1. (a) Itthu xeeni ninlipelela ahu Yehova onrowa awe onivaha? (b) Ontaphulela exeeni omulipelela Yehova? (Nwehe “Moolumo Ootthokiheriwa”.)

 YEHOVA ohaavaha nlipelelo noovara murima, atthu ootheene animphenta. Moohipisa, owo onoomaliha iretta, oriipiwa murima ni okhwa. (Wiis. 21:3, 4) Owo onimwaakhaliherya atthu “òmàla” wiiriha elapo ela okhala eparayiisu. (Esal. 37:9-11) Mparayiisu, hiyo nnookhalana ompatthani woolipa ni Yehova, ovikana ompatthani nrina ahu ni Yehova olelo-va. Mweekeekhai ninnilipelela itthu soovara murima ohoolo! Exeeni ennikupaliha wira Yehova onoopaka itthu iyo sootheene oleihenrye awe? Okathi wootheene Yehova onnipaka itthu sootheene onihimya awe. Nto eyo tenniiriha ‘waroromela Apwiya [Yehova]’. b (Esal. 27:14) Nto eyo ehaana oniiriha omulipelela Yehova moopixa murima ni otteeliwa murima nlipelelaka okathi onrowa awe opaka itthu sootheene oleihenrye awe. — Yes. 55:10, 11.

2. Etthu xeeni Yehova opanke awe?

² Yehova ohooniherya wira onnipaka itthu sootheene onileiherya awe. Nrowe niwehe ntakiheryo nimosa. Eliivuru ya Wiisuupulula, Yehova aahileiherya wira mahiku ahu ala, owo aamwaathukumanya atthu a maloko ootheene, mahimo ootheene ni a iraasa sootheene wira amukokhoreleke moowiirana. Nto ekrupu eyo ya atthu ennisuweliwa okhala “muttitthi muulupale”. (Wiis. 7:9, 10) Ekrupu eyo, enihela muhina alopwana, athiyana ni anamwane a iraasa, mattaava ni mahuweliwo ovirikana. Masi hata vari siiso, awo annimukokhorela Yehova moowiirana ntoko emusi emosa. (Esal. 133:1; Yoh 10:16) Atthu a muttitthi muulupale annikhalela nthiti olaleya ihapari sooreera. Okathi wootheene anniimananiha omulaleerya khula mutthu oniphavela  wiiwa ihapari sooreera sa elapo esya enirwa. (Math. 28:19, 20; Wiis. 14:6, 7; 22:17) Akhala wira muniirela mpantta muttitthi muulupale, moohaanyiherya nyuwo munniroromela wira muhoolo itthu sinooloka.

3. Etthu xeeni Satana oniphavela awe?

³ Satana khoniphavela wira nyuwo mukhalane nlipelelo na muhoolo. Nto oniphavela wookupalihani wira Yehova khonookhapelelani ni koorowa opaka itthu sootheene oleihenrye awe. Akhala wira Satana onoowerya oniiriha wuupuwela wira khanirina nlipelelo, nnookhulumuwa ni nnoohiya omurumeela Yehova. Ntoko ninrowa ahu oweha mwaha ola, Satana aaphavela omwiiriha Yobi ohikhalana nlipelelo ni omuhiiha omurumeela Yehova.

4. Mwaha ola, ninrowa othokorerya exeeni? (Yobi 1:9-12)

⁴ Mwaha ola, ninrowa oweha moota Satana aimananinhe awe omwiiriha Yobi ohiya ororomeleya. (Mmusome Yobi 1:9-12.) Nave nnooweha etthu nniixutta ahu ni ntakiheryo na Yobi ni nthowa naya vari aya vooloka wuupuwela wira Yehova onniniphenta ni onoopaka itthu oleihenrye awe.

5-6. Okathi vakhaani paahi, etthu xeeni yaamukhumelenle Yobi?

⁵ Yobi aahikhalana makhalelo ni okumi wooloka. Nave aahikhalana waataana wooloka ni Yehova, aahikhalana etthoko yuulupale ni yoowiiraana ni aahikhalana mihakhu sinceene. (Yobi 1:1-5) Masi nihiku nimosa paahi, Yobi aahipweteiwa itthu sootheene arina awe. Wanipacerya, owo aahipweteiwa mihakhu sawe. (Yobi 1:13-17) Nuumala-vo, anaawe ootheene aaphenta awe yaahikhwa. Nkahaya muupuwele moota ehasara ele yaahimuxankihale aya vanceene Yobi: Akhala wira anamuyari anniriipiwa murima ni oxanka yakhweliwa mwanaya, nkahaya muupuwele moota Yobi ni mwaarawe yaaxankale aya, oriipiwa murima ni woona othunku okathi yaiwale aya wira anaaya 10 yaahikhwa. Vano ninniwerya oweha etthu yaamwiirinhe Yobi okhera ikuwo sawe ni okilaathi vathi! — Yobi 1:18-20.

⁶ Moottharelana Satana aahihonona okumi wa Yobi, maana aahimukumiherya oretta woowereya, woohiirya ni waawiiriha atthu ohiphavela onweha Yobi. (Yobi 2:6-8; 7:5) Wanipacerya, Yobi aanittittimihiwa ni atthu a muttetthe akhala awe. Nave atthu akina yaaninvekela miruku. (Yobi 31:18) Masi vano khuuvo mutthu amphavela. Owo aahikhoottiwa ni amusi awe apatthani awe aalupale ni arumeyi awe khiyamphavela! — Yobi 19:13, 14, 16.

7. (a) Yobi uupuwela wira mixankiho sawe saakumiheriwa naani ni etthu xeeni aakhoottale awe opaka? (b) Ntoko enooniherya aya elatarato, mwa moonelo anyu, mixankiho xeeni mukristau okhanle awe okumana?

⁷ Satana aaphavela omwiiriha Yobi wuupuwelaka wira mixankiho sootheene samphwannya aamuhaaxiwa ni Yehova. Mwa ntakiheryo, Satana aahiiriha epheyo yuulupale omoriha empa anaawe Yobi 10 yaapaka aya efesta. (Yobi 1:18, 19) Nave Satana aahiiriha omora mooro wiirimu yoowo wiivale inama sa Yobi ni waawiivale arumeyi awe ootheene yaakhapelela inama iye. (Yobi 1:16) Okhala wira epheyo ni mooro ole waakhumelenle mekhaya ni waakhumme wiirimu pooti wira Yobi uupuwela wira Yehova taakumihenrye epheyo ni mooro ole. Owo uupuwela wira aahiipaka etthu yaamunananre Yehova. Hata vari siiso, eyo khiyaamwiirinhe Yobi onveeha Yehova ni ohiya omurumeela. Yobi aanisuwela wira mwa iyaakha sinceene Yehova aaninvaha itthu sooloka, nave aahaana weemererya itthu sootakhala. Tivonto Yobi aahimmye awe so: “Nittottopeliwe nsina n’Apwiya [Yehova]”. (Yobi 1:20, 21; 2:10) Hata nuumala Yobi opweteiwa mihakhu sawe sootheene,  anaawe ni okumi awe, owo khaahiyale ororomeleya. Masi Satana aahithipelela omukumiherya mixankiho Yobi.

8. Etthu xeeni ekina Satana aamwiirinhe awe Yobi?

⁸ Satana aahirumeela etthu ekina ya olavilavi wira omuhapuxe Yobi. Owo aahaarumeela apatthani araru a Yobi wira amwiirihe wuupuwela wira kaarina efaita. Awo yaahihimya wira itthu iye saahimukhumelela mwaha woowi Yobi aahipaka itthu sinceene sootakhala. (Yobi 22:5-9) Nave yaaheererya omukupaliha Yobi wira hata apanke itthu sinceene sooloka, Muluku khaavaha efaita. (Yobi 4:18; 22:2, 3; 25:4) Tivonto, awo yaaphavela aya omwiiriha Yobi wuupuwelaka wira Muluku khamphenta, khaamukhapelela ni omukokhorela awe Yehova khiwaarina efaita. Moolumo ale, yanwerya omwiiriha Yobi oohikhalana nlipelelo.

9. Etthu xeeni yaamukhalihenrye Yobi olipa murima ni okhala olipa?

⁹ Nkahaya muupuwele etthu yiiraneya: Yobi anoona oowereya vanceene, okilaathale ene vattuurwani. (Yobi 2:8) Apatthani awe oowootha yaanithipelela omulavulela moolumo oohoma, ahimyaka wira owo ari mutthu otakhala murima ni itthu sootheene aapanke awe khisaarina efaita. Mixankiho sootheene Yobi aarina awe saari ntoko muritti woolemela, nave aaniriipiwa murima vanceene mwaha wookhweliwa anaawe. Woopaceryani, Yobi aaroomaala paahi. (Yobi 2:13–3:1) Nto alopwana ale yuupuwela wira, mwaha woowi Yobi aaroomaala paahi, owo aamuhiya omukokhorela mpattuxa awe. Masi khahiyo yaari yeeyo. Okathi omosa, woonasa wene onvenxale ene muru ni aawehaka apatthani awe ale oowootha, Yobi aahihimya wira: “Kinolaleya ohittheka waka mpakha okhwa”. (Yobi 27:5) Etthu xeeni yaamukhalihenrye Yobi olipa murima ni okhala olipa hata aahaawale vanceene? Hata okathi aarina awe mixankiho ni aari awe mweepiphini ntoko atthu akina anihimya aya, Yobi khaahiyale okupali wira Muluku awe oophenta ammaliha mixankiho sawe. Owo aanisuwela  wira hata okhwaaka, Yehova arowa omuhihimuxa. — Yobi 14:13-15.

10. Itthu saamwiiranenle Yobi, sinniixuttiha exeeni?

¹⁰ Itthu saamwiiranenle Yobi sinniniixuttiha wira Satana khoniwerya onikhanyererya ohiiya omukokhorela Yehova. Nave sinniixuttiha wira Yehova onisuwela itthu sootheene sinniiraneela. Nave-tho sinninikhaliherya osuwela itthu sootheene sinihela muhina ororomeleya wahu wa Yehova. Vano nrowe niwehe itthu Yobi onniixuttiha awe.

11. Nikupaliki exeeni naahihiye omuroromela Yehova? (Yakobo 4:7)

¹¹ Yobi ohooniherya wira naahihiye omuroromela Yehova, nnoowerya ovilela mixankiho sootheene sinniphwanya ni omukhootta Satana. Etthu xeeni enrowa okhumelela? Biibiliya onihimya wira Satana onoonitthyawa. — Mmusome Yakobo 4:7.

12. Nlipelelo na ohihimuxiwa naamulipinhe sai Yobi?

¹² Ootheene ahu nihaana waamini nlipelelo na ohihimuxiwa. Ntoko ninweha ahu mwaha ovinre, ikwaha sinceene Satana onnirumeela woova okhwa wira onihiihe ororomeleya wa Yehova. Satana aahimmye wira Yobi aamuhiya omuroromela Yehova, wira oopole okumi awe. Nto Satana aahiiwoka vanceene. Okathi Yobi uupuwela awe wira aahanle vakhaani okhwa, owo khaahiyale omuroromela. Etthu yaamukhalihenrye vanceene, waari okupali wira Yehova tooreera murima ni wira nihiku nlo Yehova ammaliha mixankiho sootheene sa Yobi. Yobi aanikupali wira hata Yehova ahaarowa ophuka muxankiho ole nlelo ori ene mukumi, owo aamurowa ophuka ohoolo, okathi aarowa awe omuhihimuxa. Yobi aanikupali ni murima awe wootheene wira atthu akhwiiye yaamuhihimuxiwa. Nave hiyo nakhalana nroromelo ntoko na Yobi, khiivo etthu enrowa oniiriha ohiya ororomeleya hata noopopihiwaka wiiviwa.

13. Xeeni vari aya vooloka osuwela olavilavi Satana aarumenle awe wira onwoke Yobi?

¹³ Nihaana osuwela oratteene olavilavi Satana arumenle awe wira omuhapuxe Yobi, maana olelo-va onnirumeela olavilavi omosaru. Nwehe etthu Satana onoothenrye awe. Owo ohimmye so: “Atthu [ohiya paahi Yobi] annivaha sothene sirinaya wira esuke ekumi aya”. (Yobi 2:4, 5) Ni moolumo ala, Satana aaphavela wooniherya wira hiyo khannimphenta vanceene Yehova. Nto akhala wira nnookumana mixankiho, nnoopaka sootheene ninwerya ahu wira noopole okumi ahu, ohiya omuroromela Yehova. Ohiya-vo, Satana ohimmye wira Muluku khonniphenta ni khoniweha wiimananiha wahu omusiveliha. Masi hiyo ninnisuwela olavilavi wa Satana, nto khannihiya omulipelela Yehova ni khannihiya niwokiwaka ni Satana.

14. Mixankiho sinlikana ni xeeni?

¹⁴ Hiyo nihaana orumeela mixankiho wira niisuwele mmensihu. Mixankiho Yobi aarina awe saahimukhaliherya oweha mikhalelo sawe sootteettheya ni opaka marukunuxo. Mwa ntakiheryo, owo aahoona wira aahaana wiiyeviha. (Yobi 42:3) Hiyo nave nnoowerya osuwela omutthu ahu, okathi ninkhalana ahu mixankiho. Munna oniihaniwa Nikolay, c yoowo aatthukweliwe mukhatteya owereiwaka, ohimmye so: “Ekhatteya eri ntoko Raio-X, eyo ennooniherya mikhalelo mukristau orina awe”. Okathi ninweha ahu mikhalelo sahu sootteettheya, nnoowerya wiimananiha opaka marukunuxo.

15. Ti pani ninreerela ahu onwiriyana ni mwaha wa xeeni?

¹⁵ Hiyo nihaana onwiriyana Yehova, ohiya waawiriyana awanani ihu. Yobi aahivaha ephoole okathi Yehova aalavula awe ni yena.  Muluku aahimukhaliherya Yobi okhalana moonelo wooloka omukohaka wira: ‘Niireke munniweha ikuru kirumeenle aka wira kipattuxe itthu sootheene sikhanle? Miyo kinniweha itthu sootheene sinookhumelelani. Munoona wira nkinwerya wookhapelelani?’ Yobi aahaakhula moowiiyeviha ni aahixukhurela oreera murima wa Yehova. Owo aahimmye so: “Mpakha olelo, miyo kanosuwelani kìwaka muhimmwaka pahi: nto vano kihowehani ni maitho ak’ala”. (Yobi 42:5) Niireke munnisuwela opuro Yobi aari awe okathi aalavunle awe moolumo ala? Owo aari vattuurwani, erutthu awe eryeene makhwattaru. Nave aanihaawa ni aahiriipiwa murima mwaha wa okhweliwa anaawe. Hata vaari siiso, Yehova aahimooniherya wira aanimphenta vanceene ni aanimweemererya okhala murumeyi awe. — Yobi 42:7, 8.

16. Moovarihana ni Yesaya 49:15, 16, nihaana wuupuwela exeeni okathi ninkhalana ahu mixankiho?

¹⁶ Olelo-va, atthu akina pooti oniveeha ni ohinithokorerya mwa xariya. Nave awo pooti weererya onanariha nsina nahu ni onanariha mutthenkeso ahu, ahimyaka itthu “sothene sotakhala”. (Math. 5:11) Etthu yaamwiiranenle Yobi, enniniixuttiha wira Yehova onnikupali wira okathi ninkumana ahu mixankiho, khaninrowa ohiya okhala oororomeleya. Yehova onniniphenta vanceene ni khonikhala-khala aanyanyalaka ale animulipelela. (Mmusome Yesaya 49:15, 16.) Nto nihivaheke ephoole itthu anilavula aya awanani a Muluku. Munna mmosa a oTurquia oniihaniwa James, yoowo aarina mixankiho sinceene vatthokoni vawe, ohimmye so: “Hiyo naahoona wira akhala wira nanvaha ephoole itthu anootheriwa aya atthu  a Muluku, naamukhulumuwa. Nto naaniimananiha olipelela itthu sinrowa okumiheriwa ni Omwene [wa Muluku], ni ohihiya ovara muteko wa Yehova. Eyo yaahinikhaliherya ohihiya ohakalala”. Nimutakihaka Yobi, nihaana onwiriyana Yehova paahi! Niira siiso, itthu soowoothiwa sinilavuliwa ni awanani ahu, khasinrowa ohonona nlipelelo nahu.

17. Alopwana ni athiyana anilavuliwa aHeeberi ekapiitulu 11, anniixuttiha exeeni?

¹⁷ Yobi aari murumeyi a Yehova ahaahiyale olipa murima ni ohihiya ororomeleya okathi wa mixankiho. Ekarta aalepenle awe aheeberi, murummwa Paulo onnaahimya atthu akina anceene, yahaahiyale ororomeleya okathi wa mixankiho. Owo onnaahimya okhala “anamoona oowaatta ntoko meeku”. (aHeeb. 12:1) Arumeyi awo ootheene, yaahikhalana mixankiho sinceene mookumini mwaya. Hata vaari siiso, khiyaahiyale omuroromela Yehova. (aHeeb. 11:36-40) Niireke ovilela waya ni wiimananiha waya wookumiherya mireerelo? Aayo! Nnaamwi yahaawenhe siiraneyaka itthu sootheene Yehova oleihenrye awe, awo khiyaahiyale omuroromela ni omulipelela Yehova. Nave yaanikupali wira Yehova aaniweemererya okhala atthu awe. Nto eyo, yahaakhaliherya okupali ni murima wootheene wira muhoolo animwaaweha anatiri a Yehova yiiraneyaka. (aHeeb. 11:4, 5) Ntakiheryo naya ninninikhaliherya ohihiya omuroromela Yehova.

18. Etthu xeeni mulakenle anyu opaka? (aHeeberi 11:6)

¹⁸ Olumwenku ninkhala ahu, onootepa otakhala. (2 Tim. 3:13) Nlelo Satana khohiyale oweehererya arumeyi a Muluku. Hiyo ninnisuwela wira nnookhalana mixankiho sinceene muhoolo. Hata vari siiso, nihaana wiimananiha ororomeleya wa Yehova nikupaliki wira “ninnimuroromela Muluku mukumi”. (1 Tim. 4:10) Okhala wira Yobi aahiroromeleya, owo aahireelihiwa ni Yehova. Eyo ennooniherya wira “Yehova toophenta vanceene ni toomoriwa ikharari”. (Yak. 5:11) Nimutakihaka Yobi, nihihiye omuroromela Yehova, nikupaliki wira owo “onnaatthuvela ale animwaavya ni murima aya wotheene”. — Mmusome aHeeberi 11:6.