Miyo kiyariwe 22 a Dezembro a 1929, epooma yaamukhaani ya oNovilla. Epooma ele saahikhala mixaxa 9 sa ipa waattamela oBastogne, muttetthe wa wArdennes, oBelgica. Kinnuupuwelela ohakalala kaaphwanya aka nnaamwi kaakhala vamuxaxani ni anamuyari aka okathi kaari aka mwaana. Miyo ni muhima aka Raymond, khula nihiku naaniwama ipooyi sahu wiira niphwanye eleeti nave naanikhaliherya ohemphwa ipyo saari mmatta mwahu. Muttetthe ahu ole, ootheene ahu naavara moowiiraana wiira nikhaliheryaneke mukina ni mukwaawe.

Paapa aka Emile ni maama aka Alice, awo yaari makatooliku ni yaaniluttuweliwa ni etiini aya. Awo yaanirowela Missa iDominku sootheene. Nto mwaakha wa 1939, mapioneero yaakhuma wInglaterra yaahiphiya muttetthe ahu ole ni yaahaavaha apaapa erevista Consolação, (yeeyo olelo-va enisuweliwa okhala Nvenye!). Moowaakuveya apaapa yaahikupali wiira itthu erevista ele saahimya aya saari seekeekhai. Nto eyo yaahiwiiriha opacerya omusoma Biibiliya. Okathi paapa aka aahiyale awe orowela Miisa, anamwaattamanani ahu yaawo yaari apatthani ahu, yaahipacerya omulupattha. Awo yaahipaka sootheene yaawerya aya wiira paapa aka ohihiye okhala mukatooliku. Nto yaaninyakulihani vanceene voohimya sa mwaha owo.

Miyo kaahiriipiwa murima okathi kanwehaka paapa aka ohaawaka ni oothokoreriwaka moohiloka. Nto eyo ti etthu yaakiirinhe opaka nivekelo nle ni murima aka wootheene kihimmye aka waanipacerya wa mwaha ola, wiira Muluku aakhaliherye apaapa. Nuuvira okathi olupatthiwa iwe waahivukuwa nto kaahihakalala vanceene. Tthiri kaahikupali ni murima wootheene wiira Yehova ‘onniwiiwa ale aninvekela’.

Mahiku yeettaka 10 a mweeri wa Maio a 1940, Manazista yaahituphela elapo ya oBelgica nto eyo yaahiwiiriha atthu anceene okhuma elapo ele. Emusi ahu yaahitthyawa erowaka muttetthe onikela nsuwa wa oFrança. Okathi mukina hiyo naahaana ovira mapuro oowoopiha yaawo anakhotto a wAlemanhã yaawana aya ni anakhotto a oFrança.

Okathi naatthikenle ahu owaani, naaphwanye mireerelo sahu sootheene siiyiwe ene. Aahiiwe aari  mwalapwa ahu paahi iitthaniwa Bobbie, yoowo aanaakhenle. Itthu sootheene siiraneyale saanikiiriha wiikoha so: ‘Xeeni sihireere aya ikhotto? Xeeni ninhawa ahu?’

Okathi ole, naahilipihiwa ni munna aanixukunrye iitthaniwa Emile Schrantz, a yoowo ari mutokweene ni aarumeela ntoko pioneero. Omurumeelaka Biibiliya, aahikitthokiherya xeeni ninhaawa ahu nave aahaakhula makoho aka voohimya sa okumi. Nto kaahipacerya okhalana opatthani woolipa ni Yehova ni kaanikupali wiira owo Muluku oophenta.

Hata waari okathi wa ekhotto, hiyo naaniwerya okumana ni ovaanela ikwaha sinceene ni anna ni arokora. Mweeri wa Agosto 1943, munna José-Nicolas Minet, aahirwa onixukurya vamuxaxani vale naakhala ahu wiira olavule mwaha awe. Nto owo aahikoha wiira “Tani oniphavela opatisiwa?” Nto miyo, paapa aka ni tiiyu aka naahivenxa ntata. Ooraaru ahu naahipatisiwa muro mwaamukhaani waattamela muxaxa ole naakhala ahu.

Dezembro a 1944, anakhotto a wAlemanhã yaahituphela wEuropa, okathi wa Ekhotto ya Nenli ya Olumwenku Wootheene, weiwo onisuweliwa okhala Okhottoni wa oBulge. Hiyo naakhala waattamela opuro ole waawaniwa ekhotto. Masi khalai ene mpaani mwahu naahithipa nikhuku nenlo naalokihenrye ahu nnakhala-mo. Nto okathi ole naahitthyawela memmo niipittha mweeri ntero. Nihiku nimosa kaahikhuma wiira kalyihe inama, nto mootutuxerya epompa emosa yaahiphuwa ehonona osulu wa muxaxa ahu ole. Nakhotto mmosa a wAmerica iira eemenle ene waattamela opuro ole kaari aka vansisini naahuwa ahu inama. Nto owo aahikhuwela ohimyaka so: “Muurame!” Nto moowaakuveya kaahitthyawa kimorela waattamela opuro waaryaawe nto owo aahikiwariha ekapaseeti awe mmuruni mwaka wiira okikhapelele.

Nuumala ekhotto, khula nihiku naanilavula ni anna ni arokora a muloko wa oLiège, orakamelana waya ni opuro waakhala ahu waari etthu yoowiiraka ikiloomo 90. Nuuvira okathi, naahipaka ekurupu yaamukhaani oBastogne. Kaahipacerya ovara muteko empresa ya ikontha nto eyo yaahikivaha eparakha ya osoma myaha sa waakiherya itireitu. Muhoolo mwaya kaahipacerya ovara muteko okapineeti ya kuvernu a muttetthe ole. Mwaakha wa 1951 naahimulokiherya asembeleya a esirkwiitu oBastogne. Nto atthu yaamurwenle asembeleya ole yaahiphiya 100, omuhela muhina murokora mmosa pioneera ooluttuweliwa oniitthaniwa Elly Reuter. Owo aaheetta mukwaha  wa ikiloomo 50 omurumeela pisikeleeta orowaka omoona asembeleya ole. Moohipisa naahisivelana mukina ni mukhwaawe nto naahilakela othelana. Owo ammala-ru waakhela nlattulo wiira orowele Exikola ya oGileadi wEstados Unidos. Masi owo aahilepa ekarta oroihaka oseedi ya olumwenku wootheene, otthokiheryaka xeeni ahaarowa awe weemererya nlattulo nle. Munna Knorr, yoowo aahoolela muteko woolaleerya okathi ole, aahaakhula mooreera murima wiira woonasa wene nihiku nno, owo pooti orowa oGileadi vamosa ni iyawe. Nto naahithelana Fevereiro a 1953.

Mwaakha ene yoole, Elly vamosa ni miyo naahimoona asembeleya a muttetthe Estaadiyu ya oYankee, oNova York. Niri ene wuuwu, kaahimusuwela munna mmosa yoowo aakiphwanyinhe muteko waakisivela nave aahikilattula wiira neette mukwaha nirowaka wEstados Unidos. Masi nuumala onvekela Yehova voohimya sa mwaha ole, Elly vamosa ni miyo naahilakela okhootta nlattulo nle, nave naahitthikela oBelgica wiira nakhaliheryeke ekurupu yaamukhaani yaari anamalaleerya 10, oBastogne. Mwaakha waattharelana, naahihakalala vanceene nuumala omuyara mwanihu mwaamulopwana oopacerya iitthaniwa Serge. Mooriipiha murima, nuuvira miyeeri 7 Serge aahipacerya owereiwa nuumala-vo aahikhwa. Hiyo naahiriipiwa murima vanceene ni naahimuleela muxankiho ole Yehova, masi aahinlipiha ni nlipelelo na ohihimuxiwa.

Mweeri wa Outubro a 1961, kaahiphwanya muteko yoowo waakeemiherya okhala pioneero. Nihiku nenlo, kaahilikareliwa ni munna a oseedi ya olumwenku wootheene, yoowo aaweherya muteko oBelgica. Owo aahikikoha akhala wiira kanwerya orumeela ntoko murumeyi a esirkwiitu (yoowo olelo-va onisuweliwa ntoko mutokweene a esirkwiitu). Miyo kaahaakhula so: “Niireke khivaareerela okhala mapioneero kihinatthi weemererya eparakha eyo?” Nto munna owo aaheemya. Nuuvira miyeeri 8 nirumeelaka ntoko mapioneero, kaahipacerya orumeela ntoko mutokweene a esirkwiitu mweeri wa Setembro mwaakha wa 1962.

Nuumala oviriha iyaakha piili nirumeelaka muteko wa esirkwiitu, naahilattuliwa wiira narumeeleke eBeteli ya oBrussels. Naapacenrye muteko wa oBeteli, Outubro a 1964. Naahiphwanya mareeliho manceene ni yoothanleliwa ahu ele esya. Waavinre aya okathi vaakhaani nuumala munna Knorr onixukurya oBeteli, mwaakha wa 1965, kaahitikinihiwa vanceene nuumala othanliwa wiira karumeeleke ntoko munna a ekomisau ya ofiliyaali. Muhoolo mwaya miyo ni mwaaraka naahithanliwa wiira nirowele Exikola ya oGileadi eturma 41. Nto etthu munna Knorr aamunlenle awe mwaaraka iyaakha 13 saavinre, yaahiiraneya! Nuumala omaliha oxikola, naahitthikela eBeteli ya oBelgica.

Itthu iye kaixuntte aka iyaakha vakhaani saavinre voohimya sa myaha sa itireitu sa atthu, yaahikikhaliherya wiira kaakiherye itireitu sa Anamoona a Yehova a wEuropa ni ilapo sikina wiira amurumeeleke Yehova mootaphuwa. (aFil. 1:7) Nto eyo yaahikikhaliherya owerya olavula ni ahooleli a ilapo 55 muteko ahu waakhoottihiwa aya. Nto khula okathi kaapaka aka eyo, kaaninvekela Yehova wiira okikhaliherye. Ohiya olavula naawo voohimya sa muteko ole kaixuntte aka wa waakiherya itireitu, miyo kaaniixooniherya ohoolo  waya ntoko “mutthu a muluku”. Khula okathi miyo kaaninvekela malakiheryo Yehova, maana kaanisuwela wiira “Apwiya annettiha murima wa mwené, eroihaka ontthuna aya, ntoko sinettiha aya màsi anvira mmuró”. — Mir. 21:1.

Nihiku nimosa yaahiiraneya etthu kihinliyala aka maana kaahiwerya olavula ni mulopwana mmosa iirela mpantta Eparlamentu ya wEuropa. Kaahiviriha ikwaha sinceene kivekelaka wiira kilavule ni yena, masi vano kaahiwerya. Owo aahimmye so: “Kinoovahani iminuutu 5 paahi muhivikanihe”. Nto kaahuurama kinapacerya ovekela, mukhulupale ole onanariwe ene aahikikoha etthu kaapaka aka. Kinwehexexaka kaahihimya so: “Kaamuxukhurela Muluku maana nyuwo mwa mmosa a anamuteko awe”. Nto owo aahikikoha so: “Muniphavela ohimya exeeni?” Nuumala-vo, kaahimooniherya aRoma 13:4. Okhala wiira eettela etiini ya epurustante ni aanimuttittimiha Biibiliya, yoolepa ele yaahimutikiniha. Munnisuwela etthu yiiraneyale muhoolo mwaya? Ohiya olavula muhina mwa 5 minuutu aakivanhe awe, masi naahiwerya ovaanela 30 minuutu. Owo aahikihimeerya wiira aanittittimiha vanceene muteko ahu.

Mwa iyaakha sinceene, Anamoona a Yehova annaakiherya itireitu saya wEuropa, voohimya sa ohiirela mpantta ipoliitika, waahuwa anamwane, oliva mpoosito ni myaha sikina. Miyo kaahikhalana eparakha ya wiirela mpantta myaha iyo sikina, nto kaahoona moota Yehova aanikhaliherya awe oxintta. Mpakha olelo-va, Anamoona a Yehova aawerya oxintta myaha siniphiya 140 sa Corte Europeia dos Direitos Humanos.

Mwaakha wa 1990, kaavara vamosa ni munna Philip Brumley, a Oseedi ya Olumwenku Wootheene vamosa ni munna Valter Farneti, a wItália, wiira naakhaliherye anna ni arokora omurumeela Yehova mootaphuwa oCuba, weiwo muteko ahu waakhoottihiwa aya. Kaahilepa ekarta kiroihaka wempaixaata ya oCuba, oBelgica. Nuumala-vo, naahithukumana wiira niphuke mwaha ole. Okathi wa muthukumano ole, naahitthokiherya itthu atthu akina yahaiwewexa aya saana seiyo siiriha muteko ahu okhoottihiwaka.

Nuumala onvekela Yehova malakiheryo, naaheemereriwa ni naahaaroiha aBiibiliya 500 oCuba. ABiibiliya ale yaahipiixiwa ni yaahikaweliwa anna ni arokora, nto naahoona wiira Yehova aanireeliha wiimananiha wahu. Nuumala-vo naahaavekela-tho ahooleli a elapo wiira aneemererye waaroiha aBiibiliya akina 27.500. Nave-tho ekwaha ela kuvernu aahineemererya. Kaahihakalala vanceene mwaha woosuwela wiira naahaakhaliherya anna ni arokora a oCuba wiira akhalane Biibiliya.

Miyo kaahixukurya ikwaha sinceene oCuba wiira kaakhaliherye anna ni arokora ovara muteko ahu mootaphuwa. Mwaha woopaka eyo, kaahiwerya waataana ni ahooleli anceene a kuvernu.

Mwaakha wa 1994, yaahiiviwa atthu anivikana 1.000.000 mwaha wookhala a nloko na Hutu, oRuanda. Mooriipiha murima anna ni arokora akina yaahikhwa. Moowaakuveya yaahipakiwa ekurupu ya anna ni arokora wiira yaakhaliheryeke anna yaaphwanyiwe ihasara elapo ele.

Nuumala ophiya ekapilaali ya oKigali, naahoona wiira opuro saataphuleliwa aya iliivuru ni saapwehiwa aya, saahisareya iphaka mwaha wa ipaala. Naahiiwa soowiiraneya sinceene sooriipiha murima sa anna ni arokora, yaawo yaiviwe ni miyaalo. Nave naahiiwa soowiiraneya sikina sa anna ni arokora oophenta yaakhaliherya akina masi moohisuweliwa. Mwa ntakiheryo, naahimusuwela munna mmosa oniitthaniwa Tutsi, yoowo aipinthe mahiku 28 mukhukuni, aakhaliheriwa ni emusi emosa ya Anamoona a Yehova a oHutu. Okathi wa muthukumano naarina ahu oKigali, naahiwerya olipiha waamini wa anna ni arokora oowiiraka 900.

Nuumala-vo naahivira efronteira ya oZaire, (weiwo olelo-va onisuweliwa okhala República Democrático ya oCongo). Hiyo naaphavelasa ekurupu ya anna ni arokora yaawo yaatthyanwe ekhotto erowaka opuro anikhala aya atthu atthyanwe ekhotto elapo aya waattamela epooma ya oGoma. Masi khinaawenrye waaphwanya, nto naahinvekela Yehova wiira onikhaliherye waaphwanya. Nto naahinweha mulopwana eetta orwaaka ohoolo wahu ni naahimukoha akhala wiira aanisuwela opuro yaari aya Anamoona a Yehova. Owo aakhunle so: “Aayo kinnisuwela, maana miyo ka Namoona a Yehova. Muhixanke kinimookuxani koohooleni opuro eri aya ekurupu ya anna ni arokora anaakhaliherya ale aphwanyiwe ihasara”. Nuumala muthukumano naarina ahu ni anna a ekomisau ya anna anaakhaliherya ale aphwanyiwe ihasara, hiyo naahikhalana-tho muthukumano mukina ni anna ni arokora oowiiraka 1.600 yaatthyanwe elapo aya, wiira naamaalihe ni waalipiha. Nave okathi ole naahisoma ekarta ya Nikhuuru Noolamulela. Nto anna ni arokora yaahihakalala vanceene nuumala wiiwa moolumo ala ani: “Hiyo khaninhiya woovekelelani. Nave ninnisuwela wiira Yehova khonikhala-khala oonyanyalakani”. Moolumo ala a Nikhuuru Noolamulela veekeekhai ahiiraneya. Olelo-va, oRuanda aakhala Anamoona a Yehova anivikana 30.000!

Nihalaka vakhaani ophiyeriha iyaakha 58 nithelanne ene, mwaaraka Elly, yoowo kamphenta aka vanceene aahikhwa mwaakha wa 2011. Kaahinvekela Yehova kimuleelaka moota kaariipiwe aka murima. Nto kaahiweha moota Yehova aakimaalinhe awe. Etthu ekina yaakilipinhe, waari ohihiya waaleela atthu akina ihapari sooreera.

Nnaamwi kirina ene iyaakha 90, khula esumana kinniirela mpantta muteko woolaleerya. Nave kinnihakala vanceene mwaha wookhaliherya eDepartamento Juridico ya oBeteli ya oBelgica, waaleela atthu akina soowiiraneya saka, ni waalipiha amiravo a emusi ya oBeteli.

Nuumala onvekela Yehova ekwaha yoopacerya, soovira iyaakha 84. Waari waanipacerya wa okumi aka woohakalaliha vaavo kiniixoona aka wiira kinnitepa omwaattamela Yehova. Kinnimuxukhurela vanceene Yehova mwaha woowi khula okathi onniwiriyana ni onnaakhula mavekelo aka. — Esal. 66:19. b