1, 2. (a) Mixankiho xeeni sinaaphwanya anamwane anikhala ilapo sikina? (b) Makoho xeeni ninrowa ahu othokorerya mwaha ola?

JOSHUA onihimya wira: “Nnaamwi nikhalaka elapo ekina, okhuma onamwane aka, owaani ni mmulokoni, kaalavula nttaava na anamuyari aka. Masi nuumala opacerya osoma oxikola, kaahipacerya osiveliwa nttaava na elapo ele. Nuuvira iyaakha vakhaani, kaalavula paahi nttaava nne. Nto kaahipacerya ohiiwa nttaava naalavuliwa mmulokoni ni oliyala soolema sa anamuyari aka”. Yowiiraneya ya Joshua etthu enaakhumelela atthu anceene.

² Olelo-va, atthu anivikana 240.000.000 anikhala ilapo sikina. Akhala wira nyuwo mwa namuyari othaamenle elapo ekina, munrowa waakhaliherya sai aniinyu omusuwela ni omphenta Yehova ni ovikaniha ‘wettela ekekhai’? (3 Yohani 4) Nave atthu akina anrowa okhaliherya sai?

3, 4. (a) Anamuyari anrowa waavaha sai anaaya ntakiheryo nooloka? (b) Exeeni anamuyari ehinreerela aya olipelela wa anaaya?

³ Nyuwo anamuyari, ntakiheryo nanyu ti nootthuneya vanceene akhala wira muniphavela wira aniinyu akhalane wataana  wooloka ni Yehova wira aphwanye okumi woohimala. Vaavo aniinyu anoowehaayani ‘mpajeryaka ophavela Omwene’, animwiixutta omulipana Yehova ni woona wira onimwaakhapelela khula nihiku. (Matheyo 6:33, 34) Mpweheke nipuro noopacerya muteko wa Yehova, ohiya otepa ophavelasa mihakhu. Nto musyake okopha ni mweererye ohakalalaka ni itthu murina anyu. Nave mphaveleke osuka “muhakhu wirimu”, niire so, weemereriwa ni Yehova, ohiya ophavelasa musurukhu aahiiso “ovuwihiwa n’atthu”.​—Mmusome Marko 10:21, 22; Yohani 12:43.

⁴ Musyake ohiivaha okathi wookhala ni aniinyu mwaha wa waatteliwa miteko. Nwooniheryeke wira munnisiveliwa ni awo mwaha wa ompweha Yehova nipuro noopacerya ohiya ophavelasa ovuwa aahiiso musurukhu, mwaha wa nyuwo aahiiso mureerelo aya. Musyake moonelo woohiloka woowi anamwane ahaana waathukumanyerya mihakhu anamuyari aya. Muupuweleke wira “khavanrerela anamwane wathukumanyerya muhakhu atithi aya n’ame aya: nto alipa-òyara t’anathukumanyerya an’aya”.​—2 aKorinto 12:14.

5. Xeeni anamuyari anitthuneya aya owiixuttiha anamwane ikwaha sinceene voohimya sa Yehova?

⁵ Ntoko saahimmwale aya vahinatthi, atthu “a maloko othene” ni mattaava otheene annoorwa mmutthenkesoni mwa Yehova. (Zakariya 8:23) Masi akhala wira aniinyu khaniiwexexa nttaava nanyu, eyo pooti wooxankihani owiixuttiha ekeekhai. Aniinyu tari anaxikola anyu oopacerya a Biibiliya, nto akhala wira ‘anomusuwela’ Yehova anoophwanya okumi woohimala. (Yohani 17:3) Nto wira aniinyu asuwele sowiixuttiha sa Yehova, nyuwo muhaana ‘owixuttiha’ ikwaha sinceene.​—Mmusome Otumererya 6:6, 7.

6. Aniinyu anrowa ottottela sai mureerelo yiixutta nttaava nanyu? (Nwehe elatarato yoopacerya.)

⁶ Aniinyu animwiixutta nttaava na elapo eyo, oxikola ni atthu akina. Masi awo animwiixutta nttaava nanyu okathi munlavulana anyu khula nihiku. Akhala wira aniinyu annilavula nttaava nanyu, eyo enimwaakhweiherya wooleelani moonelo aya. Nave, sookhala mireerelo sikina. Vaavo aniinyu aniwerya aya olavula mattaava manceene, eyo ennaakhaliherya osuwela otthokiha itthu ni wiiwexexa moonelo wa akina. Nave ennaavaha eparakha ya wuncererya muteko woolaleerya. Carolina, yoowo onikhala elapo ekina ni anamuyari awe onihimya so: “Okhala muloko onilavuliwa nttaava nikina, etthu yoohakalaliha. Nave ti voohakalaliha okhaliherya mapuro oothowa anamalaleerya”.

7. Munrowa opaka exeeni akhala wira wookhala muxankiho wa nttaava vatthokoni vanyu?

⁷ Hata vari siiso, vaavo anamwane a anamurwa aniixutta aya nttaava ni soolema sa elapo eyo, akina pooti ohisiveliwa olavula nttaava na anamuyari aya. Nyuwo anamuyari, akhala wira eyo enniiraneya ni aniinyu, niireke munoowerya wiixutta  nttaava na opuro owo? Munoowerya owiixuttiha aniinyu wira akhale Anamoona, akhala wira munniiwexexa ele anihimya aya, matthekulelo aya, miteko saya sa oxikola ni akhala wira munnilavula ni maprusoore aya. Ekeekhai wira wiixutta nttaava nikina onitthuneya okathi, wiimananiha ni wiiyeviha. Masi eyo ennikhaliherya. Mwa ntakiheryo, akhala wira mwaninyu khoniiwa, niireke munimweererya wiixutta nttaava ninlavuliwa ni matata wira mulavulaneke? Mwaana yoole onivaanela saana orumeelaka nttaava nikina, ohaana ottottopeliwa, khahiyo siiso? *​—Nwehe enoota.

8. Munrowa waakhaliherya sai aniinyu akhala wira khamunilavula saana nttaava na elapo eyo?

⁸ Anamuyari anamurwa akina vannaaxankiha wiixutta saana nttaava anaaya yiixuntta aya. Nto eyo pooti waaxankiha anamuyari awo owiixuttiha anaaya “solempwa sowarya”. (2 Timótheyo 3:15) Akhala wira eyo etthu eniwiiraneelani, nyuwo pooti ovikaniha waakhaliherya aniinyu omusuwela ni omphenta Yehova. Mutokweene oniitthaniwa Shan, onihimya wira: “Maama ahu oohitheliwa khaasuwela saana nttaava hiyo naiwexexa ahu, nto miyo ni murokoraka khinaasuwela olavula saana nttaava nawe. Masi vaavo nanweha ahu osomaka, ovekela ni wiimananiha ohoolela omulompa Muluku vatthokoni khula esumana, nanoona wira etthu yootepa otthuneya ti omusuwela Yehova”.

9. Anamuyari anrowa waakhaliherya sai anaaya anirumeela mattaava manli?

⁹ Vanniweryaneya anamwane akina wiixutta voohimya sa Yehova arumeelaka mattaava manli. Moota xeeni? Mwaha woowi awo annilavula nttaava na oxikola ni nttaava nikina owaani. Tivonto, anamuyari akina anirumeela aya iliivuru, myaha soogravariwa ni iviidiyu sa mattaava awo. Mwekeekhai, anamuyari anamurwa ahaana wiimananiha wira yaakhaliherye anaaya omwaattamela Yehova.

10. (a) Ti pani onithanla nttaava na muloko munireerela anyu okhala? (b) Ahinatthi opaka yoothanla, ahooleli a itthoko ahaana opaka exeeni?

¹⁰ Vaavo “aletto” anamoona anikhala aya ottaiwene ni Anamoona anilavula nttaava naya, awo ahaana okhala muloko onilavuliwa nttaava na elapo eyo. (Esalimo 146:9) Masi akhala wira wookhala muloko vakhiviru onilavuliwa nttaava naya, muhooleli a etthoko ohaana othanla nttaava na muloko ninrowa okhaliherya etthoko awe. Ohinatthi opaka yoothanla, ohaana ovekela ni othokorerya saana mwaha owo. Nave-tho, ohaana othokorerya ni mwaarawe ni anaawe. (1 aKorinto  11:3) Nto ohaana othokorerya exeeni? Malakiheryo xeeni a Biibiliya anrowa omukhaliherya opaka yoothanla?

11, 12. (a) Nttaava nnaakhaliherya sai anamwane ottottela mureerelo mithukumano? (b) Xeeni anamwane akina ahiniphavela aya wiixutta nttaava na anamuyari aya?

¹¹ Nyuwo anamuyari muhaana osuwela etthu enitthuneya wa aniinyu. Wira yiiwexexe oratteene ikeekhai sa Biibiliya, khivaniphiyerya paahi anamwane orowa omithukumanoni. Nkahaya muupuwele ela: Akhala wira mithukumano anrowa aya ninlavuliwa nttaava aniiwexexa aya, anamwane anoottottela mureerelo mwaha wookhala opuro owo paahi, waaniheryasa awo pooti wiixutta saana ovikana ele anamuyari aya anuupuwela aya. Eyo pooti ohiiraneya, akhala wira anamwane khaniiwexexa saana nttaava ninlavuliwa. (Mmusome 1 aKorinto 14:9, 11.) Nave khahiyo wira nttaava mwaana oyaraniwa awe ti ninrowa ovara muupuwelo awe aahiiso moonelo awe. Tthiri, anamwane akina pooti wiixutta okomentari, opaka sowooniherya ni olavula nttaava na anamuyari aya, masi ahinawerya ohimya muupuwelo ni moonelo aya.

¹² Nave-tho, khahiyo paahi nttaava ti etthu emmukhaliherya vanceene mwaana. Eyo ti etthu yiiraneyale ni Joshua, nimulavunle ahu wanipacerya. Murokorawe oniihaniwa Esther, onihimya so: “Anamwane aninnuwa attharaka nttaava, soolema ni etiini ya anamuyari aya”. Akhala wira anamwane anoona wira kharina soolema sa anamuyari aya, awo pooti ohiphavela wiixutta nttaava ni etiini ya anamuyari aya. Exeeni anamuyari anamurwa anrowa aya opaka?

13, 14. (a) Exeeni yiirinhe etthoko emosa ya anamurwa orowa muloko onilavuliwa nttaava na elapo ele? (b) Anamuyari amosa awenrye sai ovikaniha olipiha wataana waya ni Yehova?

¹³ Anamuyari maKristau khanipweha soophavela saya opuro woopacerya, masi sa anaaya. (1 aKorinto 10:24) Samuel, tiithi aya Joshua ni Esther, onihimya wira: “Miyo ni mwaaraka nihoona nttaava nnaavara murima aniihu ni nonvekela Muluku wira onivahe ankhili. Nto nihoona wira nihiphaveleke ele ennisivela paahi. Masi okathi noonale ahu wira khiyaattottela mureerelo mithukumano muloko waalavuliwa nttaava nahu, naahilakela orowa muloko waalavuliwa nttaava na elapo ele. Otheene ahu naanirowa omithukumanoni ni muteko woolaleerya. Nave-tho, nanaalattula apatthani wira nlye vamosa ni orowa opasiyari. Itthu iyo sihaakhaliherya aniihu waasuwela anna ni omusuwela Yehova, ohiya paahi ntoko Muluku aya masi-tho ntoko Tiithi ni Mpatthani aya. Nahoona itthu iyo okhala sootepa otthuneya ovikana owiixuttiha nttaava nahu”.

¹⁴ Samuel onincererya oriki: “Wira nivikanihe olipa momunepani, miyo ni mwaaraka, ninnirowa mithukumano sa nttaava nahu. Okhala wira naanaatteliwa miteko, nto naanikhulumuwa. Masi ninnimuxukhurela Yehova oreeliha wiimananiha wahu. Aniihu araru annimurumeela Yehova muteko wa Muluku wa okathi wotheene”.

15. Xeeni murokora Kristina, oonale awe wira aahaana orowa muloko onilavuliwa nttaava na elapo ele?

¹⁵ Vaavo anamwane aninnuwa aya, animoona wira ti vooloka omurumeela Yehova  muloko ninlavuliwa nttaava aniiwexexa aya saana. Akhala wira ti siiso, anamuyari aya ahuupuweleke wira anoothanyiwa ni anaaya. Kristina onnuupuwela oriki: “Miyo kaanisuwela itthu sikina sa nttaava na anamuyari aka, masi nttaava naalavuliwa omithukumanoni, nkaiwa saana”. Nave onnincererya oriki: “Okathi kaarina aka iyaakha 12, kaahirowa muthukumano muulupale wa muttetthe naalavuliwa nttaava na oxikola waka. Tthiri, ele yaari ekwaha yoopacerya kaiwexenxa aka saana mithukumano! Etthu ekina yooreera yiiraneyale mookumini mwaka, okathi yoole kaapacenrye aka ovekela kirumeelaka nttaava na oxikola. Maana okathi owo, kaalavula ni Yehova ni murima aka wotheene!” (Miteko 2:11, 41) Okathi aarina awe iyaakha 18, Kristina aahivaanela ni anamuyari awe nto aahithanla orowa muloko naalavuliwa nttaava na elapo ele. Owo onihimya so: “Orowa muloko naalavuliwa nttaava na oxikola waka, nookikhaliherya omusuwela saana Yehova”. Moohipisa, Kristina aahikhala pioneera ookilaatheya ni onnihakalala vanceene.

16. Nthowa xeeni Nadia ohireere awe ohakalala mwaha wookhala muloko wa anamuyari awe?

¹⁶ Nyuwo amiravo, niireke munuupuwela wira muhaana othaamela muloko onilavuliwa nttaava na elapo eyo? Akhala wira ti siiso, mwiikoheke nthowa naya. Niireke orowa muloko owo onimookhaliheryani omwaattamela Yehova? (Yakobo 4:8) Niireke muniphavela wira anamuyari anyu ahiweheke itthu munivara anyu, aahiiso khamuniphavela orowa ohoolo? Nadia, yoowo onirumeela oBetheli, onihimya wira: “Okathi miyo ni axinnaka naari ahu amiravo, naaphavela orowa mithukumano saalavuliwa nttaava na elapo ele”. Masi anamuyari awe yaahoona wira orowa mithukumano sa nttaava nikina, khiwaarowa olipiha wataana waya ni Yehova. “Vano ninnixukhurela okhala wira anamuyari ahu aamananiha oniixuttiha nttaava naya ni okhala muloko waalavuliwa nttaava nno. Eyo yoonikhaliherya vanceene ni onivaha eparakha yowaakhaliherya atthu akina omusuwela Yehova”.

17. (a) Ti pani Yehova aavanhe awe muritti a owiixuttiha anamwane? (b) Anamuyari anrowa ophwanya sai nikhaliheryo wira awiixuttihe anaaya ekeekhai?

¹⁷ Yehova ohaavaha anamuyari muritti wa owiixuttiha anaaya ekeekhai. Nto ahaahiyeryeke muritti owo anamuyari aya aahiiso atthu akina. (Musome Miruku 1:8; 31:10, 27, 28.) Hata vari siiso, anamuyari ahinsuwela nttaava na elapo eyo, pooti okhaliheriwa wira avare murima wa anaaya. Akhala wira anamuyari anoovekela nikhaliheryo, eyo khentaphulela wira anisyaka muritti wowaahuwa anaaya. Masi, eyo enamuna ya waahuwa anamwane, ‘ewettihaka ni walaka n’ikano s’Apwiya’. (aÉfeso 6:4) Mwa ntakiheryo, anamuyari pooti waavekela axitokweene a muloko, malakiheryo a omulompa Muluku vatthokoni ni waaphwanya apatthani ooloka a anaaya.

18, 19. (a) Moota xeeni maKristau makina anrowa aya waakhaliherya amiravo? (b) Nto anamuyari ahaana ovikaniha opaka exeeni?

¹⁸ Wira anamuyari yaakhaliherye anaaya, ikwaha sikina ahaana olattula imusi sikina okathi animulompa aya Muluku vatthokoni.  Nave-tho, amiravo anniixutta ni maKristau makina okathi anilaleerya aya ni ovara itthu hoothe. (Miruku 27:17) Shan, yoowo nimulavunle ahu, onihimya so: “Kinnuupuwela okathi anna yaakikhapelela aya owannyeya. Nto yaahikikhaliherya olokiherya myaha saavahiwaka wira kalavule omithukumanoni, nto kaahiixutta itthu sinceene. Nave kaanisiveliwa otthekula ni atthu akina”.

¹⁹ Tthiri, ale avekeliwe wira yaakhaliheryeke anamwane, ahaana waakhaliherya anamwane awo waattittimiha anamuyari aya. Anoopaka eyo, akhala wira annaalavula saana ni osyaka owaakha muritti aya. Nave-tho, ale avekeliwe waakhaliherya anamwane ahaana osyaka mweettelo waarowa owiiriha anna ni atthu akina wuupuwela itthu soohiloka. (1 Pedru 2:12) Hata anamuyari avekelaka nikhaliheryo, nlelo muritti aya owiixuttiha anaaya ekeekhai. Nto anamuyari ahaana oweha ele anaaya anipaka aya.

20. Anamuyari anrowa waakhaliherya sai anaaya okhala arumeyi oororomeleya a Yehova?

²⁰ Nyuwo anamuyari, munvekeleke Yehova nikhaliheryo ni mpakeke ele eniwerya anyu. (Mmusome 2 Wahala 15:7.) Muhaana opweha nipuro noopacerya wataana wa mwaninyu ni Yehova, ohiya soophavela sanyu. Mmananihe oweha akhala wira Nuulumo na Muluku ninnivara murima wa mwaninyu. Mukupaliki wira mwaninyu onoothanla omurumeela Yehova. Vaavo aniinyu anitthara aya Nuulumo na Muluku ni ntakiheryo nanyu nooloka, munimoona ntoko murummwa Yohani, yoowo aalavunle anaawe oomunepani oriki: “Kaiwaka wira an’aka annettela ekekhai, kinnitteliwa murima vanjene: khivo etthu ekina enkitteliha murima siso”.​—3 Yohani 4.