1. Enamuna xeeni yooloka ya woova, ni xeeni vari aya vooloka ale animphenta Yehova okhalana enamuna eyo ya woova?

MAKRISTAU ekeekhai annimphenta vanceene Muluku ni annimoova. Atthu akina anuupuwela wira ophenta khonvarihana ni woova. Vaavo ninlavula ahu sa omoova Muluku, khonitaphulela ottettemela ohoolo wa Muluku. Vano, ninrowa othokorerya enamuna yooloka ya woova. Atthu arina enamuna eyo ya omoova Muluku, annimuttittimiha vanceene. Awo khanipaka nnakhala etthu emosa enrowa omunyoonya Tiithi aya a wiirimu mwaha woowi khaniphavela ohonona waataana waya ni yena.—Esal. 111:10; Mir. 8:13.

2. Moovarihana ni moolumo a Davidi ari Esalimo 86:11, itthu xeeni piili ninrowa ahu othokorerya?

² Musome Esalimo 86:11. Okathi munuupuwela anyu moolumo awo, munimoona oratteene wira Davidi aanisuwela otthuneya waya omoova ni omuttittimiha vanceene Yehova. Vano ninrowa othokorerya moota nikhanle ahu oovarihela muteko moolumo oowuupuxeriwa a nivekelo na Davidi mwa inamuna piili. Yoopacerya, ninrowa othokorerya mathowa anniiriha ottittimiha vanceene nsina na Muluku. Ya nenli, ninrowa othokorerya moota ninrowa ahu wooniherya khula nihiku wira ninnittittimiha nsina na Muluku.

3. Yowiiraneya xeeni yaamukhalihenrye Moise woova ni ottittimiha nsina na Muluku?

³ Nkahaya muupuwele moonelo wa Moise okathi akilaathale awe vamwala. Moottharelana onaweha ovuwa wa Yehova oviraka. Eliivuru Estudo Perispicaz enihimya so: “Vanikhala ntoko wira yoowoonihiwa ele yaari yootepa otikiniha ovikana sowoonihiwa sikina saakhumelenle Yesu Kristu ohinatthi orwa valaponi”. Moottharelana, Moise aahiiwa nlaikha nihimyaka wira: “Miyo k’Apwiya, Apwiya  Muluku òmoriwa ikharari ni òvilela, òpisa onanariwa, òrera murima ni òroromeleya. Miyo kinnarerela murima atthu n’an’aya n’osùlu aya mpakha oholo onkelelahu; miyo kinnileva sottheka saya”. (Okhum. 33:17-23; 34:5-7) Woonasa wene, Moise aanuupuwela yowoonihiwa ele okathi aaromola awe nsina na Yehova. Vanikhala ntoko wira eyo ti yaamwiirinhe Moise waaleela aIsarayeli wira muttittimiheke ni “wova nsina nla novuwa ni nowopiha n’Apwiya Muluku anyu”.—Otum. 28:58.

4. Exeeni enrowa onikhaliherya otepa omoova ni omuttittimiha Yehova?

⁴ Vaavo nnuupuwela ahu nsina na Yehova, ti vooloka omuupuwela mwaneene nsina nno. Nave nihaana wuupuwela mikhalelo sawe ntoko, owerya, ankhili, exariya ni ophenta. Wuupuwelela mikhalelo iyo, onoonikhaliherya otepa omoova ni omuttittimiha vanceene Yehova.—Esal. 77:12-16.

5-6. (a) Nsina na Muluku, nintaphulela exeeni? (b) Moovarihana ni Okhuma 3:13, 14 ni Yesaya 64:8, mwa inamuna xeeni Yehova oniiriha awe itthu okhumelela?

⁵ Nsina na Muluku nintaphulela exeeni? Asomi anceene anuupuwela wira nsina na Yehova nintaphulela wira “Owo Onniiriha Okhala”. Eyo enooniherya wira khiivo etthu ekhanle oomukhoottiherya Yehova opaka khula etthu oniphavela awe ni opaka yootthuna awe. Moota xeeni?

⁶ Yehova onniiriha itthu okhumelela, vaavo onipaka awe sotheene wira opake yootthuna awe. (Mmusome Okhuma 3:13, 14.) Ikwaha sinceene, iliivuru sahu sinninuupuxerya wuupuwelela mikhalelo ni omutthu wa Muluku. Nave, Yehova pooti owiiriha arumeyi awe okhala ele oniphavela awe wira opake yootthuna awe. (Mmusome Yesaya 64:8.) Mwa inamuna iyo, Yehova onniiriha wiiraneya yoolakela awe ni yootthuna awe. Tthiri, khiivo etthu ekhanle ookhoottiherya wiiraneya soolakela sa Yehova.—Yes. 46:10, 11.

7. Ninrowa olipiha sai omuxukhurela wahu Tiithi ahu a wiirimu?

⁷ Wuupuwelela etthu Tiithi ihu a wiirimu opanke awe ni onnikhaliherya awe opaka, enoonikhaliherya omuxukhurela vanceene. Mwa ntakiheryo, vaavo nnuupuwelela ahu itthu sotheene opattunxe awe, ninnitikinihiwa vanceene mwaha wa itthu iyo sootikiniha opanke awe.  (Esal. 8:4, 5) Nave vaavo nnuupuwelela ahu itthu Yehova onikhalihenrye awe opaka wira nivare muteko awe, eyo ennincererya omuttittimiha wahu. Tthiri nsina na Yehova ti nookuxa murima! Nlo ninhela muhina omutthu wotheene wa Tiithi ihu a wiirimu, itthu sotheene opanke awe ni onrowa awe opaka.—Esal. 89:8, 9.

8. Moovarihana ni Otumererya 32:2, 3, Yehova oniphavela wira atthu athokoreryeke sai nsina nawe?

⁸ Okathi vakhaani ahinatthi aIsarayeli okela Elapo Yooleiheriwa, Yehova aahimwiixuttiha Moise nsipo. (Otum. 31:19) Vano, Moise aahaana owiixuttiha aIsarayeli nsipo nne. (Mmusome Otumererya 32:2, 3.) Vaavo nnuupuwelela ahu eversiikulu 2 ni 3, ninnoona wira Yehova khaaphavela wira nsina nawe nihisuweliwe, maana nsina nawe ti noowaarya. Yehova oniphavela wira atthu otheene asuwele nsina nawe! AIsarayeli yaanoona okhala eparakha ya vameekhaaya, vaavo yaamwiiwa aya Moise owiixuttihaka itthu sinceene voohimya sa Yehova ni nsina nawe noowaarya. Moohaanyiherya, itthu Moise aawiixuttiha awe saanilipiha waamini waya ntoko siisaale epula enikhaliherya aya vanceene miri ni malaxi. Ninrowa owiixuttiha sai atthu akina mwa enamuna yoomaaliha ni yoolipiha?

9. Ninrowa okhaliherya sai ovuwiha ni otteeliha nsina na Yehova?

⁹ Okathi ninlaleerya ahu empa ni empa, nihaana omurumeela Biibiliya wira niwooniherye atthu nsina na Muluku, Yehova. Nave nihaana waavaha iliivuru, owooniherya iviidiyu ni myaha sikina siri va jw.org wira nivuwihe nsina na Yehova. Ohiya-vo, omutekoni, oxikola wala okathi nneetta ahu mukwaha, nihaana wiimananiha waalaleerya atthu voohimya sa Muluku ahu ni mikhalelo sawe. Nave nihaana waaleela itthu sooloka Yehova onrowa awe onipakela ni onrowa awe opaka valaponi. Nto okathi aniiwa aya itthu iyo soohakalaliha, awo animoona wira Yehova onniniphenta vanceene. Musuweleke wira okathi nnaalaleerya ahu atthu wira Tiithi ihu a wiirimu onniniphenta, ninnikhaliherya otteeliha ni ovuwiha nsina na Muluku. Nave ninnaakhaliherya atthu osuwela wira yiixuttihiwa itthu sowoothiwa voohimya sa Yehova. Tthiri okathi aniixutta aya ikeekhai sa mBiibiliyani, awo annihakalala vanceene.—Yes. 65:13, 14.

10. Vaavo nnaasomiha ahu atthu Biibiliya, xeeni vanireerela aya owiixuttiha malamulo ni malakiheryo a Muluku?

¹⁰ Vaavo nnaasomiha ahu atthu Biibiliya, nimphavela waakhaliherya osuwela ni orumeela nsina na Yehova. Nave nimphavela waakhaliherya osuwela itthu sotheene nsina na Yehova nintaphulela aya. Ohiya-vo, nihaana owiixuttiha malakiheryo, malamulo ni mweettelo Yehova oniphavela awe wira akhalane. Vaavo oniixutta awe malamulo a Muluku, owo onoosiveliwaka weettela. Masi niireke ole nimmusomiha ahu Biibiliya onoowerya omwiiwelela Yehova ohimphentaka? Nnaari. Muhiliyale wira Eva aanisuwela malamulo a Muluku, masi owo ni Adamu khiyamphenta Muluku ni murima wotheene. (Maph. 3:1-6) Nave nihaana owiixuttiha atthu malamulo ni malakiheryo a xariya a Yehova.

11. Vaavo nnaasomiha ahu atthu malamulo ni malakiheryo a Muluku, ninrowa waakhaliherya sai omphenta Yehova?

¹¹ Okathi wotheene malamulo ni malakiheryo a Yehova anniniphwanyiha mireerelo. (Esal. 119:97, 111, 112) Masi ale nnaasomiha ahu Biibiliya pooti ohisuwela wira Yehova oonivaha malamulo awo mwaha wooniphenta. Nto nihaana waakoha so ale nnaasomiha ahu Biibiliya: “Munoonela sai, xeeni Yehova onaavekela awe arumeyi awe opaka aahiiso ohipaka etthu ela? Ela enniixuttiha exeeni voohimya sa Yehova?” Akhala wira nnimwaakhaliherya ale nnaasomiha ahu Biibiliya omuupuwela Yehova ni ophenta vanceene nsina nawe, nnimwaavara murima. Niira siiso, ale nnaasomiha  ahu Biibiliya anomphentaka Yehova ni malamulo awe. (Esal. 119:68) Nave anoolipiha waamini waya ni anoowerya ovilela mixankiho sinrowa waakhumelela.—1 aKor. 3:12-15.

12. Moota xeeni Davidi ahaawenrye awe ovikaniha okhalana murima mmosaru ni exeeni yaakhumelenle?

¹² Esalimo 86:11 ninniphwanya moolumo oohakalaliha ani: “Mukivahe murima mmosaru”. Mwene Davidi aahuupuxeriwa olepa moolumo awo a faita yinceene. Okumi awe wotheene, Davidi aahoona wira vannikhweya mutthu okhalana murima wookawanyeya. Nihiku nimosa okilaathale ene empa awe ya osulu, aahinweha muthiyana orapaka. Okathi ole, murima wa Davidi waari sai? Niireke waari mmosaru wala waahikawanyeya? Davidi anisuwela nlamulo na Yehova ninhimya so: “Muhimukhalelé nrima mwar’awe mukhw’inyu”. (Okhum. 20:17) Hata vaari siiso, Davidi khaahiyale onwehexexa muthiyana ole. Nto murima awe waahikawanyeya. Owo aaniphavela orupana Bathi-Xeba ni omwiiwelela Yehova. Nnaamwi Davidi aavirinhe okathi munceene omphentaka ni omoova Yehova, owo aahipaka etampi. Okathi ole, Davidi aahipaka etthu yoohiirya ni yootakhala. Maana aahiveehiha vanceene nsina na Yehova. Nave aahaakumiherya mixankiho atthu akina waahela muhina atthu a etthoko awe.—2 Sam. 11:1-5, 14-17; 12:7-12.

13. Ninsuwela sai wira Davidi aahitthikela okhalana murima mmosaru?

¹³ Yehova aahimuhukhumu Davidi, nto muhoolo mwaya Davidi aahitthikela okhalana waataana wooloka ni Yehova. (2 Sam. 12:13; Esal. 51:4-6, 19) Davidi aahoona mixankiho ni itthu soohiloka sinikhumelela vaavo mutthu onikhalana awe murima wookawanyeya. Moolumo Davidi uupuxeriwe awe olepa ari Esalimo 86:11 pooti otaphuleliwa so: “Mukivahe murima woohikawanyeya”. Nto niireke Yehova aahimukhaliherya Davidi onvahaka murima mmosaru aahiiso murima woohikawanyeya? Aayo. Maana muhoolo mwaya, Biibiliya onnimuhimya Davidi okhala mulopwana ‘arumenle Apwiya Muluku awe ni murim’awe wothene’.—1 Mam. 11:4; 15:3.

14. Etthu xeeni ninreerela ahu wiikoha ni nthowa xeeni?

¹⁴ Ntakiheryo na Davidi ninninlipiha ni onlopola. Tthiri etampi yuulupale aapanke awe, ennaalopola arumeyi otheene a Muluku olelo-va. Hata nipacenrye ene niinaano omurumeela Yehova wala nipacenrye ene khalai, nihaana wiikoha so: ‘Kiireke kinniwerya oxintta vaavo Satana oneererya awe okawanya murima aka?’

15. Omoova Muluku onrowa onikhaliherya sai okathi sinikhumelela aya ilatarato soohiloka?

¹⁵ Mwa ntakiheryo, munipaka exeeni okathi sinikhumelela aya itthu soohiloka siniwiirihani  wuupuwela orupihana woohiloka okathi muninweha anyu TV aahiiso munternetini? Okathi owo ti vookhweya wuupuwela so: ‘Ela khahiyo epornografia’. Masi, niireke munnuupuwela wira eyo enamuna Satana onirumeela awe wira okawanye murima anyu? (2 aKor. 2:11) Elatarato yoohiloka pooti okhala ntoko maxatto mutthu onimurumeela awe wira iikitthe mwiri muulupale. Wanipacerya, owo onnimanela mpantta wowiitha wa maxatto vamwirini oniphavela awe wiikittha. Nto vaavo ontepa awe omana mwiri, owo onniikittheya. Niireke mwaanisuwela wira ilatarato soohiloka sinitumererya orupihana siri ntoko maxatto oowiitha? Omakela oweha ilatarato iyo, muupuwelaka wira khasinrowa wookumiheryani maxakha, muhoolo mwaya pooti owiirihani opaka etampi yuulupale. Nto muhikhala-khale mweemereryaka itthu soohiloka sikelaka vamurimani vanyu! Muhihiye okhalana murima mmosaru wira mmooveke Yehova!

16. Okathi nneehereriwa ahu, makoho xeeni ninreerela ahu wiikoha?

¹⁶ Ohiya paahi ilatarato soohiloka, Satana onnirumeela itthu sikina soohiloka wira oniirihe opaka etampi. Nto nnoonela sai itthu iyo? Musuwele wira, ti vookhweya mutthu wuupuwela wira itthu iyo khasinrowa omwiiriha opaka etthu yoohiloka. Mwa ntakiheryo, mutthu pooti wuupuwela so: ‘Kinoona wira nkinrowa okumihiwa mmulokoni mwaha woopaka etthu ela, maana khetempe otthekeya’. Wupuwela mwa enamuna eyo ti wootakhala. Nave ti vooloka wiikoha makoho ala: ‘Kiireke Satana onirumeela etthu ela wira okawanye murima aka? Kiireke kapaka etthu yoohiloka nkinrowa oveehiha nsina na Yehova? Kiireke opaka etthu ela enookaataaniha ni Muluku wala enrowa ohonona waataana waka ni yena?’ Wuupuwelela makoho ala, onimookhaliheryani vanceene. Okathi munuupuwelela anyu, munvekeleke Muluku ankhili wira mwaakhule moovarihana ni ele eri vamurimani vanyu.  (Yak. 1:5) Musuweleke wira opaka eyo enimookhapelelani vanceene. Nave enimookhaliheryani okhootta soweeha, ntoko Yesu yoowo aakhoottale vaavo aamulenle awe Satana wira: “Khuma va, Satana!”—Math. 4:10.

17. Xeeni murima wookawanyeya ohirina awe efaita? Nvahe nlikanyiho.

¹⁷ Murima wookawanyeya khorina efaita. Nkahaya muupuwele ekiipa emosa ehiniiwanana. Atthu akina a ekiipa eyo aniphavela ovuwihiwa mekhayaru, akina khaniphavela ommana boola attharaka malakiheryo, vano akina khanimuttittimiha muhooleli a ekiipa eyo. Niireke ekiipa eyo enookanyari? Woonasa wene nnaari. Maana ekiipa ekina yiiraanale pooti okanyari okathi wa xooku owo. Murima anyu pooti okhala ntoko ekiipa enkanyari akhala wira muupuwelo, soophavela, ni moonelo anyu ohiiraana wira mmurumeeleke Yehova. Xontte, muhiliyale wira Satana oniphavela okawanya murima anyu. Nave oniphavela wira moonelo, soophavela ni muupuwelo anyu owaneke ni malamulo a Yehova yaawo nyuwo munisuwela anyu. Nto wira muxintte, nyuwo muhaana okhalana murima mmosaru. Mwiira siiso, munoowerya omukokhorela Yehova mwa enamuna yooloka. (Math. 22:36-38) Muhikhala-khale mmweemereryaka Satana okawanya murima anyu!

18. Moovarihana ni Mikeya 4:5, exeeni mulakenle anyu opaka?

¹⁸ Munvekeleke Yehova ntoko Davidi anvekenle awe oriki: ‘Mukivahe murima mmosaru, wira kòve nsina nanyu’. Mwiimananiheke okhala moovarihana ni nivekelo nla. Khula nihiku, okathi munipaka anyu soothanla sikhale saamukhaani wala suulupale, mooniheryeke wira munnoova ni munnittittimiha nsina noowaarya na Yehova. Mwapaka eyo, nyuwo munimooniherya wira mwa Namoona a Yehova. (Mir. 27:11) Othene ahu nnoowerya ohimya etthu emosaru aahimmye awe Mikeya oriki: ‘Vano hiyo nnowettela Apwiya Muluku ahu mpakha mahiku othene’.—Mik. 4:5.