1. Etthu xeeni woonasa wene yookhumelenleni vaavo ekwaha yoopacerya mwaalaleerya anyu atthu ihapari sa mBiibiliyani?

NIIREKE munnuupuwela okathi mwaasuwenle anyu wira moophwanya ekeekhai? Woonasa wene, vanookhweelani wiiwexexa itthu Biibiliya oniixuttiha awe. Nave pooti wira muupuwela wira khula mutthu aamweemererya itthu mwiixuntte anyu. Nyuwo mwaanikupali ni murima wotheene wira muhupi wa mBiibiliyani onimwaakhaliherya atthu ohakalala ni okhalana nlipelelo nooloka na muhoolo. (Esal. 119:105) Nto, mwaaniimananiha waaleela ikeekhai mwiixuntte anyu apatthani ni amusi anyu. Nuumala-vo, exeeni yaakhumelenle? Mooriipiha murima, atthu anceene khiyeemererya ele mwaaleela anyu.

2-3. Atthu anceene a okathi awe yamoonela sai Yesu?

² Hiyo khanintikinihiwa vaavo nnaaweha ahu atthu akina akhoottaka muhupi nnaalaleerya ahu. Maana atthu anceene yaahikhootta muhupi Yesu aalaleya awe nnaamwi aapanke miiriirya seiyo sooniherya wira aanikhaliheriwa ni Muluku. Mwa ntakiheryo, Yesu aahimuhihimuxa Laazaro. Khuuvo mutthu waahela muhina awanani awe yaakhanle oovaanyiha mwiiriirya ole aapanke awe. Masi hata vaari siiso, ahooleli a etiini ya aYuda yaahimukhootta Yesu okhala Mesiya aaleiheriwe. Nave awo yaaphavela omwiiva Yesu ni Laazaro!—Yoh. 11:47, 48, 53; 12:9-11.

³ Yesu aanisuwela oratteene wira atthu anceene yammukhootta okhala Mesiya. (Yoh. 5:39-44) Yesu aahaaleela awiixutti a Yohani Mpatisa wira: “Oohakalala tuule ohinihiya waamini mwaha wa miyo”. (Math. 11:2, 3, 6) Xeeni atthu anceene ahalaka omukhootta Yesu?

4. Mwaha ola, ninrowa othokorerya exeeni?

⁴ Mwaha ola ni mwaha onittharela, ninrowa woona itthu vakhaani saawiiriha atthu a okathi awe ohimwaamini Yesu. Nave,  ninrowa woona itthu siniwiiriha atthu anceene okhumuwa, niire so, okhootta muhupi nnaalaleerya ahu. Nuumala-vo, nnimwiixutta efaita erina aya olipiha omwaamini wahu Yesu wira nihikhumuwe.

5. Woonasa wene, itthu xeeni saawiiriha atthu akina ohikupali wira Yesu aari Mesiya aleiheriwe?

⁵ Atthu anceene yaahikhumuwa mwaha wa makhalelo a Yesu. Awo yaanisuwela oratteene wira Yesu aanisuwela wiixuttiha ni aanipaka miiriirya. Hata vaari siiso, awo yaamuthokorerya Yesu okhala mwaana a masikhini, niire so, kalapintero. Nave Yesu aakhumme oNazarethi, epooma yeeyo atthu anceene yahaavahaaya efaita. Natanayeli yoowo muhoolo mwaya aari mutthareli a Yesu, aahimmye so: “ONazarethi wookhala wookhuma etthu yooreera?”. (Yoh. 1:46) Woonasa wene, Natanayeli khaasiveliwa epooma Yesu aakhala awe. Nave pooti wira Natanayeli uupuwela eprofesia eri Mikeya 5:1, yeeyo yaahimya wira Mesiya aarowa oyariwa oBethelehemu ohiya oNazarethi.

6. Etthu xeeni yaarowa waakhaliherya atthu a mahiku a Yesu osuwela wira Yesu aari Mesiya aaleiheriwe?

⁶ Soolempwa saahimya exeeni? Profeta Yesaya aahihimya vahinatthi wira awanani a Yesu khiyaarowa ocala itthu saahimya oratteene nloko Yesu aarowa awe oyariwa. (Yes. 53:8) Itthu iyo saahihimmwa vahinatthi. Nto vaakhanle wira atthu ale yaahitokosa oratteene itthu iyo, yaamoona wira Yesu aarowa oyariwa oBethelehemu ni aarowa okhuma nloko na Mwene Davidi. (Luka 2:4-7) Opuro Yesu aayariwe awe, waanivarihana oratteene ni eprofesia eri Mikeya 5:1. Etthu xeeni yaaxankiha atthu ale? Okhala wira atthu ale yaari ookhummwa murima, yaanaakuva olavula ahinatthi wuupuwela oratteene. Awo khiyaatokosa itthu sotheene sooniherya mwaha ole. Nto mwaha waivaavo awo yaahikhumuwa ni yaahihiya waamini.

7. Xeeni olelo-va atthu anceene ahinaphavela aya Anamoona a Yehova?

⁷ Niireke muxankiho owo olelo-va wookhala? Aayo. Maana arumeyi anceene a Yehova olelo-va, ayariwe itthoko soohaawa, nto atthu anceene anniwoona okhala ‘atthu oohisoma’. (Mit. 4:13) Nto mwaha waivaavo, atthu anceene anoona wira atthu a Yehova khiyaareerela owiixuttiha atthu Biibiliya mwaha woowi khasomme ixikola sa faita wala siniixuttiha myaha sa itiini. Atthu akina anihimya wira Anamoona a Yehova “etiini ya wAmérica”. Ekeekhai wira eriyari ya Anamoona 7, mmosa ta wEstados Unidos. Nave atthu akina yiixuttihiwe wira Anamoona a Yehova khanimukupali Yesu. Mwa iyaakha sinceene, Anamoona a Yehova annihimmwa okhala “makomunista”, “mastremista” ni “okhala etiini ya akunya”. Nto atthu anceene khaniphavela okhala Anamoona a Yehova mwaha woowi yiiwale ni annikupali itthu iyo sowoothiwa ni khaniphavela osuwela ekeekhai voohimya sa Anamoona a Yehova.

8. Moovarihana ni Miteko 17:11, etthu xeeni atthu akina anireerela aya opaka wira yaasuwele atthu a Muluku a mahiku ahu ala?

⁸ Ahaana opaka exeeni wira ahikhumuwe? Ahaana wiimananiha osuwela ekeekhai. Eyo ti etthu aapanke awe mulipa-oolepa Evangelyo oniihaniwa Luka. Owo aahiimananiha osoma ni ‘otokosa itthu sotheene’. Nave aaphavela wira ale yaarowa osomaka ‘akupaliki’ ni murima aya wotheene itthu yiiwale aya voohimya sa Yesu. (Luka 1:1-4) AYuda anceene yaakhala epooma ya oBereya yaari ntoko Luka. Ekwaha yoopacerya yaiwale aya ihapari sooreera voohimya sa Yesu Kristu, awo yaahitokosa Soolempwa sa eHeeberi wira awehe akhala wira ele yaaleeliwe aya yaari ekeekhai aahiiso nnaari. (Musome Miteko 17:11.) Mwa enamuna emosaru, awo ahaana wiimananiha ophavela osuwela ekeekhai. Nto wira apake eyo, ahaana olikanyiha ele atthu a Muluku aniixuttiha aya ni ele  Biibiliya onihimya awe. Nave ahaana osoma yowiiraneya ya atthu a Yehova a mahiku ahu ala. Akhala wira anoosuwela oratteene “makhalelo a atthu a Muluku” olelo-va, nthalu ni itthu soohiloka sinilavuliwa ni atthu akina khasinrowa waahapuxa.

9. Etthu xeeni yaakhumelenle nuumala Yesu okhootta wooniherya ethoonyeryo enikhuma wiirimu?

⁹ Atthu akina a mahiku a Yesu, khiyaaphiyeriwa ni itthu sootikiniha Yesu iixuttiha awe. Awo yaaphavela oleeliwa itthu sikina. Maana yaanimukhanyererya Yesu wira owooniherye aari ene Mesiya aavahaka “ethoonyeryo enikhuma wiirimu”. (Math. 16:1) Woonasa wene, atthu ale yaahimukhanyererya Yesu opaka eyo mwaha woowi khiyaiwexexa oratteene moolumo ari Daniyeli 7:13, 14. Masi ole khahiyo waari okathi wooloka wira Yehova omaliherye eprofesia ele. Itthu Yesu iixuttiha awe saamwaakhaliherya atthu ale okupali wira Yesu aari Mesiya aaleiheriwe. Masi nuumala Yesu okhootta waavaha ekanyeryo yaaphavela aya, atthu ale yaahikhumuwa wala yaahihiya waamini.—Math. 16:4.

10. Yesu aamalihenrye sai ele Yesaya aalempe awe voohimya sa Mesiya?

¹⁰ Soolempwa saahimya exeeni? Profeta Yesaya aalempe so: “Owo khanrowa ovanyihana ni mutthu walá onyakulihana. Khavo onrowa wiwa masu awe mmawani”. (Yes. 42:1, 2) Okathi Yesu aavara awe muteko awe woolaleerya, owo khaaphavela wiivuwiha maana aari mutthu oowiisumaaliha. Yesu khaatenke itemplo suulupale wala sootikiniha, khaawara ikuwo sa vameekhaaya sa etiini ni khaaphavela wira atthu amwiihaneke arumeelaka masina a nttittimiho a itiini. Hata okathi aarina awe mixankiho, Yesu aahikhootta opaka mwiiriirya wira omuhakalalihe Mwene Herodi, nnaamwi asuwela wira aamwiiviwa. (Luka 23:8-11) Ekeekhai wira Yesu aahipaka miiriirya, masi etthu aatepa awe ohela nipuro noopacerya waari olaleya ihapari sooreera. Yesu aahaaleela awiixutti awe wira: “Eyo ti etthu kirwenle aka”.—Mar. 1:38.

11. Miyuupuwelo xeeni soohiloka atthu anceene arina aya olelo-va?

¹¹ Niireke muxankiho owo olelo-va wookhala? Aayo. Olelo-va, itthu sinceene sinaasivela ahooleli a itiini ori oteka ikerexa suulupale wala ikatetral,  ilatarato sa ikerexa, masina a nttittimiho ni ifesta seiyo atthu anceene ahinsuwela aya moota sipacenrye aya. Niireke itthu iyo sinniwiixuttiha etthu voohimya sa Muluku ni ele oniphavela awe? Nnaari. Moovirikana ni atthu awo, ale aniweha mithukumano sahu, anniixutta ele Yehova oniphavela awe wira nipakeke. Nave Ipa sa Omwene, mapuro ooloka ni oohaattiheriwa itthu. Ale anihoolela khaniwara ikuwo sa vameekhaaya ni kharina masina a etiini a vameekhaaya. Itthu nniixuttiha ahu ni ninkupali ahu, sinikhuma mBiibiliyani. Hata vari siiso, atthu anceene annikhumuwa ni khaneemererya muhupi ninlaleya ahu mwaha woowi, khanimpaka ifesta ni soolema soohiloka wira nimukokhorele Muluku. Nave itthu nniixuttiha ahu khahiyo itthu sinaasivela owiriyana.

12. Moovarihana ni aHeeberi 11:1, 6, ninrowa olipiha sai waamini wahu?

¹² Nihaana opaka exeeni wira nihikhumuwe? Murummwa Paulo aahaaleela maKristau yaakhala oRoma wira: “Mutthu onaamini paahi nuumala wiiwa nuulumo. Nto, vanniweryaneya wiiwa nuulumo okathi onilaleiwa awe Kristu”. (aRom. 10:17) Ifesta sinipakiwa seiyo sihinivarihana ni Biibiliya, hata siri ene soohakalaliha ni sookuxa murima iyo khasinikhala-khala silipihaka waamini wahu. Etthu yuulupale enlipiha waamini wahu ori omusoma Biibiliya. Mwaha woowi Biibiliya onoonikhaliherya osuwela ekeekhai, maana “khivanweryaneya omusiveliha Muluku nihaaminiki”. (Mmusome aHeeberi 11:1, 6.) Nto khivanitthuneya olipelela ekanyeryo enikhuma wiirimu enrowa onikupaliha wira noophwanya ekeekhai. Osoma oratteene itthu Biibiliya oniixuttiha awe onoolipiha vanceene waamini wahu ni onoomala-maliha itthu sotheene ninhoverya ahu.

13. Xeeni atthu anceene yahamphavela aya Yesu?

¹³ Mahiku a Yesu, awiixutti a Yohani Mpatisa yaahitikinihiwa vanceene mwaha woowi awiixutti a Yesu khiyaatthara yoolema ya otthukwa. Yesu aahaatthokiherya etthu yaawiiriha awiixutti awe ohitthukwa. (Math. 9:14-17) Hata vaari siiso, awanani awe Yesu ni aFarisi yaahimphukela mwaha woowi khaatthara soolema. Nto  awo yaahinanariwa vanceene vaavo Yesu aapenuxa awe wala aavoniha awe aretta nihiku na Saabadu. (Mar. 3:1-6; Yoh. 9:16) Nnaamwi yaikukumiha wira yaaniiwelela nlamulo na Saabadu, awo khiyoona okhala etthu yootakhala omweetta nakoso otemplo. Nto yaahinanariwa vanceene vaavo Yesu aapwapwenle awe mwaha woomweetta nakoso otemplo. (Math. 21:12, 13, 15) Nave atthu ale yanwiriyana Yesu okathi aalaleerya awe musinagoga oNazarethi, yaahinanariwa vanceene vaavo aarumenle awe matakiheryo a sowiiraneya sa aIsarayeli wira owooniherye atthu wira yaari oowiitthuna ni khiyaarina waamini. (Luka 4:16, 25-30) Nto atthu anceene yaahikhumuwa mwaha woowi Yesu khaapaka itthu atthu anceene yuupuwela aya wira ampaka.—Math. 11:16-19.

14. Xeeni Yesu aapwapwenle awe atthu yaatthara soolema sa apinaatamu seiyo sahaavarihana ni Soolempwa?

¹⁴ Soolempwa saahimya exeeni? Omurumaka profeta Yesaya, Yehova aahimmye so: “Atthu ala anikattamela ni masu pahi: anikivuwiha ni molumo pahi; mirima saya siri ottaiwene ni miyo. Awo ankittittimiha siyo: ikano sinixuttihaya ti soruma s’atthu pahi”. (Yes. 29:13) Vannooneya wira Yesu khaapanke etthu yootakhala vaavo aapwapwenle awe atthu mwaha wootthara soolema sihinivarihana ni Nuulumo na Muluku. Atthu otheene yaatepa ovaha efaita soolema sa apinaatamu ohiya Soolempwa, yahooniherya wira yaahimukhootta Yehova yoowo aamurumme Mesiya.

15. Xeeni olelo-va, atthu anceene ahinsiveliwa aya ni Anamoona a Yehova?

¹⁵ Niireke muxankiho owo olelo-va wookhala? Aayo. Atthu anceene anninyoonyiheya mwaha woowi Anamoona a Yehova khaniirela mpantta soolema, iferiado, Natali ni ifesta sikina sihinivarihana ni Biibiliya. Nave atthu akina anninanariwa vanceene vaavo Anamoona a Yehova ahiniirela aya mpantta ifesta sinivuwiha elapo ni enamuna ya omusikha wala onvitha mutthu ehinivarihana ni Biibiliya. Atthu awo anuupuwela wira Muluku onneemererya enamuna animukokhorela aya. Masi musuweleke wira khula mutthu onithanla otthara soolema sa apinaatamu ohiya ele Biibiliya oniixuttiha awe, khonimusiveliha Yehova.—Mar. 7:7-9.

16. Moovarihana ni Esalimo 119:97, 113, 163-165, itthu xeeni ninreerela ahu opaka ni itthu xeeni ninreerela ahu okhootta?

¹⁶ Nihaana opaka exeeni wira nihikhumuwe? Nihaana osiveliwa vanceene malamulo ni malakiheryo a Yehova. (Musome Esalimo 119:97, 113, 163-165.) Akhala wira ninnimphenta vanceene Yehova, nnookhoottaka wiirela mpantta khula yoolema enimunanara. Nave khaninrowa weemererya nnakhala etthu emosa ekhalaka ya faita yinceene ovikana omphenta wahu Yehova.

17. Atthu anceene a okathi wa Yesu yaalipelela wira Mesiya aarowa opaka exeeni?

¹⁷ Atthu akina a mahiku a Yesu, yaaphavela opaka marukunuxo a epoliitika. Awo yaalipelela wira Mesiya anwoopola opuheriwa ni aRoma. Nto okathi yaaphavela aya omukhaliha mwene, Yesu aahikhootta. (Yoh. 6:14, 15) Akhulupale a anamukuttho ni atthu akina, yaahikhalana okhulupale yaavahiwe aya ni aRoma. Nto yaanoova wira Yesu aamukumiherya ekuvernu yaarowa waavirikanya aRoma. Okhala wira yaahikhalana mixankiho iyo sa epoliitika, aYuda anceene yaahimukhootta Yesu ni yaahikhumuwa.

18. Xeeni atthu akina yahaaphavela aya iprofesia sikina saamuhimya Mesiya?

¹⁸ Soolempwa saahimya exeeni? Iprofesia sinceene voohimya sa Mesiya, saahimya wira owo aarowa okhala Nakhotto ootupa. Masi sikina saahihimya wira aahaana opacerya okhwa mwaha wa itampi sahu. (Yes. 53:9, 12) Nto xeeni aYuda  yaarina aya miyoonelo soohiloka voohimya sa Mesiya? Mwaha woowi atthu anceene a mahiku a Yesu yaaphavela wira mixankiho saya simale moowaakuveya. Nto khula eprofesia yahaaleiherya otaphuliwa waya awo khiyaaphavela.—Yoh. 6:26, 27.

19. Miyuupuwelo xeeni soohiloka olelo-va siniwiiriha atthu ohiya waamini?

¹⁹ Niireke muxankiho owo olelo-va wookhala? Aayo. Atthu anceene olelo-va, annikhumuwa mwaha woowi khaninkhaliherya myaha sa epoliitika. Awo anuupuwela wira naahaana okhaliherya epoliitika ni ovotari okathi wa mwaathanle. Masi hiyo ninnisuwela oratteene wira omuthanla pinaatamu wira okhale muhooleli ahu waarowa okhala omukhootta Yehova. (1 Sam. 8:4-7) Atthu akina anuupuwela wira naahaana oteka ixikola, ixiripitaali ni itthu sikina sinikhaliherya mmuttettheni. Awo annikhumuwa mwaha woowi nniimananiha olaleya ihapari sooreera ohiya omananiha ophuka mixankiho sa moolumwenkuni.

20. Ntoko anttittimiherya aya moolumo a Yesu ari Matheyo 7:21-23, etthu xeeni nintepa ahu ovaha efaita?

²⁰ Nihaana opaka exeeni wira nihikhumuwe? (Mmusome Matheyo 7:21-23.) Etthu nintepa ahu ovaha efaita ori ovara muteko Yesu onrumme awe. (Math. 28:19, 20) Nto nihikhala-khale nihapuxiwaka ni epoliitika ni mixankiho sa moolumwenkuni. Hiyo ninnaaphenta vanceene atthu ni ninniriipiwa murima mwaha wa mixankiho sinaaphwanya. Masi ninnisuwela wira enamuna yuulupale ya waakhaliherya atthu akina, ori owiixuttiha voohimya sa Omwene wa Muluku ni waakhaliherya okhalana waataana wooloka ni Yehova.

21. Otheene ahu nihaana wiimananiha opaka exeeni?

²¹ Mwaha ola, nooweha itthu xexe saawiirinhe atthu anceene omukhootta Yesu seiyo siniwiiriha atthu akina ohaaphavela atthareli a Yesu olelo-va. Niireke itthu seiyo paahi ninreerela ahu okhootta? Nnaari. Mwaha onittharelana, ninrowa oweha itthu sikina xexe sikhanle oonikwattuliha. Nto, otheene ahu niimananiheke ohikhumuwa ni olipiha waamini wahu!