MWAHA ONITHOKORERIWA 22
Miruku Xeeni Sinrowa Onikhaliherya khula nihiku?
“Apwiya [Yehova] t’anavaha ankhili”. — MIR. 2:6.
NSIPO 89 Nwiriyane, Mwiiwelele ni Mphwanye Mareeliho
ELE NINROWA AHU WIIXUTTA *
1. Xeeni atthu ootheene anireerela aya okhalana ankhili anikhuma wa Muluku? (Miruku 4:8)
WOONASA WENE, okathi munipaka anyu soothanla suulupale, munninvekela Yehova wira oovaheeni ankhili, maana munnisuwela wira vannireerela opaka eyo. (Yak. 1:5) Mwene Salomoni aalempe so: “Mwaphentexe ankhili”. (Musome Miruku 4:8.) Tthiri Salomoni khahiyo aahimya ankhili pure. Masi aahimya ankhili anikhuma wa Yehova Muluku. (Mir. 2:6) Ankhili anikhuma wa Yehova Muluku, annikhaliherya sai ovilela mixankiho sootheene sinniphwanya olelo-va? Mwaha ola nnimwiiwa waakhuliwa wa nikoho nno.
2. Enamuna xeeni emosa ninrowa ahu okhala atthu a miruku?
2 Enamuna emosa nikhanle ahu ookhala atthu a miruku, ti osoma ni weettela soowiixuttiha sa alopwana anli yaarina ankhili ni yaattittimihiwa vanceene. Woopaceryani ninrowa omulavula Salomoni. Biibiliya onihimya wira: “Muluku ahinvaha Salomoni osuwela wulupale n’ankhili anjene ni miruku sawe sinjene”. (1 Mam. 5:9) Nuumala-vo, ninrowa omulavula Yesu, yoowo aari a miruku waavikana apinaatamu ootheene atonko okhala valaponi. (Math. 12:42) Yesu ti yoole aaleiheriwe wira: ‘Munepa wa Yahvéh [Yehova] onomukhuruwela yowo: munepa wosuwela ni wothanla’. — Yes. 11:2. Biblya Exirima.
3. Mwaha ola ninrowa othokorerya exeeni?
3 Yehova Muluku, aahinvaha Salomoni ni Yesu miruku aahiiso ankhili, nto mwaha wa ankhili awo oowanli aya yaahiwerya ovaha miruku soovareleya muteko. Mwaha ola, nnoothokorerya itthu tthaaru: Moota wookhalana moonelo wooloka voohimya sa musurukhu, muteko wa mulaponi, ni hiyo mmansihu.
MOOTA WOOKHALANA MOONELO WOOLOKA NI MUSURUKHU
4. Makhalelo a Salomoni yaavirikanne sai ni makhalelo a Yesu?
4 Salomoni aari mutthu oovuwa, nave-tho aahikhalana mihakhu sinceene. (1 Wah. 10:7, 14, 15) Moovirikana ni vo, Yesu khaarina itthu sinceene nave khaarina enupa. (Math. 8:20) Hata vari siiso, oowanli aya khiyaaphenta mihakhu maana miruku saya saakhuma wa Yehova Muluku.
5. Salomoni oonela sai okhalana musurukhu?
5 Salomoni aahimmye wira, musurukhu onnimukhapelela mutthu. (Mus. 7:12) Nakhalana musurukhu ninniwerya othuma itthu sinnithowa niiye nimphavela ahu. Nnaamwi aarina mihakhu sinceene, Salomoni aahoona wira yaahikhala etthu yaarina efaita yuulupale ovikana musurukhu. Mwa ntakiheryo, aalempe so: “Erayi ottittimiheya ovikana mihakhu sulupale: erayi ophentiwa ovikana eparatha n’iwero”. (Mir. 22:1) Salomoni aahoona wira okhala wene atthu aniphenta musurukhu khanihakalala ni itthu arina aya. (Mus. 5:10, 12) Nave aahimmye wira khivanreerela hiyo wuupuwelaka wira musurukhu torina efaita yuulupale ovikana itthu sootheene, maana musurukhu owo waakuva omala. — Mir. 23:4, 5.
Niireke ohela nipuro noopacerya mihakhu onoonikhoottiherya ohela nipuro noopacerya itthu sa Omwene? (Nwehe ittima 6-7) *
6. Yesu oonela sai mihakhu? (Matheyo 6:31-33)
6 Yesu aahikhalana moonelo wooloka ni mihakhu. Yena waanimusivela olya ni owurya. (Luka 19:2, 6, 7) Mwiiriirya woopacerya aapanke awe, waari otatuxa maasi khukhala eviinyu yoosiva vanceene. (Yoh. 2:10, 11) Nave nihiku aiviwe awe, aawanre nlaya na musurukhu munceene. (Yoh. 19:23, 24) Masi, Yesu kheemerenrye wira musurukhu okhaleke nipuro noopacerya mookumini mwawe. Yesu ahaalela awiixutti awe wira: “Khaavo oniwerya waavarela muteko mapatarau manli . . . Nyuwo khamunwerya onvarela muteko Muluku, vamosa ni Mihakhu”. (Math. 6:24) Yesu iixuttinhe wira vakhala wira nnoohela nipuro noopacerya Omwene, Yehova onoonivaha itthu sinnithowa. — Mmusome Matheyo 6:31-33.
7. Munna mmosa aaphwannye sai mureerelo mwaha wookhalana moonelo wooloka voohimya sa musurukhu?
7 Anna ni arokora anceene, annittottela mureerelo miruku sinikhuma wa Yehova voohimya sa musurukhu. Nrowe nithokorerye ntakiheryo na munna mmosa oohithela oniitthaniwa Daniel. Owo ohimmye so: “Okathi kaari aka mmiravo kaahilakela wira etthu yuulupale kaarowa aka ohela nipuro noopacerya mookumini mwaka, waarowa okhala omurumeela Yehova”. Mwaha wookhweiherya okumi awe, Daniel aahiwerya ovarihela muteko okathi awe ni osuwela wawe ni ovara itthu sinceene mmutekoni mwa Yehova. Onihimya-tho so: “Ohimya ekeekhai nkiniikhupanyerya mwaha wa yoothanla aka. Vaakhanle wira kaamuhela nipuro noopacerya musurukhu mookumini mwaka, kaamukhalana musurukhu munceene aahiiso kaamuthaaciri. Masi nkaarowa okhalana apatthani a ekeekhai ntoko kirina aka olelo-va. Vaakhanle wira kaahiwehexexa musurukhu nkaarowa ophwanya otteeliwa murima ntoko kirina aka olelo-va kinivara aka miteko sa Yehova. Nto, Yehova ookivaha otteeliwa murima wuulupale ovikana musurukhu kaarowa aka ophwanya”. Vannooneya wira etthu enniphwanyiha mureerelo, khahiyo owehexexa musurukhu, masi ovara miteko sa Yehova.
OKHALANA MOONELO WOOLOKA NI MUTEKO WA MULAPONI
8. Ninsuwela sai wira Salomoni aahikhalana moonelo wooloka ni muteko? (Musuweli 5:18, 19)
8 Salomoni aahihimya wira, muteko yoovaha enikhuma wa Muluku. (Mmusome Musuweli 5:18, 19.) Owo aalempe so: “Muteko ti muteko onnimurerela mutthu”. (Mir. 14:23) Salomoni aanisuwela wira etthu aalavula awe yaari ekeekhai. Yena aari mutthu oovara muteko. Salomoni aahiteka ipa sinceene, aahaala miri sa uuva, aahikhalana ijardim sinceene ni ipisina. Nave-tho aahiteka ipooma. (1 Wah. 9:19; Mus. 2:4-6) Ole waari muteko muulupale nave waanimphwanyiha ohakalala. Masi hata vari siiso, Salomoni khaaroromela wira miteko iyo sootheene saamumphwanyiha ohakalala weekeekhai. Nave aahivara miteko sinceene sa Muluku. Mwa ntakiheryo, aahihoolela muteko wootekiwa etemplo yoovuwa ya Yehova yeeyo yaamalinhe iyaakha 7 etekiwaka. (1 Wah. 6:38; 9:1) Nuumala ovara miteko sinceene soovirikana, Salomoni aahoona wira etthu erina efaita yuulupale mutthu onireerela awe opaka, omurumeela Yehova. Aalempe so: “Mwa itthu sothene silepiwe-mu, omaliherya waya ti nno: Mmuttittimihe Muluku n’umova, mwìweleleke soruma sawe”. — Mus. 12:13.
9. Yesu aahenle sai opuro wooreerela muteko a mulaponi?
9 Yesu aari mutthu oovara muteko. Okathi aari awe mmiravo aavara muteko wa okalapintero. (Mar. 6:3) Moohaanyiherya anamuyari awe yaanixukhurela vanceene nikhaliheryo nawe, okathi yaakhalela aya nthiti ovara muteko wira akhaliherye emusi ele yuulupale. Yesu khaarina etampi. Ntoko kalapintero, anirattela saana miteko sawe. Nto eyo yaaniwiiriha atthu anceene ophavela itthu aapaka awe. Yesu aanihakalala ni muteko awe. Nnaamwi aari mutthu oorattela ovara miteko sawe, mahiku ootheene aaniivaha okathi woovara miteko sa Yehova. (Yoh. 7:15) Muhoolo mwaya ntoko mutthu aavara muteko wa Muluku okathi wootheene, aahaalopola atthu yanwiriyana ohimya aka wira: “Muhivareke muteko mwaha wa yoolya enintta, masi mwaha wa yoolya enikhala, enivaha okumi woohimala”. (Yoh. 6:27) Nave okathi aawiixuttiha awe atthu vamwaako, Yesu aahimmye so: “Mwiithukumanyeryeke mihakhu wiirimu”. — Math. 6:20.
Ninrowa owerya sai okhalana moonelo wooloka voohimya sa muteko wa mulaponi ni miteko sa Muluku? (Nwehe ittima 10-11) *
10. Mixankiho xeeni sikhanle ookhumelela akhala wira nnookhala atthu oosuwela ovara saana miteko sahu sa mulaponi?
10 Okathi nnaarumeela ahu ankhili anikhuma wa Muluku, ninnikhalana moonelo wooloka voohimya sa muteko ahu, ni khanintepa ophenta mootepana muteko ahu wa mulaponi. Okhala wira na arumeyi a Muluku ninniixuttihiwa ‘ovara muteko wooloka . . . , ni matata ahu’. (aEef. 4:28) Patarau ahu pooti woona aka ororomeleya wahu ni moota nniimananiha ahu ovara saana muteko, nto owo pooti onixukhurela aka vanceene. Ikwaha sikina mwaha wa mathowa ooloka, hiyo pooti omananihaka ovara muteko mwa iwoora sinceene, niphavelaka omooniherya patarau ahu wira Anamoona a Yehova atthu ooloka. Vakhala wira nnoovirihaka okathi munceene nivaraka miteko sa mulaponi, hiyo pooti opaceryaka ohikhalana okathi wookhala ni emusi ahu aahiiso ovara miteko sa Muluku. Moohipisa hiyo pooti woonaka wira ninniviriha okathi munceene nivaraka muteko wa mulaponi, mpakha nihinakhalana okathi wira nikhale ni emusi ahu. Vakhala wira eyo enimwiiraneya, nihaana opaka marukunuxo wira nikhalaneke okathi woovara itthu sirina efaita yuulupale mookumini.
11. Etthu xeeni munna mmosa iixuntte awe voohimya sa okhalana moonelo wooloka ni muteko wa mulaponi?
11 Munna mmosa mmiravo oniitthaniwa William, ahoona mmensawe wira vannireerela ohela muteko wa mulaponi opuro aya. Omuupuwelaka munna mmosa oowuuluvala anvarela awe muteko khalai, William onihimya so: “[Munna ole] ntakiheryo nuulupale na mutthu orina moonelo wooloka ni muteko. Yena mutthu oovara muteko, nave onniiwanana saana ni makiliente awe okhala wira mutthu ooreera murima. Masi okathi muteko onimala aya, munna ole onnisuwela wira ohaana ohiya muteko onivara awe wira amulompe Muluku vamosa ni emusi awe. Mwaha woopaka eyo, munna ole mutthu ootepexa ohakalala vanceene kitonko aka omusuwela!” *
MUKHALANEKE MOONELO WOOLOKA NI NYUWO ANEENE
12. Salomoni oonihenrye sai wira aahikhalana moonelo wooloka? Niireke aahooniherya moonelo owo okumi awe wootheene? Mutthokiherye.
12 Okathi Salomoni aamukokhorela awe Yehova moororomeleya, aahikhalana moonelo wooloka. Nto ori ene mmiravo, Salomoni aanisuwela wira saahikhala itthu ahaawerya awe opaka nto aanireerela olakiheriwa ni Yehova. (1 Mam. 3:7-9) Nuumala okhalihiwa mwene, Salomoni aanisuwela otakhala waya okhala mutthu oowiixinnuuha. Owo aalempe so: “wisona okhuvela opweteya: Wihelana onniruha ehasara”. (Mir. 16:18) Mooriipiha murima muhoolo mwaya Salomoni aahihiya weettela miruku iyo. Nuuvira okathi vakhaani olamulela aka, Salomoni aahipacerya wiixinnuuha ni ohiiwelela malamulo a Muluku. Mwa ntakiheryo, nlamulo nimosa naanaakhoottiherya mamwene aIsarayeli okhalana ‘axaraya anjene wira murimaya ohihononiwe’. (Otum. 17:17) Masi Salomoni khaiwelenle nlamulo nlo. Nto aahikhalana axaarawe 700 ni aahikhalana-tho athiyana akina 300, nave anceene a yaawo yaari mapakau. (1 Mam. 11: 1-3) Woonasa wene, Salomoni uupuwela wira itthu iye khisaarowa omukumiherya mixankiho. Muhoolo mwaya Salomoni saahimukhumelela mixankiho sinceene mwaha woohiya omwiiwelela Yehova. — 1 Mam. 11:9-13.
13. Exeeni nniixutta ahu ni wiiyeviha wa Yesu?
13 Yesu nave aahikhalana moonelo wooloka ni aari mutthu oowiiyeviha. Okathi aari awe valaponi Yesu aahipaka itthu sinceene sooreera wira omusivelihe Yehova. Yesu aahimukhaliherya Yehova, ‘opattuxa itthu sootheene wiirimu ni vathi’. (aKol. 1:16) Okathi aapatisiwa awe woonasa wene, Yesu aahuupuwela itthu aapanke awe okathi aari awe ni Tiithi awe a wiirimu. (Math. 3:16; Yoh. 17:5) Masi Yesu khaixoona okhala mutthu ootepa okhalana efaita okathi uupuwela awe itthu iyo. Nave, owo khoona wira aari mutthu oosuwelexa waavikana akina. Owo aahaaleela awiixutti awe wira ‘khaarwenle orumeeliwa, masi aarwenle warumeela atthu ni ovaha okumi awe wira owoopole’. (Math. 20:28) Nave Yesu aahihimya wira khaapaka itthu voowiikuxererya. (Yoh. 5:19) Tthiri Yesu aari mutthu oowiiyeviha. Nave oonivaha ntakiheryo nooloka nikhanle ahu ootthara.
14. Ntakiheryo na Yesu, ninniixuttiha exeeni sa moota wookhalana moonelo wooloka voohimya sa hiyo?
14 Yesu aahiwiixuttiha atthareli awe, okhalana moonelo wooloka voohimya sa awo aneene. Okathi omosa, Yesu ahaalela awiixutti awe wira: “Ikharari sotheene sa mmuruni mwanyu, sookontariwa”. (Math. 10:30) Tthiri moolumo ala anninimaaliha vanceene otepexa wene okathi nnuupuwela ahu wira khanrina efaita. Eyo enooniherya wira Tiithi ahu a wiirimu onninithokorerya vanceene. Vakhala wira Yehova oonithanla wira nimurumeeleke, eyo enooniherya wira ninniphwanela ophwanya okumi woohimala elapo esya. Nto nihikhala-khale nuupuwela aka wira khanirina efaita wa Yehova.
Exeeni ekhanle oniiraneela vakhala wira nnookhalana moonelo woohiloka voohimya sa hiyo? (Nwehe ettima 15) *
15. (a) Moonelo xeeni wooloka erevista Owehaweha yaahimmye aya wira nihaana okhalana? (b) Ntoko sinooniherya aya ifootu siri epaaxina 24, vakhala wira nnimwiixunnuwiha itthu xeeni ninrowa ahu opweteiwa?
15 Iyaakha 15 sivinre, erevista Owehaweha yaahihimya oreerela waya okhalana moonelo wooloka voohimya sa hiyo aneene. Eyo yaatthokihenrye so: “Itthu ninwerya ahu opaka sihiniiriheke wuupuwela wira natthu ootepexa okhalana efaita mpakha wiixinnuuha. Nave, itthu nihinwerya ahu opaka sihiniiriheke wuupuwela wira khanirina efaita. Nihaana wiimananiha okhalana moonelo wooloka voohimya sa hiyo aneene. Nto eyo enihela muhina osuwela wira sookhala itthu ninwerya ahu opaka ni itthu nihinwerya ahu opaka. Murokora mmosa aahimmye so: ‘Miyo nkihiyo mutthu ootakhala, nave nkihiyo mutthu ootepexa oloka waavikana akina. Maana sookhala itthu kinwerya aka opaka ni itthu kihinwerya aka opaka.’” * Tthiri, nooweha efaita erina aya okhalana moonelo wooloka voohimya sa hiyo aneene.
16. Xeeni Yehova onnivaha awe miruku sooloka?
16 Orumeelaka Nuulumo nawe, Yehova onninivaha miruku sooloka. Owo onniniphenta nave oniphavela wira nihakalaleke. (Yes. 48:17, 18) Etthu yooloka nikhanle ahu oopaka wira nikhalane ohakalala weekeekhai, ori ohihiya opaka itthu sinimusivela Yehova. Napaka eyo, nnoosyaka mixankiho sinaaphwanya atthu yaale aniphenta musurukhu mootepana, muteko wa mulaponi aahiiso aniixinnuuha. Nto ootheene ahu, nihihiye okhalana ankhili ni omuhakalaliha Yehova. — Mir. 23:15.
NSIPO 94 Ninnixukhurela Nuulumo na Muluku
^ Salomoni ni Yesu yaari atthu oosuwela vanceene. Osuwela iwo yaavahiwe ni Yehova Muluku. Mwaha ola, nnoothokorerya miruku Salomoni ni Yesu saavanhe aya sa moota wookhalana moonelo wooloka voohimya sa musurukhu, muteko ni wiiyeviha. Nave nnooweha, moota weettela miruku iyo saakhalihenrye aya anna ni arokora.
^ Nwehe mwaha onihimya so: “Moota Woosiveliwa ni Muteko Anyu” okumihiwe Owehaweha 1 a Fevereiro, 2015.
^ Nwehe mwaha oni: “A Bíblia pode ajudá-lo a encontrar alegria” ori A Sentinela 1 a Agosto, 2005.
^ OTTHOKIHERIWA WA IFOOTU: Mario ni Toni amiravo anli arisa muloko mmosaru. Nto Mario onniviriha okathi munceene okhapelela ekaaro awe. Masi Toni onnirumeela ekaaro awe wira aakhaliherye anna akina orowa muteko woolaleerya ni orowa oweha mithukumano sa mmulokoni.
^ OTTHOKIHERIWA WA IFOOTU: Mario ovaraka muteko mootepana mpakha ohiyu. Owo khoniphavela omunyoonyiha xeefi awe. Tivonto, khula okathi onivekeliwa awe ni xeefi awe wira ovare mpakha ohiyu, Mario onneemererya. Toni murumeyi ookhaliherya. Ohiyu ene yoole onnimuhoola mutokweene mmosa orowa omuxukurya ni omulipiha murokora mmosa. Toni onniwerya opaka eyo, maana khalai ene aahimuleela xeefi awe wira mahiku makina ohiyu onivara miteko sa Muluku.
^ OTTHOKIHERIWA WA IFOOTU: Mario iisuupuwelaka mmansawe paahi. Masi Toni, yoowo onihela nipuro noopacerya miteko sa Yehova ohiya itthu sinimusivela, onniviriha okathi ori ene ni apatthani awe okathi anilokiherya saya Esalau ya Asembeleya.
