ATTHU ANCEENE annisuwela oratteene wira Yesu aakhomeliwe eriyari aya anakrime anli ni aiviwe vamwirini va nihaaxeryo. (Math. 27:35-38) Atthu akina, khanikupali Biibiliya aahimyaka wira murutthu wa Yesu waahilokiheriwa ni ovithiwa mmahiye. — Mar. 15:42-46.

Asomi akina a Ivangelyo khanikupali wira mutthu aiviwa vamwirini va nihaaxeryo, aanivithiwa mookhalela ntoko yaavithiwa aya atthu akina. Asomi awo anikupali wira anakrime yiiviwa vamwirini va nihaaxeryo, khiyaavithiwa ntoko yaavithiwa aya atthu akina. Olepaka exornaale Smithsonian, xornalista Ariel Sabar aahihimya etthu eniwiiriha atthu awo okhalana moonelo owo, oriki: “Okhomeliwa vamwiikimanyoni yaari ehukhumu yaavahiwa aya atthu ootepexa otakhala. Asomi akina, anoona wira aroma khiyaarowa weemererya wira atthu yiiviwe vamwiikimanyoni avithiwe ntoko yaavithiwa aya atthu akina”. Aroma yaaphavela owuulihiha muru anakrime awo ahiyaka saya vamwirini va nihaaxeryo wira sikhuuriwe ni inama sa mutakhwani. Nto mipantta saahala, saaniriheliwa nlitti nimosaru.

Atthu ale anithipa mapuro yaakhaliwa khalai, aahoona wira ayuda akina yiiviwe vamwirini va nihaaxeryo yaahivithiwa. Mwaakha wa 1968, yaahiphwanyiwa makhuva a mulopwana mmosa aiviwe okathi wa Yesu. Makhuva awo yaaphwanyiwe waattamela oYerusalemu, mahiye a emusi emosa ya ayuda. Makhuva a mulopwana ole, yaaphwanyiwe mukaaxani, niire so, ekaaxa yaaheliwa makhuva. Eriyari ya makhuva awe, naahikhala nikhuva na nxitta naakhomeliwe ni epereku yaarina isentimetru 11.5. Nxitta nle naari na mulopwana iihaniwa Yehochanan. Sabar ohimmye so: “Nxitta nne naahikhaliherya omaliha ovaanyihana voohimya sa ovithiwa murutthu wa Yesu, ntoko ivangelyo sinihimya aya. Nxitta nne na Yehochanan nihooniherya wira aroma yaaneemererya wira mutthu iiviwe vamwiikimanyoni aahaana ovithiwa oratteene ntoko yaavithiwa aya atthu akina”.

Nave nxitta nle ninnikumiherya miyoonelo soovirikana voohimya sa moota Yesu aakhomeliwe awe vamwirini va nihaaxeryo. Masi, hata vari siiso, atthu ale yiiviwa vamwirini va nihaaxeryo yaanivithiwa ntoko yaavithiwa aya atthu akina, ohiya oriheliwa nlitti nimosaru. Nto eyo ennooniherya wira, ele Biibiliya onihimya awe wira murutthu wa Yesu waahilokiheriwa ni ovithiwa ti yeekeekhai. Nto itthu anihimya aya ale anithipa mapuro yaakhaliwa khalai sinnikhaliherya ele Biibiliya onihimya awe.

Etthu yuulupale, okhala wira Yehova aahihimya khalai ene wira Yesu aarowa ovithiwa mahiye a thaaciri. Nto khuuvo mutthu okhanle ookhoottiherya wiraneya ele Yehova onihimya awe. — Yes. 53:9; 55:11.