1. Exeeni enitthokiheriwa Esalimo 15:​1-5?

 MWAHA ovinre, nihiixutta wiira mutthu oniivahererya wa Yehova pooti okhala mpatthani awe, niire so, okela muheemani mwawe ya nthoonyeryo. Masi ninrowa owerya sai ohihiya okhala muletto a Yehova? Esalimo 15 ennitthokiherya voohimya sa mwaha owo. (Musome Esalimo 15:​1-5.) Esalimo eyo, ennitthokiherya itthu nikhanle ahu oopaka wiira nikhalane opatthani woolipa ni Muluku.

2. Woonasa wene, exeeni Davidi uupuwela awe vaavo aalavunle awe sa eheema ya Yehova?

² Esalimo 15 enipacerya so: “Apwiya! Ophwanenle tani okhala mpani mwanyu? Ophwanenle tani okhala vamwako anyu wowarya?” (Esal. 15:1) Okathi Davidi aalavunle awe sa “eheema” ya Yehova, woonasa wene uupuwela sa etabernaakulu, yeeyo okathi ole yaari oXibeyoni. Nave, aahilavula sa ‘mwaako woowaarya’ wa Muluku, waanyiheryasa owo aahimya mwaako Siyoni yoowo waari oYerusalemu. Mwa ikiloomo sinceene orowaka mpantta onikela nsuwa wa oXibeyoni, Davidi aahipaka etenta opwehamo nivuku na waataana, olipelelaka okathi yaarowa aya otekiwa etemplo. — 2 Sam. 6:17.

3. Xeeni ninreerela ahu wiiwexexa saana Esalimo 15? (Nwehe efootu.)

³ Ekeekhai wiira aisarayeli anceene khiyarumeela mutabernaakulu, otepexa wene khiyaavolowa mutentani opuro yoowo naapwehiwe aya nivuku na waataana. Masi arumeyi oororomeleya ootheene a Yehova, vaaniweryaneya okhala aletto a muheemani ya nthoonyeryo ya Yehova, vaavo yiimananiha aya olipiha ni ohihiya okhala apatthani a Yehova. Tthiri eyo ti etthu ootheene ahu nimphavela ahu. Esalimo 15, Davidi onnilavula sa mikhalelo ninreerela ahu okhalana ni wooniherya, wiira nihihiye okhala apatthani a Yehova.

 MWEETTEKE MOOROROMELEYA NI MPAKEKE ITTHU SOOLOKA

4. Wiira nikhale aletto a Yehova niireke owo onnivekela opatisiwa paahi? (Yesaya 48:1)

⁴ Esalimo 15:​2, enihimya wiira mpatthani a Muluku “T’ule onettela exariya, yole onira itthu soloka”. Moolumo oowi “onettela” ni “onira” annitumererya wiira nihaana ohihiya opaka eyo. Masi niireke wiira nnoowerya ‘weettela exariya’? Aayo. Ekeekhai wiira na atthu oottheka, masi Yehova onninoona okhala atthu ‘aneettela exariya’ vaavo nniimananiha ahu omwiiwelela yena. Ninnipacerya weetta ni Muluku, vaavo nniivahererya ahu wa Yehova ni opatisiwa. Okathi wa Biibiliya, mutthu khahiyo aakhala muletto a Yehova mwaha wookhala paahi a nloko na aisarayeli. Atthu akina yaaniihimya omukokhorela Muluku, masi yaapaka eyo ‘ahittharaka ekeekhai ni exariya’. (Mmusome Yesaya 48:1.) Aisarayeli yaaphavela okhala aletto a Yehova, yaahaana osuwela itthu Yehova aaphavela awe ni otthara seiyo. Mwa enamuna emosa-ru, wiira nikhalane opatthani woolipa ni Yehova, khivaniphiyerya ohimya paahi wiira nihiivahererya wa yena ni noopatisiwa aahiiso na Anamoona a Yehova. Nto nihaana ohihiya opaka “itthu soloka”. Eyo entaphulela exeeni?

5. Exeeni enihela muhina omwiiwelela Yehova okumi ahu wootheene?

⁵ Vamaithoni va Yehova, ‘weettela exariya’ ni opaka “itthu soloka” khonitaphulela paahi ohicompela mithukumano aahiiso ovara miteko sikina Empa ya Omwene. (1 Sam. 15:22) Nihaana wiimananiha omwiiwelela Yehova okumi ahu wootheene, hata niri ene mekhihu. (Mir. 3:6; Mus. 12:​13, 14) Ti vooloka ohihiya omwiiwelela Yehova hata ni itthu seiye nnoona ahu wiira khasirina efaita yuulupale. Vaavo nimpaka ahu eyo, ninnooniherya wiira ninnimphenta Yehova nave owo onooniphentaka. — Yoh. 14:23; 1 Yoh. 5:3.

6. Moovarihana ni aHeeberi 6:​10-12, exeeni eri yootepa okhalana efaita ovikana itthu sootheene nivanre ahu khalai?

⁶ Yehova onnivaha efaita yinceene itthu  nimpakenle ahu khalai. Masi khahiyo itthu sootheene nimphakenle ahu Yehova khalai, ti sinniniiriha okhala muheemani mwa Yehova. Ninnisuwela eyo, moovarihana ni ele onihimya awe aHeeberi 6:​10-12. (Mmusome.) Ekeekhai wiira Yehova khonliyala itthu sooloka nipanke ahu khalai. Masi owo oniphavela wiira nihihiye omurumeela yena ni murima ahu wootheene “mpakha wookiseryani”. Owo khonrowa ohiya okhala mpatthani ahu “naahikhulumuwe”. — aGal. 6:9.

MULAVULEKE EKEEKHAI NI MURIMA WOOTHEENE

7. Onitaphulela exeeni olavula ekeekhai ni murima ahu wootheene?

⁷ Mutthu oniphavela okhala muletto muheemani mwa Yehova ni ohihiya omusiveliha yena, tuule “onilavula ekeekhai vamurimani vawe”. (Esal. 15:2) Eyo khentaphulela paahi ohikhala atthu oowootha. Masi Yehova oniphavela wiira nikhaleke atthu oororomeleya mwa itthu sootheene ninlavula ahu ni nimpaka ahu. (aHeeb. 13:18) Eyo etthu ya faita maana “Apwiya anniphweliwa n’atakhali: annipatthana n’atthu òloka”. — Mir. 3:32.

8. Exeeni ninreerela ahu osyaka?

⁸ Atthu ‘anilavula ekeekhai vamurimani vaya’ khanoothererya okhala oowiiwelela ari ene ni atthu akina, masi nuumala okhala mekhaya enapaka itthu sihinimusivela Muluku. (Yes. 29:13) Masi taale anikhala oororomeleya khula okathi. Mutthu oohiroromeleya, pooti opaceryaka ohoviherya malamulo makina a Yehova. (Yak. 1:​5-8) Vakhaani-vakhaani owo pooti opaceryaka ohimwiiwelela Yehova ni itthu onoona awe wiira khasirina efaita yuulupale. Nto okathi onoona awe wiira khoniirihiwa etthu ni ohiroromeleya wawe, owo onnincererya opaka itthu soohiloka sihinimusivela Yehova nlelo uupuwelaka wiira onimurumeela Yehova. Mutthu siiso Yehova khoneemererya okokhorela wawe. (Mus. 8:11) Masi hiyo nihaana okhala atthu oororomeleya mwa itthu sootheene.

9. Etthu yiiraneyale ekwaha yoopacerya nuumala Yesu omusuwela Natanayeli, enniixuttiha exeeni? (Nwehe eteseenyo.)

⁹ Nnoowerya wiixutta efaita erina aya okhala atthu anilavula ekeekhai, nuupuwelelaka etthu yiiraneyale ni Yesu nuumala omusuwela Natanayeli ekwaha yoopacerya. Okathi Filipe  amulattunle awe mpatthani awe, Natanayeli wiira omusuwele Yesu, yaahiiraneya etthu yoovara murima. Nnaamwi Yesu ahaamusuwela Natanayeli, owo aahimmye so: “Mmooneke, mwisarayeli eekeekhai. Tthiri owo khorina wootha”. (Yoh. 1:47) Ekeekhai wiira Yesu aanaathokorerya awiixutti awe akina okhala atthu anilavula ekeekhai, masi owo aahimoona Natanayeli okhala oororomeleya. Ninnisuwela wiira Natanayeli aari mutthu oottheka ntoko hiyo, masi owo khootha. Owo aari oororomeleya mwa itthu sootheene. Nto Yesu aahitikinihiwa vanceene ni Natanayeli ni aahimuttottopela. Yaarowa okhala etthu ya faita, vakhanle wiira Yesu oolavula moolumo mamosaru onihimyaka hiyo!

10. Xeeni ninreerela ahu osyaka orumeela moohiloka eyano ahu? (Yakobo 1:26)

¹⁰ Itthu sinceene Esalimo 15 sinnivekela aya opaka, sinnivarihana ni moota nnaathokorerya ahu atthu akina. Esalimo 15:​3, enihimya wiira mutthu ori muletto a muheemani mwa Yehova, tuule “ohiniwotherya akhw’awe: ohiniwirela akhw’awe sotakhala, nnákhala owapa”. Akhala wiira nnoowootherya atthu akina ni owaapa, eyo pooti waawereya atthu awo ni oniiriha ohikhala muletto a muheemani mwa Yehova. — Mmusome Yakobo 1:26.

11. Exeeni ohiniphwanela awe mutthu ohinttharuwa wootha ni owaapa atthu akina?

¹¹ Davidi oolavula nuulumo noowi waapa. Onitaphulela exeeni waapa? Onitaphulela omulavula moohiloka mutthu mukina mwa enamuna nikhanle ahu oohonona mikhalelo sawe sooloka. Mutthu ohinttharuwa okhala oowootha ni owaapa atthu akina, owo khoniphwanela okhala Namoona a Yehova. — Yer. 17:10.

12-13. Matakiheryo xeeni akhanle ooniiriha waalavula aahiiso owaapa moohiloka atthu akina? (Nwehe efootu.)

¹² Esalimo 15:​3, enninuupuxerya wiira ale ari aletto a muheemani mwa Yehova, khaniwiirela akina itthu soohiloka. Nave khaniwootherya ni owuulihiha muru apatthani aya. Eyo entaphulela exeeni?

¹³ Woonasa wene moohisuwela hiyo pooti  opaceryaka owaapa atthu akina nilaleyaka itthu soohiloka sa atthu awo. Nkuupuwelani matakiheryo ala anittharelana: (1) murokora mmosa ohiyale okhala pioneera, (2) anamathelana ahiyale oorumeela oBeteli ni (3) munna ohiyale orumeela ntoko mutokweene aahiiso murumeyi ookhaliherya. Vaarowa okhala voohiloka ohimya wiira atthu awo apanke itthu soohiloka ti maana aya ayelenle aya iparakha saya. Masi pooti wiira aakhala mathowa manceene awiirinhe, hiyo nihinsuwela ahu. Tivonto, mutthu ori muletto a muheemani mwa Yehova, ‘khoniwiirela akhwaawe sootakhala, nnakhala owaapa’.

MWAATTITTIMIHEKE ALE ANIMUTTITTIMIHA YEHOVA

14. Mutthokiherye moota aletto a Yehova anaasyaka aya ale ‘aneettela mirima sa atthu ootakhala’.

¹⁴ Esalimo 15:​4, enihimya wiira mpatthani a Yehova tuule “ohinettela mirima s’atthu òtakhala”. Ninrowa omusuwela sai mutthu ohineettela itthu sootakhala? Mwaha wookhala atthu oottheka, hiyo khaninwerya omusuwela akhala wiira mutthu owo onneettela itthu sootakhala aahiiso nnaari. Mwaha wa xeeni? Mwaha wookhala anatampi, hiyo pooti omuthanlaka mutthu onnisiveliha nto nnamunyokha ole onninyoonyiha. Masi nihaana waasyaka paahi, ale Yehova oniwoona awe okhala atthu aneettela mirima ‘sa atthu ootakhala’. (1 aKor. 5:11) Awo anihela muhina ale anipaka itthu sootakhala ahinttharuwa, ale ahinttittimiha sookupali sahu ni ale animananiha ohonona waamini wahu. — Mir. 13:20.

15. Mwa enamuna xeeni nikhanle ahu oowaattittimiha ale “animoova Yehova”?

¹⁵ Nave-tho, Esalimo 15:4 ennivekela wiira nihaana waattittimiha ale “animoova Yehova”. Wiira niwerye opaka eyo, nihaana ophavelasa inamuna sa wooniherya oreera murima ni waattittimiha apatthani a Yehova. (aRom. 12:10) Ninrowa owerya sai opaka eyo? Enamuna emosa ennihimmwa Esalimo 15:4. Eyo enihimya wiira ole ori muletto a muheemani mwa Yehova, ‘khonihiya hata ohaawaka itthu saalaphenle awe’ Apwiya. Akhala wiira nnoohiya opaka itthu nimuleihenrye ahu Yehova, pooti waariipiha murima atthu akina. (Math. 5:37) Mwa ntakiheryo, Yehova oniphavela wiira mulopwana ni muthiyana yaakhwaniheryeke ele yaaleiheryanne aya nihiku na ekasamento aya. Nave Yehova onnihakalala vaavo onaaweha awe anamuyari evarihelaka muteko itthu anaaleiherya aya anaaya. Mwaha womphenta wahu Muluku ni atthu akina, nihaana wiimananiha opaka sootheene ninwerya ahu wiira naakhwaniheryeke itthu ninleiherya ahu.

16. Enamuna xeeni ekina nnooniherya wiira ninnaattittimiha apatthani a Yehova?

¹⁶ Enamuna ekina nikhanle ahu oowaattittimiha apatthani a Muluku, ori okhala atthu ooreera murima ni oosuwela owaakhela aletto. (aRom. 12:13) Oviriha okathi niri ene ni anna ni arokora ohiya paahi okathi wa mithukumano aahiiso okathi wa muteko woolaleerya, onoonikhaliherya olipiha opatthani ahu ni Yehova vamosa naawo. Ohiya-vo, vaavo ninkhala ahu atthu oowaakhela aletto, ninnimutakiha Yehova.

MUHITEPEKE OPHENTA MUSURUKHU

17. Mwaha wa xeeni Esalimo 15 enilavula aya voohimya sa musurukhu?

¹⁷ Esalimo enihimya wiira ole ori muletto a muheemani mwa Yehova, “khonikophiha musurukhu awe ni ixuuru, nnakhala khoneemererya okunyariwa wiira omukumiherye mixankiho mutthu ohitthenke”. (Esal. 15:5) Mwaha wa xeeni Esalimo enilavula aya sa musurukhu? Mwaha woowi naaphentexaka vanceene musurukhu, hiyo pooti ovahaka efaita musurukhu owo ovikana omphenta wahu Yehova ni atthu akina. (1 Tim. 6:10) Mwa ntakiheryo, okathi  wa khalai atthu akina yaanaakophiha musurukhu aya anna yaari oohaawa wiira atthu awo eliveke musurukhu munceene anna ale yahaawerya aya. Nave makhulupale makina yaaneemererya okunyariwa wiira ephukeke milattu moohixariya. Masi Yehova onnaanyokha atthu anipaka itthu iyo. — Ezek. 22:12.

18. Makoho xeeni anrowa onnikhaliherya ovarerya muupuwelo ahu voohimya sa musurukhu? (aHeeberi 13:5)

¹⁸ Vaarowa okhala va miruku khula mmosa a hiyo wuupuwelela moota onoonela awe musurukhu. Mwiikoheke so: ‘Kiireke kinnuupuwela vanceene musurukhu ni itthu khaakhanle aka oothuma kaarina munceene? Koolihiwa musurukhu, kiireke kinnipisa oliva kuupuwelaka wiira mutthu owo khonrowa orumeela niinaano vaava? Kiireke mwaha wookhalana musurukhu munceene, kinniixoona okhala a faita waavikana atthu akina? Kiireke kinnoona ovila waaxukhurela atthu akina? Kiireke kinnimoona mukina okhala mutthu oniithukumanyerya muhakhu, mwaha wookhalana musurukhu munceene paahi? Kiireke apatthani aka taale arina musurukhu paahi ni nkinaathokorerya saana ale ahirina musurukhu?’ Ootheene ahu nookhalana eparakha yuulupale ya olattuliwa ni Yehova wiira nikhale aletto a muheemani mwawe. Nto wiira nihihiye eparakha eyo nirina ahu, nihiphenteke musurukhu mootepana. Namphentaka vanceene Yehova ovikana musurukhu, owo khonikhala-khala onihiyaka! — Mmusome aHeeberi 13:5.

YEHOVA ONNAAPHENTA APATTHANI AWE

19. Xeeni Yehova oniphavela awe wiira nipakeke itthu sootheene sinihimmwa Esalimo ela?

¹⁹ Moolumo ari Esalimo 15 animala ni yooleiherya eni: “Ole onira siso, onokhala mukumi mahiku othene”. (Esal. 15:5) Nasaalimo onnitthokiherya nthowa naya Yehova oniphavela awe wiira nipakeke itthu sootheene sinihimmwa Esalimo ela. Okhala wiira Yehova oniphavela wiira nihakalaleke. Tivonto, vaavo nimpaka ahu itthu sootheene yena onnivekela awe, ninnikhalana okumi woohakalaliha nave owo onninikhapelela. — Yes. 48:17.

20. Ale ari aletto a muheemani mwa Yehova, exeeni anilipelela aya?

²⁰ Ale ari aletto a muheemani mwa Yehova, annilipelela itthu soohakalaliha muhoolo. Ale ari oothanliwa ni oororomeleya, khareerane “mapuro ookhala”, yaawo Yesu olokihenrye awe wiirimu. (Yoh. 14:2) Ale anrowa waakhela okumi woohimala valaponi vaava, annilipelela wiiraneya eprofesia eri Wiisuupulula 21:3. Moohaanyiherya, nookhalana eparakha yuulupale mwaha wa olattuliwa ni Yehova wiira nikhale apatthani awe ni okhala aletto a muheemani mwawe mwa mahiku ootheene!