1, 2. Etthu xeeni enitthuneya ahu okupali? (Nwehe elatarato yoopacerya.)

NTOKO nithokorenrye ahu mwaha ovinre, Diabo ohimmye wira Yehova khoniphwanelela okhala namalamulela a apinaatamu. Owo onihimya wira Yehova khonilamulela mwa xariya ni wira apinaatamu anoohakalala akhala wira anrowa wiilamulelaka. Niireke Satana aahimya ekeekhai? Nkahaya muupuwele vaakhanle wira apinaatamu anniwerya wiilamulela ni okhala mahiku otheene. Niireke yaamuhakalalaka ovikana olamuleliwa ni Muluku? Niireke nyuwo mwaamusiveliwa okhala mahiku otheene muhilamuleliwaka ni Muluku?

² Khula mutthu ohaana waakhula mmansawe. Nave ohaana wuupuwelela saana makoho ala. Tivonto, waakhuliwa waya onimooniherya wira Yehova tonireerela olamulela ni toniphwanela okhaliheriwa ni murima wotheene. Ninnikupali eyo mwaha wa ele enisoma ahu mBiibiliyani. Nto, nrowe niwehe nthowa naya Biibiliya onihimya awe wira Yehova paahi toniphwanelela olamulela olumwenku wotheene.

3. Xeeni Yehova orina awe ehakhi ya okhala Namalamulela?

³ Yehova paahi tori Mukhulupale a olumwenku wotheene okhala wira owo Mpattuxa ni Muluku oowerya sotheene. (1 Wahala 29:11; Miteko 4:24) Moolohani, Yohani aahooniheriwa Kristu ni anamalamulela akhwaawe 144.000, ahimyaka wira: “Pwiy’ahu ni Muluku ahu! Nyuwo mophwanela wakhela ovuwa ni nttittimiho n’uwerya. Tthiri ti nyuwo mpattunxe itthu sothene: mwaha w’otthuna wanyu seiyo sinnikhala, khukhalana ekumi”. (Wisupulula 4:11) Okhala wira Yehova topattunxe sotheene, owo ookhalana ehakhi ya waalamulela atthu otheene, valaponi ni wiirimu.

4. Niireke otaphuwa onninvaha mutthu ehakhi ya ommwareela Muluku? Mutthokiherye.

⁴ Khiivo etthu Satana epattunxe awe. Tivonto, khorina ehakhi ya olamulela. Nto, Satana ni anamathelana oopacerya khiyaarina mathowa oovaanyiha okhulupale wa Yehova. (Yeremiya 10:23) Niireke otaphuwa waya waanaavaha ehakhi ya okhootta olamulelo wa Yehova? Nnaari. Maana otaphuwa onninvaha mutthu ehakhi ya opaka soothanla, ohiya ommwareela Yehova Mpattuxa. Tthiri ommwareela Muluku onitaphulela ohirumeela saana otaphuwa wahu. Apinaatamu ahaana olamuleliwa ni olakiheriwa ni Yehova.

5. Xeeni okathi wotheene soothanla sa Muluku siri aya sa xariya?

⁵ Nrowe noone nthowa nikina nnooniherya wira Yehova ookhalana ehakhi ya olamulela. Owo onnirumeela oratteene owerya wawe. Yehova onihimya so: “Tthiri miyo, wophentani waka ti wororomeleya, kophavelelakani exariya ni murettele mulaponi. Miyo kinnisiveliwa ni seiyo. Miyo k’Apwiya: nkinotha”. (Yeremiya 9:23) Yehova khonlipa ni malamulo aapinaatamu wira othanle ele eri ya xariya. Ohiya-vo, owo torina malamulo a xariya. Nto, onnaavaha apinaatamu malamulo awe. Nasaalimo aahimmye wira: “Exariya n’uloka ennilipiha omwene anyu”. Tivonto, malamulo, malakiheryo ni soothanla sinikhuma wa Yehova, ti sa xariya. (Esalimo 89:15; 119:128) Nnaamwi Satana ohimyaka wira Yehova khahiyo Namalamulela a xariya, Satana-owo, khoniwerya oruu ha exariya molumwenkuni.

6. Nthowa xeeni Yehova orina awe ehakhi ya olamulelo?

⁶ Osuwela ni miruku, ti mathowa makina anooniherya wira Yehova ookhalana ehakhi ya olamulela, maana onniwerya weettiha olumwenku. Nave Yehova onvaha Mwanawe, owerya woovoniha iretta sihinweriwa ni matotoro. (Matheyo 4:23, 24; Marko 5:25-29) Nnaamwi noonaka itthu iyo okhala miiriirya, masi Yehova khonoona okhala miiriirya. Maana onnisuwela wira erutthu ahu enniwerya wiilokiherya. Nave-tho, onoowerya waahihimuxa ale akhwiiye ni omaliha ihasara sa ephattu.

7. Tani oniwerya okumiherya murettele olumwenku wotheene?

⁷ Satana, yoowo ori namalamulela a olumwenku  ola, khoniwerya okumiherya murettele. Yehova paahi toniwerya okumiherya murettele olumwenku wotheene. (Yesaya 2:3, 4; 54:13) Ninnoona ntoko murummwa Paulo, yoowo aahimmye so: “Vekekhai, othajiri wa Muluku n’ankhili awe n’usuwela wawe ti wulupale. Hiyo khaninwerya otaphulela mupuwelo awe, nnákhala osuwela iphiro sawe”.​—aRoma 11:33.

8. Xeeni olamulelo wa Yehova ori aya woolokexa?

⁸ Ntoko noonale ahu, Biibiliya onnooniherya wira Yehova torina ehakhi ya olamulela. Nave, onnooniherya nthowa naya ori awe Namalamulela oolokexa. Nthowa nimosa, mwaha woowi Yehova onilamulela moophenta. Ninnimwaattamela Yehova vaavo nnuupuwela ahu moota ori awe “òmoriwa ikharari ni òvilela, òpisa onanariwa, òrera murima ni òroromeleya”. (Okhuma 34:6) Muluku onninivaha efaita ni onttittimiha. Nave onninikhapelela ovikana moota nniikhapelela ahu. Diabo onnimootherya Yehova wira onnaakhoottiherya atthu Awe itthu sooloka, masi eyo khahiyo ekeekhai. Maana Muluku oonivaha Mwanawe a vameekhaawe wira nikhalane nlipelelo na okumi woohimala.​—Musome Esalimo 84:12; aRoma 8:32.

9. Ninsuwela sai wira Yehova onnimuthokorerya khula mutthu?

⁹ Yehova onnaaphenta atthu otheene. Nave onnimuthokorerya vanceene khula mutthu. Nkahaya muupuwele ele yiiraneyale khalai. Mwa iyaakha 300, Yehova aahaarumeela makhulupale wira yeettiheke nloko nawe ni waaxintta awanani aya. Okathi siiraneya aya itthu iyo, Yehova aanimukhapelela khula mutthu. Mmosa a atthu awo aari Ruthi. Nto Ruthi khahiyo aari a nloko na Isarayeli, masi aahihiya itthu sotheene wira omurumeeleke Yehova. Tivonto, Yehova aahimutthuvela onvahaka mulopwana ooreera murima ni mwaana mwaamulopwana. Ohiya-vo, mwaana a Ruthi aahiirela mpantta emusi aarowa awe oyariwa Mesiya. Nave-tho, Yehova oheemererya olempwa sowiiraneya sa Ruthi mBiibiliyani, eliivuru erina nsina nawe. Nkahaya muupuwele nuumala Ruthi ohihimuxiwa, moota onrowa awe okhala asuwela itthu iyo!​—Ruthi 4:13; Matheyo 1:5, 16.

10. Ninsuwela sai wira olamulelo wa Yehova khonihaaxa?

¹⁰ Olamulelo wa Yehova khahiyo woohaaxa. Masi, ale animwiiwelela anniphwanya otaphuwa ni ohakalala. (2 aKorinto 3:17) Omwiipelaka Yehova, Davidi aahimmye wira: “Ovuwa n’ututha onnarukurerya, owerya n’urera wosarya mpani mwaya”. (1 Wahala 16:7, 27) Nasaalimo Etani, aalempe so: “Òreriwa t’ale aniwipelani n’utthapa: atthu awo anomwaleliwa n’urera wanyu murima. Mwaha wa nyuwo anrowa otthapa vohimala: anottottopela orera wanyu murima”.​—Esalimo 89:16, 17.

11. Exeeni enrowa onikupaliha wira okhulupale wa Yehova ti woolokexa?

 ¹¹ Vaavo nintepa ahu wuupuwelela oreera murima wa Yehova, ninnikupali wira olamulelo awe ti woolokexa. Ninnoona ntoko nasaalimo yoowo aamuhimenrye Muluku, wira: “Okhala nihiku nimosá vaté vanyu ti worerexa ovikana okhala okina mahiku manjenexa”. (Esalimo 84:11) Okhala wira Yehova tonipattunxe, tivonto owo onnisuwela etthu enniphwanyiha ohakalala. Moreerela murima, Yehova onninivaha itthu sinceene ovikana iye nimphavela ahu. Nto khula etthu Yehova onnivekela awe opaka, enninikumiherya mureerelo. Hata onivekelaka etthu yoovila, okathi wotheene ninrowa ohakalalaka akhala wira nnoomwiiwelela Yehova.​—Mmusome Yesaya 48:17.

12. Nthowa xeeni nuulupale ninniiriha okhaliherya okhulupale wa Yehova?

¹² Biibiliya onihimya wira nuuvira Iyaakha Ekonto Emosa ya Olamulelo wa Kristu, atthu akina anrowa okhootta okhulupale wa Yehova. (Wisupulula 20:7, 8) Exeeni enrowa owiiriha opaka eyo? Mwaha woowi, okathi owo, Diabo onrowa weererya owiiriha ophavela itthu sa werutthuni. Okhuma khalai onnipaka eyo. Satana onimweererya waakupaliha atthu awo wira anoowerya okhala mahiku otheene ahimwiiwelelaka Yehova. Muhiwokiwe ni wootha iwo wa Satana. Tivonto, niikoheke so: ‘Kiireke kinimweemererya wootha iwo?’ Akhala wira ninnimphenta tthiri Yehova ni okupali wira toniphwanelela okhala namalamulela a olumwenku, wootha iwo khonrowa onihapuxa. Maana ninrowa ophavelaka wiiwelela okhulupale wa Yehova, yoowo onilamulela moophenta.

13. Vaavo nimmutakiha ahu Muluku, ninkhaliherya sai okhulupale awe?

¹³ Ntoko noonale ahu, Yehova torina ehakhi ya olamulela ni olamulelo awe ti woolokexa. Nto nihaana okhaliherya okhulupale awe ni murima ahu wotheene. Ninnikhaliherya okhulupale wa Yehova, niroromeleyaka wa yena ni omutakiha. Nave ninnooniherya wira ninnimphenta ni okhaliherya olamulelo awe, vaavo nimmananiha ahu opaka itthu ntoko omphavela awe.​—Mmusome aÉfeso 5:1, 2.

14. Axitokweene ni ahooleli a itthoko animutakiha sai Yehova?

¹⁴ Biibiliya onnooniherya wira okathi wotheene, Yehova onnirumeela owerya wawe moophenta. Axitokweene ni ahooleli a itthoko anikhaliherya okhulupale wa Yehova, annimutakiha yena ahikhalaka oohaaxa aahiiso oowehaweha khula etthu. Murummwa Paulo aahiimananiha vanceene omutakiha Muluku ni Yesu. (1 aKorinto 11:1) Paulo khaanyoonyiha aahiiso waakhanyererya atthu opaka etthu oona awe okhala yooloka. Masi mooreerela murima, aanaakhaliherya woona otthuneya waya opaka itthu sooloka. (aRoma 12:1; aÉfeso 4:1; Filémoni 8-10) Okathi aapaka awe eyo, Paulo aamutakiha Yehova. Vaavo nnaathokorerya ahu akina moophenta, ninnikhaliherya okhulupale wa Yehova.

15. Yapakiwa yoothanla nihineemererya ahu, ninrowa okhaliherya sai okhulupale wa Yehova?

¹⁵ Nave nnoowerya okhaliherya olamulelo wa Yehova niwiiwelelaka ni waakhaliherya ale Yehova aavanhe awe okhulupale. Akhala wira ennipakiwa yoothanla nihinsuwela  ahu aahiiso nihineemererya ahu, nihaana okhaliherya. Atthu a olumwenku ola khanipaka eyo, masi hiyo ninnipaka eyo mwaha woowi ninnimweemererya Yehova okhala Namalamulela ahu. (aÉfeso 5:22, 23; 6:1-3; aHéberi 13:17) Okhala wira Muluku oniphavela okhala wahu saana, hiyo ninnihakalala.

16. Soothanla sahu sinooniherya sai wira ninnikhaliherya okhulupale wa Muluku?

¹⁶ Nave, ninnikhaliherya okhulupale wa Yehova mwa enamuna enipaka ahu soothanla. Yehova khonnivaha malamulo ooluluwanya a khula etthu. Ohiya-vo, oonivaha owerya wa wuupuwelela. Eyo enninikhaliherya woona etthu yoopaka. Mwa ntakiheryo, Yehova khonaavaha maKristau elista ya ikuwo sinireerela owara aahiiso ohiwara. Masi onninleela wira nihaana owara mowiiyeviha ni mookhalela ntoko Anamoona awe. (1 Timótheyo 2:9, 10) Owo oniphavela wira nuupuweleke moota soothanla sahu sinaavara aya akina. (1 aKorinto 10:31-33) Vaavo nimpaka ahu soothanla sinivarihana ni yootthuna ya Yehova, ninnooniherya wira ninniphenta ni okhaliherya olamulelo awe.

17, 18. Anamathelana anooniherya sai wira annikhaliherya okhulupale wa Yehova?

¹⁷ Nrowe nthokorerye enamuna emosa anamathelana maKristau akhanle aya ookhaliherya okhulupale wa Yehova. Mwa ntakiheryo, pooti wira anamathelana amosa, itthu khasiniweettela ntoko yuupuwela  aya. Maana pooti wira aakhalana mixankiho suulupale mukasamentoni mwaya. Akhala wira ti siiso, anoottottela mureerelo wuupuwelela moota Yehova aathokorenrye awe nloko na aIsarayeli. Yehova onniihimya okhala mutheli a nloko na Isarayeli. (Yesaya 54:5; 62:4) Nloko na Isarayeli naahimunyoonyiha Yehova ikwaha sinceene. Nto wataana waya waalikana ni ekasamento erina mixankiho. Masi Yehova khaakuvenle ohiya nloko na Isarayeli. Ohiya-vo, aanaalevelela ikwaha sinceene wira ommalelihe natiri awe.​—Musome Esalimo 106:43-45.

¹⁸ MaKristau oothelana animphenta Yehova, anneererya omutakiha yena. Hata arina ene mixankiho mukasamentoni mwaya, khaniphavela mathowa ahineemereriwa ni Biibiliya wira amwalane. Maana annisuwela wira Yehova onnimuthokorerya natiri a ekasamento okhala oowaarya, ni oniphavela wira mulopwana ni mwaarawe “aphitane”, eyo piiyo, ovarexexana. Moovarihana ni Biibiliya, oraruwa paahi, toniweemererya anamathelana omwalana wira athelane ni mutthu mukina. (Matheyo 19:5, 6, 9) Vaavo maKristau animananiha aya opaka khula etthu eniwerya aya wira ekasamento aya ekhumele saana, annikhaliherya okhulupale wa Yehova.

19. Nihaana opaka exeeni okathi ninvonya ahu?

¹⁹ Okhala wira otheene ahu na atthu oottheka, ikwaha sikina ninnipaka itthu sinimunanara Yehova. Mwaha woosuwela eyo, Yehova oonivaha mukuttho wowoopola wa Kristu. Tivonto, okathi ninvonya ahu, nihaana onvekela Yehova wira onlevelele. (1 Yohani 2:1, 2) Ohiya wiixoonaka ohikhala etthu mwaha wa soovonya sahu, nihaana wiixutta etthu ni soovonya iyo. Nave nimphavela omwaattamela Yehova, yoowo onnilevelela ni onnikhaliherya wira nivikaniheke omurumeela.​—Esalimo 103:3.

20. Xeeni olelo-va, nintthuneya ahu okhaliherya okhulupale wa Yehova?

²⁰ Elapo esya, atthu otheene anrowa olamuleliwaka ni Yehova ni wiixutta iphiro sa xariya sa Muluku. (Yesaya 11:9) Olelo-va, nnoowerya wiixutta moota onuupuwela awe ni ele eniphavela awe wira nipakeke. Moohipisa, khuuvo mutthu onrowa ovaanyiha ehakhi ya olamulelo wa Muluku. Tivonto, nrowe nimananihe okhaliherya okhulupale wa Yehova, nimwiiwelelaka, omurumeela moororomeleya, ni weererya omutakiha mwa sotheene.