1, 2. Yehova onnimaaliha sai mohaawani mwahu motheene ni yooleiherya xeeni eri mBiibiliyani?

MMIRAVO mmosa onnuupuwelela yoolepa ya 1 aKorinto 7:28, yeeyo enihimya wira ale anithela “anophwanya maxakha a vathí-va”. Vano onnirowa ovaanela ni mutokweene oowuuluvala ni othenle, onamukoha so: “Anitaphulela exeeni moolumo oowi: ‘maxakha a vathí-va’ ni kinrowa owerya sai oxintta kathela vale?” Mutokweene ole ohinatthi waakhula nikoho nne, onnimuleela munna ole wira ohaana wuupuwela etthu ekina murummwa Paulo olempe awe oriki: Yehova “onninihakalaliha mohawani mwahu mothene” aahiiso mmaxakhani mwahu.​—2 aKorinto 1:3, 4.

² Ninnisuwela wira Tiithi ihu Yehova, onniniphenta ni onimaaliha mohaawani mwahu motheene. Waaniheryasa munnuupuwela okathi Yehova ookhalihenryaweni ni woolakiheryani orumeelaka Nuulumo nawe. Tivonto, ntoko  aakhalihenrya awe arumeyi awe khalai, owo onniphavela onikhaliherya.​—Mmusome Yeremiya 29:11, 12.

3. Mwaha ola, ninrowa othokorerya makoho xeeni?

³ Okhala wene, vannikhweya ovilela mixankiho akhala wira ninnimusuwela ole onikumiherya. Masi, xeeni ninkhalana ahu mixankiho mukasamentoni aahiiso vatthokoni vahu? Matakiheryo a khalai ni a mahiku ala, anrowa onimaaliha sai? Vano nrowe naakhule makoho ala wira noone moota woovilela mixankiho.

4, 5. Mixankiho xeeni sinaaphwanya anamathelana?

⁴ Yehova aahimpaka muthiyana oopacerya Eva khunvaha Adamu wira okhale mwaarawe. Nto Yehova aahimmye so: “Tivó mulopwana onahiyawe atithi awe n’ame awe, anakhala vamosá ni mwar’awe: òwanli aya enakhala ntoko mutthu mmosaru pahi”. (Maphattuwelo 2:24) Okhala wira muhoolo mwaya yaahittheka, otheene ahu olelo-va naatthu oohimalela. (aRoma 3:23) Mwaha wa yeeyo, vaavo mulopwana ni muthiyana anithelana aya, annikhalana mixankiho. Mwa ntakiheryo, ohinatthi otheliwa, muthiyana aatthara malakiheryo a anamuyari awe. Masi Nuulumo na Muluku ninhimya wira nuumala otheliwa, iyawe tonikhala muru wa mwaarawe. (1 aKorinto 11:3) Nto mulopwana pooti onvila waavaha malakiheryo amwaarawe. Nave muthiyana pooti onvila otthara malakiheryo a iyawe, masi onatthara malakiheryo a anamuyari awe. Nave-tho, anamuyari a anamathelana, pooti okumiherya mixankiho mukasamentoni mwa anaaya, nto eyo pooti okumiherya maxakha.

⁵ Nave-tho, okhala wene muthiyana arupala, anamathelana awo annihakalala. Hata vari siiso, awo annixanka. Maana khanisuwela akhala wira erukulu eyo enookhumela saana aahiiso akhala wira mwaana onookhalana ekumi yooloka. Nave annisuwela wira mwaana owo onimuncererya miritti saya. Nuumala mwaana oyariwa, pooti otthuneyaka anamathelana opaka marukunuxo makina. Waaniheryasa, maama owo onoovirihaka okathi munceene omukhapelelaka mwanawe. Tivonto, anamathelana awo pooti ohikhapelelanaka ntoko siira aya khalai. Nave miritti sa tiithi owo sinimuncerereya. Maana ohaana onvaha mwaarawe ni mwanawe itthu sinaathowa.

6-8. Anamathelana ahiniyara anoonela sai?

⁶ Anamathelana akina annikhalana mixankiho sikina. Awo pooti wunlela okhalana anamwane, masi ahinayara. Nto vaavo muthiyana ohinirupala awe, owo onnixanka vanceene. (Miruku 13:12) Khalai, athiyana yaanivaha efaita yuulupale otheliwa ni waayara anamwane. Ti maana aya Rakheli, mwaarawe Yakobe, aaxankale awe vanceene mwaha woohiyara, nnaamwi muulupale awe aayara. (Maphattuwelo 30:1, 2) Olelo-va, ilapo sikina onnivahiwa efaita yuulupale waayara anamwane anceene. Atthu a ilapo iyo, annaakoha mamisionaario nthowa naya ahiniyara aya. Vaavo mamisionaario anaatthokiherya aya etthu eniwiiriha  ohaayara anamwane, atthu akina anihimya wira: “Nnimoovekelelani wira Muluku oovaheeni anamwane!”

⁷ Nrowe noone ntakiheryo nikina. Murokora mmosa a wInglaterra onniphavela oyara. Nto nuumala woona wira khonikhala-khala oyaraka olumwenku ola, owo onnixankiheya vanceene. Nto owo ni iyawe yaahithanla omulepiha mwaana wira okhale awaya. Masi ikwaha sikina onnixanka. Owo onihimya wira: “Koosuwela wira omulepiha mwaana wira okhale awihu khonlikana ni omuyara”.

⁸ Biibiliya onihimya wira muthiyana “onimopowa mwaha wo wayara an’awe”. (1 Timótheyo 2:15) Nto, yoolepa ela enitaphulela exeeni? Khenitaphulela wira waayara anamwane toniphwanyiha okumi woohimala. Masi enitaphulela wira maama onnaatteliwa miteko maana ohaana waakhapelela anaawe ni etthoko awe. Nto eyo ennimukhaliherya osyaka waapa aahiiso wiikeliha myaha sihinimwiira mpantta. (1 Timótheyo 5:13) Hata vari siiso, owo onookhalana mixankiho mukasamentoni aahiiso vatthokoni vawe.

9. Mixankiho xeeni sikina sinaaphwanya anamathelana olelo-va?

⁹ Anamathelana annixanka vanceene akhwa ole othelanne aya. Vano ahaana ovilela, nnaamwi yahuupuwela wira yaamwaakhumelela ehasara eyo. Mwaha woomukupali natiri a ohihimuxiwa, maKristau anniphwanya nimaaliho nuulupale. (Yohani 5:28, 29) Olelo-va, anatiri a Tiithi ihu Yehova, anninimaaliha vanceene okathi wa mixankiho. Nto nrowe niwehe moota arumeyi akina a Yehova yaalipihiwa aya ni moota eyo yaakhalihenrya aya.

10. Ana aaphwannye sai nimaaliho? (Nwehe elatarato yoopacerya.)

¹⁰ Nrowe nithokorerye ele yaamukhumelenle Ana, yoowo aatepa ophentiwa ni Elikana. Ana aaniphavela waayara anamwane, masi khaayara. Nave Elikana aahikhalana muthiyana mukina iitthaniwa Penina, yoowo ahaareere oyara. (Mmusome 1 Samuweli 1:4-7.) Penina aanitepa omuxankiha Ana okhala wira aaninveeha “iyaakha sothene” mwaha woohiyara. Eyo yaanimuhoma Ana vanceene. Exeeni aapanke awe wira ophwanye nimaaliho? Ana aahinvekela Yehova. Nave Ana aahiviriha okathi munceene ovekelaka mpaani mwa Yehova. Nto aahinvekela Yehova wira onvahe mwaana mwaamulopwana, ni aanikupali wira Yehova aamunvaha. Nuumala ovekela, aahihakalala maana Biibiliya onihimya wira “owitho wawe wahimukokola”. (1 Samuweli 1:12, 17, 18) Ana aanisuwela wira Yehova aamunvaha mwaana aahiiso ommaaliha mwa enamuna ekina.

11. Nivekelo ninnimaaliha sai?

 ¹¹ Okhala wira na atthu oohimalela ni ninkhala olumwenku ola wa Satana, nnookhalanaka mixankiho. (1 Yohani 5:19) Nto exeeni enrowa onimaaliha? Nihaana onvekela Yehova “Muluku onnihakalaliha inamuna sothene”. Eyo ti etthu Ana aapanke awe. Owo aahimuleela Yehova etthu yaamuxankiha ni aahimuxonttela wira omukhaliherye. Moolikanasa, nihaana omuxonttela Yehova wira onikhaliherye, nimuleelaka etthu ene ennixankiha ohiya olavula paahi mixankiho sahu.—aFilipi 4:6, 7.

12. Exeeni yaamukhalihenrye Ana ohakalala nnaamwi aarina mixankiho?

¹² Hiyo pooti oriipiwa murima vanceene akhala wira khanniyara aahiiso ohookhwa ole onimphenta ahu. Hata vari siiso, nnoophwanya nimaaliho. Nrowe nithokorerye ntakiheryo nikina na Ana, yoowo aakhanle mahiku a Yesu. Nuuvira iyaakha 7 sa ekasamento awe, iyawe aahikhwa. Nave khaarina anamwane. Exeeni yaamukhalihenrye? Biibiliya onihimya wira: “Khaleva empa ya Muluku”. Nnaamwi Ana aarina iyaakha 84, owo aanirowa empa ya Yehova wira anvekele ni omukokhorela. (Luka 2:37) Eyo yaahimmaaliha ni omuhakalaliha nnaamwi aarina mixankiho.

13. Vaavo amusi ahu anninyoonyiha aya, apatthani eekeekhai annimaaliha sai?

¹³ Nave-tho, apatthani eekeekhai a mmulokoni anoowerya onimaaliha. (Miruku 18:24) Okathi Paula aarina awe iyaakha 5, maama awe aahihiya omurumeela Yehova. Nto Paula aahiriipiwa murima vanceene ni aahixankiheya. Masi pioneera oniitthaniwa Ann aahimulipiha Paula ni moophenta aahimuthokorerya saana. Nto Paula onitthokiherya so: “Nnaamwi miyo ni Ann nihaakhanle apatthani, kaanoona wira aanikiphenta ni aaphavela okikhaliheya. Nto eyo yookikhaliherya ovikaniha omurumeela Yehova”. Muhoolo  mwaya, maama awe Paula aahitthikela mmulokoni, nto eyo yaahimuhakalaliha Paula vanceene. Nave Ann onnihakalala omukhaliherya Paula ovikaniha omurumeela Yehova.

14. Waamaaliha akina onniphwanyiha mureerelo xeeni?

¹⁴ Waakhaliherya atthu akina ni miteko sooreera, onninikhaliherya oliyala mixankiho sahu. Mwa ntakiheryo, arokora anceene ootheliwa ni oohitheliwa, annisuwela wira vaavo anaalaleerya aya atthu ihapari sooreera sa Omwene, anivara vamosa ni Yehova, apakaka yootthuna awe. Nto eyo ennaahakalaliha. Tthiri, otheene ahu nnoowerya waathokorerya akina naalaleeryaka ihapari sooreera. Nave okathi nnaareerela ahu murima anna ni arokora, ninnaataana ni awo. (aFilipi 2:4) Eyo ti etthu aapanke awe murummwa Paulo. Owo aahaakhapelela akina “ntoko muthiyana onakhapelelawe  an’awe”. Nave-tho, Paulo aahaalipiha ni waamaaliha annawe “ntoko tithi [oniira awe] n’an’awe”.​—Mmusome 1 aTesalonika 2:7, 11, 12.

15. Tani arina muritti wa owiixuttiha anamwane voohimya sa Yehova?

¹⁵ Ninrowa omaaliha sai imusi mmulokoni? Okathi mukina ale a niinaano pooti onivekela wira niwiixuttiheke anaaya voohimya sa Yehova. Tthiri Biibiliya onnooniherya wira anamuyari tavahiwe muritti wa owiixuttiha ni waalaka anaaya. (Miruku 23:22; aÉfeso 6:1-4) Hata atthu akina akhaliheryaka, ti vooloka anamuyari owiixuttiha mmansaya anaaya. Maana anamuyari ahaana ovaanela ni anaaya ikwaha sinceene.

16. Nuupuweleke exeeni vaavo ninwiixuttiha ahu anamwane?

¹⁶ Akhala wira anamuyari anninivekela wira naasomiheke anaaya Biibiliya, ti vooloka wuupuwela wira khanrina owerya ntoko anamuyari aya. Okathi mukina, ninniwiixuttiha anamwane yaawo anamuyari aya ahinimurumeela Yehova. Nto vaavo nnaasomiha ahu anamwane ahikhanle awihu, ti vamiruku waasomiha owannyeya, anamuyari aya aahiiso Munna oolipa momunepani ori ene vaavo aahiiso asomeke opuro onvira-viriwa. Nto eyo enookhaliherya ohiwiiriha atthu akina wuupuwela itthu soohiloka. Muhoolo mwaya, woonasa wene anamuyari aya pooti owerya owiixuttiha anaaya voohimya sa Yehova.

17. Anamwane aniwerya sai waamaaliha amusi aya?

¹⁷ Amiravo yaale yiixuntte omphenta Yehova, anoowerya waamaaliha ni waalipiha amusi aya. Moota xeeni? Yaattittimihaka ni waakhaliherya. Nave-tho, vaavo amiravo anivikaniha aya omuroromela Yehova, eyo pooti waalipiha amusi aya. Ehinatthi epula ya Mutaaseke, Lameki aanimurumeela Yehova. Olavulaka sa Nowe, owo aahimmye so: “Mwan’ola ononikurunuxa murima wa miteko sowoma sinivarahu nilimaka etthaya etakhalihiwe n’Apwiya”. Eprofesia ela, yaahiiraneya nuuvira Mutaaseke, vaavo Yehova aamalinha awe otakhala valaponi. (Maphattuwelo 5:29; 8:21) Olelo-va, anamwane anivikaniha omuroromela Yehova, annaamaaliha amusi aya. Maana annaakhaliherya amusi aya ovilela mixankiho sa mahiku ala ni sa muhoolo.

18. Exeeni enrowa onikhaliherya ovilela nnaamwi nihaawaka?

¹⁸ Vaavo olelo-va arumeyi a Yehova anivekela aya, wuupuwelela matakiheryo a mBiibiliyani ni waathanla apatthani ooloka mmulokoni, anniphwanya nimaaliho nuulupale. (Musome Esalimo 145:18, 19.) Tthiri, noosuwela wira okathi wotheene, Yehova onninimaaliha ni onrowa onikhaliherya ovilela ohaawa wahu!