1. Moovarihana ni aKolosi 2:4, 8, Satana onipaka exeeni wira onikhalihe ipottha sawe?

SATANA oniphavela wira nihiye omphenta ni omwiiwelela Yehova. Wira opake eyo, Satana onneererya ohonona muupuwelo ahu, eyo piiyo, oniiriha wuupuwelaka ntoko owo onuupuwela awe. Enamuna emosa onirumeela awe wira onihapuxe ori orumeela soophavela sahu.​—Mmusome aKolosi 2:4, 8.

2-3. (a) Xeeni vanireerela aya ovaha ephoole masu a Paulo ari aKolosi 2:8? (b) Mwaha ola, ninrowa othokorerya exeeni?

² Niireke tthiri vanniweryaneya mutthu owokiwa ni Satana? Aayo! Musuweleke wira, moolumo a Paulo ari aKolosi 2:8 khaalepenle atthu oohaamini. Owo aalepenle maKristau yaathanliwe ni munepa wootteela. (aKol. 1:2, 5) Satana aaneererya waawoka maKristau ale, nave olelo-va, owo onneererya waahapuxa maKristau a ekeekhai. (1 aKor. 10:12) Mwaha wa xeeni? Mwaha woowi Satana ooriheliwa vathi-va, nto onnipaka sotheene oniwerya awe wira aawoke arumeyi oororomeleya a Muluku. (Wis. 12:9, 12, 17) Nave, ninkhala okathi atthu ootakhala murima ni owootha “anovira [aya] etepaka”.​—2 Tim. 3:1, 13.

³ Mwaha ola, ninrowa othokorerya moota Satana onirumeela awe “molumo òwòtotha” wira ohonone muupuwelo ahu. Nave, ninrowa oweha miraakho miraru ‘solavilavi’ Satana onirumeela awe. (aÉf. 6:11) Masi, mwaha onittharelana ninrowa woona moota nikhanle ahu oolokiherya muupuwelo ahu, akhala wira woohapuxiwa ni miraakho sa Satana. Wanipacerya, ninrowa woona etthu Satana aarumenle awe wira aawoke aIsarayeli nuumala okela Elapo Yooleiheriwa ni etthu nniixutta ahu.

4-6. Moovarihana ni Otumererya 11:10-15, nuumala okela Elapo Yooleiheriwa inamuna xeeni isya sa olima aIsarayeli yaarowa aya wiixutta?

⁴ Moolavilavi, Satana aahiwiiriha aIsarayeli waakokhorela amuluku eethiru. Moota xeeni? Satana aahisuwela wira aIsarayeli yaaniphavela yoolya, nto aahittottela mureerelo yoophavela aya eyo. Mwa ntakiheryo, nuumala aIsarayeli okela Elapo Yooleiheriwa, awo yaahaana wiixutta inamuna isya sa olima. Maana okathi yaari aya wEjiitu, imatta saya yaakhuwari ni maasi a muro Nilo. Masi Elapo ele Yooleiheriwa, imatta saya khiyaakhuwari ni maasi a muro Nilo, maana saakhuwariwa ni epula ni okame, mwaha woowi, Elapo Yooleiheriwa khiwaakhanle muro muulupale wira akhuwariki imatta saya. (Mmusome Otumererya 11:10-15; Yes. 18:4, 5) Nto, khivaakhweya wiixutta inamuna iyo isya sa olima, maana aIsarayeli anceene yaasuwela saana olima yaahikhwa moothakoni.

⁵ Yehova aahaaleela aIsarayeli wira makhalelo aya yaahiturukeya. Nto aahaalopola oriki: “Mwipasope: murim’anyu ohotothiwé n’amuluku akina. Tivó muhihiyé owìwelela Apwiy’anyu, muharumeleké amuluku akina, muhakokhoreleké”. (Otum. 11:16, 17) Hiyo pooti wuupuwelaka wira nlopolo na Yehova khinaavarihana ni olima. Nto xeeni Yehova olavulaka sa waakokhorela amuluku a ethiru okathi omosaru onalavula sa wiixutta inamuna isya sa olima?

⁶ Woonasa wene, Yehova aanisuwela wira aIsarayeli yaamweehereriwa ophavela wiixutta inamuna soolima sa atthu yaattamanne aya a oKanani, yaawo yahaamurumeela Yehova. Tthiri, aKaanani yaanisuwela oratteene moota yaalimmwa aya elapo ele. Nto aIsarayeli yaamwiixuttihiwaka ni atthu awo inamuna  soolima, masi yaahikhala etthu yoowoopiha. Itthu sotheene aKaanani yaapaka aya, saavarihana ni omukokhorela Bayali. Maana, yuupuwela wira Bayali taari mwaneene erimu ni taarupiha epula. Yehova khaaphavela wira atthu awe ahapuxiwe ni sookupali iyo sowootha. Masi mooriipiha murima, aIsarayeli yaamakela omukokhorela Bayali. (Moth. 25:3, 5; Makh. 2:13; 1 Mam. 18:18) Vano, nrowe niwehe miraakho Satana arumenle awe wira owiirihe aIsarayeli okhala ipottha.

7. Waamini wa aIsarayeli weehereriwe sai nuumala okela Elapo Yooleiheriwa?

⁷ Muraakho woopacerya Satana aarumenle awe waari ottottela mureerelo soophavela sa aIsarayeli. AIsarayeli yaaphavela wira erupeke epula wira ekhuwariki imatta saya. Mweeri wa Abril mpakha Setembro, epula yaarupa vakhaani Elapo ele Yooleiheriwa. Wira aIsarayeli aruwerye yaalipa ni epula yaapacerya orupa mweeri wa Outubro. Nto Satana aahiwiiriha aIsarayeli wuupuwelaka wira yaahaana otakiha soolema soohiloka sa atthu ale yahaamukokhorela Yehova wira aruwerye. Maana, atthu a elapo ele yuupuwela wira amuluku aya yaamurupiha epula akhala wira yampaka isatakha aahiiso inamuna sikina sa okokhorela. Mooriipiha murima, yaahikhala aIsarayeli yahaamwaamini Yehova. Nto mwaha wowoova wira wanvira okathi munceene ehirupaka epula, awo yaahipacerya wiirela mpantta soolema soohiloka saavarihana ni omukokhorela Bayali.

8. Muraakho xeeni wa nenli Satana aarumenle awe? Mutthokiherye.

⁸ Muraakho wa nenli Satana aarumenle awe wira aawoke aIsarayeli waari waatumererya orupihana woohiloka. Atthu yaakhala oKanani yanaakokhorela amuluku aya eethiru arumeelaka orupihana woohiloka ni woohiirya. Alopwana ni athiyana yaanirupihana mutem-plo aahiiso mapuro aya ookokhorela. Nave, yaaneemererya orupihana alopwanaru aahiiso athiyanaru ni yaanirupihana mwa inamuna sikina soohiloka! (Otum. 23:17, 18; 1 Mam. 14:24) AKaanani yaakupali wira itthu iyo soohiloka saaniwiiriha amuluku aya oruweriha etthaya. Nto aIsarayeli anceene, yaahipacerya otthara soolema iyo sa orupihana woohiloka. Mwaha woopaka eyo, yaahipacerya waakokhorela amuluku eethiru. Moohaanyiherya, aIsarayeli yaahikhala ipottha sa Satana.

9. Moovarihana ni Hoseya 2:18, 19, Satana aawiirinhe sai aIsarayeli omuliyala Yehova?

⁹ Muraakho wa neeraru Satana aarumenle awe, waari owiiriha aIsarayeli omuliyala Yehova. Mahiku a Profeta Yeremiya, Yehova aahimmye wira maprofeta oowootha yaaniwiiriha atthu awe oliyala nsina na Yehova “mwaha wa muluku Bayali”. (Yer. 23:27) Woonasa wene, atthu a Muluku yaahihiya orumeela nsina na Yehova, anarantteliha ni nsina na Bayali, nenno nintaphulela “Mwaneene” wala “Pwiya”. Eyo yaahiwiiriha aIsarayeli ohisuwela ovirikana waakhanle eriyari ya Yehova ni Bayali. Nave aIsarayeli yaanitakanxerya soolema sa okokhorela woohiloka ni okokhorela wekeekhai.​—Mmusome Hoseya 2:18, 19.

10. Olelo-va, miraakho xeeni Satana onirumeela awe?

¹⁰ Olelo-va, Satana onnirumeela miraakho arumenle awe khalai. Owo onnaawoka atthu orumeelaka soophavela saya, orupihana woohiloka ni owiiriha atthu omuliyala Yehova. Wanipacerya, nrowe niwehe moota Satana oniwiiriha awe atthu omuliyala Yehova.

11. Satana oniwiiriha sai atthu omuliyala Yehova?

 ¹¹ Satana onniwiiriha atthu omuliyala Yehova. Nuumala okhwa arummwa a Yesu, atthu akina yiihimya okhala maKristau, yaahipacerya wiixuttiha itthu sowoothiwa. (Mit. 20:29, 30; 2 aTes. 2:3) Atthu awo, yaahipacerya waaliyaliha atthu ekeekhai voohimya sa Muluku. Mwa ntakiheryo, aBiibiliya yaataphulela aya yaanikumiha nsina na Yehova anarantteliha ni nuulumo noowi “Apwiya”. Mwaha wookumiha nsina na Yehova mBiibiliyani, atthu khanwerya osuwela ovirikana okhanle eriyari ya Yehova ni “mapwiya” makina anilavuliwa mBiibiliyani. (1 aKor. 8:5) Awo anirumeela nuulumo nimosa noowi “Apwiya” amuhimyaka Yehova ni Yesu. Eyo enniwiiriha atthu waavila osuwela ovirikana okhanle eriyari ya Yehova ni Yesu. (Yoh. 17:3) Nave, eyo enniwiiriha atthu okupali yowiixuttiha ya Amuluku Araru, yeeyo Biibiliya ohiniixuttiha awe. Mwaha woopaka eyo, enniwiiriha atthu anceene wuupuwelaka wira Muluku khonsuwanyeya ni khivaniweryaneya omusuwela. Tthiri iwo wootha wuulupale!​—Mit. 17:27.

12. Etiini yoowootha entumererya exeeni? Moovarihana ni aRoma 1:28-31, exeeni enikhumelela?

¹² Satana onnaatumererya atthu orupihana woohiloka. Okathi wa aIsarayeli a khalai, Satana aanirumeela etiini yoowootha wira aatumererye atthu orupihana woohiloka. Olelo-va, owo onnipaka etthu emosaru. Mwa ntakiheryo, etiini yoowootha enniweemererya atthu orupihana woohiloka ni enniwiiriha wuupuwelaka wira khahiyo etampi. Mwaha woopaka eyo, atthu anceene aniihimya omurumeela Muluku, aahiya wiiwelela malamulo a Muluku. Epaphelo aalepenle awe aRoma, murummwa Paulo onnilavula sowiiraneya soohiloka mweettelo owo onikumiherya aya. (Mmusome aRoma 1:28-31.) Maana atthu anceene anniira “itthu sihimphwanela wiriwa” ntoko orupihana woohiloka ni orupihana alopwanaru aahiiso athiyanaru. (aRom. 1:24-27, 32; Wis. 2:20) Eyo ennooniherya otthuneya waya wiiwelela malamulo ni soowiixuttiha sa Biibiliya!

13. Muraakho xeeni Satana onirumeela awe?

¹³ Satana onnaahapuxa atthu orumeelaka soophavela saya. Otheene ahu, ninniphavela  wiixutta itthu wira niphwanyeke yoolya wira nikhapeleleke emusi ahu. (1 Tim. 5:8) Ikwaha sikina, ninniixutta itthu oxikola aahiiso wiimananiha osoma vanceene. Masi, nihaana okhalana ephoole. Mwaha woowi, ilapo sinceene khahiyo paahi siniwiixuttiha atthu itthu anireerela aya ovara, masi sinniwiixuttiha itthu sowoothiwa. Mwa ntakiheryo, maprusoore makina annaatumererya anaxikola wira ahikupaliki wira Muluku ookhala ni ahimukupaliki Biibiliya. Awo anniwiixuttiha wira atthu oosomexa anikupali wira itthu siroothatuwa. (aRom. 1:21-23) Nto soowiixuttiha iyo sinnivirikana ni osuwela wa Muluku.​—1 aKor. 1:19-21; 3:18-20.

14. Miruku sa apinaatamu sinikumiherya exeeni?

¹⁴ Miruku sa apinaatamu khasinivarihana ni malamulo a Yehova. Ohiya waakhaliherya atthu okhalana yoowiima ya munepa wa Muluku, osuwela wa apinaatamu onaatumererya atthu ‘wettihiwa ni makhalelo aya òtakhala’. (aGal. 5:19-23) Nto eyo enniwiiriha atthu okhala oowiixinnuwiha, owiitthuna ni “wiiphentaka mmansaya”. (2 Tim. 3:2-4, Waataana wa Naanaano) Mikhalelo iyo sinnivirikana ni iye Muluku oniphavela awe wira arumeyi awe akhalaneke. Maana Muluku oniphavela wira arumeyi awe akhaleke oowiiyeviha ni oomaala. (2 Sam. 22:28) Mooriipiha murima, maKristau makina asomme wuniversidade aahapuxiwa ni muupuwelo wa apinaatamu. Vano nrowe niwehe matakiheryo vakhaani.

15-16. Yowiiraneya ya murokora enniixuttiha exeeni?

¹⁵ Murokora mmosa ovirinhe iyaakha 15 ovaraka muteko wa Muluku wa okathi wotheene ohimmye so: “Okhuma okathi kibatiziwe aka, kaamakela osoma ni wiiwa mixankiho sinikhumelela mwaha woorowa osoma wuniversidade.  Masi miyo nkiiwelela malakiheryo awo. Maana kuupuwela wira malakiheryo ale khiyaavareleya muteko mookumini mwaka”. Exeeni yaamukhumelenle murokora ole? Owo onihimya so: “Osoma wuniversidade waanikiiyerya okathi ni ikuru sinceene. Nnakhala nkaarina okathi woomusoma Biibiliya ni onvekela Yehova ntoko kaapaka aka okhuma khalai. Nave, nkaarina okathi woorowa olaleerya nnakhala olokiherya mithukumano. Nuumala woona wira osoma wuniversidade waanihonona waataana waka ni Yehova, kaahisuwela etthu yoopaka. Miyo kaahihiya osoma wuniversidade”.

¹⁶ Niireke osoma wuniversidade waahihonona muupuwelo wa murokora ole? Owo onaakhula wira: “Kinnuuliwa muru ohimya wira osoma wuniversidade wookiiriha omakela waaphukela atthu akina voohinthowa, otepexa wene anna ni arokora a mmulokoni. Miyo kaamakela oweha soovonya saya nto eyo yaanikiiriha waasyaka. Waahivira okathi munceene wira kituruke muupuwelo ole woohiloka. Yowiiraneya ele, yookiixuttiha wira ohiiwelela miruku ni malamulo Yehova onnivaha awe orumeelaka mutthenkeso awe onnikumiherya mixankiho. Yehova Tiithi aka oophenta, onnikisuwela oratteene ovikana moota kiniisuwela aka. Tthiri miyo kaahaana wiiwelela miruku iye sa Yehova!”

17. (a) Etthu xeeni nilakenle ahu opaka? (b) Mwaha onittharelana, ninrowa othokorerya exeeni?

¹⁷ Otheene ahu, noolakela ohikhalihiwa ipottha sa “molumo òwòtotha ni miruku sihikhanle etthu” sa olumwenku ola wa Satana. Muhikhala-khale mweemereryaka owokiwa ni miraakho sa Satana. (1 aKor. 3:18; 2 aKor. 2:11) Nave, muhimuhiye Satana owiirihakani omuliyala Yehova. Khula nihiku mweetteleke malamulo a Yehova. Nave-tho, muhimweemererye Satana owiirihakani ohiiwelela malakiheryo ni malamulo a Muluku. Nto muhaana opaka exeeni akhala wira moohapuxiwa ni muupuwelo wa olumwenku? Mwaha onittharelana, ninrowa woona moota Biibiliya onnikhaliherya awe ‘opwetexa’ soolema ni miyuupuwelo soohiloka.​—2 aKor. 10:4, 5.