OTHEENE AHU ninnikupali wira Yehova onnaahoolela, waakhaliherya ni waavaha itthu sinaathowa arumeyi awe wira ahihiye ororomeleya “okathi [ola] wokiserya”. (2 Tim. 3:1) Tthiri, nihaana omwiiwelela Yehova. Maana mukhalelo ahu onoolikana ni mukhalelo wa aIsarayeli okathi yaari aya moothakoni. Vaavo yiiwa aya nlope nirumaka, awo yaahaana opaka etthu.

Yehova aahimuruma Moise opaka malope manli a eparatha wira orumiheke aaphavelaka “wathukumanya atthu, nave evaheke ethonyeryo y’ovenya ekwaha”. (Moth. 10:2) Anamukuttho yaahaana orumiha malope ale mwa inamuna soovirikana wira yaaleele atthu etthu yaakhanle aya oopaka. (Moth. 10:3-8) Olelo-va, atthu a Muluku annivahiwa malakiheryo mwa inamuna soovirikana. Mwaha ola, ninrowa othokorerya inamuna tthaaru ninvahiwa ahu malakiheryo ni ninrowa olikanyiha inamuna iyo ni oruma wa malope okathi wa aIsarayeli. Inamuna iyo tthaaru anivahiwa aya atthu a Muluku olelo-va tiiya: Okathi wa mithukumano suulupale, okathi axitokweene aniixuttihiwa aya ni okathi wa marukunuxo.

Vaavo Yehova aaphavela awe waathukumanya atthu otheene vamukhora va etabernaakulu, anamukuttho yaahaana orumiha malope oomanli okathi omosaru. (Moth. 10:3) Nto ikrupu iye xexe sa maloko otheene yaakhala waattamela etabernaakulu yaaniiwa oruma wa malope ale okathi omosaru. Vano ale yaattamenle vamukhora wa etabernaakulu yaanaakuva ophiya. Masi ale yaakhala ottaiwene yaahaana oviriha okathi vakhaani ahiphiyale ni yaahaana wiimananiha vanceene wira aphiye okathi wooreerela. Moohicikha opuro yaakhala aya, Yehova aaphavela wira atthu otheene athukumane ni attottele mureerelo.

Olelo-va, hiyo khaninthukumana otabernaakulu, masi okathi mukina atthu a Muluku annilattuliwa okhalana mithukumano suulupale. Mithukumano iyo sinihela muhina, asembeleya, akongresu ni mithukumano sikina sa vameekhaaya. Okathi owo hiyo ninnivahiwa malakiheryo manceene. Olumwenku wotheene, Anamoona a Yehova annikhalana mithukumano ni iprokrama iyo simosaru. Nto ale aneemererya othukumana okathi owo annihakalala vanceene. Atthu akina anneetta mikwaha soorakama waavikana akina. Hata vari siiso, otheene aya khanithanana opaka mikwaha iyo soorakama wira athukumane ni atthu akina a Muluku.

Niireke ale anikhala mapuro oorakama annittottela mureerelo? Aayo. Erumeeliwaka etekonologia, atthu awo anikhala mapuro oorakamela opooma annittottela mureerelo iprokrama iyo ni annoona wira aniirela mpantta emusi emosaru. Mwa ntakiheryo, okathi munna aarummwale ni eseedi ahu ya olumwenku wotheene oxukurya eBetheli ya oBenin, erumeeliwaka interneti, muthukumano ole waahooniwa epooma ya wArlit, oNíger. Epooma ele enikhala muttetthe anithimpwa maluku oowaarya oDeserto do Saara. Opuro ole yaahithukumana anna ni arokora 21 ni  atthu akina anisiveliwa ekeekhai. Tthiri nnaamwi yaari opuro woorakamela, awo yaari vamosa ni arumeyi a Muluku 44.131. Munna mmosa aalempe so: “Kinnixukhurela vanceene oweha eprokrama ela erumeeliwaka interneti, eyo yookivara murima vanceene. Tthiri kinnoona wira munniniphenta ni murima wotheene”.

Okathi anamukuttho yoopa aya nlope nimosa ni ekwaha emosa, “makhulupale pahi, [ni] alupale a maloko àtthu” yaanirowa ohoolo wa eheema yoothukumana. (Moth. 10:4) Okathi owo, makhulupale ale yaaniixuttihiwa ni ovahiwa malakiheryo ni Moise. Nto Moise aanipaka eyo wira makhulupale ale asuweleke ovara saana muteko yaavahiwe aya munlokoni mwaya. Vaakhanle wira nyuwo mwa mukhulupale, niireke khimwaarowa opaka itthu sotheene wira mwakhale muthukumano owo wira muttottele mureerelo?

Olelo-va, axitokweene khahiyo “alupale a maloko àtthu” ni khahiyo axineene waamini wa atthu a Muluku, yaawo avahereriwe aya wira yaakhapeleleke. (1 Ped. 5:1-3) Hata vari siiso, axitokweene anniimananiha okhapelela ipwittipwitthi sa Muluku. Nto awo annaakuvela wiiwelela vaavo anilattuliwa aya wira yiixuttihiwe, ntoko okathi wa Exikola ya Orummwa wa Omwene. Okathi wa ixikola iyo, axitokweene anniixuttihiwa moota akhanle aya oovara saana miteko saya mmulokoni. Okhala wira anniixuttihiwa, axitokweene ni ale anaakhapelela aya mmulokoni anikhalana waataana wooloka ni Muluku. Akhala wira mootoko orowela exikola ya axitokweene hata ekhalaka ekwaha emosa, nyuwo muhiixutta itthu sinceene sinookhaliheryani ovara saana muteko anyu mmulokoni.

Okathi anamukuttho a wIsarayeli yaarumiha aya nlope ntoko elulu, eyo yaari ethoonyeryo yoowi Yehova aaphavela wira atthu ale akhumeke. (Moth. 10:5, 6) Okathi atthu ale yaakhuma aya, yaakhuma mwa enamuna yootthokiheya, masi wira apake eyo yaahaana wiimananiha vanceene. Okathi mukina vaanaavila aIsarayeli othaama. Mwaha wa xeeni?

Woonasa wene, atthu akina yuupuwela wira nlope na othaama noopiwa ikwaha sinceene ni okathi yahaalipelela aya. “Okathi mukina, neku nanikhala vavo okhuma ohiyu mpakha vasisu pahi”. Masi okathi mukina “yakhalá mahiku manli walá mweri mmosa” aahiiso okathi munceene ahinatthi othaama. (Moth. 9:21, 22) Yaathaamale ikwaha ikavi? Eliivuru ya Onamukuttho ekapiitulu 33 enihimya wira yaahithaama ni yaahimaka mapuro 40.

Okathi mukina, aIsarayeli yaanimaka nipuro naari muuttutthi munceene. Tthiri omaka vamuuttutthini yaari etthu yoohakalaliha vanceene moothakoni mme mooviha. (Otum. 1:19) Muhiliyale wira omaka vamuuttutthini, woonasa wene waaniwiiriha wuupuwela wira othaama yaari etthu yooxankiha.

Vaavo waaphiya aya okathi woothaama, maloko makina yaahaana opixa murima alipelelaka ophiya okathi aya. Maana khahiyo wira okathi nlope noopiwa aya maloko otheene yaakhuma okathi omosaru. Ekwaha yoopacerya noopiwa aya nlope, eyo yaari ethoonyeryo yoowi maloko yaakhala onikhuma nsuwa, nloko na Yuda, Isakari ni Zabuloni yaahaana okhuma. (Moth. 2:3-7; 10:5, 6) Nuumala maloko awo mararu okhuma, anamukuttho yaanitthikela woopa nlope ekwaha ya nenli, eyo yaari ethoonyeryo yoowi maloko mararu yaakhala osul yaahaana okhuma. Musuweleke wira anamukuttho yaanipaka eyo, mpakha maloko otheene okhuma.

Woonasa wene, mootoko woona ovila weemererya marukunuxo. Mwaha wa xeeni? Pooti wira nyuwo muupuwela wira marukunuxo awo yaamukumiherya mixankiho sinceene. Wala vaanoosivelani enamuna itthu saapakiwa aya khalai, nto muhinaphavela wira enamuna eyo eturukeye. Moohicikha ele yaawiirihani, woonasa wene woovilani opixa murima nlelo mwiimananihaka olimalela malakiheryo a niinaano. Masi muhiliyale wira marukunuxo anniniphwanyiha mireerelo ni anooniherya wira Yehova onninreeliha.

Mahiku a Moise, Yehova aahaalakiherya ni oweettiha mothakoni atthu imilyau sinceene waahela muhina alopwana, athiyana ni anamwane. Tthiri, vaakhanle wira atthu ale khiyaavahiwa malakiheryo ni Yehova, khuuvo aarowa woopowa. Mwa enamuna emosaru, hiyo ninnikhalana mukhalelo wooloka wa omunepani mwaha woowi Yehova onninilakiherya. Nave waamini wahu ti wooloka, okathi ola wooxankiha. Hata vari siiso, nihaana opaka itthu sotheene wira nihihiye omwiiwelela ni ororomeleya ntoko aIsarayeli ale, yaawo yiiwelela oruma wa malope!