Wiira nimuhakalalihe Yehova, nihaana okhalana waamini. Masi, Biibiliya onihimya wiira “khahiyo wiira atthu otheene akhalana waamini”. (2 aTes. 3:2) Okathi murummwa Paulo aalavunle awe moolumo ala, aahimya “ atthu otepa otakhala”, eyo piiyo, atthu yaale yaamulupattha. Masi moolumo aalavunle awe voohimya sa waamini, annaahela muhina atthu akina. Atthu akina khanikupali wiira Muluku ookhala. (aRom. 1:20) Nnaamwi ehimukupaliki Muluku, awo anihimya wiira aakhalana waamini maana annikupali wiira yookhala etthu erina owerya wuulupale. Tthiri eyo kheniphiyerya para omuhakalaliha Yehova, maana khahiyo waamini weekeekhai.

Hiyo nihaana okupali wiira Yehova ookhala ni wiira onnaatthuvela ale animwaamini. (aHeeb. 11:6) Waamini mukhalelo onikumiheriwa ni munepa woowaarya. Wiira nikhalane munepa woowaarya, nihaana onvekela Yehova wiira onivahe. (Luka 11:​9, 10, 13) Enamuna ekina nikhanle ahu oowaakhela munepa woowaarya, ori osomaka Nuulumo na Muluku. Nave ti va faita wuupuwelela ni ovarihela muteko itthu niixuntte ahu. Napaka eyo, munepa woowaarya wa Yehova onaamunikhaliherya okhalana waamini ni omuhakalaliha Yehova.