1. Moovarihana ni Esalimo 18:​46, Davidi aamulikanyinhe Yehova ni exeeni?

 HIYO, ninkhala olumwenku ohireere osareya mixankiho, seiyo sikhanle oturuka okumi ahu mootutuxerya. Masi ninnihakalala vanceene, okhala wiira Yehova onninikhaliherya! Mwaha ovinre, nihiixutta wiira Yehova Muluku mukumi nave owo khula ookathi ori oolikana ene wiira onikhaliheryeke. Vaavo owo onnikhaliherya awe, hiyo ninnikupali wiira “Yehova ookhala!” (Musome Esalimo 18:46.) Nuumala Davidi ohimya moolumo ala, moottharelana owo aahimulikanyiha Muluku “ntoko Mwala” awe. Masi exeeni yaamwiirinhe Davidi omulikanyiha Yehova yoowo ori Muluku mukumi ni etthu ehirina okumi, eyo piiyo, mwala?

2. Exeeni ninrowa ahu wiixutta mwaha ola?

² Mwaha ola, nnoothokorerya xeeni Yehova onilikanyihiwa awe ntoko mwala, ni etthu nnixutta ahu ni nlikanyiho nla. Nave nnimwiixutta xeeni ninreerela ahu omuroromelaka yena ni omwiitthanaka ntoko mwala ahu. Wookiseryani, nnimwiixutta inamuna soovirikana nikhanle ahu ootakiha mikhalelo sa Yehova.

NTHOWA NAYA YEHOVA ONILIKANYIHIWA AWE NTOKO MWALA

3. Biibiliya onirumeela sai nuulumo noowi “mwala”? (Nwehe efootu ya vakaapani.)

³ Biibiliya onnirumeela nuulumo noowi “mwala”, ophavelaka onikhaliherya wiiwexexa mikhalelo sa Yehova. Okhuma khalai, arumeyi a Yehova anninvuwiha yena mwaha wa mikhalelo sawe soovara murima, nave awo annimulikanyiha ntoko mwala. Ekwaha yoopacerya Biibiliya onimulikanyiha awe Yehova ntoko “nluku” aahiiso mwala, eniphwanyaneya Otumererya 32:​4, Biblya Exirima. Nivekelo Ana aapanke awe, owo aahimmye wiira “Muluku ahu, nyuwo paahi muri oolipa ntoko mwala”. (1 Sam. 2:2) Habakuki aahimwiitthana Yehova okhala “nluku” nawe, aahiiso mwala awe. (Hab. 1:​12, Piibiliya Emakhuwa.) Nave mulipa-oolepa Esalimo 73, aahimuhimya Muluku okhala mwala wa “murima aka”. (Esal. 73:26) Hata okathi yoole Yehova aahimmye awe mmansawe, owo aahiilikanyiha ntoko mwala. (Yes. 44:8) Vano nrowe nthokorerye mikhalelo miraru sa Yehova seiyo  sinooniherya wiira ori ntoko mwala. Nave nnimwiixutta moota nikhanle ahu oomuthokoreryaka Yehova okhala “mwala” ahu. — Otum. 32:31.

4. Moota xeeni Yehova ori awe ntthyawelo nahu? (Esalimo 94:22)

⁴ Yehova ntthyawelo nahu. Ntoko siisale nikhuku niri vamwaakoni nikhanle aya oomukhaliherya mutthu okathi wa munamukhaya, mwa enamuna emosaru, Yehova onoonikhaliherya okathi sinniphwanya aya mixankiho soovirikana. (Musome Esalimo 94:22.) Owo onninikhaliherya okhapelela waataana nirina ahu ni yena. Nave onninlipiherya wiira khiivo etthu aahiiso muxankiho onniphwanya nenna-va, onrowa okhala wa okathi wootheene. Nave-tho owo onnileiherya wiira muhoolo onoomala-maliha khula etthu ennikumiherya mixankiho ni enniiriha ohikhala oovareleleya. — Ezek. 34:​25, 26.

5. Ninrowa ompaka sai Yehova okhala ntthyawelo nahu?

⁵ Enamuna emosa nikhanle ahu ompaka Yehova okhala Ntthyawelo nahu, ori onvekela. Vaavo nninvekela ahu Yehova, owo oninivaha “murettele” awe. Nave onookhapelela murima ahu ni muupuwelo ahu. (aFil. 4:​6, 7) Muthokorerye etthu yaamwiiranenle Artem munna yoowo aatthukweliwe mukhatteya mwaha wa waamini wawe. Poliisia mmosa aatokosa mwaha a munna ole, aahimukoha itthu sinceene, omuhaaxa ni omoopopiha. Artem ohimmye so: “Khula okathi Poliisia ole aakikoha-koha awe, aanikinyoonyiha vanceene. . . . Khula okathi kaaninvekela Yehova wiira okikhaliherye okhala oomaaleleya ni okhalana ankhili. Nto inamuna sa olavilavi Poliisia ole aarumenle awe, khisaakhumenle saana. . . . Kikhaliheriwaka ni Yehova, vaakhala ntoko wiira kitthyawenle munikhukuni”.

6. Xeeni khula ookathi ninreerela ahu omuroromelaka Yehova? (Yesaya 26:​3, 4)

⁶ Yehova toororomeleya ni khonikhala-khala oninyanyalaka. Siisaale mwaako aahiiso mwala vahiniweryaneya aya okhuma opuro ori aya, mwa enamuna emosa-ru, Yehova khoniturukeya ni ori oolikana ene wiira onikhaliheryeke. Nto nihaana omuroromela yena maana owo ori ntoko ‘ikuru sahu [aahiiso mwala] wa mahiku ootheene’. (Mmusome Yesaya 26:​3, 4.) Yehova khonrowa ohiya okhala. Nave owo onnileiherya owiriyana mavekelo ahu ni onikhaliherya khula okathi nimpirisari ahu. Nave nihaana omwaamini Yehova, okhala wiira owo toororomeleya wa ale animurumeela. (2 Sam. 22:26) Owo khonikhala-khala oliyalaka itthu nimpakenle ahu nave khula okathi onoonireelihaka. — aHeeb. 6:10; 11:6.

7. Exeeni enrowa onikhaliherya omuroromela Yehova? (Nwehe efootu.)

⁷ Hiyo ninnimpaka Yehova okhala mwala ahu, vaavo nimmuroromela ahu ni murima wootheene. Nave ninnikupali wiira ninniphwanya mureerelo, vaavo nimmwiiwelela ahu yena hata okathi wa mixankiho. (Yes. 48:​17, 18) Khula okathi nnuupuwelela ahu moota Yehova onnikhaliherya awe, eyo enniniiriha wuncererya omuroromela wahu ni okupali wiira owo onoonikhaliheryaka ovilela khula muxankiho, hata noonaka wiira khaninwerya oxintta. Nave, okupali wiira Yehova paahi toniwerya onikhaliherya, eyo enniniiriha ovilela khula muxankiho hata iye suulupale. Eyo ti etthu aakupali awe munna Vladimir. Owo ohimmye so: “Ompatthani aka ni Yehova waahitepa wuncerereya okathi kaatthukweliwe aka mukhatteya.  Miyo kaahiixutta omuroromela Yehova maana okathi ole kaari mekhaka ni yena paahi taakhanle ookikhaliherya ovilela mixankiho saka”.

8. a) Xeeni ninhimya ahu wiira Yehova khoniturukeya? b) Mureerelo xeeni ninrowa ahu ophwanya mwaha wompaka Yehova okhala mwala ahu? (Esalimo 62:​6, 7)

⁸ Yehova khoniturukeya. Yehova ori ntoko mwaako ohinikhuma opuro ori aya aahiiso ohiniturukeya. Ninnihimya eyo, maana mikhalelo sawe ni yoolakela awe, khasiniturukeya. (Mal. 3:6) Nuumala Adamu ni Eva omutthekela Yehova, owo khaaturunke yoolakela awe para apinaatamu. Murummwa Paulo ohimmye wiira Yehova, “khokhanle oowiikhootta mmansawe”. (2 Tim. 2:13) Eyo enitaphulela wiira moohicikha itthu sinikhumelela aahiiso sinipakiwa ni apinaatamu, yena khonituruka mikhalelo sawe, yoolakela awe ni malamulo awe. Nto nihaana omuroromelaka Muluku ahu, yoowo ohiniturukeya wiira onoonoopola ni onikhaliherya okathi wa mixankiho. Nave nihaana okupali wiira sooleiherya sawe sa muhoolo sinimwiiraneya. — Musome Esalimo 62:​6, 7.

9. Yoowiiraneya ya Tatyana eniwiixuttihani exeeni?

⁹ Hiyo ninnimpaka Yehova okhala mwala ahu, vaavo nnuupuwelela ahu mikhalelo sawe ni yoolakela awe ya elapo ya vathi ni apinaatamu. Nave eyo enninikhaliherya, omuroromela Yehova, okhala oomaaleleya ni okupali wiira onoonikhaliherya okathi wa mixankiho. (Esal. 16:8) Eyo ti etthu yaamwiiranenle murokora oniitthaniwa Tatyana yoowo aatthukweliwe mwaha wa waamini wawe. Owo onihimya so: “Miyo kaaniixoona wiira kaari mekhaka, wanipacerya, muxankiho ole waanikikhulumula vanceene”. Nuumala-vo, owo aahipacerya wuupuwelela voohimya sa Yehova ni yoolakela awe wa apinaatamu. Nave aahoona wiira waari wa faita ovilela muxankiho ole wamphwannye. Nto eyo yaahimukhaliherya okhala oomaaleleya ni aahikhalana ikuru wiira owerye ovilela muxankiho awe ole. Owo onihimya-tho so: “Osuwela saana etthu yiirinhe okhumelela muxankiho ole, yaahikikhaliherya wuupuwelela wiira kaahaawa mwaha wa omphenta Yehova. Nave, yaahikikhaliherya ohimakelaka wiisuupuwelela mmansaka”.

10. Mwa enamuna xeeni Yehova ori awe mwala ahu nenna-va?

¹⁰ Moohipisa, sinooniphwanya mixankiho sinceene. Nto okathi owo ninrowa opirisariki omuroromela Yehova ovikana khalai. Ti vooloka okhuma nenna-va olipiha waamini wahu wiira owo onoonikhaliheryaka ovilela mixankiho moororomeleya. Ninrowa owerya sai opaka eyo? Nnoowerya akhala wiira nnoosomaka soowiiraneya sa mbiibiliyani ni soowiiraneya sa anna ni arokora a mahiku ahu ala. Okathi munisoma anyu soowiiraneya iyo, mmananiheke wuupuwelela moota Yehova aakhaliherye awe arumeyi awe. Nave mwiivaheke okathi wiira muupuwelele soowiiraneya iyo. Akhala wiira munoopaka eyo, munooweha wiira Yehova ori ntoko mwala anyu.

MUTAKIHEKE MIKHALELO SA YEHOVA

11. Xeeni ninreerela ahu otakiha mikhalelo sa Yehova? (Nwehe ekaaxa eni: “ Soolakela Amiravo Anireerela Aya Okhalana”.)

¹¹ Mpakha-va, nihiixutta mikhalelo soovirikana sa Yehova sinnikhaliherya osuwela wiira Yehova ori ntoko mwala. Nto ninrowa wiixutta moota nikhanle ahu ootakihaka mikhalelo iyo. Vakhala wiira nnimwiimananihaka otakiha mikhalelo iyo,  nnoowerya waalipiha anna ni arokora a mmulokoni. Mwa ntakiheryo, Yesu aahinvaha Simoni nsina noowi Keefa, (nuulumo nenlo nintaphulela, “Pedru”). Nsina nlo nintaphulela “epetaaso ya mwala”. (Yoh. 1:42) Ni moolumo ala, Yesu aaphavela ohimya wiira Pedru anwerya waalipiha anna ni arokora ni olipiha waamini waya. Nave axitokweene a mmulokoni, annilikanyihiwa ni “muuttutthi worirya nihiku novihexa”. Eyo entaphulela wiira axitokweene annaakhapelela anna ni arokora a mmulokoni. (Yes. 32:2) Ohiya paahi axitokweene, masi ootheene ahu nnoowerya otakiha mikhalelo sa Yehova ni waalipiha anna ni arokora. — aEef. 5:1.

12. Mutthokiherye inamuna soovirikana nikhanle ahu oowaakhaliherya anna ni arokora ovilela okathi wa mixankiho.

¹² Mwaakhaliheryeke anna ni arokora okathi wa mixankiho. Okathi anna ni arokora sinaaphwanya aya ihasara sa ephattu aahiiso ikhotto, hiyo pooti opirisariki waakhaliherya naakuxaka wiira akhaleke owannyihu. Moohaanyiherya ‘mahiku ala ookiserya’, makhalelo anootepa oxankiha, nto eyo enooniherya wiira nihaana wiimananiha waakhaliherya anna ni arokora. (2 Tim. 3:1) Ohiya paahi waavaha itthu sinaathowa, masi hiyo nihaana olipiha waamini waya ni owooniherya wiira ninnaaphenta. Enamuna emosa nikhanle ahu oopaka eyo, ori wiivaha okathi wiira nivaanele naawo okathi wa mithukumano sa Empa ya Omwene ni waamaaliha vakhala wiira annipirisari. Hiyo nimphavela wiira mmulokoni nikhale nipuro anna ni arokora akhanle aya oophwanya nimaaliho ni olipihiwa. Ninkhala olumwenku atthu anceene anaathokorerya aya athiyana moohiloka nto eyo enniwiiriha anna ni arokora okhala oonyoonyiheya ni wiixoonaka ohiphentiwa. Okathi anna ni arokora anirowela aya mithukumano, nihaana wiimananiha wiira naaphente, waalipiha ni waakhaliherya wiira akhaleke oovareleleya.

13. Axitokweene anrowa wooniherya sai okhala ntthyawelo na anna ni arokora? (Nwehe efootu.)

¹³ Nave axitokweene anoowerya okhala ntthyawelo na anna ni arokora yaawo sinaaphwanya  mixankiho soovirikana. Okathi sinikhumelela aya ihasara sa ephattu aahiiso oretta mootutuxerya, axitokweene moowaakuveya anniimananiha opaka ele aniwerya aya wiira akhaliherye. Nave axitokweene annimurumeela Biibiliya wiira yaavahe malakiheryo anna ni arokora ni waalipiha. Anna ni arokora vanimwaakhweela onvekela nikhaliheryo mutokweene onisuweliwa okhala ooreera murima, oopatthaneya ni oniwiriyana miyoonelo saya. Axitokweene anooniherya mikhalelo iya, annaakhaliherya atthu akina wiixoona okhala oophentiwa. Mwa enamuna eyo, awo vannaakhweela ovarihela muteko malakiheryo a mbiibiliyani anivahiwa aya ni axitokweene. — 1 aTes. 2:​7, 8, 11.

14. Exeeni nikhanle ahu oopaka wiira anna ni arokora aniroromeleke?

¹⁴ Muroromeleyeke. Hiyo nimphavela wiira atthu akina aroromeleke wiira nnimwaakhaliherya okathi wa mixankiho. (Mir. 17:17) Exeeni nikhanle ahu oopaka wiira anna ni arokora aniroromeleke? Etthu nikhanle ahu oopaka, ori otakiha mikhalelo sa Yehova khula nihiku ni omaleliha itthu ninleiherya ahu ni okathi ene yoowo naaleihenrye ahu. (Math. 5:37) Nave nnoowerya akhala wiira nnimwiimananiha waakhaliherya ale anipirisari. Ohiya-vo, nihaana omaleliha soothanleliwa sahu mmulokoni, moovarihana ni malakiheryo nnaakhela ahu.

15. Vaavo axitokweene anikhala aya oororomeleya, anamalaleerya anittottela sai mireerelo?

¹⁵ Axitokweene oororomeleya, annikhaliherya vanceene muloko. Moota xeeni? Okathi anamalaleerya anoona aya wiira annireerela ovekela nikhaliheryo na axitokweene, awo annipaka eyo  mootaphuwa. Nto eyo ennaakhaliherya ovukula oxanka. Nave okathi anamalaleerya awo anisuwela aya wiira annikhaliheriwa ni axitokweene khula okathi anipirisari aya, awo annoona wiira anniphentiwa. Anna ni arokora annitepa waaroromela axitokweene vaavo anisuwela aya wiira awo khanrumeela muupuwelo aya, masi animurumeela Biibiliya ni iliivuru sahu sinimutthokiherya Biibiliya wiira avahe malakiheryo. Nave axitokweene annitepa ororomeliwa, vakhala wiira khanaaleela atthu akina isiiri sanya ni annipaka itthu anileiherya aya.

16. Okathi nintthara ahu malakiheryo a Yehova ninttottela sai mureerelo ni nnaakhaliherya sai atthu akina?

¹⁶ Mutthareke Malakiheryo a Yehova. Vaavo khula okathi nintthara ahu malakiheryo a Yehova nave nimpaka ahu soothanla sinivarihana ni Biibiliya, ninnikhala ntakiheryo nooloka. Osoma Nuulumo na Muluku ni olipiha omwaamini wahu Yehova, eyo enoonikhaliherya omuroromela yena ni malakiheryo awe. Nave khaninrowa wootothiwa ni soowiixuttiha soowoothiwa aahiiso itthu sinihimmwa ni atthu akina sinivonyola malamulo a mbiibiliyani. (aEef. 4:14; Yak. 1:​6-8) Vaavo nniiwa ahu ihapari sooriipiha murima, hiyo khannihiya okhala ororomeleya maana ninnikupali sooleiherya sa Yehova. (Esal. 112:​7, 8) Nave-tho nnoowerya waakhaliherya ale sinaaphwanya mixankiho aahiiso sooweha. — 1 aTes. 3:​2, 3.

17. Axitokweene aniwerya sai waakhaliherya anamalaleerya a mmulokoni?

¹⁷ Axitokweene ahaana okhala atthu anisuwela wiiphimela itthu sootheene, anuupuwela vookhalela, oowiitthokiha saana ni oowaakhela aletto. Nave axitokweene ahaana waakhaliherya atthu akina okhala oomaaleleya ni olipiha omwaamini waya Yehova, ‘attharaka moororomeleya nuulumo na Muluku’. (Tito 1:9; 1 Tim. 3:​1-3) Arumeelaka ntakiheryo naya ni muteko wa waaxukurya ni waalipiha anna ni arokora, axitokweene anniwerya waakhaliherya anamalaleerya ohicompela mithukumano, muteko woolaleerya ni yoosoma ya omwaneene. Vaavo anna ni arokora sinaaphwanya aya mixankiho ni ahinoona aya etthu yoopaka, axitokweene anniwuupuxerya efaita erina aya omuroromela Yehova ni wuupuwelela sooleiherya sawe.

18. Xeeni ninreerela ahu omuttottopelaka Yehova ni ohihiya omwaattamela? (Nwehe ekaaxa eni: “ Inamuna sa Omwaattamela Yehova”.)

¹⁸ Nuumala othokorerya mikhalelo soovirikana ni soovara murima sa Yehova, vanooweryaneya hiyo ohimya ntoko mwene Davidi yoowo aalavunle so: “Ottottopeliwe Yehova, yoowo ori mwala aka”. (Esal. 144:1) Tthiri khula okathi nihaana omuroromelaka Yehova. Hata nuuluvanle ene aahiiso nnaari, nihaana omuroromela Yehova wiira owo onoonikhaliheryaka ni okupali moolumo ani: “Owo ti Mwala aka”. — Esal. 92:​14, 15.