1. Exeeni enaakhaliherya arumeyi a Yehova ohihiya omurumeela yena nnaamwi saaphwanyaka mixankiho?

 BIIBILIYA onihimya wiira ninkhala ‘mahiku ookiserya, makhalelo ari aya ooxankiha ni oowoopiha’. (2 Tim. 3:1) Ohiya paahi ovilela mixankiho sinaaphwanya atthu ootheene mwaha wookhala olumwenku ola wootakhala, arumeyi a Yehova annivilela mwaha wa olupatthiwa. Nto exeeni enniiriha ohihiya omurumeela Yehova nnaamwi siniphwanyaka mixankiho iyo? Etthu emosa ennikhaliherya mwaha woosuwela wiira Yehova, “Muluku mukumi”. — Yer. 10:10; 2 Tim. 1:12.

2. Ninsuwela sai wiira Yehova onoonikhaliheryaka?

² Yehova Muluku eekeekhai nave yena onniweha mixankiho sinniphwanya ni khula okathi onniphavela onikhaliherya. (2 Wah. 16:9; Esal. 23:4) Vaavo nnuupuwelela ahu wiira Muluku onninthokorerya ni khula okathi onninikhaliherya, eyo enniniiriha ovilela khula muxankiho onniphwanya. Nrowe nthokorerye moota eyo eri aya ekeekhai, niixuttaka ni ntakiheryo na Mwene Davidi ni arumeyi akina a Yehova.

3. Exeeni Davidi aaphavela awe ohimya ni moolumo oowi “Yehova [Muluku], ookhala”?

³ Davidi aanimusuwela saana Yehova ni aanimuroromela. Nto okathi aalupatthiwa awe ni awanani awe omuhela muhina Mwene Sawuli, Davidi aahinvekela Yehova wiira omukhaliherye. (Esal. 18:6) Nuumala Yehova waakhula nivekelo na Davidi ni omukhaliherya, Davidi aahimmye so: “Yehova [Muluku], ookhala!” (Esal. 18:46) Exeeni Davidi aaphavela awe ohimya ni moolumo ala? Eliivuru emosa ehimmye so: “Davidi aaphavela wooniherya wiira aanimuroromela Yehova wiira khula okathi, owo aamwaakhaliheryaka arumeyi awe”. Moovarihana ni itthu saamukhumelenle, Davidi aanisuwela wiira okathi wootheene Muluku aari ni yena ni ammukhaliheryaka. Eyo ti etthu yaamukhalihenrye Davidi ohihiya omurumeela ni onvuwiha Yehova. — Esal. 18:​28, 29, 49.

4. Ninttottela sai mureerelo mwaha woosuwela wiira Yehova ookhala?

 ⁴ Etthu enrowa onikhaliherya ohihiya omurumeela Yehova moororomeleya, ori okupali wiira owo Muluku okhanle. Nto eyo enoonivaha ikuru wiira nivilele mixankiho sinniphwanya ni wiira nihihiye oluttuweliwa ovara miteko sa Muluku. Nave nihiliyalaka wiira eyo enoonikhaliherya olipiha opatthani ahu ni yena.

MULUKU OKHANLE ONIMOOLIPIHANI

5. Exeeni nikhanle ahu ookupali okathi sinniphwanya aya mixankiho? (aFilipi 4:13)

⁵ Hiyo nnoowerya ovilela khula muxankiho onniphwanya okhale mwaamukhaani wala muulupale, vakhala wiira nnimuupuwelela wiira Yehova ookhala ni ori oolikana ene wiira onikhaliherye. Ekeekhai ti yoowi khuuvo muxankiho Yehova ohiniwerya awe omaliha okhale muulupale aahiiso mwaamukhaani. Okhala wiira owo Muluku Oowerya Sootheene ni onninivaha ikuru nimpirisari ahu wiira nivilele. (Mmusome aFilipi 4:13.) Namuroromela Yehova, nnoowerya ovilela khula muxankiho onniphwanya. Vaavo ninweha ahu wiira Yehova onninikhaliherya ovilela mixankiho saamukhaani, nikupaliki wiira onoowerya onikhaliherya ovilela hata ni iye suulupale.

6. Itthu xeeni saamwiiranenle Davidi okathi aari awe mmiravo, saamukhalihenrye olipiha omwaamini wawe Yehova?

⁶ Nrowe nthokorerye itthu piili saamukhalihenrye Davidi wuncererya omuroromela wawe Yehova. Okathi aari awe mmiravo makampusi, kharamu aahituphela ipwittipwitthi sa tiithi awe. Nave ekwaha ekina saatupheliwe ni mwaamunama oniitthaniwa ursu. Ikwaha iye soopiili, Davidi aahoomola inama iye ni aahaakiherya ipwittipwitthi sawe. Masi owo khuupuwela wiira aapanke ele ni ikuru sawe, owo aanisuwela wiira Yehova tanvanhe ikuru ni owerya wiira opake ele. (1 Sam. 17:​34-37) Davidi khaaliyala soowiiraneya iye. Okathi uupuwela awe, waamini wawe waanilipa nave aanikupali wiira Muluku mukumi ammulipiha muhoolo.

7. Tani Davidi aamuroromela awe ni mwaha wa xeeni?

⁷ Muhoolo mwaya, nlelo Davidi ori ene mmiravo, owo aahirowa opuro yaari aya anakhotto a wisarayeli. Davidi aahaaphwanya anakhotto ale axankale ene vanceene, okhala wiira nakhotto a afilisti yoowo ootupa iitthaniwa Goliyathi, ‘aahaaveeha anakhotto a wisarayeli’. (1 Sam. 17:​10, 11) Anakhotto ale yaahoova vanceene okhala wiira yaawehexexa makhalelo awe Goliyathi, ntoko orakama wawe, otupa ohela muhina itthu aahimya awe. (1 Sam. 17:​24, 25) Davidi aarina muupuwelo ni moonelo woovirikana ni anakhotto ale. Owo aanisuwela wiira Goliyathi khahiyo aawana paahi ni anakhotto a wisarayeli, masi aawana ni ‘anakhotto a Muluku mukumi’. (1 Sam. 17:26) Davidi aamuroromela paahi Yehova. Owo aanikupali wiira Muluku yoowo aamukhalihenrye yena ori ene makampusi, nave ammukhaliherya okathi wa muxankiho ole. Aanikupali ni murima awe wootheene wiira aamukhaliheriwa ni Yehova, tivonto aahirowa owana ni Goliyathi ni aahimuxintta! — 1 Sam. 17:​45-51.

8. Ninrowa omuroromela sai Yehova okathi sinniphwanya aya mixankiho? (Nwehe efootu.)

⁸ Nave hiyo nnoowerya oxintta khula muxankiho onniphwanya, vakhala wiira nnimuupuwelelaka wiira Muluku mukumi ori ni hiyo wiira onikhaliheryeke. (Esal. 118:6) Ninnilipiha omuroromela wahu, vaavo nnuupuwelela ahu moota Yehova aanikhalihenrye awe khalai. Musomeke soowiiraneya sa mbiibiliyani seiyo sinooniherya moota Yehova aakhalihenrye awe arumeyi awe. (Yes. 37:​17, 33-37) Ohiya-vo, nyuwo pooti osoma soowiiraneya sa anna ni arokora siri musaitini jw.org. Soowiiraneya iyo sinnooniherya moota Yehova  onaakhaliherya awe arumeyi awe olelo-va. Nave-tho nyuwo pooti wuupuwelela moota Yehova ookhalihenrye aweni. Hata sihikhalaka itthu suulupale ntoko owana ni mwatto aahiiso kharamu, ekeekhai ti yoowi owo khula okathi onnookhaliheryani! Okhala wiira owo toolattunleni wiira mukhale mpatthani awe. (Yoh. 6:44) Nave mwaha wa nikhaliheryo Yehova onnivaha awe, hiyo ninniwerya okhala oororomeleya wa yena. Nto munoonela sai onvekela Yehova wiira ookhaliheryeni wuupuwelela ikwaha sootheene aakhunle awe mavekelo anyu ni ookhalihenrye aweni oxintta mixankiho sanyu? Wuupuwelela itthu iyo, sinimookhaliheryani omuroromela Yehova ni okupali wiira khula okathi onimookhaliheryakani.

9. Exeeni ninreerela ahu wuupuwelela vaavo sinniphwanya aya mixankiho? (Miruku 27:11)

⁹ Omuthokorerya Yehova ntoko Muluku mukumi, eyo enoonikhaliherya oxintta mixankiho sahu. Mwaha wa xeeni? Vaavo sinniphwanya aya mixankiho, etthu yootepa okhalana efaita ori wuupuwelela okhulupale wa Yehova, maana Satana ohimmye wiira saniphwanya mixankiho nnoohiya omurumeela Yehova. Nto moota nnoonela ahu mixankiho sahu, eyo ennooniherya moota nimmuroromela ahu Yehova. (Yoob. 1:​10, 11; musome Miruku 27:11.) Vaavo nihinhiya ahu ororomeleya wa Yehova hata siniphwanyaka mixankiho, ninnooniherya wiira ninnimphenta Yehova nave itthu Satana onihimya awe ti soowoothiwa. Ankhi nyuwo, niireke sinnoophwanyani mixankiho ntoko olupatthiwa ni kuvernu, othoiwa musurukhu, ohaakheliwa saana okathi woolaleerya, aahiiso muxankiho mukina? Vakhala wiira munniroromeleya hata soophwanyakani mixankiho, muupuweleke wiira Yehova onnihakalala. Masi muhiliyale wiira owo khonrowa weemererya woophwanyani muxankiho muhinrowa anyu owerya ovilela. (1 aKor. 10:13) Yehova onimoovahani ikuru munipirisari anyu wiira nwerye ovilela.

MULUKU MUKUMI ONIMOOTTHUVELANI

10. Exeeni Muluku mukumi onrowa awe waapakela ale animurumeela?

¹⁰ Yehova Onnaatthuvela ale animurumeela. (aHeeb. 11:6) Owo onninivaha murettele  ni omaaleleya niinano-va nave onoonivaha okumi woohimala muhoolo. Moohaanyiherya hiyo ninnikupali wiira Yehova onoonikhaliherya ni ookhalana owerya wiira opake eyo. Sintoko arumeyi awe a khalai yaapanka aya, nihihiye opaka ele eniwerya ahu wiira nimurumeele. Tthiri eyo ti etthu Timootheyo apanke awe. — aHeeb. 6:​10-12.

11. Exeeni yaamwiiriha Timootheyo wiimananiha ovara muteko munceene mmulokoni? (1 Timootheyo 4:10)

¹¹ Mmusome 1 Timootheyo 4:10. Timootheyo aanimwaamini Muluku mukumi. Ti maana aya owo iimananiha awe vanceene onvarela muteko Yehova ni anna ni arokora. Moota xeeni apanke awe eyo? Murummwa Paulo aahimutumererya wiira aahaana osuwela wiixuttiha okhale mmulokoni aahiiso muteko woolaleerya. Nave-tho murummwa Paulo aahimuleela Timootheyo wiira aahaana waavaha ntakiheryo nooloka anna ni arokora, akhale amiravo aahiiso oowuuluvala. Timootheyo aahaakhela-tho soothanleliwa sikina soovila, seiyo saahela muhina ovaha miruku sooluluwanya masi mwa niphento para ale yaapirisari. (1 Tim. 4:​11-16; 2 Tim. 4:​1-5) Ikwaha sikina, atthu akina khiyaarowa osuwela miteko sootheene Timootheyo aavara awe aahiiso khiyaarowa oxukhurelaka. Masi hata vari siiso aanikupali wiira Yehova ammutthuvela. — aRom. 2:​6, 7.

12. Exeeni eniwiiriha axitokweene oluttuweliwaka ni miteko anivara aya? (Nwehe efootu.)

¹² Olelo-va, axitokweene aahaana okupali wiira Yehova onniweha miteko sootheene anivara aya ni onimwaatthuvela. Ohiya paahi waakhapelela anna ni arokora, wiixuttiha ni olaleerya, axitokweene anceene annikhaliherya muteko wooteka ni annaakhaliherya anna ni arokora sinaaphwanya ihasara sa ephattu. Axitokweene akina annithanliwa wiira yiirele mpantta Ekomisau ya Axitokweene Anaaxukurya Aretta nave akina annithanliwa wiira yiirele mpantta Ekomisau Enilavula ni Ispitaali. Nto axitokweene aniivahererya wiira avareke miteko iyo, annisuwela wiira muloko ti wa Yehova ohiya wa apinaatamu. Ti maana aya awo aniimananiha aya ovara khula etthu aniwerya  aya ni annikupali wiira Muluku onimwaatthuvela. — aKol. 3:​23, 24.

13. Yehova onoonela sai vaavo nniimananiha ahu opaka ele eniwerya ahu wiira ninvarele muteko?

¹³ Khahiyo wiira atthu ootheene annikhalana eparakha eyo ya orumeela ntoko axitokweene. Masi ootheene ahu nnoowerya onvaha Yehova ele eniwerya ahu. Muluku ahu onnihakalala vanceene vaavo nniimananiha ahu ovara khula etthu eniwerya ahu wiira nimurumeeleke. Owo onniweha musurukhu ninvaha ahu wiira nikhaliherye miteko sa Omwene sinivariwa olumwenku wootheene hata ori ene vakhaani. Yehova onnihakalala vaavo nniimananiha ahu wiira nixintte woona ehaaya ni vaavo ninvenxa ahu ntata wiira nivahe ekomentaario ahu omuthukumanoni. Nave owo onnihakalala vanceene vaavo nihincala ahu soovonya sa anna ni arokora ni vaavo nnaalevelela ahu. Hata moonaka wiira khamuniwerya ompakela Yehova itthu sinceene ntoko mwaaphavela anyu, mukupaliki wiira owo onnisiveliwa vanceene ni ele muniwerya anyu ovara. Owo onnoophentani vanceene ni onimootthuvelani. — Luka 21:​1-4.

MUHIHIYE OMWAATTAMELA MULUKU MUKUMI

14. Moota xeeni omwaattamela Yehova onrowa aya onikhaliherya ohihiya ororomeleya wa yena? (Nwehe efootu.)

¹⁴ Vakhala wiira nnoomoona Yehova okhala mpatthani ahu eekeekhai, vanookhweya omuroromela. Tthiri eyo ti etthu yiiraneyale ni Yosefe. Owo aanisuwela wiira ammuriipiha murima Yehova vakhala wiira aamurupihana voohiloka. Nto ti nthowa naya owo aakhontte awe moomalela. (Maph. 39:9) Wiira niwerye omoona Yehova ntoko mpatthani ahu eekeekhai, nihaana oviriha okathi munceene nivaanelaka ni yena ni osoma Nuulumo nawe. Niira siiso, waataana wahu ni yena, onrowa otepaka olipa khula nihiku. Ntoko Yosefe, nakhalana ompatthani woolipa ni Yehova, hiyo khaninrowa opaka etthu enrowa omuriipiha murima. — Yak. 4:8.

15. Exeeni nniixutta ahu ni itthu aisarayeli yaapanke aya okathi yaari aya moothakoni? (aHeeberi 3:12)

¹⁵ Ale aniliyala wiira Yehova Muluku mukumi, pooti okhala vookhweya ohiya omurumeela yena. Nrowe nithokorerye etthu yaawiiranenle aisarayeli okathi yaari aya moothakoni.  Awo yaanisuwela wiira Yehova Muluku a ekeekhai, masi ikwaha sikina yaanipacerya waanyiherya akhala wiira amwaakhapelelaka. Nto yaahikoha ahimyaka so: “Apwiya ari ni hiyo, walá khàkhanle ni hiyo”? (Okhum. 17:​2, 7) Mwaha waivaavo, awo yaahimurukunuwela Muluku. Hiyo khanimphavela opaka etthu emosa-ru yaapanke aya atthu awo. Hiyo nimphavela okhala atthu oowiiwelela. — Mmusome aHeeberi 3:12.

16. Exeeni ekhanle oowiiriha waamini wahu ovukuwa?

¹⁶ Khivanikhweya ovikaniha omwaattamela Yehova olumwenku ola wootakhala ninkhala ahu. Atthu anceene khanikupali wiira Muluku ookhala. Nave ikwaha sikina vanikhala wiira ale ahinimurumeela Yehova, annipuha. Vaavo itthu iyo siniiraneya aya, waamini wahu pooti opaceryaka ovukuwa. Ekeekhai wiira hiyo pooti ohuupuwela wiira Muluku khokhanle, masi pooti opaceryaka waanyiherya vakhala wiira onninikhaliherya. Mulipa-oolepa Esalimo 73, aahikhalana moonelo mmosa-ru. Nto atthu yaattamanne awe, yaanikhootta wiiwelela malamulo a Muluku nave yaakhala moovarihana ni soophavela saya. Mwaha waivaavo, owo aahipacerya waanyiherya vakhala wiira vaari va faita omurumeela Muluku. — Esal. 73:​11-13.

17. Exeeni enrowa onikhaliherya ohihiya omwaattamela Yehova?

¹⁷ Exeeni yaamukhalihenrye nasaalimo oturuka moonelo awe? Owo uupuwelela etthu yaarowa owiiraneela ale yaarowa ohiya omurumeela Yehova. (Esal. 73:​18, 19, 27) Nave aanuupuwelela mareeliho anikhumelela mwaha woomurumeela Muluku. (Esal. 73:24) Nto hiyo nihaana wuupuwelelaka mareeliho ootheene Yehova onivaha awe. Mmananiheke wuupuwelela moota okumi anyu waarowa aya okhala mwahaamurumeela Yehova. Wuupuwelela itthu iyo, sinoonikhaliherya ohihiya ororomeleya wa yena. Nave, ntoko nasaalimo nnoowerya ohimya so: “Miyo okisivela omwaattamela Muluku”. — Esal. 73:28.

18. Xeeni nihinreerela ahu woova itthu sinrowa wiiraneya muhoolo?

¹⁸ Hiyo nnoowerya ovilela khula muxankiho onniphwanya mahiku ala ookiserya ninkhala ahu, mwaha woowi na “ipottha sa Muluku mukumi ni eekeekhai”. (1 aTes. 1:9) Muluku ahu ta ekeekhai ni khula okathi ori oolikana ene wiira onikhaliherye. Okhuma khalai owo khonaaliyala arumeyi awe ni ti etthu onipaka awe olelo-va. Moohipisa anookhumelela maxakha maalupale ahitonko okhumelela elapo yootheene. Masi hiyo khaninrowa okhala mekhihu, maana Yehova ori ni hiyo. (Yes. 41:10) Tthiri ootheene ahu nnoowerya okhala oolipa murima. Nave, “nihimyeke ni nroromelo wira: ‘Yehova tonikikhaliherya. Miyo nkinrowa woova etthu’”. — aHeeb. 13:​5, 6.