1. Xeeni anna ni arokora akina vanaaxankiha aya opaka yoosoma aya ya Biibiliya?

OLELO-VA, wira mutthu ophwanye yoolya ohaana wiimananiha vanceene. Anna ni arokora anceene annivara muteko nihiku notheene wira akhapelele etthoko aya. Akina ahaana weetta mukwaha woorakama khula nihiku wira aphiye omutekoni waya. Atthu akina annivara muteko wookhulumula wira aphwanye yoolya. Tthiri wanikisa wa nihiku, anna ni arokora awo annikhulumuwa vanceene! Nto pooti wira khanikhalana ikuru wira apake yoosoma aya ya Biibiliya.

2. Munipaka okathi xeeni yoosoma anyu ya Biibiliya?

² Hata nikhulumuwaka nihaana ophavelasa okathi wira nisome Nuulumo na Muluku ni iliivuru sikina sa mutthenkeso ahu. Tthiri waataana wahu ni Yehova ni okumi ahu woohimala onlipa ni omusoma Biibiliya ni iliivuru sahu! (1 Tim. 4:15, 16) Atthu akina annipeherya apaka yoosoma aya, mwaha woowi okathi owo ti woomaaleleya ni muupuwelo aya onnikhala saana. Akina annirumeela minutu vakhaani anikhalana aya wanikisa wa nihiku wira asome ni wuupuwelela ele asomme aya.

3-4. Mahiku ala marukunuxo xeeni apakiwe, ni nthowa xeeni?

³ Moohaanyiherya, munnikupali wira ti vooloka ophavelasa okathi wira mpake yoosoma anyu ya Biibiliya. Masi nihaana osoma exeeni? Woonasa wene munnuupuwela so: ‘Khasireere itthu soosoma, nkinwerya osoma itthu sotheene’. Anna akina anniwerya osoma iliivuru ni oweha iviidiyu sotheene sinikumiheriwa ni mutthenkeso ahu. Masi anna ni arokora akina vannaavila ophwanya okathi wira apake eyo. Nikhuuru Noolamulela ninnisuwela eyo. Tivonto malakiheryo a niinaano annooniherya wira iliivuru soowimpirimiriwa ni iye siri munternetini soovukuliwa.

⁴ Mwa ntakiheryo, mahiku ala oohiiwa opakiwa Anúario das Testemunhas de Jeová. Nto sowiiraneya sinceene siniphwanyaneya  va jw.org^® ni iprograma sa khula mweeri sa JW Broadcasting^®. Ohiya-vo, erevista Owehaweha ankaweliwa atthu ni erevista Nvenye! sinikumiheriwa ikwaha tthaaru vamwaakhani. Anna a Nikhuuru Noolamulela aapaka marukunuxo awo, wira nikhalaneke okathi woomukokhorela Yehova. Nave yoolakela ya marukunuxo awo onikhaliherya ohela nipuro noopacerya “itthu sintepa ophwanela”. (aFil. 1:10) Vano nrowe niwehe etthu mukhanle anyu oopaka wira muhele nipuro noopacerya yoosoma anyu ya Biibiliya ni mireerelo munrowa anyu ophwanya.

5-6. Ikaruma xeeni ninreerela ahu osoma ni ephoole?

⁵ Etthu xeeni enireerela ohela nipuro noopacerya naasomaka? Khula nihiku nihaana osoma Nuulumo na Muluku. Woonasa wene, muhoona wira mahiku ala iveersu sa omusoma Biibiliya khula esumana soovukuliwa. Anna aapaka marukunuxo awo wira nikhalaneke okathi wowuupuwelela ni otokosa saana ele ninsoma ahu. Yoolakela ahu ehikhaleke osoma iveersu iyo paahi, masi nihaana weemererya yoosoma eyo ya Biibiliya enivaraka murima ni onikhaliherya wuncererya omphenta ni omwiiwelela wahu Yehova.​—Esal. 19:15.

⁶ Etthu xeeni ekina ninreerela ahu ovaha ephoole naasomaka? Nihaana olokiherya saana erevista ahu Owehaweha Yoosoma, Eliivuru ya Yoosoma ya Muloko ni osoma myaha sa mithukumano sa eriyari ya esumana. Nave nihaana osoma irevista sotheene Owehaweha ni Nvenye! sinikumiheriwa.

7. Niireke nihaana okhulumuwa akhala wira khaninwerya osoma aahiiso oweha itthu sotheene sinikumiheriwa va jw.org aahiiso va TV JW?

⁷ Pooti wira nyuwo munnuupuwela so: ‘Sookhala itthu sinikumiheriwa va jw.org^® ni JW Broadcasting^®, iyo khasireere, kiireke tthiri kihaana oweha aahiiso osoma?’ Masi nkahaya nlikanyihe so: Muupuwele wira munrowa erestaurante yowaatta soolya soosiva. Ekeekhai wira khamunrowa owerya olawiha soolya sotheene sikhanle. Masi nyuwo munimoolya enakhalakaru enamuna emosa ya yoolya. Etthu emosaru enniiraneya ni iliivuru ni iviidiyu nrina ahu va jw.org. Akhala wira khamunrowa owerya osoma aahiiso oweha iviidiyu sotheene, muhixanke, musomeke aahiiso nweheke mpakha vaniwerya anyu. Vano nrowe niwehe ele entaphulela aya osoma ni moota woottottela mureerelo ele ninsoma ahu.

8. Itthu xeeni munireerela anyu opaka okathi munilokiherya anyu erevista Owehaweha Yoosoma? Opaka eyo munrowa ottottela mureerelo xeeni?

⁸ Osoma ontaphulela othokorerya saana mwaha owo wira niixutte etthu. Nave osoma khahiyo paahi okhwenyenya aahiiso opintari mapuro anaakhuliwa makoho. Mwa ntakiheryo, okathi ninlokiherya ahu erevista Owehaweha Yoosoma, wanipacerya nihaana osoma masu ari wanipacerya wa mwaha owo opuro oni: “Ele ninrowa ahu wiixutta”. Nuumala-vo, nwehe muru muulupale wa yoosoma eyo, miru saamukhaani ni makoho oowuuluula. Moottharelana muhaana osoma khula ettima moohitthimaka ni ephoole. Nvaheke ephoole moolumo oopacerya a khula ettima. Okhala wene, awo annihimya etthu ettima eyo enniixuttiha aya. Vaavo munisoma anyu mwaha owo, nwehe moota khula ettima enikhaliherya aya muru muulupale wa mwaha owo ni moota khula muru mwaamukhaani onikhaliherya aya mwaha onithokoreriwa. Akhala wira munniphwanya moolumo aahiiso ifrase muhiniiwexexa anyu, mpintariki ni mutokoseke okathi mukina.

9. (a) Xeeni vanireerela aya ovaha ephoole soolepa okathi wa yoosoma ya erevista Owehaweha? (b) Ntoko onihimya awe Yoxuwa 1:8, nihaana opaka exeeni okathi ninsoma ahu yoolepa?

 ⁹ Vaavo ninthokorerya ahu erevista Owehaweha Yoosoma mmithukumanoni, eyo enninikhaliherya omwiiwexexa Biibiliya. Tivonto muhaana ovaha ephoole soolepa siri mwaha owo, otepexa wene iye sinisommwa okathi muloko onithokorerya awe mwaha owo. Nvaheke ephoole moolumo a yoolepa eyo anttittimiherya iponto suulupale sa ettima eyo enithokoreriwa. Ohiya-vo, muhaana wuupuwelela soolepa ni oweha moota munrowa anyu ovarihela muteko mookumini mwanyu.​—Mmusome Yoxuwa 1:8.

10. Moovarihana ni aHéberi 5:14, xeeni vanireerela aya anamuyari ottottela mureerelo Omulompa Muluku Vatthokoni wira awiixuttihe anaaya osuwela osoma ni otokosa?

¹⁰ Tthiri anamuyari anniphavela wira okathi Woomulompa Muluku Vatthokoni okhaleke okathi woohakalaliha, ni anaaya attotteleke mureerelo. Nnaamwi axipaapa arina ene muritti woosuwela vahinatthi itthu anrowa aya othokorerya, awo ahitepeke oxanka aphavelaka ophwanya myaha anoona aya wira ti sootepa oreera aahiiso sinimwaasivela vanceene atthu a etthoko aya. Okathi mukina wa Omulompa Muluku Vatthokoni pooti orumeela wira nwehe eprograma ya mweeri owo ya TV JW aahiiso opaka etthu ya vameekhaaya ntoko opaka ekalawa ya Nowe. Nave anamwane ahaana wiixuttihiwa moota woosoma. Mwa ntakiheryo, awo ahaana osuwela moota woolokiherya mithukumano, moota wootokosa wira yaakhule makoho oxikola ni moota woopaka yoosoma aya. (Mmusome aHéberi 5:14.) Akhala wira aniinyu anoolimalela osoma owaani, eyo enimwaakhaliherya ovaha ephoole ni ottottela mureerelo mithukumano sa mmulokoni, asembeleya ni akongresu yaawo okhala wene anihela muhina iviidiyu. Musuweleke wira okathi muniviriha anyu musomaka ni mwaninyu onlipa ni munnuwelo ni makhalelo a mwaninyu.

11. Xeeni vanireerela aya omwiixuttiha ole nimmusomiha ahu Biibiliya osuwela osoma?

¹¹ Ale nnaasomiha ahu Biibiliya ahaana osuwela moota woosoma. Wanipacerya ninnihakalala vaavo nnaweha ahu asuwelaka opuro anaakhuliwa makoho a eliivuru anisoma aya aahiiso iliivuru sinithokoreriwa omuthukumanoni. Hata vari siiso, nihaana owiixuttiha osuwela otokosa myaha ni opaka yoosoma aya yoohakalaliha. Napaka eyo, okathi anrowa aya okumanana muxankiho khivanrowa otthuneyaka waakoha atthu akina mmulokoni wira yaaleele etthu yoopaka. Maana anoosuwela  moota wootokosa mwaha owo ni ophwanya ele aniphavela aya.

12. Nikhalaneke yoolakela xeeni naasomaka?

¹² Akhala wira nyuwo khamunisiveliwa osoma, pooti muupuwelaka wira khamunikhala-khala musiveliwaka. Masi eyo khahiyo ekeekhai. Etthu ekhanle anyu oopaka tiila: Mpaceryeke osoma okathi vakhaani, muhoolo mwaya, vakhaani-vakhaani muncereryeke okathi munisoma anyu. Nave musuweleke etthu eniwiirihani osoma. Tthiri munnisuwela wira yoolakela ahu yuulupale naasomaka, okhalana waataana wooloka ni Yehova. Nave nyuwo pooti okhalana soolukama sa okathi vakhaani. Mwa ntakiheryo, pooti okhalana yoolukama ya waakhula makoho munikohiwa anyu mwaalaleeryaka aahiiso otokosa moota wooxintta muxankiho murina anyu.

13. (a) Itthu xeeni mmiravo onireerela awe opaka wira otthokiherye sookupali sawe oxikola? (b) Munrowa ovarihela sai muteko malakiheryo ari aKolosi 4:6?

¹³ Mwa ntakiheryo, nyuwo amiravo munisoma oxikola pooti wira anaxikola akhwiinyu annikupali wira itthu siroothatuwa. Woonasa wene, munniphavela waaleela ele Biibiliya oniixuttiha awe, masi munoona wira khamuniwerya opaka eyo. Nto ola ti okathi wira mpacerye otokosa saana mwaha owo! Nyuwo pooti okhalana soolakela piili: (1) Olipiha yookupali anyu yoowi itthu sotheene sipattuxiwe ni Muluku ni (2) osuwela moota wowaatthokiherya atthu sookupali sanyu. (aRom. 1:20; 1 Ped. 3:15) Nyuwo pooti wiikoha so: ‘Xeeni anaxikola akhwaaka anikupali aya wira itthu siroothatuwa?’ Nuumala-vo, murumeelaka iliivuru sa mutthenkeso ahu, muhaana otokosa saana mwaha owo. Waakiherya sookupali sahu khivanikhweya. Muupuweleke wira atthu akina annikupali wira itthu siroothatuwa mwaha woowi mutthu animuttittimiha aya towiixuttinhe. Akhala wira okathi munitokosa anyu moophwanya eponto emosa wala piili sinooniherya wira yowiixuttiha ya othatuwa ti yeethiru, mwaaleeleke ale aniphavela wiiwa.​—Mmusome aKolosi 4:6.

14-16. (a) Munrowa wiixutta sai eliivuru ya mBiibiliyani muhinsuwela anyu saana? (b) Murumeelaka soolepa silavuliwe muttimani, mutthokiherye moota woosuwela saana eliivuru ya Amosi. (Nwehe ekaaxa eni: “ Mwaasuwele Saana Atthu Anilavuliwa mBiibiliyani.”)

¹⁴ Nkahaya muupuwele wira nihiku nimosa mmuthukumanoni ninrowa osoma eliivuru emosa yaamukhaani ya maprofeta aniromoliwa mBiibiliyani. Woonasa wene, khamunsuwela itthu sinceene sa eliivuru eyo. Munrowa opaka exeeni? Wanipacerya, muhaana ophavela osuwela itthu profeta owo olempe awe ni ele nniixutta ahu. Munrowa owerya sai opaka eyo?

¹⁵ Nyuwo muhaana wiikoha so: ‘Etthu xeeni kinsuwela aka sa mulipa-oolepa eliivuru ela? Owo ari aani? Aakhala opuro xeeni? Tuuvi waari muteko awe?’ Osuwela makhalelo a mulipa-oolepa owo animookhaliheryani osuwela etthu yaamwiirinhe olepa mwa enamuna eyo ni etthu yaamwiirinhe orumeela malikanyiho awo. Nto vaavo munrowa anyu osomaka, mphaveleke woona moolumo anooniherya omutthu wa mulipa-oolepa eliivuru eyo.

¹⁶ Etthu ekina enrowa wookhaliheryani ti otokosa okathi eliivuru eyo elempwale aya. Nyuwo pooti orumeela ekaaxa eni: “Tabela dos Livros da Bíblia” eri wanikisa wa Biibiliya Tradução do Novo Mundo. Nave-tho nyuwo pooti orumeela eponto 3 ya elivirinyu eni: Malakiheryo Anikhaliherya Osoma Nuulumo na Muluku, mpantta onilavula sa maprofeta ni mamwene. Akhala wira eliivuru munisoma anyu enilavula sa iprofesia, mmananiheke oweha makhalelo a  atthu yaakhala okathi owo. Moonelo xeeni ni mweettelo xeeni woohiloka profeta owo aaphavela awe waakhaliherya ottharuwa? Tani yaakhala okathi wa profeta owo? Wira musuwele itthu sinceene sa yowiiraneya eyo, nyuwo pooti osoma iliivuru sikina sinimutthokiherya Biibiliya. Mwa ntakiheryo, wira musuwele etthu yiiraneya okathi wa profeta Amosi, nyuwo muhaana osoma soolepa ntoko 2 Mamwene ni 2 Wahala a Mamwene, siri ereferensia ya Amosi 1:1. Nave nyuwo pooti otokosa voohimya sa Hoseya, yoowo aakhala okathi omosaru ni Amosi. Itthu iyo sotheene sinimookhaliheryani osuwela okathi Amosi aakhanle awe.​—2 Mam. 14:25-28; 2 Wah. 26:1-15; Hos. 1:1-11; Am. 1:1.

17-18. Murumeelaka ntakiheryo nri muttimani aahiiso nikina munuupuwela anyu, muhimye moota oweha itthu saamukhaani sinnikhaliherya aya osiveliwa ni yoosoma ahu.

¹⁷ Okathi nimmusoma ahu Biibiliya ti vooloka ophavela wiixutta itthu sinceene. Mwa ntakiheryo, muupuwele wira munsoma ekapiitulu 12 ya eprofesia ya Zakariya enilavula sa okhwa wa Mesiya. (Zak. 12:10) Nto vaavo munisoma anyu eveersu 12, munnoona wira “emusi ya Natani” yammunlela vanceene Mesiya. Ohiya ohicalela etthu eyo, nyuwo pooti wiikoha so: ‘Emusi ya Natani enivarihana sai ni Mesiya? Niireke yookhala enamuna yoosuwela eyo?’ Nyuwo muhaana otokosa. Pooti orumeela ireferensia seiyo sinrowa wooroihani yoolepa ya 2 Samuweli 5:13, 14, yeeyo enooniherya wira Natani aari mwaana a Mwene Davidi. Ereferensia ekina enooroihani yoolepa ya Luka 3:23, 31, yeeyo enooniherya wira Natani aari muhavinre awe Maria maama awe Yesu. (Munwehe Owehaweha nummuru 3, 2016 epaaxina 9 ittima 1-3.) Moohaanyiherya nuumala ophwanya eyo munnihakalala vanceene! Vano munnoona wira eprofesia ele ennooniherya wira Mesiya aarowa orwa nloko  na Davidi. (Math. 22:42) Musuweleke wira Davidi ahikhalana anamwane 20. Tthiri munnitikinihiwa woona wira profeta Zakariya aahilavula mooluluwanya wira etthoko ya Natani yammunlela Mesiya.

¹⁸ Nwehe ntakiheryo nikina. Ekapiitulu 1 ya Luka, ninnoona wira nlaikha Gabriyeli naahimuxukurya Maria ni naahimuleela voohimya sa mwaana aarowa awe omuyara nriki: “Mwan’owo onrowa okhala mulupale, onimwihaniwa Mwana a Muluku Mulupalexa. Apwiya Muluku anonvaha omwene wa Davidi, tithi awe. Owo onimwettiha vohimala-tho nloko na Yakobe”. (Luka 1:32, 33) Woonasa wene hiyo pooti omakela wuupuwelela paahi masu a nlaikha Gabriyeli anihiya wira Yesu aarowa wiihaniwa “Mwana a Muluku Mulupalexa”. Masi nlaikha nne naahihimya wira Yesu aarowa ‘owettiha’ aahiiso olamulela ntoko Mwene. Hiyo pooti wuupuwelaka so: Exeeni Maria uupuwela awe nuumala wiiwa masu awo a nlaikha Gabriyeli? Niireke uupuwela wira Yesu aarowa omuranttela Mwene Herodi? Akhala wira Yesu aarowa okhala mwene, Maria aamukhalana eparakha yuulupale ni amusi awe yaarowa okhalaka empa ya mwene. Masi Biibiliya khonihimya akhala wira Maria ootoko wuupuwela eyo. Nave khonihimya wira Maria ootoko onvekela Yesu opuro wa vameekhaaya Momweneni mwa Muluku, ntoko awiixutti akina a Yesu yaavekenle aya. (Math. 20:20-23) Itthu iyo sinninikhaliherya woona wira Maria aari muthiyana oowiiyeviha vanceene!

19-20. Moovarihana ni Yakobo 1:22-25 ni 4:8, nikhalaneke yoolakela xeeni naamusomaka Biibiliya?

¹⁹ Ntoko nihimmye ahu wanipacerya, yoolakela ahu yuulupale okathi nimmusoma ahu Biibiliya ni iliivuru sinimutthokiherya Biibiliya, okhalana waataana wooloka ni Yehova. Nave nimphavela osuwela omutthu ahu ni opaka marukunuxo anireerela wira nimusiveliheke Muluku. (Mmusome Yakobo 1:22-25; 4:8.) Nto muhinatthi opacerya omusoma Biibiliya muhaana onvekela Yehova wira oovaheeni munepa awe wootteela. Mmuxontteleke wira ookhaliheryeni wiixutta itthu sinceene ni opaka marukunuxo mookumini mwanyu wira mukhale mutthu oolokexa.

²⁰ Akhala wira mookhalana yoolema ya omusoma Biibiliya, munookhala mutthu ntoko ole onilavuliwa ni nasaalimo, oni: Owo ‘ónnisiveliwa n’ikano s’Apwiya, onnitthokelela ikano iyo othana n’uhiyu. . . . Miteko sothene onvarawe, sinnirera’.​—Esal. 1:2, 3.