1, 2. (a) Masu a Yesu ari Matheyo 24:12, anaahimya aani? (b) Eliivuru ya Miteko enooniherya sai wira maKristau manceene a eseekulu yoopacerya yaanilipiha ophenta waya? (Nwehe elatarato yoopacerya.)

OKATHI Yesu aari awe valaponi, aahihimya moota atthu yaarowa aya osuwela ethoonyeryo “y’omala olumwenku”. Nave aahihimya wira “ophentana w’atthu anjene onovukuwa”. (Matheyo 24:3, 12) Nnaamwi aYuda a eseekulu yoopacerya yaihimya okhala atthu a Muluku, awo yaahihiya omphenta waya Muluku ovukuwaka.

² Masi, maKristau manceene a okathi ole yaarina moonelo woovirikana. Maana awo yaaniluttuweliwa ‘olaleya wira Yesu ti Mòpoli’, nave yaanimphenta Muluku, waaphenta annaya ni ale yahaasuwenle ekeekhai. MaKristau ale yaanivikaniha olipiha omphenta waya Muluku. (Miteko 2:44-47; 5:42) Mooriipiha murima, maKristau a eseekulu yoopacerya yaahihiya ophenta waya ovukuwaka. Ninsuwela sai?

3. Exeeni yaavukunle ophenta wa maKristau makina?

³ Olavulaka ni maKristau a eseekulu yoopacerya a wEefeso, Yesu aahimmye so: “Nyuwo mohiya ophenta warinanyu wopajeryani”. (Wisupulula 2:4) Pooti wira maKristau a wEefeso  yaahihiya ophenta waya ovukuwaka, mwaha wootthara makhalelo a atthu yaaphavela wiihakalaliha paahi. (aÉfeso 2:2, 3) Okhala wira wEfeso yaari epooma yoothaaciri, nto atthu a epooma ele yaaphavela opuha paahi. Nave atthu anceene a wEfeso yaari anamuttompe ni khiyaattittimiha malamulo a Muluku. Awo yaaphavela wiihakalaliha ohiya omphenta Muluku ni atthu akina.

4. (a) Olelo-va, exeeni enooniherya wira ophenta woovukuwa? (b) Inamuna xeeni tthaaru sa ophenta wahu ninreerela ahu olipiha?

⁴ Olelo-va, masu a Yesu oowi ophentana wa atthu anceene onoovukuwa, annivareleya muteko. Maana atthu akina khanimphenta Muluku. Ohiya owehereryaka wira Muluku onoomaliha mixankiho sa olumwenku, atthu imilyau sinceene anikupali wira mixankiho sahu sinoomalihiwa ni mitthenkeso sa apinaatamu. Nto ophenta wa atthu anceene onootepa ovukuwaka. Ntoko maKristau a khalai a muloko a wEefeso, ophenta wa arumeyi a Yehova onnivukuwa. Tivonto, nrowe nthokorerye inamuna tthaaru sinrowa onikhaliherya olipiha ophenta wahu: (1) omphenta Yehova, (2) ophenta ekeekhai ni (3) waaphenta annihu.

5. Xeeni vanitthuneya ahu omphenta Muluku?

⁵ Ti pani onireerela ahu omphenta vanceenexa? Yesu aahimmye wira: “‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene’. Ela ti yoruma yulupalexa ni yopajerya”. (Matheyo 22:37, 38) Omphenta Muluku onninikhaliherya wiiwelela malamulo awe, ovilela ni onyokha itthu sootakhala. (Musome Esalimo 97:10.) Masi Satana ni olumwenku awe oniphavela otteettheiha ni omaliha omphenta wahu Muluku.

6. Exeeni eniwiiraneela atthu yaale ahiyale omphenta Muluku?

⁶ Atthu a olumwenku ola, aapahula ophenta wekeekhai. Maana ohiya omphenta Muluku, ‘anisupuwela mmansaya pahi’. (2 Timótheyo 3:2) Awo amphavela ‘itthu sonanara, ophavela okhalana sothene sinònaya, ororomela ni wisona mwaha wa mihakhu sirinaya’. (1 Yohani 2:16) Murummwa Paulo aahihimya etthu ekhanle ookhumelela akhala wira nimphavela wiihakalaliha paahi. Owo aahimmye so: “Ophavela sintthunaya makhalelo òtakhala, onniphwanyiha okhwa”. Nthowa xeeni? Nthowa noowi atthu anipaka eyo annikhala awanani a Muluku. (aRoma 8:6, 7) Tivonto, atthu yaale aniluttuweliwa paahi ni ophavelasa musurukhu aahiiso orupihana woohiloka anninyoonyiheya.​—1 aKorinto 6:18; 1 Timótheyo 6:9, 10.

7. Exeeni ekhanle oowiiriha maKristau okhalana muupuwelo woohiloka?

⁷ Atthu ntoko: ale ahinikupali wira Muluku ookhala, anihoverya okhala wa Muluku ni ale anikupali wira itthu siroothatuwa, anniwiiriha akina ohimphenta Muluku ni woona wira Muluku khokhanle. Nave aniphavela waakupaliha wira paahi alolo ni ale ahisomme, tanikupali wira ookhala Mpattuxa. Atthu anceene annaattittimiha masientista ohiya omuttittimiha Mpattuxa. (aRoma 1:25) Akhala wira maKristau khaniivaha ephoole, pooti wuupuwelaka ntoko atthu awo. Nave-tho, wataana wahu ni Yehova pooti otteettheya ni omphenta wahu ovukuwa.​—aHéberi 3:12.

8. (a) Itthu xeeni sikhanle oowaakhulumula atthu a Yehova? (b) Moota xeeni Esalimo 136 ennimaaliha aya?

 ⁸ Ekeekhai wira ikwaha sikina hiyo pooti okhulumuwa, okhala wira ninkhala olumwenku wootakhala wa Satana. (1 Yohani 5:19) Masi akhala wira nnoohiya nitepaka okhulumuwa, waamini ni omphenta wahu Muluku pooti ovukuwa. Mwa ntakiheryo, hiyo pooti oxanka mwaha wa wuuluvala, owereyasiwa ni othoiwa musurukhu. Aahiiso pooti oriipiwa murima akhala wira khanniwerya opaka itthu ntoko siniphavela ahu. Nave pooti onyoonyiheya akhala wira itthu khasineetta ntoko naawehererya ahu. Akhala wira ninnikumana mixankiho, nihuupuweleke wira Yehova ooninyanyala. Muupuweleke masu ala oomaaliha aniphwanyaneya Esalimo 136:23, yaawo ani: “Okathi wapuheriwahu, Apwiya yahinùpuwela: oniphenta waya ti wohimala”. Nikupaliki wira Yehova onniniwiriyana vaavo ‘vaninvekela ahu’ ni onrowa onaakhula.​—Esalimo 116:1; 136:24-26.

9. Exeeni yaamukhalihenrye Paulo olipiha omphenta wawe Muluku?

⁹ Murummwa Paulo aari murumeyi a Muluku yoowo uupuwenle vanceene moota Yehova aamukhalihenrye awe ni omulipiha. Paulo olempe so: “Apwiya t’anikikhaliherya, tivó vahinòvaka etthu. Atthu anwerya okìriha exeni?” (aHéberi 13:6) Paulo aanikupali wira Yehova ammukhaliherya ovilela mixankiho. Okathi Paulo aakhalana awe mixankiho, owo khahiyale omuroromela Yehova. Hata okathi aari awe mukhatteya, owo aahaalipiha maKristau akhwaawe olepelaka iwarakha miloko. (aÉfeso 4:1; aFilipi 1:7; Filémoni 1) Nnaamwi Paulo saamukhumelela mixankiho, owo aahivikaniha olipiha omphenta wawe Yehova. Owo aalipana “Muluku onnihakalaliha inamuna sothene”. (2 aKorinto 1:3, 4) Ninrowa omutakiha sai Paulo?

10. Ninrowa olipiha sai omphenta wahu Yehova?

¹⁰ Paulo oohimya enamuna ekhanle oolipiha omphenta wahu Muluku oriki:  “Mulompeke vohihiyererya”. Nave aalempe so: “Mulipiheryeke olompa”. (1 aTesalonika 5:17; aRoma 12:12) Moota xeeni ovekela onnikhaliherya aya omwaattamela Muluku? Okhala wira, okathi onivekela ahu ninvaanela ni Yehova. Ovekela onnikhaliherya okhalana wataana wooloka ni Muluku. (Esalimo 86:3) Vaavo nimmuleela ahu Tiithi ihu a wiirimu itthu sintepa onixankiha, hiyo ninnitepa omwaattamela. (Esalimo 65:3) Nave-tho, omphenta wahu Yehova onnincerereya vaavo nnoona ahu wira onnaakhula mavekelo ahu. Ninnikupali wira “Apwiya anniwattamela othene ale anavekela”. (Esalimo 145:18) Okupali wira Yehova onniniphenta, onoonikhaliherya ovilela khula muxankiho onniphwanya vano aahiiso muhoolo.

11, 12. Ninrowa wuncererya sai ophenta wahu ekeekhai?

¹¹ Ntoko maKristau ninniphenta ekeekhai. Nto ekeekhai eyo eri mBiibiliyani. Olavulaka ni Tiithi awe, Yesu aahimmye wira: “Ekekhai iyo ti nulumo nanyu”. (Yohani 17:17) Wira niphente ekeekhai, nihaana osuwela sowiixuttiha sa Biibiliya. (aKolosi 1:10) Nave sookhala itthu sikina. Nwehe moota Esalimo 119 ennikhaliherya aya woona ele enitthuneya ahu opaka. (Musome Esalimo 119:97-100.) Nuumala omusoma Biibiliya, nihaana wuupuwelela ele esomme ahu nihiku notheene. Akhala wira nnimuupuwelela mureerelo oniphwanya ahu mwaha woweettela ekeekhai eri mBiibiliyani, ninrowa otepaka ophenta.

¹² Nave-tho, nasaalimo aahimmye wira: “Mwixuttiho anyu ti wosiva mwano mwaka, ovikana yolya yosivexa walá oravo”. (Esalimo 119:103) Iliivuru sinimutthokiherya Biibiliya sa mutthenkeso ahu sinnilokiheriwa ntoko yoolya yoosivexa. Waaniheryasa, okathi munilya anyu yoolya enoosivelani, khamunilya mwaakuvaka, masi vakhaani-vakhaani. Moolikanasa, nihaana omusoma Biibiliya nihaakuvaka. Vaavo nimpaka ahu eyo nnoohakalalaka ni “molumo òsiveliha” a ekeekhai, nave enoonikhaliherya wuupuwela ele esomme ahu ni orumeela wira naakhaliherye akina.—Musuweli 12:10.

13. Exeeni yaamukhalihenrye Yeremiya ophenta Nuulumo na Muluku? Nto eyo yaamwiirinhe opaka exeeni?

¹³ Profeta Yeremiya aaniphenta Nuulumo na Muluku. Owo aahimmye wira: “Kikumanakaru ni masu anyu, kanimirya. Masu anyu àkitteliha murima. Apwiya, Muluku òwerya sothene! Miyo k’àwinyu: tivó masu anyu àsariha murim’aka otteliwa n’upuha”. (Yeremiya 15:16) Yeremiya aahuupuwelela vanceene ni ophenta moolumo a Muluku. Owo aanixukhurela eparakha awe ya okhala namuhupi a Yehova ni olaleya masu awe. Akhala wira ninniphenta ekeekhai ya mBiibiliyani, nnimoona wira eparakha yuulupale okhala Namoona a Yehova ni olaleya Omwene mahiku ala ookiserya.

14. Etthu xeeni ekina enrowa onikhaliherya wuncererya ophenta wahu ekeekhai?

¹⁴ Etthu xeeni ekina enrowa onikhaliherya wuncererya ophenta wahu ekeekhai ya Nuulumo na Muluku? Nihicompelaka mithukumano, okhala wira enamuna Yehova enirumeela awe wira oniixuttihe. Khula esumana, yoosoma ya Biibiliya ya erevista Owehaweha, enamuna yuulupale eniixuttihiwa ahu ekeekhai. Wira nittottele mureerelo mithukumano, nihaana olokiherya vahinatthi. Mwa ntakiheryo, nihaana osoma soolepa sa  Biibiliya siromoliwe. Olelo-va, vanniweryaneya osoma aahiiso obaxari erevista Owehaweha, okhala wira enniphwanyaneya mattaava manceene va websaite ahu jw.org ni aplikativo JW Library. Aplikativo owo onninikhaliherya ophwanya yoolepa mowaakuveya. Vaavo ninthokorerya ahu khula mwaha, nnasoma khula yoolepa ni wuupuwelela saana, ophenta wahu ekeekhai onimunnuwa.​—Musome Esalimo 1:2.

15, 16. (a) Moovarihana ni Yohani 13:34, 35, exeeni Yesu enirumme awe? (b) Omphenta wahu Muluku ni ekeekhai onivarihana sai ni waaphenta annihu?

¹⁵ Ohiyu wookiserya Yesu aari awe valaponi, owo aahaaruma awiixutti awe oriki: “Kinovahani nikano na nanano: mphentaneke mukina ni mukhw’awe. Sisale miyo kophentalyakani, siso-tho nyuwo muhana ophentana. Atthu othene anosuwela wira mwá awixutti aka, mwaphentanaka mukina ni mukhw’awe”.​—Yohani 13:34, 35.

¹⁶ Waaphenta wahu anna ni arokora onnivarihana ni omphenta Yehova. Khivaniweryaneya omphenta Muluku, nihaaphentaka annihu. Nave akhala wira khannaaphenta annihu, nto khaninwerya omphenta Muluku. Murummwa Yohani aalempe so: “Vekekhai ole ohinimphenta munn’awe onimònawe, khanwerya omphenta Muluku ohinimònawe”. (1 Yohani 4:20) Nave omphenta wahu Yehova ni annihu, onnivarihana ni omphenta wahu Biibiliya. Moota xeeni? Maana, akhala wira ninnimphenta Biibiliya, nnoophavelaka wiiwelela malamulo aniixutta ahu, yaawo annitumererya omphenta Muluku ni annihu.​—1 Pedru 1:22; 1 Yohani 4:21.

17. Inamuna xeeni nikhanle ahu oowaakhaliherya annihu?

¹⁷ Mmusome 1 aTesalonika 4:9, 10. Ninrowa waaphenta sai anna a muloko ahu? Pooti wira ookhala munna aahiiso murokora oowuuluvala, ohiniwerya  orowa omuthukumanoni. Aahiiso naamukhweli ohiniwerya olokiherya etthu ehononeyale vatthokoni vawe. (Yakobo 1:27) Nave pooti wira aakhala anna ni arokora akhulumunwe, ariipiwe murima aahiiso anikumana mixankiho sikina, anireerela waaxukurya, waalipiha ni waamaaliha. (Miruku 12:25; aKolosi 4:11) Ninnooniherya waaphenta wahu anna awo ari “amus’ihu [annihu] òwamini” ni masu ahu ni miteko sahu.​—aGalasia 6:10.

18. Exeeni enrowa onikhaliherya ophuka ohiiwanana ni annihu?

¹⁸ Biibiliya onihimya wira “okathi wokiserya” wa olumwenku ola wootakhala, atthu anceene yaarowa okhala oowiitthuna ni ananrima. (2 Timótheyo 3:1, 2) Ntoko maKristau, nihaana wiimananiha vanceene wira nincererye ophentana wahu mukina ni mukhwaawe, omphenta wahu Yehova ni Nuulumo nawe. Okhala wira na atthu oohimalela, ikwaha sikina pooti ohiiwanana ni annihu. Masi ophentana wahu mukina ni mukhwaawe, onniniiriha ophuka moohipisa mixankiho sahu ni mooreerelana murima. (aÉfeso 4:32; aKolosi 3:14) Nihikhala-khale nihiyaka ophenta wahu ovukuwaka! Masi nihaana ovikaniha wuncererya omphenta wahu Yehova, Nuulumo nawe ni annihu.