1. Biibiliya onitthokiherya sai ophenta weekeekhai?

 BIIBILIYA onnitthokiherya ophenta weekeekhai mwa enamuna yooreera, oriki: ophenta “onlikana ni moro: ti moro wowopiha onkhuma w’Apwiya [Yehova]. Màsi malupale khanwerya ottipiha ophenta: màsi a mutáseke khanwerya opwetexa ophentana”. b (Nsip. 8:6, 7) Moolumo ala anniwooniherya anamathelana wiira: Anoowerya ophentana weekeekhai mukina ni mukhwaawe.

2. Anamathelana ahaana opakaka exeeni wiira ophenta waya ohivukuwe?

² Wiira ophentana wa anamathelana ohimale aahiiso ovukuwa, awo ahaana wiimananihaka. Mwa ntakiheryo, nkahaya muupuwele mooro opattihiwe. Nto wiira mooro owo ohittiphe, vaniprisari ohelaka ikhuni. Nave mwaahikhalane ephoole mooro owo pooti ottipha. Mwa enamuna emosaru, wiira anamathelana awerye olipiha ophentana waya, awo ahaana okhapelelaka ompatthani aya. Ikwaha sikina, mixankiho ntoko othoiwa musurukhu, owereiwa aahiiso waahuwa anamwane, pooti wiirihaka ophentana waya ovukuwa. Vakhala wiira moothela aahiiso mootheliwa, munrowa owerya sai ohihiya “moro wowopiha onikhuma w’Apwiya [Yehova]” wiira ohittiphe mukasamentoni mwanyu? Mwaha ola, nnooweha itthu tthaaru sinrowa okhaliherya ekasamento anyu okhala yoolipa ni yoohakalala. c

3. Moota xeeni okhalana waataana woolipa ni Yehova onrowa aya anamathelana wuuncererya ophentana waya? (Musuweli 4:12.) (Nwehe elatarato.)

³ Wiira “moro wowopiha onikhuma w’Apwiya [Yehova]” ohittiphe, anamathelana ahaana wiimananiha olipiha ompatthani aya ni  Yehova. Wiimananiha opaka eyo, enrowa okumiherya mireerelo xeeni? Vaavo anamathelana anihela aya nipuro noopacerya ompatthani aya ni Yehova, aneettela malakiheryo awe eyo enimwaakhaliherya osyaka ni oxintta mixankiho saarowa omaliha aahiiso ovukula ophentana waya iwo. (Mmusome Musuweli 4:12.) Mutthu orina waataana woolipa ni Yehova onniimananiha otakiha mikhalelo sawe, ntoko oreera murima, opixa murima ni olevelela. (aEef. 4:32–5:1) Okathi anamathelana anooniherya aya mikhalelo iyo, ophentana waya onnincerereya. Murokora mmosa oniitthaniwa Lena, yoowo ovirinhe iyaakha 25 otheliwe ene, onihimya so: “Khivanvila omphenta ni omuttittimiha mutthu orina waataana woolipa ni Yehova”.

4. Xeeni Yehova ahalaka omuthanla Yosefe ni Maria wiira akhale aanamuyari awe Mesiya?

⁴ Nrowe niwehe ntakiheryo nimosa mbiibiliyani. Okathi Yehova aaphavela awe waathanla tani yaarowa okhala anamuyari awe mesiya, owo aamuthanlale Yosefe ni Maria. Nnaamwi yaakhanle atthu anceene nloko na Davidi. Mwaha wa xeeni? Mwaha woowi Yosefe ni Maria yaahikhalana waataana woolipa ni Yehova, ni Yehova anisuwela wiira khula okathi awo yaarowa omuhelaka nipuro noopacerya mukasamentoni mwaya. Anamathelana aniixutta exeeni ni ntakiheryo na Yosefe ni Maria?

5. Ntakiheryo na Yosefe ninwiixuttiha exeeni alopwana oothela?

⁵ Yosefe khaapisa ovarihela muteko malakiheryo avahiwa awe ni Yehova, nto eyo yaahimukhaliherya okhala mulopwana oothela ooloka. Ninniira siiso okhala wiira ikwaha tthaaru Yosefe aahivahiwa malakiheryo ni Muluku voohimya sa etthoko awe. Nto ikwaha sootheene aavahiwa awe malakiheryo awo, owo aahiiwelela moowakuveya hata eyo yaahela muhina opaka marukunuxo maalupale. (Math. 1:20, 24; 2:13-15, 19-21) Mwaha wowiiwelela malakiheryo a Muluku, eyo yaahimukhaliherya Yosefe omukhapelela saana ni omukhaliherya Maria. Nto itthu iye sootheene saahimukhaliherya Maria wuuncererya omphenta wawe ni omuttittimiha Yosefe. Nyuwo alopwana oothela, munimooniherya wiira munnimutakiha Yosefe akhala wiira khula okathi munoophavelasaka malakiheryo a mbiibiliyani wiira mukhaliherye emusi anyu. d Nave hata mureerelaka opaka marukunuxo maalupale, vaavo munitthara anyu malakiheryo a mbiibiliyani nyuwo munimooniherya wiira munaaphenta amwaarinyu ni olipiha ekasamento anyu. Murokora mmosa onikhala elapo ya oVanuatu, ovirinhe iyaakha 20 otheliwe ene, onihimya so: “Okathi iyaka oniphavela sawe malakiheryo a Yehova oneettela, omuttittimiha waka onnincerereya. Kinnikhala oovareleya ni kinnikupali soothanla sawe”.

6. Ntakiheryo na Maria ninwiixuttiha exeeni athiyana ootheliwa?

⁶ Maria aahikhalana waataana wooloka ni Yehova. Okhala wiira yena mmansawe aniimananiha  olipiha waamini wawe. Owo aanisuwela saana soolepa. (Luka 1:46.) Nave owo aaniivaha okathi wiira uupuwelele itthu aasoma awe. (Luka 2:19, 51) Maria aari muthiyana ootheliwa ooloka, okhala wiira aahikhalana waataana woolipa ni Yehova. Nave olelo-va, athiyana anceene ootheliwa anniimananiha omutakiha Maria. Mwa ntakiheryo murokora mmosa oniitthaniwa Emiko, onihimya so: “Kihinatthi otheliwa, kaanikhalela nthiti itthu saalipiha waamini waka. Nuumala otheliwa iyaka taavekela ni taamuhoolela omulompa Muluku vatthokoni. Nuumala-vo kaahoona wiira miteko iye kaavara aka kihinatthi otheliwa kaamuhiyerya iyaka paahi. Masi nuuvira okathi kaahona wiira ti miyo kirina muritti wookhapelela waataana waka ni Yehova. Masi kinnaavya okathi wiira kivekele, kimusome Biibiliya ni wuupuwelela ele kinsoma aka”. (aGal. 6:5) Xontte nyuwo athiyana ootheliwa muhihiye olipiha ompatthani anyu ni Yehova, mwiira siiso axiiyanyu khanrowa ohiyaka woottottopelani ni woophentani. — Mir. 31:30.

7. Ntakiheryo na Yosefe ni Maria ninwiixuttiha exeeni anamathelana sa amukokhoreleke Yehova ari ene hoothe?

⁷ Wiira Yosefe ni Maria alipihe ompatthani aya ni Yehova awo yaahana ovarasa hoothe ntoko ekiipa. Awo yanoona wiira omukokhorela Yehova vamosa ni emusi yaari etthu ya faita. (Luka 2:22-24, 41; 4:16) Hata vaaxankiha opaka eyo, nuumala waayara anamwane awo khiyaahiyale olipiha waataana waya ni Yehova ntoko emusi. Tthiri nla ntakiheryo nooloka anamathelana anireerela ottharaka olelo-va! Ntoko siisaale Yosefe ni Maria, akhala wiira nyuwo mookhalana anamwane pooti wooxankihakani orowela mithukumano aahiiso waavya okathi wiira mmulompe Muluku vatthokoni. Woonasa wene pooti wooxankihakani waavya okathi wiira musome ni ovekela ni ole muthelanne anyu. Vaavo anamathelana anikhalela nthiti ovara miteko sa Yehova ari ene hoothe, waataana waya onnilipa nave annitepa omwaattamela Yehova. Nto nyuwo anamathelana muheleke nipuro noopacerya miteko muninvarela anyu Yehova.

8. Hata ekasamento aya erina ene mixankiho, exeeni enrowa waakhaliherya anamathelana ohihiya omulompa Muluku vatthokoni?

⁸ Exeeni mukhanle anyu oopaka vakhala wiira ekasamento anyu yookhalana mixankiho? Vakhala wiira ti siiso nyuwo woonasa wene nyuwo munoona wiira khivanwerya omulompa Muluku hoothe. Nto nyuwo pooti waavya mwaha onrowa woosivelani aahiiso onrowa omusivela ole muthelanne anyu wiira muthokorerye hoothe. Opaka itthu iyo onimwaakhaliherya anamathelana wuuncererya ophentana waya ni okhalela nthiti miteko aninvarela aya Yehova ari ene hoothe.

9. Exeeni anamathelana anireerela aya oviriha okathi ari ene hoothe?

⁹ Nyuwo anamathelana, wiira mulipihe ophentana wanyu nviriheke okathi muryeene hoothe. Opaka eyo enimookhaliheryani omusuwela saana ole muthelanne anyu, osuwela miyuupuwelelo sawe ni miyoonelo sawe. (Maph. 2:24) Nrowe niwehe etthu Lilia ni Ruslan yaawenha aya nuumala othelana. Anamathelana awo aaviriha iyaakha 15 aryeene hoothe. Lilia onihimya so: “Nihinatthi othelana nuupuwela wiira nuumala othelana naarowa ovirihaka okathi munceene nryeene hoothe, masi kaahiyo yeeyo yiiraneyale. Maana okathi wootheene naanatteliwa miteko sinceene ntoko: muteko, okhapelela empa ni anamwane. Nto nahoona wiira nahaana waavya okathi wiira nikhalase hoothe, maana ohipaka eyo yaamuniiriha ovalaana mukina ni mukhwawe”.

10. Anamathelana anrowa ovarihela sai muteko yoolepa ya aEefeso 5:15, 16, mukasamentoni mwaya?

¹⁰ Etthu xeeni anamathelana akhanle aya oopaka, wiira aviriheke okathi ari ene hoothe? Woonasa wene awo aahaana ohiya okathi aahiiso ompaka palano wiira akhale hoothe. (Mmusome aEefeso 5:15, 16.) Munna mmosa a oNigeria,  oniitthaniwa Uzondu, onihimya so: “Okathi kinimpakaka palano aka, kinnithanla okathi wiira kikhale ni amwaaraka ni kinnihela eyo nipuro noopacerya”. (aFil. 1:10) Nrowe niwehe ntakiheryo na Anastasia, a oMoldavia. Owo otheliwe ni mutokweene a esirkwitu, nave owo onnihimya moota onirumeela awe saana okathi awe. Okathi iyaka onaatteliwa awe miteko mwaha wa iparakha sawe, kinnirumeela okathi owo wiira kivare itthu saka. Nto nuumala iyaka omaliha miteko sawe ninnikhala hoothe”. Masi ankhi vakhala wiira munnatteliwasa miteko, muhinaweryasa waavya okathi wiira mukhalase hoothe?

11. Miteko xeeni Akila ni Prisila yaavara aya hoothe?

¹¹ Anamathelana anniixutta etthu ni ntakiheryo na Akila ni Prisila. Anamathelana awo yaaniphentiwa vanceene ni makristau oopacerya. (aRom. 16:3, 4) Biibiliya khonihimya itthu sinceene voohimya sa ekasamento aya. Hata vari siiso, Biibiliya onnooniherya wiira yaanivarasa muteko, yaanilaleerya ni yaanaakhaliherya atthu akina. Nto yaanipaka itthu iwo sootheene ari ene hoothe. (Mit. 18:2, 3, 24-26) Khula okathi Biibiliya onaalavula awe anamathelana awo Akila ni Prisila khonaavalanya.

12. Anamathelana anrowa owerya sai oviriha okathi ari ene hoothe? (Nwehe elatarato.)

¹² Anamathelana anrowa omutakiha sai Akila ni Prisila? Woonasa wene nyuwosa munnivarasa miteko sinceene. Munoonela sai ovara miteko sikina nuule muthelanne anyu? Munoonela sai okhumaka hoothe ikwaha sikina muteko woolaleerya nuule muthelanne anyu? Eyo ti etthu Akila ni Prisila yaapaka aya. Woonasa wene, nyuwo khamunvara muteko mmosaru nuule muthelanne anyu. Masi munoonela sai ovara miteko sikina nuule muthelanne anyu ntoko orattela empa? (Mus. 4:9) Vaavo anamathelana anivara aya miteko sa vate hoothe, eyo ennaakhaliherya ovara ntoko ekiipa ni annikhalana okathi munceene wiira avaanele. Robert ni Linda aaviriha iyaakha sinivikana 50 athelanne ene. Robert onihimya so: “Hiyo khaninkhalana okathi munceene wiira nitthekule, masi kinnihakalala vanceene okathi kinimukhaliherya aka mwaaraka orapiha iparatho nave okathi owo onkikhaliherya awe vaavo kinlokiheryaka exardim ahu. Tthiri ovara miteko hoothe onninikhaliherya okhala oowiiraana ni wuncererya ophentana wahu”.

13. Anamathelana aahaana opaka exeeni wiira akhale oowiiraana?

¹³ Masi muhiliyale wiira okhala hoothe khentaphulela wiira mwa atthu oowiiraana. Murokora mmosa ootheliwa onikhala oBrasil, ohimmye so: “Mahiku ala, khasireere itthu sikhanle oniiyerya okathi ahu, nto anamathelana pooti wuupuwelaka wiira ari oowiiraana mwaha wookhalaka empa emosaru. Kihiixutta wiira khivanphiyerya paahi okhala hoothe ni iyaka masi kihaana onwiriyanaka okathi onlavula awe ni miyo”. Nrowe niwehe etthu Bruno onipaka awe vaavo mwaarawe Tays onilavula awe. Bruno onihimya so: “Vaavo ninviriha ahu okathi niri ene hoothe a telefoni ahu khinnaarumeela. Opaka eyo ennikikhaliherya olavulana ni onwiriyana mwaaraka ni ephoole”.

14. Vakhala wiira anamathelana khonaasivela oviriha okathi ari ene hoothe, exeeni akhanle aya opaka?

 ¹⁴ Masi ankhi vakhala wiira khivanoosivela-ni oviriha okathi muri ene hoothe nuule muthelanne anyu? Woonasa wene, vannoosivela-ni opaka itthu soovirikana muri ene aahiiso okathi munkhalasanyu hoothe munnaakuva onyoonyihana. Nto exeeni mukhanle anyu oopaka? Nrowe ntthikele wuupuwelela ntakiheryo nahu na mooro. Mooro khonaakuva opatta. Nto wiira mooro owo opatte vanceene, nihaana otetheeryaka ikhuni suulupale. Nuupuwelaka ntakiheryo nno, munoonela sai opacerya oviriha okathi muri ene hoothe khula nihiku? Nto okathi owo musyakeke opaka itthu, saarowa omunyoonyiha ole muthelanne anyu mpakeke itthu sinrowa woosivelani oowanli anyu. (Yak. 3:18) Vakhaani-vakhaani munoowerya wuncererya ophentana wanyu.

15. Wiira ophentana vatthokoni ohivukuwe xeeni anamathelana anireerela aya ottittimihanaka?

¹⁵ Ottittimihana ti wa faita vanceene mukasamentoni. Ottittimihana vatthokoni pooti olikanyihiwa ni epheyo. Okhala wiira yaahikhale epheyo mooro onnaakuva ottipha. Mwa enamuna emosaru, anamathelana yaahittittimihaneke ophentana waya onoovukuwa. Moovirikana ni vo vakhala wiira anamathelana anittittimihana ophentana waya onincerereya. Woonasa wene, nyuwo pooti wuupuwelaka wiira munnimuttittimiha ole muthelanne anyu. Masi niireke iyanyu, aahiiso mwaarinyu onnoona tthiri wiira munnimuttittimiha? Penny ni Aret, aaviriha iyaakha sinivikana 25 athelanne ene. Penny onihimya so: “Okhala wiira ninnittittimihana, eyo enniiriha ekasamento ahu okhala yoowiiraana. Nto khannoovelela oovaanela. Maana ninnisuwela wiira moonelo wa mukina wookhalana efaita”. Nto exeeni mukhanle anyu oopaka wiira iyanyu aahiiso mwaarinyu ooneke wiira munnimuttittimiha? Nwehe ntakiheryo na Abrahamu ni Sara.

16. Alopwana oothela aniixutta exeeni ni ntakiheryo na Abrahamu? (1 Pedru 3:7.) (Nwehe elatarato.)

¹⁶ Abrahamu animuthokorerya Sara mwa nttittimiho. Okhala wiira aniwiriyana mwa nttittimiho miyoonelo ni miyuupuwelo sa Sara. Ekwaha emosa Sara aahinyoonyiwa vanceene nto aahimuleela mixankiho sawe Abrahamu, ohimyaka wiira mixankiho samphwannye Abrahamu taarina nthowa. Masi niireke Abrahamu aahinanariwa ni Sara? Nnaari. Maana Abrahamu aanisuwela wiira Sara aari muthiyana oowiiwelela ni animukhaliherya. Nto Abrahamu aahinwiriyana Sara ni aahiphuka muxankiho ole. (Maph. 16:5, 6) Ntakiheryo na Abrahamu ninwiixuttiha exeeni alopwana oothela? Awo aakhalana muritti woopaka soothanla vatthokoni vaya. (1 aKor. 11:3) Masi, munimooniherya wiira munnimphenta mwaarinyu vakhala wiira munniwiriyana miyuupuwelelo sawe, muhinatthi opaka soothanla. (1 aKor. 13:4, 5) Ikwaha sikina, mwaarinyu pooti onyoonyiheyaka nto onaphavela ovaanela ni nyuwo wiira ooleeleni mixankiho sawe. Nto mwiireke munimooniherya omuttittimiha munwiriyanaka ni ephoole? (Mmusome  1 Pedru 3:7.) Angela ni Dmitry aaviriha iyaakha 30 athelanne ene. Angela onnitthokiherya etthu iyawe onipaka awe enooniherya wiira onnimuttittimiha. Owo onihimya so: “Khula okathi Dmitry onnikiwiriyana hata okathi kinnyoonyiheyaka aahiiso kiniphavela aka oovaanela paahi. Nto hata okathi yoole kinnanariwaka owo onnikipixerya murima”.

17. Athiyana ootheliwa aniixutta exeeni ni ntakiheryo na Sara? (1 Pedru 3:5, 6.)

¹⁷ Sara animuttittimiha Abrahamu okhaliheryaka soothanla sawe. (Maph. 12:5) Nihiku nimosa, Abrahamu aahiwaakhela aletto owannya awe mootutuxerya, nto aahaalattula wiira yalye etthu. Abrahamu aahinvekela Sara oohiya muteko aavara awe wiira ooxe iphaawu. (Maph. 18:6) Nto moohipisa Sara aahiiwelela etthu ele Abrahamu aavekenle awe. Yoowiiraneya ela, enniwiixuttiha athiyana ootheliwa wiira ahaana okhaliheryaka soothanla sa axiiyaya. Tthiri yapaka eyo anoolipiha ekasamento aya. (Mmusome 1 Pedru 3:5, 6.) Dmitry nimulavunle ahu ettima evinre, onnitthokiherya etthu mwaarawe onipaka awe enooniherya wiira onnimuttittimiha yena. Dmitry onihimya so: “Okisivela vanceene vaavo kininwehaka Angela okhaliheryaka soothanla saka, hata okathi yoole ninkhalana ahu miyoonelo soovirikana. Nto akhala wiira yoothanla aka khenikhumela saana, owo khonikiphukela”. Tthiri vannikhweya omphenta mutthu onoottittimiha!

18. Exeeni enrowa wiiraneya akhala wiira anamathelana anniimananiha olipiha ophentana waya mukasamentoni?

¹⁸ Olelo-va, Satana onnipaka sootheene oniwerya awe wiira omala-malihe niphento mukasamentoni. Owo onnipaka eyo, maana onnisuwela wiira akhala wiira anamathelana anoohiya ophentana waya, woonasa wene anoohiya nave omphenta Yehova. Masi muhiliyale wiira ophenta weekeekhai khonimala. Nto mpakeke sootheene muniwerya anyu wiira ophentana okhanle mukasamentoni mwanyu, olikaneke nuule oniromoliwa ni eliivuru ya Nsipo Noophentana. Anamathelana, mmuheleke Yehova nipuro noopacerya mukasamentoni mwanyu, nviriheke okathi muri ene hoothe ni muttittimiheke miyoonelo ni soophavela ni ole muthelanne anyu. Akhala wiira munoopaka itthu iya sootheene, nyuwo munoomuttittimiha Yehova yoowo ori Maphattuwelo a ophenta weekeekhai. Nave ntoko siisaale mooro opattihiwe oniprisari awe ikhuni wiira ohittiphe, ophentana wanyu onrowa okhalaka woolipa mahiku wootheene.