Etthu ele yowoopiha yaakiiranenle, yaahituruka okumi aka ni yaahikiiriha ophavela omusuwela Mpattuxa. Masi kihinatthi wooleelani itthu siiraneyale moottharelana ohiyu ole, mukihiye kootthokiheryeni moota kihuuwale aka. Itthu saakikhumelenle okathi ole saahilokiherya muupuwelo aka ni saahikikhaliherya ophavela omusuwela Muluku.

Miyo kiyariwe mwaakha wa 1937 epooma ya oGuesnain, yeeyo anithimpwa maluku oowaarya oFrança. Paapa aka aathipa makhala, nto ookiixuttiha ovara muteko. Nave paapa aka ookiixuttiha okhala mutthu a xariya. Owo aanaakhaliherya vanceene atthu ale yaathipa maluku oowaarya, yaawo yahaathokoreriwa saana omutekoni ni yaahaarina makhalelo a muteko ooloka. Paapa aka aaniirela mpantta ekrupu ya atthu yaawanela ihakhi sa atthu ale yaathipa maluku oowaarya. Ohiya-vo, paapa aka aaninanariwa vanceene mwaha wowootha wa ahooleli a itiini a elapo ele. Ahooleli anceene a etiini yaahikhalana makhalelo ooloka, masi hata vaari siiso, yaanaavekela yoolya ni musurukhu atthu ale yaathipa maluku, yaawo yiimananiha vanceene wira aphwanye enayevaru wira alyiheke emusi aya. Paapa aka khaasiveliwa nnakhala  vakhaani mweettelo wa ahooleli ale a etiini. Nto khaaniixuttinhe nnakhala etthu emosa enivarihana ni etiini. Ohimya ekeekhai khinaatonko olavula voohimya sa Muluku.

Vaavo kannuwa aka, kaninyokha vanceene ohixariya. Mwa ntakiheryo, miyo kaanoona wira atthu a elapo ekina yaakhala oFrança yaanikhaleliwa nthalu. Miyo kaamakela ommana boola ni anamwane a atthu yaakhumme ilapo sikina ni waanikisivela vanceene othweela naawo. Maama aka, aari a oPolonia, ohiya oFrança. Miyo kaaphavela wira atthu a makhuli otheene akhaleke ni murettele ni ahipuheryaneke.

Kaahilattuliwa wiirela mpantta etoropa, mwaakha wa 1957. Nto ti etthu yaakiirinhe ophiya myaako iye sa wArgélia ohiyu ole wooriipa vanceene kilavunle aka wanipacerya. Nuumala okhuwela wira “Muluku! Mukikhaliherye!” Kaahikumanana nwanani, masi ohiya nakhotto, owo aari buuru a mutakhwani. Owiitho waahikikokola. Hata vaari siiso, yowiiraneya ele ni itthu ekhotto yaakumihenrye aya yaahikiiriha wuupuwela yootaphulela ya okumi. Exeeni emwiirinhe Muluku waapattuxa apinaatamu? Niireke Muluku onninthokorerya? Niireke nnookhala-khala nikhalanaka murettele ohinimala?

Okathi kaari aka owaani kiri ene ifeeriya, kaahimusuwela Namoona a Yehova mmosa. Owo aahikivaha Biibiliya La Sainte Bible, a eFrancês, yoowo aataphuleliwe ni Ekerexa Katoolika. Nto kaahipacerya omusoma nuumala otthikela wArgélia. Mpantta wahaareere okisivela yaari yoolepa ya Wiisuupulula 21:3, 4. Yoolepa eyo enihimya so: “Eheema ya Muluku eri ni apinaatamu, . . . owo onoopuputtha maithori aya otheene, khunrowa-tho okhala okhwa, nnakhala oriipiwa murima, wala wunla, hata woona owereya. Itthu sa khalai soovira”. * Moolumo ale yaahikivara murima nkaatonko woona. Nto kaahiikoha so: ‘Kiireke moolumo ala animwiiraneya?’ Okathi ole miyo nkaasuwela etthu voohimya sa Muluku ni Biibiliya.

Nuumala omaliha miteko sa etoropa mwaakha wa 1959, kaahimusuwela Namoona a Yehova oniihaniwa François, yoowo aakiixuttinhe ikeekhai sinceene sa mBiibiliyani. Mwa ntakiheryo, owo aahikooniherya mBiibiliyani nsina na Muluku, Yehova. (Esal. 83:19) Nave François aahikitthokiherya wira Yehova onooruuha exariya valaponi, onimwiiriha elapo okhala eparayiisu ni onoomaliherya moolumo ari Wiisuupulula 21:3, 4.

Sowiixuttiha iye saari sookhalela ni saahikivara murima vanceene. Masi kaahipacerya onanariwa mwaha wa ahooleli a itiini, miyo kaaphavela wooniherya wira itthu aniixuttiha aya ti sowoothiwa ni khasinikhuma mBiibiliyani. Nto kinoona wira kaari ntoko paapa aka, maana nkaapixa murima. Miyo kaaphavela opaka etthu mowaakuveya!

François ni apatthani aka asya Anamoona a Yehova, yaahikikhaliherya omaaleleya. Awo yaahikitthokiherya wira muteko ahu ntoko maKristau khahiyo waaphukela atthu, masi waavaha nlipelelo ninvahiwa ahu ni ihapari sooreera sa Omwene wa Muluku. Owo tori muteko Yesu Kristu aavara awe ni aavanhe awe atthareli awe wira avareke. (Math. 24:14; Luka 4:43) Nave kaahiixutta ovaanela ni atthu moopixa murima ni mooreerela murima  moohicikha itthu anikupali aya. Biibiliya onihimya wira: “Murumeyi a Pwiya khonireerela onyakulihana, masi ohaana waareerela murima atthu otheene”.—2 Tim. 2:24.

Kaahipaka marukunuxo mookumini mwaka ni kaahipatisiwa kikhala Namoona a Yehova, okathi wa asembeleya a esirkwiitu aapakiwe mwaakha wa 1959. Nave okathi ole wa asembeleya kaahimusuwela mwali iihaniwa Angèle, nto aahikisivela. Kaahipacerya oxukurya muloko awe ni naahithelana mwaakha wa 1960. Tthiri owo muthiyana ooloka, ooreera murima ni yoovaha enikhuma wa Yehova.—Mir. 19:14.

Mwa iyaakha sinceene, anna a ankhili ni arina sookumanana sinceene aakiixuttiha itthu sa faita yinceene. Etthu yuulupale kiixuntte aka tiila: Naaphavelaka okhumela saana yoothanleliwa yooxankiha, nihaana wiiyeviha ni ovarihela muteko malakiheryo ari Miruku 15:22, yaawo anihimya wira: “Yattá anvaha miruku sorera, miteko iyo sinokelela oholo”.

Mwaakha wa 1964, kaahipacerya woona wira miruku iye ti soovareleya muteko. Mwaakha ole, kaahithanliwa okhala mutokweene a esirkwiitu wira kaalipihe anna ni arokora. Masi okathi ole, miyo kaarina iyaakha 27 paahi ni nkaarina sookumanana sinceene, nto kaanivonya. Hata vaari siiso, kaaniimananiha wiixutta ni soovonya saka. Nto kaaniixutta etthu ni anna a ankhili yaasuwela ovara miteko sinceene.

Kinnuupuwela etthu yaakikhumelenle wanipacerya wa muteko aka wa osirkwiitu. Nuumala oxukurya muloko mmosa oParis, munna mmosa oolipa mwa omunepani aahikivekela wira navaanele okhwipi. Nto miyo kaahimwaakhula wira: “Aayo”.

Munna ole aahikikoha so: “Louis, okathi meetiku onrowa awe oxukurya etthoko, tani onrowa awe onweha?”

Kaahimwaakhula wira: “Muretta”.

Munna ole aahihimya wira: “Ekeekhai. Miyo koonale wira munniviriha okathi munceene muri ene ni anna oolipa mwa omunepani ntoko axitokweene a mmulokoni. Muloko ahu, aakhala anna ni arokora anceene akhulumunwe, a niinaano nave akina oowuuliwa muru. Awo yaamusiveliwa vanceene woowehani nvirihaka okathi naawo wala orowa olya owannyeya”.

Miruku aakivanhe awe munna ole, saari sa faita yinceene. Tthiri waaphenta wawe atthu a Yehova wookivara murima. Moowaakuveya, kaahihiya wiixunnuwiha waka ni kaahivarihela muteko malakiheryo  a munna ole. Kinnimuxukhurela vanceene Yehova, onivaha anna ntoko munna ole.

Mwaakha wa 1969 ni 1973, kaahithanliwa okhala muhooleli a eDepartamento ya Yoolya konkresu internacional aapakiwe oColombes, oParis. Konkresu a 1973, naahaana waavaha eyoolya atthu 60.000 mahiku 5! Ohimya ekeekhai kaahixanka. Masi etthu yaarowa okikhaliherya okhumela saana yaari Miruku 15:22, waakoha atthu a ankhili. Nto kaahaavekela miruku anna oolipa mwa omunepani yaawo yaarina sookumanana sinceene voohimya sa yoolya, yaavara mapuro saiviwa inama, alimi, atthu oowaapeya ni ale anithuma yoolya. Ekeekhai wira muteko ole waari wooxankiha, masi moowiirana naahivara saana.

Mwaakha wa 1973, miyo ni mwaaraka naahilattuliwa orumeela eBetheli ya oFrança. Yoothanleliwa aka yoopacerya oBetheli yaari yooxankiha vanceene. Miyo kaahaana waaroihela iliivuru anna a oCamarões, wÁfrica. Masi muteko ahu woolaleerya elapo ele waanikhoottihiwa okhuma 1970 mpakha 1993. Nto kaahixanka vanceene kuupuwelaka wira nkaarowa owerya ovara saana muteko ole. Woonasa wene, munna aahoolela muteko woolaleerya oFrança aahiweha wira kaahixanka. Nto aahikilipiha ohimyaka wira: “Anna a oCamarões, anniphavela yoolya ya omunepani. Nto nihaana waavaha!” Eyo ti etthu kaapanke aka, naahaavaha yoolya ya omunepani.

Miyo kaahirowa ilapo sinceene saari mmukanoni ni oCamarões wira kipake mithukumano ni axitokweene a ilapo iyo. Anna ale a ankhili ni oolipa murima, yaahikikhaliherya vanceene opaka mareheryo wira niroiheke yoolya ya omunepani khula okathi oCamarões. Yehova aahireeliha vanceene wiimananiha wahu. Iyaakha iye 20 muteko ahu waakhoottihiwa aya elapo ele anna ni arokora yaanikhalana erevista Owehaweha ya khula mweeri ni ekaruma yaakumiheriwa khula mweeri yiihaniwa Nosso Serviço do Reino.

Okhuma okathi naanamorari ahu, miyo kaaniweha mikhalelo sooloka sa omunepani sa  Angèle. Mikhalelo iyo, saanitepa wooneya nuumala hiyo othelana. Tthiri nihiku naathelanne ahu, owo aahikivekela wira okathi wa nivekelo kimuleele Yehova yoophavela ahu ya omurumeela okathi wotheene. Nto Yehova aahaakhula nivekelo nahu.

Angèle aanikikhaliherya omuroromela vanceene Yehova. Mwa ntakiheryo, okathi naalattuliwe ahu orumeela oBetheli mwakha wa 1973, miyo kaahixanka vakhaani maana kaanisiveliwa muteko aka wa osirkwiitu. Masi Angèle aahikuupuxerya wira hiyo niivaherenrye wa Yehova. Niireke khahiyo vooloka okathi wotheene ovara ele mutthenkeso awe onnivekela awe? (aHeeb. 13:17) Miyo kaaheemererya ele aahimmye awe! Nto naahirowa orumeela oBetheli. Iyaakha iya sotheene nivirinhe ahu vamosa, miyo kinnihakalala okhalana mwaaraka a ankhili, ooreera murima ni oolipa momunepani. Mikhalelo iyo sookhaliherya vanceene olipiha ekasamento ahu ni sinninikhaliherya opaka soothanla sooloka.

Vano nuuluvanle ahu, Angèle khonihiya okhala muthiyana ooloka ni ookhaliherya. Mwa ntakiheryo, ixikola sinceene sa Omwene sinipakiwa ni Enkelexi, nto wira nirowele, Angèle ni miyo naahiimananiha wiixutta Enkelexi. Nave hiyo naahithaamela muloko enlavuliwa Enkelexi nnaamwi okathi ole naarina iyaakha 70. Mwaha wa eparakha kirina aka ya wiirela mpantta Ekomisau ya Efiliyaali ya oFrança, wiixutta mattaava manceene onnikiixankiha. Masi Angèle ni miyo naanikhaliheryana mukina ni mukhwaawe. Vano nrina iyaakha sinivikana 80 ni khanihiyale olokiherya mithukumano ni nttaava na Enkelexi ni eFrancês. Nave ninniimananiha wiirela mpantta mithukumano ni olaleerya ni muloko nithanleliwe ahu. Yehova onnireeliha wiimananiha wahu wiixutta nttaava na Enkelexi.

Mwaakha wa 2017 naahikhalana eparakha yuulupale. Mwaakha ole, miyo ni Angèle naahilattuliwa Exikola ya Anna a Ekomisau ya Efiliyaali ni Axaaraya, yeeyo yaapakiwe oCentro Educacional da Torre de Vigia, oPatterson, oNova York.

Tthiri Yehova Mwiixuttihi ahu Muulupalexa. (Yes. 30:20) Tivonto khahiyo vootikiniha waaweha arumeyi awe amiravo ni oowuuluvala yiixuttihiwaka mwa enamuna yoolokexa! (Otum. 4:5-8) Tthiri kihoona wira amiravo aninwiriyana Yehova ni anna ni arokora arina sookumanana sinceene, annikela vahoolo momunepani ni vaavo aninnuwa aya annikhumela saana. Eliivuru ya Miruku 9:9 enihimya so: “Mwanvaha miruku mutthu ànkhili, owo onotepa okhala nankhili: mwamusomihá naxariya, owo onotepa okhala òloka”.

Okathi mukina kinnuupuwela ohiyu ole wahaareere oriipa kiri ene myaako sa wArgélia, iyaakha 60 sivinre. Miyo nkuupuwela wira saamukikhumelela itthu sooloka muhoolo. Atthu akina aakiixuttiha itthu sinceene! Yehova ookivaha miyo ni Angèle okumi woohakalaliha. Tivonto, hiyo khaninhiya wiixuttihiwa ni Tiithi ahu a wiirimu, anna ni arokora a ankhili, yaawo arina sookumanana sinceene ni animphenta vanceene Yehova.