1. Ninrowa omutakiha sai Tiithi ahu oophenta Yehova?

YEHOVA onniniphenta vanceene. (Yoh. 3:16) Nave hiyo nimphavela omutakiha Yehova Tiithi ihu oophenta. Wira nipake eyo nihaana okhala atthu oothunku, ‘òwìwanana ni okhupanyeryana’ mukina ni mukhwaawe, otepexa wene “amus’ihu òwamini”. (1 Ped. 3:8; aGal. 6:10) Vaavo anna ni arokora anwanana aya mixankiho nihaana waakhaliherya.

2. Mwaha ola, ninrowa othokorerya exeeni?

² Khula mutthu oniphavela omurumeela Yehova onookumanana mixankiho. (Mar. 10:29, 30) Nave vaavo olumwenku ola onrowa aya otepaka waattamela wanikisa, mixankiho sahu sinrowa otepaka. Nto nihaana opaka exeeni wira nikhaliheryane mukina ni mukhwaawe? Nrowe nthokorerye yowiiraneya ya Lothi, Yobi ni Nowemi wira noone etthu nikhanle ahu oowiixutta. Nuumala-vo, ninrowa othokorerya mixankiho anna ni arokora akina aniwanana ni moota nikhanle ahu oowaakhaliherya.

3. Moovarihana ni 2 Pedru 2:7, 8, yoothanla xeeni yoohiloka Lothi aapanke awe, ni exeeni yaakhumelenle?

³ Lothi aahipaka yoothanla yoohiloka vaavo aathanlale awe othaamela oSodoma. Nnaamwi epooma ele yaari yooloka, atthu yaakhala epooma ele yaanirupihana moohiloka ni yaari ootakhala. (Mmusome 2 Pedru 2:7, 8.) Epooma ele yaari yoothaaciri, masi Lothi saahimukhumelela mixankiho sinceene mwaha woothaamela oSodoma. (Maph. 13:8-13; 14:12) Woonasa wene, mwaarawe Lothi aahitepa osiveliwa mihakhu aahiiso atthu a elapo ele yaawo yahaamwiiwelela Yehova. Nto okathi Muluku aapwetenxe awe ni mooro epooma ele, mwaarawe Lothi aahikhwa mwaha  woohiiwelela malakiheryo a malaikha. Vano, nkahaya nwuupuwele anamwane anli axithiyana a Lothi. Awo yaanamorari ni alopwana ale yaakhwiiye epooma ele ya oSodoma. Nave Lothi aahiyeleela empa awe, mihakhu sawe ni mooriipiha murima amwaarawe yaahikhwa. (Maph. 19:12-14, 17, 26) Niireke okathi ole wooxankiha Yehova aahihiya ompixerya murima Lothi? Nnaari.

4. Yehova ampixenrye sai murima Lothi? (Nwehe elatarato ya ekaapa.)

⁴ Nnaamwi aari Lothi aathanlale orowa okhala oSodoma, moopixa murima Yehova aahiruma malaikha orowa omoopola Lothi ni emusi awe. Malaikha ale yaahimuleela Lothi wira aahaana okhuma mowaakuveya. Masi ohiya opaka ele malaikha yaahimmye aya, Biibiliya onihimya wira Lothi “anipisa”. Nto malaikha ale yaahinvarela ntata owo ni emusi awe khwaakumiherya ota wa epooma ele. (Maph. 19:15, 16) Moottharelana, malaikha ale yaahimuleela wira aahaana otthyawela muttetthe waattamenle omwaako. Masi ohiya omwiiwelela Yehova, Lothi aavekenle otthyawela epooma yaattamenle oSodoma. (Maph. 19:17-20) Moopixa murima Yehova aahimuhiya Lothi otthyawelaka epooma ele aavekenle awe. Muhoolo mwaya, Lothi aahoova vanceene mpakha orowa okhala opuro ole Yehova aamulenle awe wanipacerya. (Maph. 19:30) Tthiri Yehova aanimpixerya murima Lothi! Ninrowa omutakiha sai Yehova?

5-6. Vaavo nimmutakiha ahu Muluku, ninrowa ovarihela sai muteko malakiheryo ari 1 aTesalonika 5:14?

⁵ Ntoko Lothi, anna akina pooti wiikumiherya maxakha mwaha wa soothanla soohiloka apanke aya. Nto akhala wira eyo enookhumelela, ninrowa opaka exeeni? Hiyo pooti omuleela munna owo aahiiso murokora wira onihepha ele aalale awe. (aGal. 6:7) Masi ohiya opaka eyo, nihaana omukhaliherya mwa enamuna yooloka. Tthiri vanrowa okhala vooloka omukhaliherya mwa enamuna Yehova aamukhalihenrye awe Lothi. Moota xeeni?

⁶ Yehova khaarumme malaikha orowa omuleela Lothi wira otthyawe muttetthe ole paahi, masi-tho wira amukhaliherye otthyawa ehukhumu yaarowa okhumelela oSodoma. Moolikanasa, nihaana waaleela anna ni arokora akhala wira noosuwela wira annipaka etthu yoohiloka ekhanle oowaakumiherya maxakha. Nave nihaana wiimananiha waakhaliherya. Hata apisaka ovarihela muteko malakiheryo a mBiibiliyani nnaavaha ahu, nihaana waapixerya murima. Okathi owo vannireerela otakiha malaikha ale manli. Tthiri nihaana ovikaniha waakhaliherya anna ohiya paahi ni moolumo, masi ni miteko. (1 Yoh. 3:18) Okathi mukina, nihaana waavarela moono aahiiso waareerela murima naakhaliheryaka ovarihela muteko malakiheryo nnaavaha ahu.​—Mmusome 1 aTesalonika 5:14.

7. Ninrowa otakiha sai enamuna Yehova aamuthokorenrye awe Lothi?

⁷ Vanweryaneya Yehova owehexexa soovonya sa Lothi. Masi ohiya opaka eyo, muhoolo mwaya Yehova aahimuleela murummwa Pedru olepa wira Lothi aari naxariya. Tthiri ti voohakalaliha osuwela wira Yehova khonwehexexa itampi sahu! (Esal. 130:3) Ninrowa otakiha sai enamuna Yehova aamuthokorenrye awe Lothi? Nisyakaka owehexexa soovonya sa anna, masi niwehexexeke mikhalelo saya sooloka. Wira nipake eyo, nihaana waapixerya murima. Akhala wira nnimwaapixerya murima, woonasa wene animweemererya nikhaliheryo nnaavaha ahu.

8. Ninrowa owerya sai okhala atthu oothunku?

⁸ Yobi aahiviriha mixankiho sinceene, masi ohiya mwaha woopaka soothanla soohiloka ntoko Lothi. Yobi aahiyeleela mihakhu sawe  sotheene, ottittimihiwa wawe ni atthu akina ni okumi wooloka aarina awe. Etthu yootepa-tho oxankiha, owo aahikhweliwa anaawe otheene. Nnaamwi saamukhumelenle ihasara iyo sotheene, owo aanootheriwa ni apatthani awe araru yaarwiiye omuxukurya. Nto ohiya ommaaliha, apatthani awe ale khiyaarina othunku. Xeeni ahimoonelaka othunku? Mwaha woowi khiyaaphavela osuwela itthu saamukhumelenle Yobi. Mwaha woopaka eyo, awo yaahikhalana moonelo woohiloka voohimya sa Yobi ni yaahimphukela mwa enamuna yootakhala. Ninrowa osyaka sai omorela muraakho ole wa apatthani araru a Yobi? Musuweleke wira Yehova paahi tonsuwela oratteene itthu sinimwiiranela mutthu owo. Nto mwiimananiheke onwiriyana saana vaavo onilavula awe. Ohiya paahi onwiriyana, muhaana weererya osuwela muxankiho awe. Akhala wira munoopaka eyo, munoowerya omoonela othunku mwekeekhai munna aahiiso murokora.

9. Othunku onrowa oniiriha osyaka exeeni ni nthowa xeeni?

⁹ Othunku onoonikhaliherya osyaka olaleya aahiiso owaapa atthu akina mwaha wa mixankiho sinaaphwanya. Waapa khonlipiha muloko, masi onookawanya. (Mir. 20:19; aRom. 14:19) Mutthu onilavula ohuupuwenle, khonaareerela murima atthu akina. Nto moolumo awe pooti waawereiha murima anna ale arina mixankiho. (Mir. 12:18; aÉf. 4:31, 32) Tivonto vari aya vooloka opacerya wuupuwela nihinatthi olavula ni owehexexa mikhalelo sooloka sa munna owo ni wuupuwela moota nikhanle ahu oomukhaliherya ovilela muxankiho awe!

10. Yobi 6:2, 3, onniixuttiha exeeni?

¹⁰ Mmusome Yobi 6:2, 3. Okathi mukina Yobi aanilavula moolumo ‘òwali ni òlolo’. Muhoolo mwaya, Yobi aahithanana mwaha wa moolumo aalavunle awe wanipacerya. (Yobi 42:6) Ntoko Yobi, olelo-va munna aahiiso murokora  orina mixankiho pooti olavula etthu onrowa awe othanana muhoolo. Okathi owo nooneleke sai moolumo awe? Ohiya ompwapwela, nihaana omoonela othunku. Muupuweleke wira Yehova khoniphavela wira sinikhumeleleke mixankiho sooriipiha murima sinnikhumelela olelo-va. Tivonto, munna aahiiso murokora oororomeleya pooti olavula itthu soohiloka okathi oniwanana awe mixankiho. Owo pooti olavula itthu soohiloka voohimya sa Yehova aahiiso onlavula moohiloka. Nto okathi owo nihaakuveleke onanariwa aahiiso omphukela mwaha wa itthu olavunle awe.​—Mir. 19:11.

11. Axitokweene anrowa omutakiha sai Elihu?

¹¹ Okathi mukina, mutthu orina mixankiho vannireerela onvaha miruku aahiiso ompwapwela. (aGal. 6:1) Akhala wira nyuwo mwa mutokweene, enamuna xeeni yooloka ya opaka eyo? Enamuna yooloka omutakiha Elihu. Moothunku, Elihu aahinwiriyana saana vaavo Yobi aalavula awe mixankiho sawe. (Yobi 33:6, 7) Nave Elihu anvanhe miruku nuumala onwiriyana ni osuwela moonelo wa Yobi. Mwa enamuna emosaru, nyuwo axitokweene muhaana waawiriyana ni ephoole anna vaavo anilavula aya mixankiho saya ni ophavela osuwela moonelo aya. Akhala wira munoopaka eyo, woonasa wene miruku sanyu sinimwaavara murima.

12. Nowemi aari sai nuumala okhweliwa iyawe ni anaawe?

¹² Nowemi aari muthiyana oororomeleya ni amphenta Yehova. Masi, nuumala iyawe ni anaawe anli aaxilopwana okhwa, Nowemi aahixanka vanceene mpakha ophavela oturuka nsina nawe. Owo aaphavela wira iihaaniweke “Mara” nsina nintaphulela ‘Ohawa’. (Ruth. 1:3, 5, 20, 21) Okathi ole wooxankiha, Nowemi aakhala vamosa ni mwaara a mwanawe iihaniwa Ruthi. Ohiya paahi omukhaliherya Nowemi, Ruthi aanimmaaliha. Ni moolumo ookhweya masi anikhuma vamurimani, Ruthi ahooniherya omphenta ni omukhaliherya Nowemi.​—Ruth. 1:16, 17.

13. Xeeni ale akhweliwe ole yaathelanne aya anireerela aya okhaliheriwa?

¹³ Anna ni arokora akina annikhweliwa ole yaathelanne aya, nto nihaana waakhaliherya. Ekasamento enlikana ni miri miili sininnuwa opuro omosa. Vaavo iyaakha sinivira aya, mitatthaari saya sinnivitikeleleya ni sinnilipihana vanceene. Nto okathi mwiri mmosa onipheliwa awe khukhwa, mwiri mukina onnihaawa vanceene. Moolikanasa, vaavo mutthu onikhweliwa awe ole aathelanne awe, owo onniriipiwa murima okathi munceene. Mwa ntakiheryo, Paula, * okhweliwe iyawe mootutuxerya onihimya so: “Okumi aka waahiturukeya mowaakuveya, ni nkoona yoopaka. Miyo kaahikhweliwa mpatthani aka muulupalexa. Iyaka aari mutthu kaamuleelaka khula etthu. Naanihakalala hoothe ni aanikikhaliherya okathi wa mixankiho. Owo aanikiwiriyana okathi kaamuleela aka mixankiho saka. Okathi aakhwiiye awe, vaakhala ntoko wira mpantta mmosa wa erutthu aka waahikhwa”.

14-15. Ninrowa ommaaliha sai mutthu okhweliwe ole aathelanne awe?

¹⁴ Ninrowa ommaaliha sai mutthu okhweliwe ole aathelanne awe? Etthu yoopacerya nikhanle ahu oopaka ori ovaanelana hata muuliwaka muru aahiiso muhoonaka etthu yoohimya. Paula nimulavunle ahu onihimya so: “Kihoona wira okhwa onniwiiriha atthu ohoona etthu yoopaka aahiiso yoohimya. Awo annixanka yuupuwelaka wira yalavula etthu enoonveeha ole okhweliwe. Masi vannireerela olavula etthu hata ehilokaka ohiya omaala paahi”. Woonasa wene, mutthu ole okhweliwe khonlipelela wira nnoohimya etthu enrowa oturuka okumi awe okathi ene yoole. Paula oni: “Vaavo apatthani aka anihimya aya  wira ‘kinnoona othunku’ eyo ennikimaaliha vanceene”.

¹⁵ William yoowo okhweliwe mwaarawe iyaakha vakhaani sivinre onihimya so: “Vannikisivela vaavo atthu akina anilavula aya itthu sooloka voohimya sa mwaaraka. Eyo ennikooniherya wira aaniphentiwa ni ottittimihiwa. Nikhaliheryo nno, ninnikimaaliha vanceene. Kinnihakalala okathi ankikhaliherya aya, mwaha woowi kaanimphenta vanceene mwaaraka ni aari mutthu ootepa otthuneya mookumini mwaka”. Naamukhweli oniihaniwa Bianca onihimya so: “Kinniphwanya nimaaliho vaavo atthu akina anivekela aya ni osoma soolepa sa mBiibiliyani ni miyo. Nave kinnilipa vaavo anilavula aya voohimya sa iyaka ni vaavo anikiwiriyana aya kaalavulaka itthu iyaka aapaka awe”.

16. (a) Nihaana ovikaniha owiirela exeeni ale akhweliwe? (b) Moovarihana ni Yakobo 1:27, muritti xeeni nrina ahu?

¹⁶ Nimutakihaka Ruthi yoowo aamukhalihenrye naamukhweli Nowemi, hiyo nihaana ovikaniha waakhaliherya ale akhweliwe ole yaathelanne aya. Paula nimulavunle ahu, onihimya so: “Moohipisa nuumala iyaka okhwa, kaahikhaliheriwa vanceene. Masi vaavo okathi onivira aya atthu awo annitthikela ovara miteko saya sa khula nihiku. Hata vaari siiso, okumi aka waahiturukeya moomalela. Ti vooreera vaavo atthu ansuwela aya wira ale akhweliwe annireerela okhaliheriwa hata oviraka okathi aahiiso iyaakha sinceene”. Ekeekhai wira khula mutthu orina mukhalelo awe. Akina annaakuvela olimalela makhalelo aya masya. Masi atthu akina, vaavo anipaka aya etthu yaapaka aya ni ole yaathelanne  aya annipacerya omuupuwela ni anniriipiwa murima. Nave khula mutthu orina enamuna awe ya oriipiwa murima mwaha wookhweliwa. Nto, nihaana wuupuwela wira Yehova oonivaha muritti ni eparakha ya waamaliha ale akhweliwe ole yaathelanne aya.​—Mmusome Yakobo 1:27.

17. Xeeni vanireerela aya waakhaliherya atthu ale ahiiwale ni ole yaathelanne aya?

¹⁷ Atthu akina annixanka ni oriipiwa murima mwaha woohiiwa ni ole yaathelanne aya. Nwehe ntakiheryo na Joyce yoowo ohiiwale ni iyawe, khumukuxa muthiyana mukina. Joyce onihimya wira: “Owereya onikhumelela mwaha woohiiwa ti wootepa owereya ovikana owereya kaarowa aka okhalana vaakhanle wira iyaka aarimookhwa. Vaakhanle wira iyaka aarimookhwa mwaha wa ehasara aahiiso oretta, murima waamukuuma. Masi, iyaka oroolakelela okihiya. Tthiri khoreere okiramusa ni okuulihiha muru”.

18. Ninrowa waakhaliherya sai ale ahiiwale ni ole yaathelanne aya?

¹⁸ Vaavo nnaareerela ahu murima ale ahiiwale ni ole yaathelanne aya ninnooniherya wira ninnaaphenta. Mwaha wa omeekha waaphwannye, awo anniphavela okhalana apatthani. (Mir. 17:17) Munrowa okhala sai mpatthani aya ooloka? Muhaana waalattula wira mwalye hoothe. Nave nyuwo pooti otthekulana atthu awo aahiiso orowa olaleerya vamosa. Ohiya-vo, okathi mukina nyuwo pooti waalattula okathi woomulompa Muluku vatthokoni vanyu. Akhala wira munoopaka eyo, munoomuhakalaliha Yehova, yoowo onkhala “vakhiviru n’ale òtemwa” ni “onniwakiha athiyana anamukhweli”.​—Esal. 34:19; 68:6.

19. Nuupuwelaka ele 1 Pedru 3:8 onihimya awe, exeeni mulakenle anyu opaka?

¹⁹ Moohipisa, Omwene wa Muluku onrowa olamulelaka valaponi, nto “sohawa sivinre sinoliyaliwa”. Tthiri okathi owo “itthu sa khalai khasinupuweliwa-tho, itthu sivinre sinoliyaliwa khuluwi”. (Yes. 65:16, 17) Nlipelelaka ophiya okathi owo, nihaana ovikaniha okhaliheryana mukina ni mukhwaawe. Tivonto otheene ahu nrowe nooniherye ni miteko sahu wira ninnaaphenta anna ni arokora otheene.​—Mmusome 1 Pedru 3:8.