1. Moolumo xeeni Yehova aamulenle awe Abrahamu?

 ORUMEELAKA nlaikha, Yehova aahivaanela ni Abrahamu omuleelaka wiira ampwetexa ipooma sa oSodoma ni oGomora. Nto Abrahamu khaaliyala ovaanela iwe. Abrahamu aahixanka vanceene, nto owo aahimukoha Yehova ohimyaka so: “Ekhweli wira munrowa owiva atthu òrera murima vamosá n’ale òtakhala? . . . Nyuwo munlamula elapo yothene, khamunrowa wettela exariya?” Moopixa murima, Yehova aahimuleela mpatthani awe ole, moolumo yaawo annilipiha ni anniixuttiha etthu ootheene ahu. Moolumo ene taala: Muluku khonkhala-khala aapwetexaka anaxariya. — Maph. 18:23-33.

2. Ninsuwela sai wiira Yehova oniphuka mwa enamuna ya exariya ni moomoriwa ikharari?

² Ninrowa okupali sai wiira okathi Yehova onaaphukela awe atthu, owo onipaka eyo mwa enamuna ya xariya ni moomoriwa ikharari? Hiyo noosuwela wiira “Yehova oniweha murima” wa khula mutthu. (1 Sam. 16:7) Moohaanyiherya, owo paahi tonisuwela “mirima sa atthu ootheene”. (1 Mam. 8:39; 1 Wah. 28:9) Tthiri eyo etthu yoovara murima. Enamuna Yehova onaaphukela awe atthu, ti yoovirikana ni enamuna nnuupuwela ahu. Murummwa Paulo ottittimiheryaka mikhalelo sa Yehova Muluku, owo aalempe so: “Khuuvo oniwerya osuwelexa ophukela wawe, nave khuuvo oniwerya osuwela iphiro sawe!” — aRom. 11:33.

3-4. a) Makoho xeeni woonasa wene ninreerela ahu wiikoha? (Yohani 5:28, 29) b) Mwaha ola ninrowa othokorerya exeeni?

³ Hata vari siiso, ikwaha sikina hiyo pooti okhalanaka makoho ntoko Abrahamu aarina awe. Hiyo pooti wiikoha so: ‘Niireke nookhala nlipelelo na atthu ale apwetexiwe a oSodoma ni oGomora? Niireke akina a yaawo anihela muhina ale “Muluku onrowa [awe] waahihimuxa . . . ahikhanle anaxariya”?’ — Mit. 24:15.

 ⁴ Vano, nrowe nithokorerye ele enisuwela ahu voohimya sa ohihimuxiwa. Okathi vakhaani ovinre, nihiiwexexa otthokiheriwa wa niinaano, voohimya sa ohihimuxiwa wa atthu anrowa ‘waakhela okumi woohimala ni ale anrowa ophukeliwa’. a (Mmusome Yohani 5:28, 29.) Wiiwexexa nno wa niinaano, woonikhaliherya opaka marukunuxo masya. Nto marukunuxo awo nnoothokorerya mwaha ola ni mwaha onittharelana. Moovarihana ni ophukela wa xariya wa Yehova, wanipacerya ninrowa othokorerya etthu nihinsuwela ahu nuumala-vo, nnoothokorerya etthu ninsuwela ahu.

ETTHU NIHINSUWELA AHU

5. Khalai nuupuwela exeeni voohimya sa atthu Yehova aapwetenxa awe oSodoma ni oGomora?

⁵ Khalai, iliivuru sahu saanitthokiherya etthu Yehova aarowa awe owiiriha ale onaathokorerya awe okhala oohixariya. Nave nuupuwela wiira atthu yaapwetexiwe oSodoma ni oGomora, khiyaarina nlipelelo na ohihimuxiwa. Masi nuumala otokosa vanceene ni opaka mavekelo voohimya sa mwaha owo, nihiixutta wiira khanikhanle ohimya wiira eyo ekeekhai aahiiso nnaari. Mwaha wa xeeni?

6. a) Nvahe matakiheryo a ikurupu tthaaru sa atthu oohixariya Yehova aapwetenxe awe. b) Exeeni nihinsuwela ahu?

⁶ Sookhala itthu sinceene ninreerela ahu osuwela. Mwa ntakiheryo, nkuupuwelani ikurupu tthaaru sa atthu Yehova aapwetenxe awe yahaakhanle anaxariya. Ekhurupu yoopacerya, atthu yaale yaakhwiiye ni Epula ya Mutaaseke, ya nenli maloko 7 yaakhala Elapo Yooleiheriwa Yehova aarumihale awe wiiviwa ni ekhurupu ya neeraru, atthu 185.000 a wAsiiria yaiviwe ni nlaikha nimosa na Yehova. (Maph. 7:23; Otum. 7:1-3; Yes. 37:36, 37) Niireke Biibiliya onnihimya akhala wiira Yehova oohaapwetexa atthu ale moomalela, aahiiso onoorowa waahihimuxa muhoolo? Khanisuwenle. Exeeni enniiriha ohimya siiso?

7. Exeeni nihinsuwela ahu voohimya sa atthu yaapwetexiwe okathi wa Epula ya Mutaaseke vamosa ni atthu yaakhala elapo ya oKanaani? (Nwehe ya vakaapani.)

⁷ Matakiheryo niwenhe ahu ettima evinre, khaninsuwela moota Yehova amphukenle awe khula mmosa a atthu awo. Nave khaninsuwela akhala wiira yaahikhalana eparakha ya wiixutta voohimya sa Yehova ni oottharuwa. Yoowiiraneya ya mbiibiliyani enihimya sa okathi wa Epula ya Mutaaseke, ennooniherya wiira Nowe aari mutthu “aalaleya exariya”. (2 Ped. 2:5) Masi Biibiliya, khonihimya akhala wiira Nowe okathi ole aateka awe ekalawa, aanirowa omulaleerya khula mutthu aakhala muttetthe ole. Eyo enoolikana ni maloko yaakhala oKanaani. Maana khaninsuwela vakhala wiira yaahikhalana eparakha ya wiixutta voohimya sa Yehova ni oottharuwa soottheka saya.

8. Exeeni nihinsuwela ahu voohimya sa atthu a oSodoma ni oGomora?

⁸ Ankhi voohimya sa atthu ale yaakhala oSodoma ni oGomora? Lothi, mulopwana axariya aakhala eriyari ya atthu awo. Masi niireke Lothi aahiwerya waalaleerya atthu ootheene yaakhala muttetthe ole? Nnaari. Moohaanyiherya, atthu awo yaari otepa otakhala, masi hata vari siiso, niireke atthu awo yaanisuwela etthu yooloka ni yoohiloka? Vanikhala wiira nnaari, maana akina a yaawo yaahiimananiha waatuphela aletto a Lothi. Biibiliya onihimya wiira atthu awo yaahela muhina “okhuma amiravo mpakha òkiserya wuluvala”. (Maph. 19:4; 2 Ped. 2:7) Niireke nihaana ohimya wiira Muluku ahu oomoriwa ikharari Yehova, oolakela wiira khonrowa omuhihimuxa nnakhala mmosa wa atthu ale? Khanikhanle oohimya eyo. Yehova aahimuleela Abrahamu wiira epooma ele khiyaakhanle nnakhala atthu muloko yaari axariya. (Maph. 18:32) Atthu awo khahiyo yaari axariya, nto Yehova ahikhalana ehakhi ya waapwetexa mwaha wa miteko saya. Niireke nihaana ohimya wiira khuuvo onrowa ohihimuxiwa okathi anrowa aya ‘okhuma mmahiye . . . ale  avanre miteko sootakhala’? Nnaari, khanikhanle oohimya eyo!

9. Exeeni nihinsuwela ahu voohimya sa Salomoni?

⁹ Biibiliya, onnaaromola atthu yaari axariya masi nuumala-vo, ahiya okhala axariya. Mmosa a yaawo aari mwene Salomoni. Owo aanimusuwela oratteene Yehova nave aanisuwela enamuna yooloka ya omukokhorela, mwaha waivaavo Yehova aahimureeliha. Masi muhoolo mwaya Salomoni aahipacerya waakokhorela amuluku eethiru. Yehova aahinanariwa vanceene, nave itthu Salomoni aapanke awe saahaakumiherya mixankiho atthu anceene mwa iyaakha sinceene. Masi Biibiliya onihimya wiira, “Salomoni aahirowa omumula ni amuhavinre awe”, opuro yoowo yaavithiwe aya atthu oowaamini ntoko Mwene Davidi. (1 Mam. 11:5-9, 43; 2 Mam. 23:13) Niireke mwaha woovithiwa opuro ole, eyo entaphulela wiira Salomoni onoorowa ohihimuxiwa? Biibiliya khonihimya akhala wiira onoohihimuxiwa aahiiso nnaari. Masi atthu akina pooti ohimya wiira Salomoni onoohihimuxiwa, maana Biibiliya onihimya wiira “ole okhwiiye ooleveleliwa itampi sawe”. (aRom. 6:7) Eyo ekeekhai, masi khahiyo wiira atthu ootheene akhwiiye anoorowa ohihimuxiwa. Nave eyo khentaphulela wiira mwaha wa mutthu owo okhwa ookhalana etireitu ya ohihimuxiwa. Masi ohihimuxiwa yoovaha ya Muluku ahu oophenta, Yehova. Owo onnaavaha eparakha eyo, atthu yaale aniphavela wiira amurumeeleke mahiku ootheene. (Yoob. 14:13, 14; Yoh. 6:44) Niireke Salomoni onimwaakhela eparakha eyo ya ohihimuxiwa? Yehova paahi tonisuwela waakhuliwa wa nikoho nlo. Etthu enisuwela ahu, ti yoowi Yehova khula okathi onipaka itthu mwa xariya.

ETTHU NINSUWELA AHU

10. Niireke Yehova vannimusivela waaphukela atthu wiira akhwe? (Ezekiyeli 33:11) (Nwehe eteseenyo.)

¹⁰ Mmusome Ezekiyeli 33:11. Yehova onninleela moota onoonela awe okathi onaaphukela awe atthu. Murummwa Pedru aahirummwa olepa moolumo mamosa-ru profeta Ezekiyeli aarummwale awe olepa, ohimyaka so: “Yehova . . . khoniphavela wira mutthu opwetexiwe, nnakhala mmosa”. (2 Ped. 3:9) Tthiri moolumo ala toolipiha. Hiyo noosuwela wiira Yehova khokhanle ompwetexa nnakhala mutthu mmosa ahikhanle mathowa animwiiriha opaka eyo. Owo Muluku oomoriwa ikharari vanceene, nave onniwooniherya omoriwa wawe ikharari ale anipirisari.

11. Tani ahinrowa ohihimuxiwa, nave ninsuwela sai eyo?

¹¹ Exeeni ninsuwela ahu voohimya sa atthu ahinrowa ohihimuxiwa? Mbiibiliyani aakhala matakiheryo vakhaani. b Mwa ntakiheryo, Yesu aahihimya wiira Yuda Isikaryoti khaarowa ohihimuxiwa. (Mar. 14:21; munwehe-tho Yoh. 17:12.) Yuda Isikaryoti aanisuwela oratteene wiira aahimutthekela Yehova vamosa ni Mwanawe, Yesu Kristu. (Munwehe-tho Mar. 3:29.) Nave, Yesu aahihimya wiira ahooleli a itiini khiyaarowa okhalana nlipelelo na ohihimuxiwa. (Math. 23:33; munwehe-tho Yoh. 19:11.) Nave-tho, murummwa Paulo aahaalopola anamavirikanya wiira yaahittharuwe khiyaarowa ohihimuxiwa. — aHeeb. 6:4-8; 10:29.

12. Exeeni ninsuwela ahu voohimya sa omoriwa ikharari wa Yehova? Nvahe matakiheryo.

¹² Enamuna xeeni ekina ninsuwela ahu voohimya sa omoriwa ikharari wa Yehova? Yehova oonihenrye sai wiira “khoniphavela wira mutthu opwetexiwe, nnakhala mmosa”? Nrowe nthokorerye moota Yehova aamorenle awe ikharari atthu akina yaapanke itampi suulupale. Mwa ntakiheryo, Mwene Davidi, aahiraruwa ni aahiiva. Okhala wiira Davidi aahittharuwa, Yehova aahimmorela ikharari ni aahimulevelela. (2 Sam. 12:1-13) Mwa okathi munceene, mwene Manase aahipaka itthu soohiloka mookumini mwawe. Masi hata vari siiso, Yehova aahiweha wiira Manase aahittharuwa ni aahimulevelela. (2 Wah.  33:9-16) Matakiheryo ala, annooniherya wiira Yehova onnaamorela ikharari atthu awe ni mathowa ooloka animwiiriha opaka eyo. Nave Yehova onimwaahihimuxa atthu hata apanke ene itampi suulupale masi attharunwe itampi saya.

13. a) Xeeni Yehova aamorenle awe ikharari atthu a oNiinive? b) Olavulaka sa atthu a oNiinive, exeeni Yesu aahimmye awe?

¹³ Nave hiyo noosuwela wiira Yehova aahaamorela ikharari atthu yaakhala oNiinive. Yehova aahimuleela Yona wiira: “Tthiri otakhala waya murima ti wulupale. Miyo kosuwela orattene”. Masi okathi awo yaattharunwe aya itampi saya, Yehova aahaalevelela mooreerela murima. Yehova aahaamorela ikharari aNiinive onvikana Yona. Profeta Yona khaareere onanariwa, ti maana aya Yehova aamuupuxenrya awe ohimyaka wiira atthu ale a oNiinive ‘khiyaasuwela tuuvi waari moono woolopwana ni moono woothiyana’. (Yona 1:1, 2; 3:10; 4:9-11) Muhoolo mwaya, Yesu aahirumeela ntakiheryo nne ophavelaka wiixuttiha exariya ni omoriwa ikharari wa Yehova. Yesu aahimmye wiira atthu a oNiinive yaarukununxe mirima saya, anoohihimuwa “nihiku noophukela”. — Math. 12:41.

14. Mwa enamuna xeeni aNiinive anrowa aya oohihimuxiwa wiira ‘aphukeliwe’?

¹⁴ Nihiku xeeni na ‘ophukela’ atthu a oNiinive yaarowa aya ‘ohihimuwa’? Yesu aahimmye wiira muhoolo onookhala ohihimuxiwa wa atthu akhwiiye wiira ‘aphukeliwe ni olamuliwa’. (Yoh. 5:29) Owo aahimya okathi wa Olamulelo awe wa Iyaakha Ekonto Emosa, okathi yoowo anrowa aya ohihimuxiwa “anaxariya ni ale ahikhanle anaxariya”. (Mit. 24:15) Nto ale ahikhanle anaxariya anrowa ohihimuxiwa wiira ‘aphukeliwe’. Eyo entaphulela wiira Yehova ni Yesu tanrowa waavarerya wiira asuwela akhala wiira anniiwelela ni annivarihela muteko ele yiixuttihiwa aya. Nto akhala mutthu a oNiinive onrowa ohihimuxiwa ni okhootta omukokhorela Yehova mwa enamuna yooloka ntoko yena oniphavela awe, nihiku nno na ophukela, Yehova khonrowa weemererya wiira ovikaniheke okhala. (Yes. 65:20) Nto ootheene ale anrowa othanla omukokhorelaka Yehova moororomeleya, nihiku nno na ophukela, awo anookhalana eparakha ya wakhela okumi woohimala! — Dan. 12:2.

15. a) Xeeni nihinreerela ahu ohimya wiira ale apwetexiwe oSodoma ni oGomora khanrowa ohihimuxiwa? b) Nniiwexexa sai moolumo ari Yuda eversiikulu 7? (Nwehe ekaaxa eni: “ Anitaphulela Exeeni Moolumo a Yuda?”)

¹⁵ Okathi Yesu aalavunle awe sa atthu a oSodoma ni oGomora, owo aahimmye wiira “Nihiku Noophukela”, khinaarowa okhala nihiku nooxankiha wa atthu awo ovikana ale yaamukhoottale  yena ni ele aixuttiha awe. (Math. 10:14, 15; 11:23, 24; Luka 10:12) Eyo entaphulela exeeni? Atthu akina, pooti wuupuwelaka wiira okathi ole Yesu aalavula mwa enamuna yootepiha. Masi eyo khahiyo yaari yoolakela ya Yesu. Mwa enamuna emosa-ru, okathi aalavula awe sa atthu oNiinive, khahiyo aalavula mwa enamuna yootepiha. c Nave etthu emosa-ru, okathi aalavula awe sa atthu a oSodoma ni oGomora owo khahiyo aalavula mootepiha. Eyo entaphulela wiira ‘Nihiku na Ophukela’ wa atthu a oSodoma ni oGomora vamosa ni atthu a oNiinive khovirikanne. Moolikanasa ni atthu a oNiinive, atthu a oSodoma ni oGomora yaahipaka itampi suulupale. Masi atthu a oNiinive, yaahikhalana eparakha ya wooniherya wiira aattharuwa itampi saya. Muhiliyale ele Yesu aahimmye awe sa ohihimuxiwa atthu wiira ‘aphukeliwe’, onihela muhina “ale avanre miteko sootakhala”. (Yoh. 5:29) Waanyiheryasa, nookhala nlipelelo na ohihimuxiwa wa atthu a oSodoma ni oGomora. Woonasa wene, atthu akina pooti ohihimuxiwa wiira nikhalane eparakha ya owiixuttiha voohimya sa Yehova ni Yesu Kristu!

16. Yehova onrowa waathanla sai ale anrowa awe waahihimuxa? (Yeremiya 17:10)

¹⁶ Mmusome Yeremiya 17:10. Eversiikulu ela, enninikhaliherya wiiwexexa etthu ninsuwela ahu. Etthu ene tiila: Yehova ‘onnitokosa mirima sa atthu, onnisuwela sinuupuwela aya’. Okathi Yehova onrowa awe waahihimuxa muhoolo ale akhwiiye, owo onoomutthuvela khula mutthu, moovarihana ni “miteko sivanryawe”. Okathi owo Yehova Khonrowa ohiya okhala oomoriwa ikharari. Hiyo khanikhanle ohimya wiira mutthu khorina nlipelelo na ohihimuxiwa, vahikhanle wiira Biibiliya tonihimya eyo!

‘NAMALAMULELA A ELAPO YOOTHEENE ONIMWEETELA EXARIYA’

17. Exeeni enrowa wiiraneya muhoolo ni atthu ale akhwiiye?

¹⁷ Atthu imilyau sinceene annookhwa, okhuma okathi yoole Adamu ni Eva vamosa ni Satana amutthekenle aya Yehova. Okhwa, ori “nwanani” ahu muulupale, onaapwetexa atthu anceene! (1 aKor. 15:26) Nto exeeni enrowa owiiraneela  atthu ootheene? Ekurupu yaamukhaani ya atthu 144.000, yaawo animutthara Kristu moororomeleya, anoohihimuxiwa wiira yaakhele okumi ohinikhwa wiirimu. (Wiis. 14:1) Nave atthu imilyau sinceene alopwana ni athiyana yamphenta Yehova, anoorowa otthikela okhala akumi okathi Yehova onrowa awe “waahihimuxa . . . anaxariya”. Nave animwaakhela okumi woohimala valaponi, akhala wiira khanihiya okhala oororomeleya okathi wa olamulelo wa Kristu wa Iyaakha Ekonto Emosa ni okathi wa yooweeha yookiserya. (Dan. 12:13; aHeeb. 12:1) Nave okathi owo wa olamulelo wa Kristu wa Iyaakha Ekonto Emosa, “ale ahikhanle anaxariya” waahela muhina ale ahitonko omurumeela Yehova aahiiso “ale avanre miteko sootakhala”, anookhalana eparakha ya oturuka mweettelo aya ni okhala oororomeleya wa Yehova. (Luka 23:42, 43) Moovirikana ni vo, atthu akina ootakhala murima aahiiso yahaaphavenle omwiiwelela, owo oolakela ohaahihimuxa. — Luka 12:4, 5.

18-19. a) Exeeni ninreerela ahu okupali voohimya sa moota Yehova onrowa awe waaphukela atthu ale akhwiiye? (Yesaya 55:8, 9) b) Exeeni enrowa ahu othokorerya mwaha onittharelana?

¹⁸ Niireke nihaana okupali wiira okathi Yehova onaaphukela awe atthu ootheene, owo onnipaka eyo mwa enamuna yooloka? Aayo! Ntoko Abrahamu aasuwela awe, Yehova Muluku toohittheka, tankhili, toomoriwa ikharari ni ‘Mulamuli a elapo yootheene’. Owo oomwiixuttiha Yesu ni onvaha muritti wa waaphukela atthu ootheene. (Yoh. 5:22) Yehova ni Yesu, annimusuwela khula pinaatamu, etthu enuupuwela awe aahiiso moonelo awe. (Math. 9:4) Vaavo animphukela aya mutthu, khula okathi awo ‘anneettela exariya’!

¹⁹ Muroromeleke wiira khula okathi Yehova onoopakaka soothanla sooloka. Ntoko apinaatamu, hiyo khaninwerya waaphukela atthu akina masi Yehova onniwerya! (Mmusome Yesaya 55:8, 9.) Nto moororomeleya, nimphavela wiira nimuhiyerye ophukela wootheene Yehova ni Mwanawe, Yesu, yoowo onitakiha moomalela exariya ni omoriwa ikharari wa Tiithi awe. (Yes. 11:3, 4) Masi exeeni nikhanle ahu oohimya sa ophukela Yehova onrowa awe okumiherya okathi wa maxakha maalupale? Etthu xeeni nihinsuwela ahu? Ni etthu xeeni ninsuwela ahu? Mwaha onittharelana nnoothokorerya waakhuliwa wa makoho ala.