1-2. Mixankiho xeeni anna ni arokora anceene arina aya?

MURUMMWA Paulo aahimutumererya Timootheyo ni maKristau makina wiimananiha olaleerya moomalela. (2 Tim. 4:5) Hiyo nave nihaana otthara malakiheryo Paulo onivanhe awe ni wiimananiha ovara muteko wa Muluku. Masi nookhalana mixankiho. Mwa ntakiheryo, wira alaleerye anna ni arokora anceene ahaana olipa murima. (2 Tim. 4:2) Nkahaya nwuupuwele anna ni arokora anikhala ilapo muteko ahu woolaleerya onikhoottihiwa aya ni kuvernu. Awo annilaleerya hata asuwelaka wira yavariwa vale anootthukweliwa mukhatteya!

² Anna ni arokora akina aakhalana mixankiho sinceene, seiyo sinaakhulumula. Mwa ntakiheryo, awo annivara muteko munceene wira aphwanyeke yoolya yoovaha imusi saya. Tthiri anna awo anniphavela oviriha okathi munceene alaleeryaka, masi nuumala ophiya wanikisa wa esumana awo khanikhalana ikuru sinceene wira arowe olaleerya. Anna ni arokora akina anniwereyasiwa ni akina ahuuluvala. Nto okathi mukina khaniwerya okhuma owaani wira yalaleerye. Ohiya-vo, aakhala anna ni arokora akina arina miyoonelo soohiloka, nto anuupuwela wira kharina efaita vamaithoni va Yehova. Murokora oniihaniwa Maria, * yoowo onikhala oMédio Oriente ohimmye so: “Kinniimananiha vanceene wira kikasoope moonelo aka woohiloka, nto kinnikhulumuwa ni nkinikhalana ikuru. Kinniivaha nthowa mwaha wa miyuupuwelelo iyo soohiloka ni sinnikiiyerya okathi ni ikuru kaarowa aka ovirihaka kilaleeryaka”.

3. Mwaha ola, ninrowa othokorerya exeeni?

³ Moohicikha mixankiho ninwanana ahu, Yehova onninivaha ikuru ni onninikhaliherya ovara muteko awe mpakha vaniwerya ahu. Mwaha ola, ninrowa oweha moota Yehova onnikhaliherya awe. Masi nihinatthi othokorerya eyo, nrowe niwehe moota Yehova anvanhe awe ikuru Paulo ni Timootheyo wira aweryeke olaleerya nnaamwi yaarina mixankiho.

4. Mixankiho xeeni Paulo aarina awe?

⁴ Murummwa Paulo aahaana ovahiwa ikuru otepexa wene okathi yoole aamaniwa awe, ovonyiwa maluku ni otthukweliwa mukhatteya. (2 aKor. 11:23-25) Nave Paulo aahihimya wira okathi mukina aaniwanana miyuupuwelelo soohiloka. (aRom. 7:18, 19, 24) Ohiya-vo, Paulo aahaana owanana ‘mwiiwa waaheliwe mweerutthuni mwawe’. Nto waahikhala okathi Paulo aamuxonttenle awe Muluku wira okumihe mwiiwa owo wala muxankiho awe.—2 aKor. 12:7, 8.

5. Nnaamwi Paulo aarina mixankiho, itthu xeeni aawenrye awe opaka?

⁵ Nnaamwi Paulo aarina mixankiho iyo sotheene, Yehova aahinvaha ikuru wira owerye olaleerya. Mwa ntakiheryo, okathi omosa, vaavo Paulo aahaawerya awe okhuma mwaha woowi aarootthukweliwa oRoma, owo aaniimananiha waalaleerya atthu waahela muhina makhulupale a kuvernu. Nave Paulo aahaalaleerya Makwarta otheene a Mwene ni atthu ale yaamuxukurya. (Mit. 28:30, 31; aFil. 1:13) Nave okathi ole, Paulo aahilepa ikarta, seiyo mpakha olelo-va sinaakhaliherya maKristau eekeekhai. Ohiya-vo, Paulo aahaavaha ntakiheryo nooloka anna a muloko wa oRoma. Maana Biibiliya onihimya wira anna a muloko ole ‘yanitepa wooniherya olipa murima alaleyaka masu a Muluku, ahoovaka etthu’. (aFil. 1:14) Nnaamwi okathi mukina Paulo aahaawerya opaka itthu sotheene aaphavela awe, owo aaniimananiha ovara mpakha aawerya awe. Nto etthu xeeni yaakhumelenle mwaha wa wiimananiha wa Paulo? Owo ohimmye so: “Kiniphavela wira musuwele wira mukhalelo aka, wookhaliherya tthiri olaleiwa ihapari sooreera”.—aFilipi 1:12.

6. Moovarihana ni 2 aKorinto 12:9, 10, exeeni yaamukhalihenrye Paulo ovara muteko woolaleerya moomalela?

⁶ Paulo aanisuwela wira itthu sotheene aapaka awe mmutekoni mwa Yehova, khahiyo aapaka ni ikuru sawe, masi aavara okhaliheriwaka ni ikuru sa Muluku. Paulo aanisuwela wira ikuru sa Muluku saanimwiiriha ‘otepa olipa, okathi ahaalipa awe’. (Mmusome 2 aKorinto 12:9, 10.) Tthiri Yehova aahirumeela munepa awe woowaarya wira onvahe ikuru Paulo. Nto Paulo aahiwerya olaleerya moomalela nnaamwi aalupatthiwa, otthukweliwa mukhatteya ni aarina mixankiho sikina.

7. Mixankiho xeeni Timootheyo aarina awe saarowa omukhoottiherya olaleerya?

⁷ Nnaamwi Timootheyo aari mmiravo namulikanyiha ni Paulo, owo ahaana ororomela ikuru sa Muluku wira ovare muteko awe woolaleerya. Maana Timootheyo aahimuhoola Paulo mikwaha soolaleerya, niire so, mikwaha  sa omisionaario. Ohiya-vo, Paulo aahinvekela Timootheyo orowa oxukurya ni olipiha miloko. (1 aKor. 4:17) Woonasa wene, Timootheyo uupuwela wira khaaphwanelela ovara muteko ole. Pooti wira eyo ti etthu yaamwiirinhe Paulo omutumererya Timootheyo wira: “Muhimuhiye mutthu oothanyakani mwaha wookhala mmiravo”. (1 Tim. 4:12) Nave waahikhala okathi Timootheyo aarina awe mixankiho sinceene mookumini, owo ‘aaniwereiwa ikwaha sinceene’. (1 Tim. 5:23) Masi Timootheyo aanikupali ni murima wotheene wira Yehova aamunvaha munepa awe woowaarya. Nto okhaliheriwaka ni munepa woowaarya, aamukhalana ikuru wira olaleye ihapari sooreera ni waarumeela anna ni arokora.—2 Tim. 1:7.

8. Olelo-va, Yehova onaavaha sai ikuru arumeyi awe?

⁸ Olelo-va, Yehova onnaavaha arumeyi awe “owerya onivikana wa mutthu”. Nto nikhaliheriwaka ni ikuru iyo hiyo ninnivikaniha ororomeleya. (2 aKor. 4:7) Nrowe niwehe inamuna xexe Yehova onnivaha awe ikuru wira onikhaliherye ororomeleya: (1) Ovekela, (2) Biibiliya, (3) anna ni arokora ni (4) muteko ahu woolaleerya.

9. Ovekela onnikhaliherya sai?

⁹ Nivekelo ninnivaha ikuru. Eliivuru ya aEefeso 6:18, murummwa Paulo onnintumererya onvekela Muluku “khula okathi”. Nto Muluku onimwaakhula mavekelo ahu onivahaka ikuru. Munna oniihaniwa Jonnie, yoowo onikhala oBolivia aanoona wira Yehova aanimukhaliherya okathi aarina awe mixankiho sinceene. Okathi omosaru, mwaarawe ni anamuyari awe khiyaareere owereiwa. Nto vaaninvila Jonnie waakhapelela otheene aya. Maama awe aahikhwa ni waahivira okathi munceene wira mwaarawe ni paapa awe apenuwe. Uupuwelaka okathi ole wooxankiha, Jonnie onihimya so: “Okathi kaatepa aka oxanka, etthu yaakikhaliherya waari onvekela Yehova mooluluwanya”. Nto Yehova aahinvaha ikuru Jonnie wira owerye ovilela. Mutokweene a oBolivia oniihaniwa Ronald aahoona wira maama awe aahiphwanyaniwa kanser. Mooriipiha murima nuuvira myeeri vakhaani, maama awe aahikhwa. Etthu xeeni yaamukhalihenrye ovilela? Owo onihimya so: “Okathi kanvekela aka Yehova kaanimuleela itthu sotheene saari vamurimani vaka. Miyo kinnisuwela wira Yehova onnikisuwela oratteene waavikana atthu otheene. Tthiri Yehova onnikisuwela vanceene ovikana ele miyo kinnuupuwela aka”. Okathi mukina, hiyo ninnikhalana mixankiho soovela-veliha nnakhala nihinoona etthu yoohimya vaavo ninvekela ahu. Masi muhiliyale wira Yehova onnintumererya ovekela hata vanivilaka ohimya moonelo ni muupuwelo ahu.—aRom. 8:26, 27.

10. Ntoko onihimya awe aHeeberi 4:12, xeeni vari aya vooloka omusoma Biibiliya ni wuupuwelela ele ninsoma ahu?

¹⁰ Biibiliya onninivaha ikuru. Murummwa Paulo aanikupali wira Soolempwa saamunvaha ikuru ni nimaaliho. Hiyo nave nikupaliki wira Biibiliya onoonivaha ikuru ni nimaaliho. (aRom. 15:4) Nto ti vooloka omusoma Biibiliya ni wuupuwelela ele ninsoma ahu. Niira siiso, Yehova onoonivaha munepa awe woowaarya wira nuupuwelele ele ninsoma ahu ni woona moota woovarihela muteko moovarihana ni muxankiho ahu. (Mmusome aHeeberi 4:12.) Ronald, nimulavunle ahu wanipacerya ohimmye so: “Onnikisivela vanceene omusoma Biibiliya khula ohiyu. Nave kinnuupuwelela mikhalelo sa Yehova ni moota onaathokorerya awe arumeyi awe moophenta. Nto eyo ennikivaha ikuru sinceene”.

11. Biibiliya anvanhe sai ikuru murokora mmosa ahaareere oriipiwa murima?

¹¹ Wuupuwelela ele ninsoma ahu mBiibiliyani onninikhaliherya okhalana moonelo wooloka voohimya sa mixankiho sahu. Nkahaya nwehe  etthu yaamwiiranenle murokora mmosa naamukhweli. Okhala wira khaareere oriipiwa murima mwaha wa okhweliwa iyawe, mutokweene mmosa aahinvaha malakiheryo wira aahaana osoma eliivuru ya Yobi. Nto murokora ole aahipacerya osoma eliivuru ele. Okathi aasoma awe owo aahipacerya omphukela Yobi mwaha wa miyuupuwelelo soohiloka aarina awe. Okathi uupuwela awe, owo aanihimya vamurimani vawe wira: “Yobi! Xeeni murina anyu miyuupuwelelo soohiloka!” Vano murokora ole aahoona wira moonelo awe waamulikana ni wa Yobi. Nave aahoona wira aahaana olokiherya moonelo awe woohiloka. Nto eyo yaahinvaha ikuru ovilela oriipiwa wawe murima mwaha wookhweliwa iyawe.

12. Yehova onaaruma sai anna ni arokora wira anivahe ikuru?

¹² Anna ni arokora anninivaha ikuru. Yehova onnaaruma anna ni arokora a mmulokoni wira anivahe ikuru. Paulo aahaalepela anna ni arokora wira aaniphavela vanceene waaweha wira alipihane mukina ni mukhwaawe. (aRom. 1:11, 12) Maria nimulavunle ahu wanipacerya, onnimusivela vanceene okhala ni anna ni arokora. Owo onihimya so: “Yehova aahaaruma anna ni arokora okikhaliherya, nnaamwi yahaasuwela mixankiho saka. Awo yaanilavula moolumo oolipiha ni yaanikiruuhela ikartau soolipiha, iyo ti itthu kaaphavela aka okathi ole. Etthu ekina yaakikhalihenrye waari waaleela mixankiho saka anna ni arokora yaawananne mixankiho ntoko sawaka, mwaha woowi mixankiho yaarina aya saahiwiixuttiha etthu yuulupale. Nave okathi wotheene axitokweene yaanikooniherya wira kookhalana efaita yinceene mmulokoni”.

13. Ninrowa olipihana sai okathi wa mithukumano?

¹³ Okathi wa mithukumano sa mmulokoni ninnikhalana eparakha wira nilipihane mukina ni mukhwaawe. Okathi wa mithukumano, munrowa waalipiha sai anna ni arokora? Nyuwo pooti waaleela wira munnaaphenta vanceene ni munnixukhurela itthu sotheene anipaka aya. Mwa ntakiheryo, sihinatthi opacerya mithukumano, mutokweene oniihaniwa Peter aahimuleela murokora oohitheliwa wira: “Munnikilipiha vanceene woowehani murwenle ene mithukumano. Nyuwo munnaaruha aniinyu 6 ni munnaakhaliherya okomentari”. Murokora ole aahipacerya omoriha maithori mwaha wooxukhurela, onahimya so: “Miyo kaaniphavela vanceene wiiwa moolumo awo olelo”.

14. Olaleerya onnikhaliherya sai?

¹⁴ Olaleerya onninivaha ikuru. Vaavo nnaalaleerya ahu atthu akina ikeekhai sa mBiibiliyani, hata yeemereryaka wala nnaari, hiyo ninnilipa vanceene. (Mir. 11:25) Murokora oniihaniwa Stacy aahoona wira muteko woolaleerya onninvaha ikuru. Mutthu mmosa a etthoko awe aahikumihiwa mmulokoni, nto eyo yaanimuriipiha murima vanceene. Owo aamakela wiikoha so: ‘Kiireke kaahaana opaka etthu wira kimukhaliherye?’ Nto vaanimuxankiha vanceene ohiya wuupuwela muxankiho ole. Nto etthu xeeni yaamukhalihenrye Stacy ovilela muxankiho ole? Olaleerya! Vaavo aaluttuweliwa awe olaleerya, owo aaniimananiha waakhaliherya atthu a muttetthe awe. Stacy onihimya so: “Okathi ole wooxankiha, Yehova aahikivaha naxikola a Biibiliya, yoowo aakenle vahoolo momunepani moowaakuveya. Nto yaahikilipiha vanceene. Nave etthu yaakikhalihenrye okhalana moonelo wooloka waari ohihiya olaleerya”.

15. Ntakiheryo na Maria niwiixuttinheni exeeni?

¹⁵ Mwaha wa mixankiho sinaaphwanya anna ni arokora akina, awo anoona wira khaniwerya oviriha okathi munceene alaleeryaka. Niireke nyuwo mookhalana muxankiho owo? Akhala wira ti siiso, muhiliyale wira Yehova onnihakalala vanceene mwaha wa wiimananiha wanyu ovara ele muniwerya anyu. Nwehe ele yaamwiiranenle Maria nimulavunle ahu. Okathi aathaamenle awe muloko ninlavuliwa nttaava na elapo ekina, Maria khaawerya ovara itthu sinceene. Maria onihimya so: “Waahivira okathi kivahaka  ekomentaario yaamukhaani, omusoma Biibiliya wala ovaha efolyetu paahi kaalaleeryaka”. Maria aanixanka vanceene mwaha woowi aaniilikanyiha ni atthu yaasuwela olavula oratteene nttaava nne. Masi owo aahituruka muupuwelo awe. Maria aahoona wira anwerya ovara miteko sinceene sa Yehova nnaamwi ahaasuwela olavula oratteene nttaava nne. Owo onihimya so: “Ikeekhai ti sookhweya ni ti sooreera, nave sinoowerya oturuka makhalelo a atthu”.

16. Akhala wira khamuniwerya okhuma owaani wira mwalaleerye, etthu xeeni enrowa woovahani ikuru?

¹⁶ Yehova onnisuwela wira ninniphavela oviriha okathi munceene nilaleeryaka hata nihiweryaka okhuma owaani. Nto owo onoonikhaliherya waalaleerya ale annikhapelela, mamfirimeero ni mameediku. Tivonto muhilikanyiheke ele muniwerya ahu ovara olelo-va ni ele mwaapaka anyu khalai. Maana akhala wira munoopaka eyo, munookhulumuwa. Akhala wira nnooweha moota Yehova onnikhaliherya awe niinaano-va, eyo enoonivaha ikuru wira nivilele khula muxankiho moohakalala.

17. Moovarihana ni Musuweli 11:6, xeeni vahinreerela aya ohiya olaleerya?

¹⁷ Hiyo khaninsuwela oratteene ipyo sa ekeekhai naalale ahu sinrowa omela ni wunnuwa. (Mmusome Musuweli 11:6.) Nwehe yowiiraneya ya murokora Barbara, owo orina iyaakha sinivikana 80 ni onimakela olaleerya omurumeelaka telefoni ni ikarta. Ekarta emosa aalempe awe aahihela erevista ya Owehaweha ya 1 a Março ya 2014 yeeyo yaarina muru oni: “Exeeni Muluku Opanke Awe Mmureerelo Anyu”. Barbara khaasuwela wira ekarta awe yaaroiheliwe anamathelana yaakumihiwe mmulokoni. Nto anamathelana ale yaamakela osoma erevista ele. Amulopwana aanoona wira Yehova aanilavula ni yena orumeelaka erevista ele. Nuuvira iyaakha 27, anamathelana ale yaahipacerya orowela mithukumano ni yaahittikiheriwa mmulokoni. Tthiri Barbara aahihakalala vanceene oweha mireerelo ekarta awe yaakumihenrye aya.

18. Nihaana opaka exeeni wira Muluku onivahe ikuru?

¹⁸ Yehova onninivaha itthu sinceene wira nikhalane ikuru. Owo oonivaha eparakha ya ovekela, Biibiliya, anna ni arokora ni muteko ahu woolaleerya. Akhala wira munoottottela mureerelo itthu iyo, munimooniherya wira munnikupali wira Yehova onimookhaliheryani. Nto mmuroromeleke ni murima anyu wotheene Tiithi ahu a wiirimu Yehova ni mukupaliki wira owo ‘onniweha ilapo sothene wira akhaliherye ale animuroromela ni murim’aya wothene’.—2 Wah. 16:9.