1. Mixankiho xeeni atthu akina anikhalana aya?

 NIIREKE mootoko ophavela opaka etthu masi vanoovila-ni omaliherya? b Akhala wiira eyo yootoko owiiraneelani, khamukhanle mekhinyu. Mwa ntakiheryo, Filipe aahikhalana yoolukama ya ovekelaka ikwaha sinceene ni olokiherya enamuna aavekela awe. Masi waaninvila okhalana okathi wiira ovekele. Nave Erika aahikhalana yoolukama ya ohaatarasariki muthukumano wa muteko woolaleerya. Masi hata aarina yoolukama ele, khula okathi owo aanaatarasari. Nave-tho Tomas aahikhalana yoolukama ya omusoma Biibiliya ootheene. Owo onihimya so: “Khiwaakisiwela omusoma Biibiliya. Kaahimananiha ikwaha tthaaru, masi hata vari siiso kaamalela eliivuru ya Onamukuttho kinamuhiya”.

2. Akhala wiira nimphavela opaka etthu masi nihinawerya omaleliha, xeeni nihinreerela ahu okhulumuwa?

² Akhala wiira yookhala etthu mwaaphavela anyu omaleliha masi muhinawerya, xontte muhikhulumuwe. Maana wiira mutthu omaliherye opaka etthu hata ekhalaka yaamukhaani onipirisari okathi ni ikuru. Nto muhiliyale wiira wiimananiha wanyu omaleliha itthu muniphavela anyu onnooniherya wiira munnivaha efaita ompatthani anyu ni Yehova ni muniphavela omuhakalaliha. Nave muhiliyale wiira Yehova onnivaha efaita wiimananiha wanyu. Ekeekhai wiira Yehova khonnivekela opaka etthu nihinwerya ahu. (Esal. 103:14; Mik. 6:8) Akhala wiira muniphavela omaleliha etthu, mukhalaneke ephoole wiira muhithanle etthu muhiniwerya anyu opaka. Nuumala othanla etthu muniphavela  anyu oopaka, exeeni mukhanle anyu oopaka wiira nwerye omaleliha? Nrowe niwehe malakiheryo vakhaani anrowa wookhaliheryani.

3. Xeeni ninreerela ahu okhalana moonelo wooloka? (Nwehe eteseenyo.)

³ Wiira niwerye omaleliha itthu nimphavela ahu mmutthenkesoni mwa Yehova, nihaana okhalana moonelo wooloka. Nto okhalana moonelo wooloka mukhalelo onnikhaliherya omaleliha itthu nimphavela ahu. Hiyo pooti olikanyiha okhalana moonelo wooloka ni epheyo enimpurula paarku wiira oweryeke weetta. Nto akhala wiira epheyo khenimaala, paarku onoophiya opuro onirowa awe. Nave akhala wiira ennoopa epheyo yinceene, paarku onoophiya opuro onirowa awe moowaakuveya. Moolikanasa akhala wiira ninnikhalana moonelo wooloka, nnoowerya omaleliha itthu nimphavela ahu. Munna David onikhala elapo ya El Salvador, onihimya so: “Vaavo munikhalana anyu moonelo wooloka, vannikhweya omaleliha itthu muniphavela anyu opaka. Nave munniimananiha wiira ehikhale etthu enrowa wookhoottiheryani omaleliha itthu muniphavela anyu ophwanya”. Exeeni mukhanle anyu oopaka wiira mukhalane moonelo wooloka?

4. Etthu xeeni ninreerela ahu ovekelaka? (aFilipi 2:13.) (Nwehe eteseenyo.)

⁴ Munvekeleke Yehova wiira mukhalane moonelo wooloka. Yehova onimoovahani munepa awe woowaarya, wiira mukhalane moonelo wooloka yoowo onrowa wookhaliheryani ophwanya itthu muniphavela anyu. (Mmusome aFilipi 2:13.) Ikwaha sikina, hiyo pooti ophavelaka omaleliha etthu emosa nnoona ahu wiira ti yooloka. Masi pooti ohikhalana moonelo wooloka aahiiso ohiphavela omaleliha etthu nimphavela ahu. Eyo ti etthu yaamwiiranenle murokora mmosa oniitthaniwa Norina onikhala wUganda. Norina aahikhalana yoolukama ya wiiriha yoosoma ya Biibiliya, masi okhala wiira khaarina moonelo wooloka yena aixoona wiira khaixuttiha saana. Nto exeeni yaamukhalihenrye? Owo onihimya so: “Khula nihiku kaaninvekela Yehova wiira okikhaliheryeke osiveliwa wiiriha yoosoma ya Biibiliya. Nto nuumala ovekela, kaaniimananiha olokiherya enamuna kiixuttihaka. Nuuvira miyeeri vakhaani, kaahipacerya osiveliwa wiiriha yoosoma ya Biibiliya. Nto mwaakha ene yoole, yaahipacerya wiiriha soosoma sa Biibiliya piili”.

5. Etthu xeeni ninreerela ahu wuupuwelelaka wiira niwerye ophwanya etthu nimphavela ahu?

⁵ Muupuweleleke itthu Yehova oopakenlyaaweni. (Esal. 143:5) Murummwa Paulo aanuupuwelela moota Yehova aamureerenle awe murima nto eyo yaanimwiiriha oluttuweliwa omurumeela Yehova. (1 aKor. 15:9, 10; 1 Tim. 1:12-14) Moolikanasa, akhala wiira munimuupuwelelaka itthu Yehova oopakenlyaaweni, eyo enimookhaliheryakani omaleliha itthu muniphavela anyu. (Esal. 116:12) Nwehe etthu yaamukhalihenrye murokora mmosa onikhala woHonduras omaleliha itthu aaphavela awe ya okhala pioneera ookilaatheya. Owo onihimya so: “Miyo kaanuupuwela moota Yehova onikiphenta awe. Owo ookithanla wiira kiireleke mpantta emusi awe. Nave Yehova onnikikhapelela. Tthiri wuupuwelela itthu iyo saahikikhaliherya wuncererya omphenta waka Yehova ni omaleliha yoophavelaka ya okhala pioneera”.

6. Etthu xeeni ekina enrowa onikhaliherya ohihiya omaleliha ele nimphavela ahu?

 ⁶ Muupuweleke mireerelo munrowa anyu ophwanya. Nwehe etthu emukhalihenrye Erika, nimulavunle ahu ittima sivinre, ohaatrasariki muthukumano wa muteko woolaleerya. Owo onihimya so: “Kaahoona wiira okathi kaatarasari aka, kaanipweteiwa itthu sinceene. Mwa ntakiheryo, nkaawerya waakoha ihaali anna ni arokora ni nkaaviriha okathi munceene kiri ene naawo. Nave nkaawerya wiiwa malakiheryo yaavahiwa okathi wa muthukumano wa muteko woolaleerya”. Etthu yaamukhalihenrye Erika ohaatrasariki yaari wuupuwelela mireerelo aarowa awe ophwanya. Vano, Erika khonaatrasari-tho muthukumano wa muteko woolaleerya. Nto ankhi nyuwo, niireke munnuupuwelela mireerelo munrowa anyu ophwanya akhala wiira munoomaleliha ele muniphavela anyu? Mwa ntakiheryo, akhala wiira etthu muniphavela anyu enihela muhina omusoma Biibiliya aahiiso opaka mavekelo muupuweleleke itthu iyo moota sinrowa aya olipiha waataana wanyu ni Yehova. (Esal. 145:18, 19) Akhala wiira muniphavela wunnuuherya mukhalelo mmosa wa ekristau, muupuweleke moota mukhalelo owo onrowa aya wookhaliheryani waataana ni atthu akina. (aKol. 3:14) Nyuwo pooti opaka elista ya itthu sootheene sooreera sinrowa okhumelela, akhala wiira munoomaleliha itthu muniphavela anyu. Nto nweheke elista eyo khula okathi. Tomas nimulavunle ahu ittima sivinre, onihimya so: “Okathi kinuupuwela aka mireerelo kinrowa aka ophwanya akhala wiira kinoomaleliha itthu kiniphavela aka, eyo ennikiiriha wiimananiha vanceene wiira kiphwanye ele kiniphavelaka”.

7. Exeeni yaamukhalihenrye Julio ni amwaarawe ophwanya etthu yaaphavela aya?

⁷ Nviriheke okathi muri ene ni atthu anootumereryani omaleliha ele muniphavela anyu. (Mir. 13:20) Julio vamosa ni mwaarawe yaaphavela wuncererya muteko aya woolaleerya. Nrowe niwehe ele yaakhalihenrye owerya opaka eyo. Julio onihimya so: “Hiyo nanaaphavela apatthani yaanikhaliherya omaleliha ele naaphavela ahu ni naarowa ahu ovaanelanaka voohimya sa mwaha owo. Anamunceene a yaawo yaahiphwanya itthu ntoko iye naaphavela ahu, nto yaahinivaha miruku sooloka. Nave apatthani ahu ale yaaniphavela osuwela moota apalano ahu yaari aya ni yaaninlipiha khula okathi”.

8. Exeeni enrowa wiiraneya akhala wiira ninlipelela okhalana ikuru sinceene wiira nimalelihe itthu nimphavela ahu? (Nwehe eteseenyo.)

⁸ Ekeekhai wiira aakhala mahiku ninkhulumuwa ahu. Masi niireke eyo pooti oniiriha ohiwerya ophwanya itthu nimphavela ahu? Nnaari. Nrowe ntthikele wuupuwelela ntakiheryo nenle na paarku. Etthu yuulupale enimukhaliherya paarku ophiya opuro onrowa awe: epheyo. Masi ikwaha sikina pooti oturukeyaka aahiiso pooti ohoopaka. Nto akhala wiira itthu iyo sinimwiiraneya, niireke paarku khoneetta-tho? Nnaari, owo khonihiya weetta. Mwa ntakiheryo, apaarku akina aakhalana mutooro nave akina aakhalana ereemu aahiiso epontto enimukhaliherya paarku ophiya opuro onirowa awe. Ntoko siisaale epheyo eniturukeya aya, moonelo ahu pooti oturukeyaka. Vakhala wiira munilipelela okhalana ikuru sinceene wiira nwerye omaleliha etthu muniphavela anyu, pooti ohiwerya-tho omaleliha. Ntoko siisaale paarku ohimpirisari awe epheyo  paahi wiira ophiye opuro onirowa awe, hiyo nave nnoowerya ophwanya itthu nimphavela ahu hata nihirina ikuru sinceene. Ekeekhai wiira ikwaha sikina pooti ohikhweyaka, masi nnoowerya. Nrowe niwehe nikoho ninkhumelela ni etthu ninreerela ahu opaka.

9. Niireke vannireerela wiimananiha omaleliha etthu nimphavela ahu hata nihirina ikuru? Mutthokiherye.

⁹ Yehova oniphavela wiira nimurumeeleke moohakalala ohiya mwaha wookhanyereriwa. (Esal. 100:2; 2 aKor. 9:7) Akhala wiira khamurina ikuru wiira mmalelihe etthu muniphavela anyu, niireke muhaana wiimananiha? Niwehe ntakiheryo na murummwa Paulo. Owo aahimmye so: “Kinnihaaxa erutthu aka ni kinneettiha ntoko epottha”. (1 aKor. 9:25-27, enoota eri eversiikulu 27.) Paulo aaniikhanyereriha opaka etthu yooloka hata ahaarina ikuru wiira opake eyo. Nto Yehova oonela sai itthu Paulo aapaka awe? Owo aanihakalala ni muteko wa Paulo! Nave Yehova aahimutthuvela Paulo mwaha wa wiimananiha wawe. — 2 Tim. 4:7, 8.

10. Xeeni vari aya vooloka wiimananiha wiira nimalelihe etthu nimphavela ahu hata nihirina ikuru?

¹⁰ Yehova onnihakalala aaniwehaka niimananihaka wiira nimalelihe etthu nimphavela ahu, hata nihirina ikuru sinceene. Owo onnihakalala maana onnisuwela wiira wiimananiha wahu khahiyo mwaha woophenta etthu nimpaka ahu, masi mwaha womphenta yena. Ntoko siisaale aamureelinhe awe Paulo, nikupaliki wiira nave Yehova onooreeliha wiimananiha wahu. (Esal. 126:5) Nto vaavo nnoona ahu wiira Yehova onnireeliha wiimananiha wahu ninniphwanya ikuru sinceene. Murokora mmosa a oPolonia, oniitthaniwa Lucyna ohimmye so: “Ikwaha sikina khonikisivela orowa olaleerya, otepexa wene okathi kinikhulumuwaka. Masi ohakalala kiniphwanyaaka nuumala olaleerya tthiri mareeliho a Yehova”. Vano, nrowe niwehe etthu nikhanle ahu oopaka wiira niwerye omaleliha itthu nimphavela ahu.

11. Nihaana opaka exeeni wiira nikhale atthu oowiihiiha?

¹¹ Munvekeleke Yehova wiira ookhaliheryeni okhala oowiihiiha. Wiihiiha mukhalelo onnikhaliherya ovarerya miyuupuwelo sahu ni miteko sahu. Okhala wene mukhalelo ola onninikhaliherya wiira nihipake etthu yoohiloka. Nave-tho wiihiiha onninikhaliherya wiira nipake itthu sooloka, otepexa wene akhala wiira etthu eyo ti yooxankiha aahiiso khinrina ikuru woopaka. Muhiliyale wiira wiihiiha oniirela mpantta mikhalelo sinikumiheriwa ni munepa woowaarya. Nto munvekeleke Yehova munepa woowaarya wiira munnuuherye mukhalelo owo wa faita. (Luka 11:13; aGal. 5:22, 23) Davidi yoowo nimulavunle ahu ittima sivinre, ikwaha sinceene khaawerya opaka yoosoma awe ya omwaneene. Owo onnitthokiherya moota nivekelo naamukhalihenrye aya, oriki: “Khula okathi kaaninvekela Yehova wiira okikhaliherye okhala mutthu oowiihiiha. Nto kikhaliheriwaka ni yena, kaahiwerya opaka eprokrama aka ya omusoma Biibiliya ni kaanimaleliha”.

12. Musuweli 11:4, onnikhaliherya sai omaleliha itthu nimphavela ahu?

¹² Nihilipeleleke wiira nikhalane okathi wooreerexa. Elapo ela ninkhala ahu khivanireerela olipelela itthu ookhala saana wiira nipake ele nimphavela ahu. Akhala wiira nnoolipelela okathi wooreerexa, woonasa wene khaninkhala-khala nimalelihaka etthu nimphavela ahu. (Mmusome Musuweli 11:4.) Munna mmosa oniitthaniwa Daniyeli onihimya so: “Okathi wooreerexa khokhanle, masi nnoowerya ophwanya okathi wooreerexa nuumala opacerya opaka ele nimphavela ahu”. Munna mmosa a elapo ya Uganda yoowo oniitthaniwa Paulo, onnihimya nthowa naya vahinreerela aya ohiyereryaka miteko sahu. Owo onihimya so: “Vaavo nimmaleliha ahu itthu nlakenle ahu hata nirina ene mixankiho, Yehova onninikhaliherya”. — Mal. 3:10.

13. Wiira nimalelihe ele nimphavela ahu, xeeni vari aya vooloka opaceryaka vakhaani-vakhaani?

¹³ Mpaceryeke vakhaani-vakhaani. Ikwaha sikina nyuwo pooti ohikhalanaka ikuru woomaleliha etthu muniphavela anyu otepexa wene vakhala wiira ti yooxankiha. Akhala wiira eyo enimwiiraneya, munoonela sai opaceryaka vakhaani-vakhaani mpakha omaleliha? Nave mwaaphavelaka wunnuuherya mukhalelo mmosa wa ekristau, munoonela sai wooniheryaka vakhaani-vakhaani mukhalelo owo khula nihiku? Aahiiso akhala wiira  muniphavela omusoma Biibiliya ootheene, munoonela sai opacerya omusomaka minuutu vakhaani khula nihiku? Tomas yoowo nimulavunle ahu ittima sivinre, khaawerya omaleliha yoophavela awe ya omusoma Biibiliya ootheene mwaakha mmosa paahi. Owo onihimya so: “Nkaawerya omaleliha yoophavela aka okhala wiira kaamananiha osoma itthu sinceene okathi omosaru. Nto kaahilakela opaka eprokrama ekina yoomusoma Biibiliya. Masi ekwaha ela kaasoma iversiikulu vakhaani khula nihiku ni wuupuwelela ele kaasoma aka. Nuumala-vo, kaahipacerya osiveliwa omusoma Biibiliya”. Okhala wiira Tomas aahiixutta osiveliwa omusoma Biibiliya, owo aahiviriha okathi munceene omusomaka. Voohakalaliha Tomas aahiwerya ommaliha omusoma Biibiliya ootheene. c

14. Mixankiho xeeni sikhanle ooniiriha ohiwerya ophwanya etthu nimphavela ahu?

¹⁴ Mooriipiha murima, hata nirina ene ikuru aahiiso niilokihenrye ene wiira niphwanye etthu nimphavela ahu, ikwaha sikina pooti oniphwanyaka mixankiho. Mwa ntakiheryo, okhala wiira ‘oreeriwa ni otakhaliwa khonimuthanla mutthu’, ikwaha sikina pooti ohiweryaka ophwanya ele naaphavela ahu. (Mus. 9:11) Aahiiso mixankiho pooti onikhulumula ni oniriipiha murima. (Mir. 24:10) Nave mwaha wookhala atthu oottheka, hiyo pooti opakaka etampi enrowa oniiriha ohiwerya ophwanya etthu nimphavela ahu. (aRom. 7:23) Aahiiso ikwaha sikina pooti hiyo ohikhalanaka ikuru. (Math. 26:43) Nto exeeni enrowa onikhaliherya oxintta mixankiho iyo?

15. Xeeni nihinreerela ahu ohiya mixankiho sinikhulumulaka? Mutthokiherye. (Esalimo 145:14.)

¹⁵ Muhihiye mixankiho sookhulumulakani. Biibiliya onnooniherya wiira hata siniphwanyaka mixankiho ikwaha sinceene, hiyo nnoowerya oxintta. Tthiri nnoowerya nikhaliheriwaka ni Yehova. (Musome Esalimo 145:14.) Filipe yoowo nimulavunle ahu ittima sivinre, onihimya so: “Wiira kimalelihe etthu kiniphavela aka, nkiniwehexexa ikwaha kavi sitonko aya okiphwanya mixankiho. Ohiya-vo, etthu enikikhaliherya ori wuupuwelela ikwaha kiwenrya aka oxintta mixankiho iyo”. Nave Davidi nimulavunle  ahu ittima sivinre onihimya so: “Nkineemererya mixankiho sikikhoottiheryaka omaleliha ele kiniphavela aka. Masi kinnirumeela okathi owo wiira kooniherye omphenta waka Yehova”. Nto vaavo nihinhiya ahu omaleliha etthu nimphavela ahu hata siniphwanyaka mixankiho, ninnooniherya wiira nimphavela omuhakalaliha Yehova. Tthiri mukupaliki wiira Yehova onnihakalala vanceene, vaavo onoowehaaweni mwiimananihaka wiira mmalelihe ele muniphavela anyu!

16. Ikwaha sikina mixankiho pooti oniixuttiha exeeni?

¹⁶ Mwiixutteke etthu okathi mixankiho sinikhumelela aya. Mwiikoheke so: ‘Exeeni yiirinhe okhumelela muxankiho ola? Exeeni kikhanle aka oopaka wiira muxankiho ola ohikhumelele-tho? (Mir. 27:12) Ikwaha sikina, muxankiho pooti oniixuttiha wiira etthu nimphavela ahu omaleliha khaninrowa owerya. Akhala wiira eyo enoowiiraneelani, mutthikele wuupuwela saana voohimya sa ele muniphavela anyu ni moone akhala wiira nyuwo tthiri munoowerya. d Nto moona wiira khamuniwerya omaleliha etthu muniphavela anyu, muhuupuweleke wiira Yehova oniwoonani ntoko mutthu oolosowa. — 2 aKor. 8:12.

17. Xeeni vari aya vooloka wuupuwela itthu nwenrye anyu opaka?

¹⁷ Muupuweleke itthu nwenrye anyu opaka. Biibiliya onihimya so: “Muluku naxariya, owo khonrowa oliyala muteko anyu”. (aHeb. 6:10) Nto mmutakihaka Yehova muhiliyaleke itthu nwenrye anyu opaka. Mwa ntakiheryo, mookhalana waataana wooloka ni Yehova, munnaaleela atthu akina voohimya sa yena ni moowerya opatisiwa. Akhala wiira moowerya omaleliha itthu mwaaphavela anyu mmutthenkesoni mwa Yehova khalai, nto mukupaliki wiira munoowerya omaleliha iye muniphavela anyu nenna-va. — aFil. 3:16.

18. Exeeni ninreerela ahu opaka okathi nniimananiha ahu omaleliha itthu nimphavela ahu? (Nwehe eteseenyo.)

¹⁸ Nikhaliheriwaka ni Yehova, nnoowerya omaleliha itthu nimphavela ahu. Ntoko siisaale mutthu oneetta mukwaha ni paarku onihakalala awe nuumala ophiya onirowa awe, ni hiyo nnootteeliwa murima nuumala omaleliha etthu nimphavela ahu. Nto okathi muneetta anyu mukwaha owo, muhiliyaleke ottottela muraarelo. Eyo entaphulela wiira okathi munimananiha anyu omaleliha ele muniphavela anyu, muhakalaleke oweha moota Yehova onookhaliheryaaweni ni moota onireeliha awe wiimananiha wanyu. (2 aKor. 4:7) Nto mukupaliki wiira mwaahikhulumuwe, munimwaakhela-tho mareeliho manceene. — aGal. 6:9.