Mwaakhaliherye “Aletto” Wira ‘Yarumele Apwiya N’utteliwa Murima’
“Apwiya annakhaliherya aletto”.—ESALIMO 146:9.
ISIPO: 3, 25
1, 2. (a) Mixankiho xeeni anna ni arokora akina arina aya? (b) Makoho xeeni anikhumelela?
MUNNA Lije onihimya so: “Okathi yaapacenrye aya ekhotto ya atthu a elapo emosaru oBurundi, emusi ahu yiira eri ene vamuthukumanoni muulupale. Naanaaweha atthu atthyawaka, akina akhwaaka. Anamuyari aka ni hiyo anamwane 11, naahitthyawa wira noopole okumi ahu nikunxe ene paahi ikuwo saari mmirupani mwahu. Amusi aka akina yaheetta mukwaha wa ikiloomo 1.600, etthyawelaka oMalawi, mapuro anikhala atthu atthyanwe elapo aya. Nto hiyo naahanle naahimwara-mwareya”.
2 Olumwenku wotheene, aakhala atthu anivikana imilyau 65 atthyanwe elapo aya mwaha wa ekhotto ni olupatthiwa. Tthiri nna nummuru nuulupale mpakha-va nilavuliwe. * (Nwehe enoota.) Nto atthu ikonto sinceene sa ale atthyanwe elapo aya Anamoona a Yehova. Anamunceene aakhweliwa amusi aya ni aapweteiwa sotheene yaarina aya. Mixankiho xeeni sikina arina aya? Ninrowa waakhaliherya sai anna ni arokora omurumeela Yehova ni ovikaniha ohakalala okathi anikumana aya mixankiho iyo? (Esalimo 100:2) Nave enamuna xeeni yooloka ya waalaleerya ale atthyanwe elapo aya ahimusuwenle Yehova?
MAKHALELO A ALE ATTHYANWE ELAPO AYA
3. Exeeni yaamwiirinhe Yesu ni atthareli awe anceene otthyawela ilapo sikina?
3 Nuumala nlaikha na Yehova omulopola Yosefe wira Mwene Herodi aaphavela omwiiva Yesu, nto Yesu ni anamuyari awe yaahitthyawela wEjiitu. Awo yaahikhala wEjiitu mpakha Herodi okhwa. (Matheyo 2:13, 14, 19-21) Iyaakha sinceene ohoolo waya, awiixutti a Yesu “yahimwarela ilapo s’oYudeya ni s’oSamaria” mwaha wa olupatthiwa. (Miteko 8:1) Yesu aanisuwela wira atthareli awe anceene yaarowa olupatthiwaka, nto eyo yanwiiriha otthyawela ilapo sikina. Yesu aahimmye so: “Mwalupatthiwaka muttetthe mmosá, mutthyaweleke mukina”. (Matheyo 10:23) Okhala wene, otthyawela elapo ekina, khivanikhweya.
4, 5. Mixankiho xeeni sinaaphwanya ale atthyanwe elapo aya vaavo (a) anitthyawa aya? (b) anikhala aya mapuro ari atthu atthyanwe elapo aya?
4 Hata ale atthyanwe elapo aya akhalaka mapuro anikhala atthu atthyanwe aahiiso nnaari, sinnaaphwanya mixankiho sinceene. Muhima awe Lije, oniihaniwa Gad, onihimya wira: “Saahivira isumana neettaka ni naaniweha mirutthu imiya sinceene”. Nave onnincererya oriki: “Kaarina iyaakha 12. Okhala wira inawu saka saahiipa, kaahaaleela amusi aka wira aroweke, nto miyo kaamuhala. Paapa aka aahikikuxa maana oova wira kanvariwa ni anakhotto. Etthu yaanikhaliherya khula nihiku waari onvekela ni omuroromela Yehova, nto ikwaha sikina naalya imanka paahi naaphwanya ahu mphironi”.—aFilipi 4:12, 13.
5 Amusi anceene a Lije, aaviriha iyaakha sinceene ari ene mapuro yaakhapeleliwa aya ni mutthenkeso wa Nações Unidas. Nave opuro ole saahikhala mixankiho. Lije, yoowo olelo-va onirumeela ntoko mutokweene a esirkwiitu, onihimya so: “Atthu anceene khiyaarina muteko. Nto yaari oowaapa, anamuhapaliwa, yaaweetta axooku a musurukhu, anawiiye ni yaanirupihana moohiloka”. Wira anna awerye osyaka mikhalelo iyo, yahaana oluttuweliwa miteko sa mmulokoni. (aHéberi 6:11, 12; 10:24, 25) Okhala wira yaahirumeela mwa miruku okathi aya, awo yaahivikaniha okhala oolipa mwekeekhaini ni anceene yaahikhala mapioneero. Awo yaanuupuwela wira muhoolo yaamukhuma opuro ole yaatthyawenle aya, ntoko siisaale waamanle aya okathi aIsarayeli yeetta aya mothakoni. Nto eyo yaahaakhaliherya ovikaniha okhalana moonelo wooloka.—2 aKorinto 4:18.
MWAAPHENTEKE ALE ATTHYANWE ELAPO AYA
6, 7. (a) Moota xeeni ‘omphenta Muluku’ onnikhaliherya aya waathokorerya saana annihu? (b) Nvahe ntakiheryo.
6 ‘Omphenta Muluku’ ti etthu ennikhaliherya waaphenta annihu, vanceenexa okathi sinaaphwanya aya mixankiho. (Mmusome 1 Yohani 3:17, 18.) Mwa ntakiheryo, okathi maKristau a eseekulu yoopacerya a oYudeya yaavoliwa aya etala, maKristau a wAntiyokiya yaahivarihana othukumanya yoolya wira yaakhaliherye anna ale. (Miteko 11:28, 29) Nave murummwa Paulo ni Pedru, yaahatumererya anna wira yaakhelaneke mukina ni mukhwaawe. (aRoma 12:13; 1 Pedru 4:9) Okhala wira maKristau anitumereriwa waareerela murima anna anikhuma mapuro makina, nihaana waareerela murima anna anihaawa ni anlupatthiwa mwaha wa waamini waya! * (Nwehe enoota.)—Musome Miruku 3:27.
7 Mahiku ala, elapo ya Ucrânia oriental Anamoona a Yehova ikonto sinceene, aatthyawa mwaha wa ekhotto ni olupatthiwa. Mooriipiha murima, anna akina ahiiviwa. Masi anamunceene a anna atthyanwe, ahaakheliwa saana itthoko sa anna ni arokora mapuro makina a Ucrânia ni oRussia. Ilapo iyo, anna annivikaniha ohiirela mpantta myaha sa epoliitika nto mooluttuweliwa, annivikaniha olaleya “ehapari yorera ya masu”.—Yohani 15:19; Miteko 8:4.
MWAAKHALIHERYE ALE ATTHYANWE ELAPO AYA OLIPIHA WAAMINI WAYA
8, 9. (a) Mixankiho xeeni ale atthyawenle elapo ekina anikhalana aya? (b) Xeeni ninreerela ahu waapixerya murima?
8 Atthu anceene annitthyawela mapuro makina a elapo aya. Masi, atthu akina annirowa elapo ekina ehitonko aya okhala. Nnaamwi guvernu aakhaliheryaka ale atthyanwe elapo aya, ntoko waavaha yoolya, ikuwo ni opuro wookhala, nlelo awo annikhalana mixankiho. Mwa ntakiheryo, yoolya pooti okhala yoovirikana ni ele yaalimalenle aya. Alipa-ootthyawa akina anikhuma ilapo sooviha, pooti ohisuwela ikuwo sinireerela owara elapo yooriirya. Waaniheryasa, akina ahaana wiixutta orumeela ikaruma sa etekonologia ya vano.
9 Iguvernu sikina sookhalana iprograma sa waakhaliherya ale atthyanwe elapo aya wira alimalele okhala elapo eyo. Masi ikwaha sikina iguvernu sinlipelela wira ale atthyanwe elapo aya yiikhapeleleke nuuvira myeeri vakhaani. Nto eyo pooti waaxankiha atthu awo. Nkahaya muupuwele itthu sinitthuneya wira yiixutte okathi omosaru: nttaava, soolema isya, malamulo a moota wooliva mpoosito, itthu sinivekeliwa oxikola, waalaka anamwane ni itthu sikina! Niireke munimwaapixerya murima ni mwa nttittimiho waakhaliherya anna ni arokora arina mixankiho iyo?—aFilipi 2:3, 4.
10. Ninrowa olipiha sai waamini wa anna atthyawenle elapo ahu? (Nwehe elatarato yoopacerya.)
10 Ikwaha sikina makhulupale annaaxankiha anna atthyanwe ilapo saya, okathi aniphavela aya osuwela opuro ori muloko. Mitthenkeso sikina sa guvernu, sinniwoopopiha sihimyaka wira sinoohiya waakhaliherya annihu. Waaniheryasa, sinnaaleela wira sinowoomola elapo eyo akhala wira annikhootta ovara muteko ohiniweemererya orowela mithukumano. Mwaha wa woova ni ohikhalana yoolipana, akina anneemererya miteko iyo. Tivonto, naakuveke owaavya annihu atthyanwe elapo aya nasuwela wira aaphiya elapo ahu. Awo ahaana woona wira ninnaathokorerya saana. Nto waathokorerya saana ni waakhaliherya, onoowiiriha olipiha waamini waya.—Miruku 12:25; 17:17.
MWAAKHALIHERYE ALE ATTHYANWE ELAPO AYA NI ITTHU SINAATHOWA
11. (a) Nihaana opacerya waavaha exeeni ale atthyanwe elapo aya? (b) Anrowa wooniherya sai oxukhurela waya?
11 Wanipacerya, hiyo pooti waavaha annihu yoolya, soowara aahiiso itthu sikina. * (Nwehe enoota.) Nave awo anooxukhurela akhala wira munimwaavaha itthu saamukhaani ntoko, egravata. Tthiri, ale atthyanwe elapo aya khanitthuneya oxankiha, masi ahaana oxukhurela itthu sinikhaliheriwa aya. Opaka eyo pooti waahakalaliha anna anaavaha. Nnaamwi vari siiso, ti vootthuneya ale atthyanwe elapo aya, ohoolo waya omananiha wiikhapelela. Eyo enimwaakhaliherya ovikaniha okhala oottittimiheya ni wataana saana ni annaya. (2 aTesalonika 3:7-10) Hata vari siiso, nihaana waakhaliherya.
Ninrowa waakhaliherya sai anna ni arokora atthyanwe elapo aya? (Nwehe ittima 11-13)
12, 13. (a) Ninrowa waakhaliherya sai ale atthyanwe elapo aya? (b) Nvahe ntakiheryo.
12 Hata nirina ene itthu sinceene aahiiso vakhaani, nnoowerya waakhaliherya anna awo. Maana waaphenta wahu ni okathi ahu ti itthu sootepa otthuneya. Mwa ntakiheryo, nyuwo pooti owooniherya opuro wonwela xaapa, opuro woothuma yoolya yooloka masi yookhuwala epereso. Nave pooti owooniherya opuro woothuma maakina oottottha ni maakina anthikila malaxi wira aphwanyeke musurukhu. Etthu yootepa otthuneya, waakhaliherya woona
wira annaakheliwa muloko ahu. Vaweryaneya, hiyo pooti waakuxa mukaaroni mwahu naarowaka mithukumano. Nave-tho, pooti orowa olaleerya hoothe ni waakhaliherya osuwela moota woolaleerya muttetthe ahu.13 Nuumala amiravo axexe ophiya mmulokoni, axitokweene anceene yahaakhaliherya saana. Awo yaahiwiixuttiha moota woweettiha ekaaro, olepa ekarta arumeelaka maakina ni moota woophwanya muteko. Awo nave, yaahiwooniherya moota woolokiherya miteko saya wira apweheke nipuro noopacerya muteko wa Yehova. (aGalasia 6:10) Moohipisa, amiravo ale axexe yaahikhala mapioneero. Nikhaliheryo na axitokweene vamosa ni wiimananiha waya okhalana soolukama mmuteko wa Yehova, ohaakhaliherya orowa vahoolo momunepani ni osyaka wiirela mpantta olumwenku wa Satana.
14. (a) Yoweeha xeeni ale atthyanwe elapo aya, anitthuneya aya osyaka? (b) Nvahe ntakiheryo.
14 Ntoko maKristau otheene, ale atthyanwe elapo aya ahaana osyaka yoweeha ya ophavela mihakhu, alipihaka wataana waya ni Yehova. * (Nwehe enoota.) Lije nimulavunle ahu wanipacerya, ni annawe ni axirokorawe annuupuwela okathi tiithi aya aalenle awe otthuneya waya okhalana waamini okathi ole wootthyawa. Awo anihimya so: “Vakhaani-vakhaani, aahipacerya oriha itthu sahaarina efaita naakunxe ahu. Nto, aahikuxa murupa wahaarina etthu, otheyaka aahihimya wira: ‘Muhoona? Ela ti etthu enitthuneya wa nyuwo!’”—Mmusome 1 Timótheyo 6:8.
NAAKHALIHERYEKE ATTHYANWE ELAPO AYA ITTHU SINAATHOWA
15, 16. (a) Ninrowa olipiha sai waamini wa annihu? (b) Ninrowa waakhaliherya sai mmuupuweleloni?
15 Ale atthyanwe elapo aya khahiyo paahi aniphavela yoolya ni soowara. Masi anitthuneya okhaliheriwa mmuupuweloni ni olipihiwa ni Biibiliya. (Matheyo 4:4) Nto axitokweene pooti waakhaliherya avekelaka iliivuru sa nttaava na anna awo ni owaavya anna anilavula nttaava naya. Ela etthu yootepa otthuneya okhala wira anceene atthyanwe elapo aya aahiya itthu saalimalenle aya. Nto anninkheliwa amusi aya, muttetthe aya ni muloko aya. Awo ahaana woona wira atthu a Yehova anniphentana ni woonelana othunku. Akhala wira khinnaakhaliherya, awo anrowa ophavelaka okhaliheriwa ni ale arwanne aya elapo emosaru masi ahinimurumeela Yehova. (1 aKorinto 15:33) Vaavo ninwaakhela ahu saana mmulokoni, ninnivara vamosa ni Yehova naakhapelelaka “aletto”.—Esalimo 146:9.
16 Yesu ni emusi awe khiyaatthikenle-tho elapo aya okathi ale yaalupattha yaalamulela aya. Nave, mahiku ala, ale atthyanwe elapo aya pooti ohiwerya otthikela elapo aya. Masi akina khaniphavela otthika. Lije onihimya wira anamuyari anceene yaawenhe amusi aya atupheliwaka wira arupihiwe ni wiiviwa, khaniphavela-tho otthikela ni anaaya elapo aya. Wira naakhaliherye annihu, nihaana ‘ophentana ntoko axinna; nikhalaka a ikharari ni òwìyeviha’. (1 Pedru 3:8) Olupatthiwa onniwiiriha ale atthyanwe elapo aya osyaka weetta ni atthu akina, nave pooti wuuliwa muru olavula mixankiho saya, vanceenexa akhala wira anaaya ari vaavo. Nto mwiikoheke so: ‘Vaakhanle wira muxankiho owo onikiiraneela miyo, kaarowa ophavela othokoreriwa mwa enamuna xeeni?’—Matheyo 7:12.
OKATHI NNAALALEERYA AHU ALE ATTHYANWE ELAPO AYA
17. Moota xeeni olaleerya onaakhaliherya aya ale atthyanwe elapo aya?
17 Atthu anceene atthyanwe elapo aya olelo-va, anikhuma ilapo seiye muteko woolaleerya onikhoottihiwa aya. Mwaha wa oluttuweliwa wa Anamoona, ikonto sinceene sa ale atthyanwe elapo aya ahiiwa ekwaha yoopacerya mookumini mwaya “masu Òmwene”. (Matheyo 13:19, 23) Atthu anceene ‘alemeliwe muritti mulupale’ anniphwanya olipa ni nimaaliho mmithukumanoni sahu, nto annihimya ariki: “Vekekhai, Muluku ori ni nyuwo!”—Matheyo 11:28-30; 1 aKorinto 14:25.
18, 19. Ninrowa waarumeela sai ankhili okathi nnaalaleerya ahu ale atthyanwe elapo aya?
18 Nihaana okhala “òwipasopa” ni waarumeela ankhili okathi nnaalaleerya ahu ale atthyanwe elapo aya. (Matheyo 10:16; Miruku 22:3) Mpixeke murima okathi munaawiriyana anyu atthu awo, masi muhilavuleke myaha sa epoliitika. Nihaana otthara malakiheryo ninvahiwa ahu ni efiliyaali ni ale aneettiha elapo wira nisyake ophwanya ehasara ni waaphwanyiha atthu akina. Okhala wira atthu awo yaari a itiini ni soolema soovirikana, nto nihaana wiixutta moota woottittimiha moonelo ni muupuwelo aya. Mwa ntakiheryo, atthu anikhuma ilapo sikina aakhalana moonelo aya voohimya sa moota athiyana anireerela aya owara. Tivonto, okathi nnaalaleerya ahu, nihaana owara mwa enamuna ehinrowa waakhumuliha.
19 Nimphavela waakhaliherya atthu anihaawa, hata ahimurumeelaka Yehova. Napaka eyo, nnootthara ntakiheryo nooloka na muSamariya aalavuliwe ni nlikanyiho na Yesu. (Luka 10:33-37) Enamuna yooloka ya waakhaliherya atthu ori waalaleerya ihapari sooreera. Mutokweene ohireere waakhaliherya ale atthyanwe elapo aya, ohimyale wira ti vooloka waaleela wira hiyo na Anamoona a Yehova. Nihaana waaleela wira khahiyo ninkawa yoolya, masi nimphavela waakhaliherya wiiwexexa nlipelelo nooloka nri mBiibiliyani.
SOOKHUMELELA SOOHAKALALIHA
20, 21. (a) Itthu xeeni sooreera sinikhumelela mwaha wa waaphenta ale atthyanwe elapo aya? (b) Mwaha onittharelana, ninrowa wiixutta exeeni?
20 Okathi nnaaphenta ahu mwekeekhai “aletto”, eyo ennikumiherya itthu sooloka. Vaavo murokora Alganesh aakhweliwa awe iyawe, owo ni anaawe 6 yaahitthyawa elapo ya wEritreia mwaha woolupatthiwa. Awo yaaheetta mahiku 8 aviraka mutakhwani. Wanikisa waya, akhulumunwe ene vanceene, awo yaahiphiya oSudão. Nto murokora owo onihimya so: “Anna yaanithokorerya ntoko amusi aya, anivahaka yoolya, soowara, opuro wookhala ni onikuxa mukaaroni mwaya. Ti pani aarowa owaakhela saana vate vawe ale atthyanwe elapo aya mwaha woomukokhorela Muluku mmosaru? Eyo eniiraneya paahi ni Anamoona a Yehova!”—Mmusome Yohani 13:35.
21 Ankhi anamwane anceene anirwa ni anamuyari aya? Mwaha onittharelana, ninrowa wiixutta moota wookhaliherya imusi iyo omurumeela Yehova moohakalala.
^ etti. 2 Mwaha ola, moolumo oowi “ale atthyanwe elapo aya”, anihimmwa atthu yaale atthyanwe elapo aya mwaha wa ekhotto, olupatthiwa aahiiso ihasara sa ephattu. Vano anikhala elapo ekina aahiiso muttetthe mukina wa elapo aya. Moovarihana ni ACNUR (Alto Comissariado das Nações Unidas para Refugiados), onihimya wira eriyari ya atthu 113 olumwenku wotheene, mutthu mmosa otthyanwe elapo awe.
^ etti. 6 Nwehe mwaha oni: “Muhihiyé Owakhela Aletto”, Owehaweha a Outubro 2016, ipaaxina 8-12.
^ etti. 11 Moohipisa nuumala ale atthyanwe elapo aya ophiya, axitokweene a muloko ahaana otthara malakiheryo a Organizados para Fazer a Vontade de Jeová, ekapiitulu 8, ettima 30. Wira asuwele muloko wa anna awo, axitokweene ahaana olepela ofiliyaali emurumeelaka jw.org. Okathi omosaru, axitokweene pooti mwa miruku omukoha muloko awe munna aahiiso murokora owo, wira asuwele mukhalelo awe womunepani.
^ etti. 14 Nwehe myaha sini: “Khaavo Oniwerya Waarumeela Mamwene Manli” ni “Nihimyeke ni Nroromelo Wira Yehova Tonnikhaliherya!”, erevista Owehaweha 15 a Abril, 2014 ipaaxina 17-26.