.) Maama awe ni piipi awe ti yaapacenrye omwiixuttiha “solempwa sowarya”. Moohaanyiherya yena aaniviriha okathi munceene osomaka soolempwa iyo. Mwaha woopaka eyo, Timootheyo aanikupali ni murima wotheene wira aahisuwela ekeekhai. Muhoolo mwaya, Timootheyo, maama awe ni piipi awe yaahisuwela ekeekhai ya eKristau. Ekeekhai wira Timootheyo aanisiveliwa ophenta wa atthareli a Kristu. Nave aanisiveliwa vanceene othukumana wira aakhaliheryeke momunepani anna ni arokora mmulokoni. (aFil. 2:19, 20) Masi, waamini wawe waahilipa, ohiya mwaha wa moonelo ni muupuwelo wa apinaatamu, masi mwaha wa itthu aasuwela awe ni ophavela wawe okhala mpatthani a Yehova. Nyuwo nave muhaana omusoma ni otokosa myaha sa mBiibiliyani wira moone akhala wira ele mwiixuntte anyu voohimya sa Yehova ekeekhai.

9. Ikeekhai xeeni tthaaru sa mBiibiliyani munireerela anyu okupali?

⁹ Wira mpacerye, nyuwo muhaana okupali mmensinyu sowiixuttiha tthaaru soopacerya sa mBiibiliyani. Yoopacerya, muhaana okupali ni murima wotheene wira Yehova Muluku topattunxe itthu sotheene. (Okhum. 3:14, 15; aHéb. 3:4; Wis. 4:11) Ya nenli, muhaana okupali ni murima wotheene wira Biibiliya uupuxeriwe ni Muluku ni muhupi onaaroihela awe apinaatamu. (2 Tim. 3:16, 17) Ya neeraru, muhaana okupali wira Yehova ookhalana ekrupu ya atthu animukokhorela ahooleliwaka ni Yesu Kristu ni wira ekrupu eyo ti Anamoona a Yehova. (Yes. 43:10-12; Yoh. 14:6; Mit. 15:14) Osuwela ni okupali sowiixuttiha iyo soopacerya sa Biibiliya khonitthuneya osuwela itthu sotheene sa mBiibiliyani. Muhaana waarumeela  ankhili anyu wira mulipihe okupali wanyu wira moophwanya ekeekhai.—aRom. 12:1.

10. Nuumala wiixutta ekeekhai, nihaana opaka exeeni?

¹⁰ Nuumala okupali, ikeekhai tthaaru soopacerya voohimya sa Muluku, Biibiliya ni atthu a Muluku, muhaana omurumeela Biibiliya wira nwooniherye atthu akina ikeekhai iyo. Mwaha wa xeeni? Mwaha woowi, na atthareli a Kristu, nookhalana muritti wowiixuttiha ikeekhai iyo atthu otheene aniphavela oniwiriyana. * (1 Tim. 4:16) Vaavo nniimananiha ahu waakhaliherya atthu akina okupali ikeekhai sa mBiibiliyani, ninnilipiha okupaliwa wahu ikeekhai iyo.

11. Ntakiheryo xeeni murummwa Paulo onivanhe awe okathi awiixuttiha awe atthu ekeekhai?

¹¹ Okathi murummwa Paulo aawiixuttiha awe atthu, owo “ahiphavela owaminiha mwaha wa Yesu, àtaphulelaka molumo a Moise ni a Maprofeta”. (Mit. 28:23) Munrowa omutakiha sai Paulo okathi muniwiixuttiha anyu ekeekhai atthu akina? Muhaana opaka itthu sikina, ohiya paahi waaleela ele Biibiliya onihimya awe. Nave nihaana waakhaliherya ale nnaasomiha ahu Biibiliya wuupuwela saana ele aniixutta aya mBiibiliyani. Nimphavela wira yeemererye ikeekhai ohiya mwaha wa onittittimiha, masi mwaha woowi ahoona itthu sinaakupaliha wira ele aniixutta aya ekeekhai ni mwaha wa omphenta Muluku.

12-13. Anamuyari anrowa waakhaliherya sai anaaya ohihiya ekeekhai?

¹² Tthiri anamuyari anniphavela waakhaliherya anaaya ohihiya ekeekhai. Woonasa wene, munuupuwela wira yakhalana apatthani ooloka mmulokoni eyo enimwaakhaliherya olipiha waamini waya. Masi, okhalana apatthani ooloka mmulokoni khoniphiyerya wira aniinyu akupali ni murima wotheene wira aakhalana ekeekhai. Awo aahaana okhalana waataana wooloka ni Muluku ni okupali sowiixuttiha sa Biibiliya wira ti sekeekhai.

¹³ Anamuyari ahaana opaka etthu ekina ohiya paahi owiixuttiha anaaya ekeekhai voohimya sa Muluku. Awo ahaana waavaha ntakiheryo nooloka, amusomaka oratteene Biibiliya. Nave anamuyari ahaana ophavelasa okathi wira yuupuwelele oratteene ele aniixutta aya mBiibiliyani. Yiira siiso, awo anoowerya owiixuttiha anaaya opaka etthu emosaru. Anamuyari aahaana owiixuttiha anaaya moota woorumeela ikaruma sinnikhaliherya omusoma Biibiliya, ntoko siisaale aniwiixuttiha aya atthu anaasomiha aya Biibiliya. Yapaka eyo, awo anoowerya waakhaliherya anaaya omphenta ni omuroromela Yehova ni ororomela enamuna onirumeela awe wira onivahe yoolya ya omunepani, eyo piiyo, “murumeyi òroromeleya ni ànkhili”. (Math. 24:45-47) Xontte anamuyari, muhihakalaleke paahi owiixuttiha aniinyu ikeekhai soopacerya sa mBiibiliyani. Nwiixuttiheke  aniinyu itthu “sotikiniha sa Muluku”, moovarihana ni iyaakha ni makhalelo a aniinyu. Mwiira siiso, munimwaakhaliherya aniinyu okhalana waamini woolipa.—1 aKor. 2:10.

14. Xeeni vari aya vooloka osoma iprofesia sa mBiibiliyani? (Nwehe ekaaxa eni: “ Niireke Munniwerya Otthokiherya Iprofesia Iya?”)

¹⁴ Iprofesia sa mBiibiliyani, mpantta muulupale wa Nuulumo na Muluku, onnikhaliherya olipiha omwaamini wahu Yehova. Iprofesia xeeni sa mBiibiliyani silipinhe waamini wanyu? Woonasa wene nyuwo pooti wuupuwelaka eprofesia enilavula sa “okathi wokiserya”. (2 Tim. 3:1-5; Math. 24:3, 7) Masi iprofesia xeeni sikina siiraneyale sikhanle oolipiha waamini wanyu? Mwa ntakiheryo, niireke munniwerya otthokiherya moota iprofesia siri Daniyeli ekapiitulu 2 ni Daniyeli ekapiitulu 11 siiraneyale aya ni siniiraneya aya? * Waamini onivarihana ni Biibiliya ti woolipa vanceene ntoko mwala. Mwa ntakiheryo, nkahaya muupuwele ntakiheryo nooloka na anna a wAlemanha anivanhe aya, yaawo yahaareere olupatthiwa okathi wa Ekhotto ya Nenli ya Olumwenku Wotheene. Awo khiyaasuwela oratteene iprofesia voohimya sa mahiku ookiserya, masi hata vaari siiso, awo yaanikupali ni murima wotheene Nuulumo na Muluku.

15-17. Ninsuwela sai wira omusoma Biibiliya waahilipiha waamini wa anna ni arokora okathi yaalupatthiwa aya ni maNazista?

¹⁵ Okathi wAlemanha waalamuleliwa aya ni maNazista, imilyau sinceene sa anna ni arokora yaahiroihiwa mapuro yaavariwa muteko mookhanyereriwa. Hitler ni mukhulupale a SS, iihaniwa Heinrich Himmler, yaanaanyokha vanceene Anamoona a Yehova. Murokora mmosa onnuupuwela etthu Himmler aahimmye awe mapuro yaavariwa muteko mookhanyereriwa. Himmler aahimmye so: “Yehova anyu onilamulela wiirimu, masi vathi-va hiyo ninlamulela! Vano nnoowooniheryani tani anrowa ovilela okathi munceene, akhala wira ti nyuwo wala hiyo!” Nto exeeni yaakhalihenrye atthu a Yehova ohihiya ororomeleya?

 ¹⁶ Anamasoma ale a Biibiliya yaanisuwela wira Omwene wa Muluku waahipacerya olamulela mwaakha wa 1914. Nto khiyaatikinihiwa vaavo yoona aya alupatthiwaka vanceene. Masi, awo yaanisuwela wira khiivo ekuvernu ya apinaatamu yaarowa omukhoottiherya Yehova opaka yootthuna awe. Hitler khaarowa omala-maliha okokhorela wekeekhai ni khaarowa opaka ekuvernu yootepexa olipa ovikana Omwene wa Muluku. Anna ni arokora ale yaanisuwela wira hata vapisaka ekuvernu ya Hitler yammala.

¹⁷ Etthu anna ni arokora ale yaakupali aya yaari ekeekhai. Ohivinre okathi munceene, olamulelo wa maNazista waahimala-mala. Vano Heinrich Himmler yoole aahimmye wira “vathi-va hiyo ninlamulela” aahitthyawa wira ohiiviwe. Okathi Himmler aatthyawa awe, owo aahimphwanya mutthu aamusuwela awe, Munna Lübke, yoowo aatthukweliwe mukhatteya. Vano oxankale ene vanceene, Himmler aahimukoha munna Lübke wira: “Namasoma a Biibiliya, vano exeeni enrowa okhumelela?” Munna Lübke aahimuleela Himmler wira Anamoona a Yehova yaanikupali wira yaamutaphuliwa ni olamulelo wa maNazista wammala. Himmler, yoowo aaramusa vanceene Anamoona a Yehova, okathi ole owanoni waahimuuma. Moohipisa nuumala ovaanela ni munna ole, Himmler aahiixiiva. Etthu xeeni nniixutta ahu? Omusoma Biibiliya, ohela muhina iprofesia onoonikhaliherya okhalana waamini woolipa ni onikhaliherya okathi wa mixankiho.—2 Ped. 1:19-21.

18. Moovarihana ni Yohani 6:67, 68, xeeni vari aya vooloka okhalana ‘osuwela n’ankhili othene’?

¹⁸ Khula mmosa a hiyo nihaana ophentana, maana ophenta ekanyeryo enooniherya wira na maKristau ekeekhai. Masi, nihaana-tho okhalana ‘osuwela n’ankhili othene’. (aFil. 1:9) Naahikhalane osuwela ni ankhili, hiyo pooti ‘oveveleya ni opuruliwa n’ipheyo ya khula mwixuttiho’ waahela muhina anammwareya. (aÉf. 4:14) Eseekulu yoopacerya, atthareli anceene a Yesu yaahihiya omutthara, masi murummwa Pedru aahimuleela Yesu ni murima wotheene wira: “Murina molumo anvaha ekumi yohimala, ti nyuwo”. (Mmusome Yohani 6:67, 68.) Hata ahaasuwela oratteene itthu sotheene Yesu aahimya awe, Pedru khaahiyale ororomeleya, maana aanisuwela ekeekhai voohimya sa Kristu. Nyuwo nave muhaana olipiha okupali wanyu itthu Biibiliya oniixuttiha awe. Akhala wira munoopaka eyo, waamini wanyu khonrowa ottikinyeya okathi muneehereriwa anyu ni munoowerya waakhaliherya atthu akina olipiha waamini waya.—2 Yoh. 1, 2.