1-2. Mutthokiherye xeeni okathi makhalelo ahu aniturukeya aya soolepa sikina sinikhala aya sootepa otthuneya.

 NIHIKU na ekasamento, ale anirowa othelana anniwiriyana mwaha onikhuma mBiibiliyani voohimya sa ekasamento. Malakiheryo anilavuliwa okathi wa mwaha, khahiyo anoopacerya wiiwa. Masi mwaha owo ekwaha ela ti woovirikana. Mwaha wa xeeni? Mwaha woowi malakiheryo aniwiriyana aya vano, anrowa ovarihelaka muteko mukasamentoni mwaya.

² Etthu emosaru enniiraneya okathi anamathelana anaayara aya anamwane. Woonasa wene okhuma khalai awo aatoko wiiwa myaha sinceene saatthokiherya moota woowaahuwa anamwane. Masi vano awo ahaana ovarihela muteko malakiheryo awo mookumini mwaya. Maana awo aakhalana muritti woomuhuwa mwaana amuyanre aya. Tthiri owo muritti muulupale. Nto okathi makhalelo ahu aniturukeya aya soolepa sikina sa mBiibiliyani sinnikhalana efaita yinceene mookumini mwahu. Nla ti nthowa ninwiiriha arumeyi a Yehova olelo-va osomaka soolempwa. Nave ti etthu yaamwiirinhe Yehova waaleela mamwene a wisarayeli wa khalai wira yaahaana osomaka ni wuupuwelela soolempwa “nihiku ti nihiku”. — Otum. 17:19.

3. Exeeni ninrowa ahu othokorerya mwaha ola?

³ Anamuyari ntoko makristau, aakhalana eparakha yoowiixuttiha anaaya malamulo a Yehova. Nto ohiya paahi owiixuttiha aniinyu awo malamulo a Yehova, nyuwo munniphavela wira yeetteleke. Tthiri nyuwo munniphavela waakhaliherya aniinyu omphentaka Yehova. Nto exeeni mukhanle anyu oopaka wira mwaakhaliherye aniinyu omphentaka vanceene Yehova? Mwaha ola, nnoothokorerya malakiheryo maxexe anikhuma mBiibiliyani anrowa wookhaliheryani nyuwo anamuyari.  (2 Tim. 3:16) Nave nnooweha moota anamuyari akina makristau yaattottenle aya mureerelo mwaha wooweettela ele Biibiliya onihimya awe.

4. Etthu xeeni enrowa waakhaliherya anamuyari owiixuttiha anaaya omphenta Yehova ni murima aya wootheene? (Yakobo 1:5)

⁴ Malakiheryo 1: Mphaveleke nikhaliheryo na Yehova. Munvekeleke Yehova malakiheryo wira mwaakhaliherye aniinyu wuncererya omphenta waya Yehova. (Mmusome Yakobo 1:5.) Tthiri owo tonireerela onivaha miruku. Aakhala mathowa manceene animwiiriha Muluku oreerelaka onivaha miruku. Vano nrowe nithokorerye mathowa manli. Nthowa noopacerya: Okhala wira Yehova tiithi onipattunxe. (Esal. 36:10) Na nenli: Okhala wira miruku onnivaha awe sinniniphwanyiha mureerelo. — Yes. 48:17.

5. (a) Itthu xeeni mutthenkeso wa Yehova onaavaha awe anamuyari wira awiixuttiheke anaaya? (b) Ntoko enooniherya aya eviidiyu, etthu xeeni mwiixuntte anyu sa moota munna Amorim ni mwaara awe yaahuwa aya anaaya? (Nwehe enoota)

⁵ Orumeelaka Nuulumo nawe ni mutthenkeso awe, Yehova onnaavaha anamuyari malakiheryo manceene a moota oowiixuttiha anaaya omphenta yena. (Math. 24:45) Mwa ntakiheryo, nyuwo munoowerya ophwanya miruku soovareleya muteko mpantta oni: “Ajuda Para a Família” seiyo sikumiheriwe Despertai! Vano siniphwanyaneya esaite ahu jw.org. Nave munoophwanya iviidiyu sinceene sa anamwane seiyo sinrowa waakhaliherya anamuyari owiixuttiha anaaya. * — Mir. 2:4-6.

6. Mulopwana mmosa ni mwaara awe, anoonela sai malakiheryo anivahiwa aya ni mutthenkeso wa Yehova?

⁶ Anamuyari anceene aaxukhurela mwaha wa Yehova waakhaliherya orumeelaka mutthenkeso awe. Paapa mmosa oniitthaniwa Joseph ohimmye so: “Waahuwa anamwane araru mweekeekhayini khahiyo etthu yookhweya. Okathi wootheene miyo ni mwaaraka ninninvekela Yehova wira onikhaliherye. Nto ninnoona wira myaha ni iviidiyu sinikumiheriwa, sinninikhaliherya oxintta mixankiho sinniphwanya. Eyo enniniiriha ororomelaka malakiheryo a Yehova”. Joseph ni mwaara awe ahoona wira iviidiyu iyo ni myaha iyo sihaakhaliherya anaaya olipiha waataana waya ni Yehova.

7. Xeeni anamuyari vanireerela aya waavaha ntakiheryo nooloka anaaya? (aRoma 2:21)

 ⁷ Malakiheryo 2: Mwaavaheke ntakiheryo nooloka. Okhala wene anamwane waasivela waatakiha anamuyari aya. Ekeekhai wira khuuvo namuyari ori oomalela. (aRom. 3:23) Hata vari siiso, anamuyari a miruku annipaka sootheene aniwerya aya wira yaavahe ntakiheryo nooloka anaaya. (Mmusome aRoma 2:21.) Olavulaka sa anamwane, paapa mmosa ohimmye so: “Anamwane anlikana ni nxotte, anninuula khula etthu anoona aya”. Paapa owo onnihimya-tho so: “Akhala wira hiyo khanimpaka ele ninwiixuttiha ahu aniihu mweettelo wa aniihu onimooneyaka”. Nto vakhala wira nimphavela wira aniihu amphenteke Yehova ni hiyo nave omphenta wahu Yehova ohaana okhala woolipa nave ohaana wooneyaka ni miteko.

8-9. Itthu silavunle awe munna Andrew ni murokora Emma sinniixuttiha exeeni?

⁸ Sookhala inamuna sinceene anamuyari akhanle aya oopaka wira awiixuttihe anaaya omphenta Yehova. Munna mmosa oniitthaniwa Andrew orina iyaakha 17 ohimmye so: “Anamuyari aka aakiixuttiha oreerela waya khula okathi opakaka mavekelo. Khula ohiyu paapa aka aanivekela ni miyo, nnaamwi miyo nave kaapaka nivekelo naka. Anamuyari ahu yaaninuupuxerya wira: ‘Hiyo pooti onvekela Yehova khula okathi nimphavela ahu’. Mwaha waivaavo kinnoona ovekela okhala etthu ya faita. Vano vannikikhweela ovekela nave kinnoona wira Yehova Tiithi onkiphenta”. Nyuwo anamuyari, muhiliyale wira omphenta wanyu Yehova pooti waakhaliherya aniinyu nave omphentaka yena.

⁹ Nrowe nithokorerye ntakiheryo na murokora oniihaniwa Emma. Okathi paapa awe aatthyanwe awe emusi awe, iira okomphe ene musurukhu munceene nto maama awe aahaana oliva. Emma ohimmye so: “Waahikhala okathi maama aka ahaarina awe musurukhu, masi owo khula okathi aaninileela wira Yehova onnaakhapelela arumeyi awe. Mweettelo awe waahikooniherya wira yena aanikupali itthu aixuttiha awe”. Yoowiiraneya ela enniixuttiha exeeni? Nniixutta wira anamuyari anoowerya waavaha ntakiheryo nooloka anaaya hata okathi wa mixankiho. — aGal. 6:9.

10. Okathi xeeni anamuyari a wisarayeli a khalai yaarina aya wira avaanele ni anaaya voohimya sa Yehova? (Otumererya 6:6, 7)

¹⁰ Malakiheryo 3: Nvaaneleke ni aniinyu khula okathi. Yehova ahaalakiherya aisarayeli a khalai wira yaahaana owiixuttihaka anaaya voohimya sa yena khula okathi. (Mmusome Otumererya 6:6, 7.) Anamuyari a wisarayeli a khalai, yaanikhalana okathi munceene khula nihiku wira avaaneleke ni anaaya ni awiixuttiheke omphenta Yehova ni murima aya wootheene. Mwa ntakiheryo, mmiravo mmosa mwisarayeli anwerya oviriha okathi munceene omukhaliheryaka paapa awe waala ipyo ni ohepha. Nave, murokora awe anwerya oviriha okathi aakhaliheryaka amamawe ottottha aahiiso otthava ikuwo ni ovara miteko sikina sa vate. Vaavo anamuyari yaaviriha aya okathi ari ene ni anaaya, awo yaaniwerya ovaanela myaha sinceene sa efaita. Mwa ntakiheryo, okhala wira yaaniviriha okathi ari ene ni anaaya, awo yaaniwerya ovaanela mikhalelo sa Yehova ni moota owo aakhaliherya awe.

11. Olelo-va, anamuyari makristau anrowa owerya sai ovaanela ni anaaya?

¹¹ Masi, mahiku ala itthu sooturukeya. Ilapo sinceene vanihikuni anamuyari khaniwerya oviriha okathi munceene ari ene ni anaaya. Okhala wira anamuyari anirowa omutekoni nave anaaya anirowa oxikola. Nto anamuyari ahaana waavya okathi wira avaaneleke ni anaaya. (aEef. 5:15, 16; aFil. 1:10) Enamuna emosa  anamuyari akhanle aya oovaanela aka ni anaaya, ori okathi woomulompa Muluku vatthokoni. Munna mmosa mmiravo oniitthaniwa Alexander onihimya so: “Paapa aka onnipaka mareheryo wira nikhalane omulompa Muluku vatthokoni. Nave onniimananiha wira ehikhale etthu enrowa waakanyerya okathi owo. Nuumala osoma, ninnivaanela”.

12. Etthu xeeni muhooleli a etthoko okhanle awe oosyaka okathi woomulompa Muluku vatthokoni?

¹² Vakhala wira nyuwo mwa muhooleli a etthoko, exeeni mukhanle anyu oopaka wira omulompa Muluku vatthokoni okhaleke woohakalaliha? Nyuwo pooti orumeela ebroxura aahiiso eliivuru ekumiheriwe niinaano eni: Okumi Woohimala! wira mwaasomihe aniinyu. Opaka eyo, enimookhaliheryani ovaanelaka saana ni aniinyu. Okhala wira muniphavela wira aniinyu avaaneleke ni nyuwo yooleelakani itthu sinaaxankiha, muhirumeeleke okathi woomulompa Muluku vatthokoni wira mwaapwapwele ni waavaanyiha. Nave mwaapixeryeke murima okathi aniinyu anihimya aya etthu ehinivarihana ni malakiheryo a mBiibiliyani. Ohiya-vo mwaaxukhureleke mwaha woohimya itthu sinaaxankiha, nave mwaatumereryeke olavula moohoova. Munoowerya waakhaliherya aniinyu saana, vakhala wira munnisuwela itthu sinaaxankiha.

13. Enamuna xeeni ekina anamuyari akhanle aya oowiixuttiha anaaya omphenta Yehova?

¹³ Anamuyari ahaana ophavelasa okathi khula nihiku wira yaakhaliherye anaaya olipiha waataana waya ni Yehova. Nto, muhilipeleleke paahi okathi woomusoma Biibiliya wira nwiixuttihe aniinyu voohimya sa Muluku ahu oophenta. Maama mmosa oniitthaniwa Lisa ohimmye so: “Ninnirumeela itthu sipattuxiwe wira niwiixuttihe aniihu voohimya sa Yehova. Mwa ntakiheryo, okathi mwalapwa ahu onipaka awe itthu sinaatheiha aniihu, ninniwiixuttiha wira eyo enooniherya wira Yehova, Muluku oohakalala nto oniphavela wira nihakalaleke”.

14. Xeeni vari aya va efaita anamuyari waakhaliherya anaaya waathanla apatthani mwa miruku? (Miruku 13:20)

¹⁴ Malakiheryo 4: Mwaakhaliheryeke aniinyu waapaka apatthani ooloka. Nuulumo na Muluku ninnooniherya wira, apatthani ahu pooti oniirihaka opaka soothanla sooloka aahiiso soohiloka. (Musome Miruku 13:20.) Nyuwo  anamuyari, niireke munnaasuwela apatthani aaniinyu? Niireke mootoko oviriha okathi muri ene ni apatthani aaniinyu wira mwaasuwele saana? Munrowa waakhaliherya sai aniinyu waathanla apatthani animphenta Yehova? (1 aKor. 15:33) Enamuna emosa, ori waalattula anna ni arokora arina waataana wooloka ni Yehova wira atthekuleke ni nyuwo vamosa ni aniinyu. — Esal. 119:63.

15. Etthu xeeni anamuyari akhanle aya oopaka wira yaakhaliherye anaaya waathanla apatthani ooloka?

¹⁵ Tiithi mmosa oniitthaniwa Tony, onnitthokiherya etthu onipaka awe yena ni mwaarawe, wira yaakhaliherye anaaya wira yaaphwanye apatthani ooloka. Owo ohimmye so: “Iyaakha sinceene miyo ni mwaaraka, ninnaalattula owannyihu anna ni arokora arina iyaakha soovirikana ni a ilapo soovirikana. Nave ninnoolya hoothe ni omulompa Muluku vatthokoni hoothe. Nto eyo enninikhaliherya waasuwela ale animphenta Yehova ni animurumeela moohakalala. Tthiri yaari eparakha yuulupale owaakhela owannyihu axitokweene a esirkwiitu, mamisionaario, ni anna akina. Nave itthu yaanileela aya, ntakiheryo ni oluttuweliwa waya ovara muteko mmutthenkesoni mwa Yehova, saahaakhaliherya aniihu olipiha ompatthani aya ni Yehova”. Nto nyuwo anamuyari, muhihiye waakhaliherya aniinyu waapaka apatthani ooloka.

16. Exeeni munrowa anyu opaka vakhala wira mwaninyu onihimya wira khoniphavela-tho omurumeela Yehova?

¹⁶ Nilikanyihe wira nyuwo muhiimananiha vanceene waakhaliherya aniinyu omphenta Yehova. Masi mwaninyu mmosa onahimya wira khoniphavela-tho omurumeela Yehova. Munrowa opaka exeeni? Muhuupuweleke wira nyuwo khahiyo namuyari ooloka. Yehova oonivaha ootheene ahu, omuhela muhina mwaninyu, eparakha yoothanla mootaphuwa. Hiyo pooti othanla vakhala wira nnoomurumeela Yehova aahiiso khaninrowa omurumeela. Nto akhala wira mwaninyu onoohiya omurumeela Yehova, muhikhulumuwe. Nave muhihiye okhalana nlipelelo wira nihiku nlo owo onootthika. Muupuweleke nlikanyiho na mBiibiliyani na mwaana aarimenle. (Luka 15:11-19, 22-24) Mwaana ole aahipaka itthu sinceene soohiloka, masi wanikisa waya owo aahitthika. Woonasa wene  nyuwo pooti ohimyaka so: “Nlo nlikanyiho paahi, kiireke mwanaka onoomutthikela Yehova?” Aayo, eyo pooti wiiraneya. Tthiri eyo ti etthu yaamwiiranenle mulopwana mmosa oniitthaniwa Elie.

17. Yoowiiraneya ya Elie enoolipihani sai?

¹⁷ Olavulaka sa anamuyari awe, Elie ohimmye so: “Awo yaahiimananiha vanceene okikhaliherya omphenta Yehova ni Nuulumo nawe, Biibiliya. Masi okathi kaari aka mmiravo, kaahipacerya ohiiwananeya”. Elie aahipacerya opaka itthu soohiloka moohisuweliwa. Nave anamuyari awe yaahiimananiha omukhaliherya okhalana waataana wooloka ni Yehova, masi owo kheemerenrye okhaliheriwa. Nuumala othaama etthoko ya anamuyari awe, aahikhalana mweettelo woohiloka. Masi hata vari siiso, aanivaanela myaha sa Biibiliya ni mpatthani awe. Owo ohimmye so: “Okathi kaavaanela aka ni mpatthani aka voohimya sa Yehova, kaanuupuwela itthu kiixuttihiwe aka. Nto vakhaani-vakhaani ikeekhai iye kiixuttihiwe aka ni anamuyari aka, saahipacerya wunnuwa vamurimani vaka”. Nuuvira okathi, Elie aahitthikela mweekeekhayini. * Nkahaya muupuwele moota anamuyari awe yaahakalanle aya, mwaha woowiimananiha omwiixuttiha mwanaya okhuma enamwane awe omphenta Yehova. — 2 Tim. 3:14, 15.

18. Muniwoonela sai anamuyari aniimananiha vanceene owiixuttiha anaaya omphenta Yehova?

¹⁸ Yehova ohaavaha anamuyari eparakha ya vameekhaaya ya waahuwa arumeyi awe asya a muhoolo. (Esal. 78:4-6) Tthiri owo, khahiyo muteko wookhweya. Nto ninnoottottopelani mwaha woowiimananiha wanyu waakhaliherya aniinyu. Exeeni enrowa wiiraneya vakhala wira khamunihiya waakhaliherya aniinyu omphenta Yehova ni owiixuttiha omwiiwelela? Mukupaliki wira Tiithi ihu a wiirimu onoohakalala vanceene ni nyuwo. — aEef. 6:4.