1-3. Onitaphulela exeeni omurumeela Yehova ni “murima” wotheene? Nvahe ntakiheryo.

OTHEENE ahu naalipa-oottheka ni ninnivonya. Nto ninnimuxukhurela Yehova, okhala wira oonivaha yowoopola ni onniphavela onilevelela. Tivonto, akhala wira ninniiyeviha ni ottharuwa nnoowerya onvekela wira onlevelele. Nave nikupaliki wira Yehova khonniirela sotakhala “mwaha wa itampi sahu”. (Esalimo 103:10) Hata vari siiso, nihaana ‘omurumela ni murima worera’, niire so, ni murima wotheene. (1 Wahala 28:9) Ninrowa omurumeela sai Yehova ni murima wotheene, nryeene alipa-oottheka?

² Etthu enrowa onikhaliherya tiila: nihaana oweha itthu saamwiiranenle Mwene Asa ni Mwene Amasiya. Maana mamwene ala yaahipaka itthu sooloka, nnaamwi yaavonya mwaha wookhala alipa-oottheka. Masi Biibiliya onihimya so: “Murima wa mwené Asa wahasiveliha Apwiya mahiku othene èkumi awe”. (2 Wahala 15:16, 17; 25:1, 2; Miruku 17:3) Okathi wotheene owo aaheererya omusiveliha Yehova ni “murima”  wotheene. (1 Wahala 28:9) Nave, Amasiya khaamurumenle Yehova ni “murima” wotheene. Nuumala waaxintta awanani a Muluku, Amasiya aahaakuxa amuluku aya onapacerya waakokhorela.​—2 Wahala 25:11-16.

³ Mutthu yoole onimurumeela Muluku ni “murima” wotheene, onnimphenta vanceene Yehova ni onniphavela omukokhorela mahiku otheene. MBiibiliyani, nuulumo noowi “murima”, ikwaha sinceene nintaphulela omutthu ahu. Eyo enihela muhina muupuwelo ahu, ele eniphenta ahu, ele ennisivela opaka, ni etthu enniiriha ovara ele enipaka ahu. Hata nryeene atthu oottheka, nnoowerya omukokhorela Yehova ni murima wotheene. Hiyo nimmurumeela Muluku mwaha woophenta, ohiya mwaha wookhanyereriwa nnakhala okhala yoolema ahu.​—2 Wahala 19:9.

4. Exeeni ninrowa ahu othokorerya vano?

⁴ Wira nisuwele ele enitaphulela aya omurumeela Muluku ni murima wotheene, nrowe nthokorerye yowiiraneya ya mwene Asa ni mamwene makina mararu a oYuda. Mamwene awo taala: Yosafati, Ezekiya ni Yosiya. Nnaamwi mamwene ala maxexe yaarina soovonya saya, awo yaanimusiveliha Yehova. Nto Yehova aahoona wira yaanimurumeela ni murima wotheene. Xeeni Muluku aawoonela awe siiso, ni ninrowa waatakiha sai?

5. Exeeni Asa aapanke awe nuumala okhala mwene?

⁵ Asa aari mwene a neeraru a oYuda, nuumala nloko na aIsarayeli okawanyeya khukhala omwene wa Isarayeli ni omwene wa oYuda. Okathi Asa aakenle awe omwene, owo aahilakela omala-maliha okokhorela woohiloka ni omala-maliha orupihana woohiloka moomweneni mwawe. Owo aahaapwexakasa amuluku eethiru yaakokhoreliwa ni atthu ni aahiwoomola ale yaararuwa empa ya Muluku. Nave Asa aahimwaakha “opwiyamwene Maaka, pipi awe, mulattu w’opaka elatarato ya muluku Axera”. (1 Mamwene 15:11-13) Nave Asa aahaatumererya atthu “wira yaphaveleke Apwiya” ni “wira yetteleke Ikano ni soruma s’Apwiya”. Asa aahiimananiha waakhaliherya akina omukokhorela Yehova.​—2 Wahala 14:3.

6. Asa aapanke exeeni okathi anakhotto a wEthiyopia yaatuphenle aya muttetthe wa oYuda?

⁶ Iyaakha muloko sa olamulelo wa Asa, omwene wa oYuda waahikhalana murettele. Nuumala-vo, anakhotto emilyau emosa ni ikaaro 300 a wEthiyopia, yaahirwa otuphela omwene wa oYuda. (2 Wahala 13:23; 14:5, 8, 9) Nto Asa aapanke exeeni? Owo aahinvekela Yehova wira omukhaliherye oxintta ekhotto. Nave, Asa aanikupali wira Yehova aamwaakhaliherya atthu awe. (Mmusome 2 Wahala 14:10.) Okathi mukina Yehova aanaakhaliherya atthu awe waaxintta awanani aya, hata okathi yoole mamwene aya yahaamuroromela aya Yehova. Owo aanipaka eyo ophavelaka wooniherya  wira tori Muluku eekeekhai. (1 Mamwene 20:13, 26-30) Masi, okathi ola, Yehova aahaakhaliherya aIsarayeli okhala wira Asa aahimuroromela yena. Yehova aahaakhula nivekelo na Asa, nto Asa aahixintta ekhotto. (2 Wahala 14:11, 12) Muhoolo mwaya, Asa aahivonya vanceene okhala wira aahinvekela nikhaliheryo mwene a wAsiria, ohiya Yehova. (1 Mamwene 15:16-22) Hata vari siiso, Yehova aahoona wira Asa aanimphenta. Maana murima wa “mwené Asa wahasiveliha Apwiya mahiku othene èkumi awe”. Ninrowa otthara sai ntakiheryo nooloka na Asa?​—1 Mamwene 15:14.

7, 8. Munrowa omutakiha sai Asa?

⁷ Ninsuwela sai wira nihiivahererya wa Yehova ni murima wotheene? Hiyo pooti wiikoha so: ‘Kiireke kinoovikaniha omwiiwelela Yehova okathi wooxankiha? Koolakela ni murima wotheene okhaliherya muloko awe wira ovikaniheke okhala wooloka?’ Tthiri, mwene Asa aahaana olipa murima wira omwaakhe opwiyamwene piipi awe! Okathi mukina pooti otthuneyaka olipa murima ntoko Asa. Mwa ntakiheryo, sai akhala wira mmusi anyu aahiiso mpatthani anyu oopaka etampi ni khoniphavela ottharuwa, vano oomoliwa mmulokoni? Niireke munoohiya wataana ni mutthu owo? Niireke murima anyu onoowiirihani opaka eyo?

⁸ Ntoko Asa, okathi mukina hiyo pooti woonaka wira atthu anceene annininyokha. Waaniheryasa ale anisomana anyu oxikola aahiiso maprusoore pooti wooramusani mwaha wookhala Namoona a Yehova. Aahiiso pooti wira atthu omutekoni wanyu anuupuwela wira nyuwo mwa mulolo okhala wira munnikumiha ifeeriya wira murowe muthukumano muulupale wa esirkwiitu aahiiso khamuneemererya ovikaniha ovara muteko nuumala okathi wa muteko. Muhaana omuroromela Muluku ntoko siirale awe Asa. Munvekele Yehova, mukhale oolipa murima ni nvikaniheke opaka itthu sooloka. Nto muupuweleke wira Muluku aahimulipiha Asa, nave onrowa woolipihani.

9. Ninrowa omusiveliha sai Yehova okathi nnaalaleerya ahu akina?

⁹ Asa khahiyo aisuupuwela mmensawe paahi; owo aahaatumererya atthu wira “yaphaveleke Apwiya”. Hiyo-tho ninnaakhaliherya atthu omukokhorela Yehova. Nto Yehova onnoona vaavo nnaalaleerya ahu akina voohimya sa yena. Tthiri, Yehova onnisiveliwa vanceene vaavo onniweha awe nimphentaka, naathokoreryaka atthu ni ophavela okhala waya saana muhoolo.

10, 11. Ninrowa omutakiha sai Yosafati?

¹⁰ Yosafati, “ahitthara ephiro y’Asa, tithi awe”. (2 Wahala 20:31, 32) Moota xeeni? Ntoko tiithi awe, Yosafati aahaatumererya atthu ovikaniha omukokhorela Yehova. Nave, Yosafati aahaaruma alopwana owiixuttiha “elívuru ya ikano s’Apwiya”, atthu a mittetthe sa oYuda. (2 Wahala 17:7-10) Nave aahirowa muttetthe wa okuusini wa  omwene wa Isarayeli, wa atthu yaakhala omiyaakoni wa wEfrayimi, wira ‘attikiherye atthu awo owamini Apwiya’. (2 Wahala 19:4) Yosafati aari mwene “àphavenle Apwiya ni murim’awe wothene”.​—2 Wahala 22:9.

¹¹ Olelo-va, Yehova oniphavela wira atthu a olumwenku wotheene yiixuttihiwe voohimya sa yena, nto otheene ahu nnoowerya okhaliherya muteko ola. Niireke moolakela waalaleerya atthu khula mweeri? Munnisiveliwa owiixuttiha atthu Biibiliya wira awo nave apacerye omukokhorela Yehova? Niireke munnivekela voohimya sa mwaha owo? Akhala wira munniimananiha, Yehova onimookhaliheryani okhalana yoosoma ya Biibiliya. Niireke munnisiveliwa omusomiha mutthu yoole orina okathi, okathi yoole oniphavela anyu ophumurya? Ntoko siisaale Yosafati aakhalihenrye awe atthu otthikela-tho omukokhorela Yehova, hiyo nnoowerya waakhaliherya ale ahiyale olaleerya. Nave-tho, axitokweene a mmulokoni annaaxukurya mmuttettheni mwaya ale yoomoliwe mmulokoni wira yaakhaliherye, woonasa wene ale attharunwe itampi saya.

12, 13. (a) Okathi Yosafati oova awe, exeeni aapanke awe? (b) Xeeni vanitthuneya ahu otthara ntakiheryo na Yosafati?

¹² Omutakihaka tiithi awe, Yosafati aahimuroromela Yehova okathi anakhotto anceene yaarwiiya aya otuphela muttetthe wa oYuda. (Mmusome 2 Wahala 20:2-4.) Owo aahoova ni aahinvekela nikhaliheryo Yehova. Vaavo aavekela awe aahihimya wira khaarowa owerya waaxintta awanani awe. Nave, aahihimya wira owo ni atthu awe khiyaasuwela etthu yoowiira. Masi Yosafati khaanyiherya wira Yehova ammukhaliherya. Owo aahimmye wira: “Ninnororomelani nyuwo”.​—2 Wahala 20:12.

¹³ Ntoko Yosafati, ikwaha sikina pooti ohisuwela etthu yoowiira voohimya sa muxankiho ahu, nave pooti woova. (2 aKorinto 4:8, 9) Masi muhaana wuupuwela ele Yosafati aapanke awe. Oryeene ohoolo wa atthu otheene, Yosafati aahinvekela Yehova omuleelaka wira owo ni atthu awe yaahivela-vela. (2 Wahala 20:5) Ahooleli a itthoko ahaana omutakiha Yosafati. Awo ahaana onvekela Yehova wira aakhaliherye oxintta mixankiho ni woona etthu enireerela opaka. Muhuuliweke muru ohimya itthu iya okathi onivekela anyu ni etthoko anyu. Awo animoona wira munnimuroromela Yehova. Okhala wira Yehova aahimukhaliherya Yosafati, nave onrowa wookhaliheryani.

14, 15. Moota xeeni Ezekiya aamuroromenle awe Muluku moomalela?

¹⁴ Nave Ezekiya aari mwene mukina yoowo ‘arumela Apwiya’. Owo aahipaka eyo nnaamwi tiithi awe aakokhorela amuluku eethiru. Ezekiya “ahipwanyuliha mapuro òttukhuwa, ahipwexakasa maluku yalompiwa, ahìkittha mwiri wolompiwa, ahipwexa enowa ya yuma, yapakalyawe Moise” okhala wira aIsarayeli yaanikokhorela. Ezekiya aanimurumeela Yehova ni murima wotheene. Maana “owo aharumela Apwiya, khànyanyanle: ahìwelela ikano Apwiya sanvahalyawe Moise”.​—2 Mamwene 18:1-6.

¹⁵ Okathi Ezekiya aaryaawe mwene, anakhotto oowerya a wAsiriya yaahituphela  muttetthe wa oYuda ni yaahilakela ompwetexa Yerusalemu. Nto Senakeribi, mwene a wAsiria, aahinveeha Yehova ni aaheererya omwiiriha Ezekiya wiivahererya. Okathi ole wowoopiha, Ezekiya aahimuroromela Yehova ni murima wotheene ni aahinvekela nikhaliheryo. Maana aahisuwela wira Muluku torina owerya wuulupale waavikana anakhotto a wAsiria, nto Yehova aahiwoopola atthu awe. (Mmusome Yesaya 37:15-20.) Muluku aahaakhula nivekelo na Ezekiya, nto aahiruma nlaikha, nenno naawiivale anakhotto 185.000 a wAsiria.​—Yesaya 37:36, 37.

16, 17. Munrowa omutakiha sai Ezekiya?

¹⁶ Muhoolo mwaya, Ezekiya aahiwereiwa onahala okhwa. Okathi owo wooxankiha, aahimuxonttela Yehova omuupuxeryaka ororomeleya wawe ni aahinvekela nikhaliheryo. (Mmusome 2 Mamwene 20:1-3.) Yehova aahaakhula nivekelo na Ezekiya, khunvoniha aahiiso ompenuxa. Biibiliya onnooniherya wira olelo-va, Muluku khonipaka miiriirya sa onivoniha okathi oniwereiwa ahu aahiiso wuncererya mahiku a okumi ahu. Masi ntoko Ezekiya, nnoowerya omuroromela Yehova wira onikhaliherye. Hiyo pooti omuhimeerya so: “Xontte, Apwiya! Muhiliyalé wira kihetta vororomeleya vamaithoni vanyu, kittharaka exariya ni murima woloka”. Niireke munnikupali wira okathi wotheene Yehova onrowa wookhapelelakani, hata okathi oniwereiwa anyu?​—Esalimo 41:4.

¹⁷ Etthu xeeni ekina enrowa ahu omutakiha Ezekiya? Woonasa wene yookhala etthu enihonona wataana wahu ni Yehova aahiiso enniiyerya okathi naarowa ahu omurumeela yena. Mwa ntakiheryo, atthu anceene olelo-va annaakokhorela apinaatamu. Awo annaavuwiha atthu awo nnaamwi ahaasuwelaka. Nave anniviriha okathi munceene asomaka myaha saya ni awehaka ifootu sa atthu awo. Ikwaha sikina anniviriha okathi munceene avaanelaka ni atthu awo arumeelaka Internet aahiiso redes sociais. Tthiri ninnisiveliwa orumeela ikaruma iyo wira nivaanele ni amusi aahiiso apatthani. Niireke ninnimaliha okathi munceene nrumeelaka redes sociais? Akhala wira ninnipaka eyo, nnoopaceryaka wiixinnuwiha vaavo atthu anceene anihimya wira annisiveliwa ni ifootu aahiiso moolumo ahu yaawo ninlepa ahu nrumeelaka Internet. Nto, nasuwela wira atthu akina aahiya oweha itthu iyo, hiyo pooti okhumuwa. Masi nnoowerya wiixutta etthu ni ntakiheryo na murummwa Paulo, Akila ni Prisila. Niireke munuupuwela wira anna ale yaaniviriha okathi khula nihiku awehaka itthu saapakiwa ni atthu, vanceenexa ale yahaamurumeela Yehova? Biibiliya onihimya wira Paulo “ahìvahererya olaleya” masu. Nave Prisila ni Akila yaaniviriha okathi munceene yaalaleeryaka akina ni waatthokiherya “orattene ephiro ya Muluku”. (Miteko 18:4, 5, 26) Nihaana wiikoha so: ‘Kiireke kinnisyaka waakokhorela apinaatamu? Kiireke kinniviriha okathi munceene khivaraka itthu sihirina efaita?’​—Mmusome aÉfeso 5:15, 16.

18, 19. Ninrowa omutakiha sai Yosiya?

¹⁸ Nave-tho, Mwene Yosiya aahiiwelela malamulo a Yehova “ni murim’awe wothene”. (2 Wahala 34:31) Yosiya aari  musulwaawe Ezekiya. Okathi aaryaawe mmiravo, “ahipajerya otthara otthuna wa Muluku a Davidi”. Nave okathi aarina awe iyaakha 20, aahipacerya opwexakasa mapuro yaakokhoreriwa amuluku eethiru oYuda. (Mmusome 2 Wahala 34:1-3.) Yosiya aahimananiha vanceenexa wira omusivelihe Yehova, waavikana mamwene makina a oYuda. Nihiku nimosa, mukhulupale aanamukuttho aahiphwanya mpaani mwa Muluku eliivuru ya Ikano. Waaniheryasa, yaari eliivuru yaalempwale ni Moise! Okathi mulipa-oolepa aasomme awe ohoolo wa Yosiya, nto Yosiya owo aahoona wira aahaana omurumeela Yehova moomalela. Nave, aahaatumererya atthu akina opaka etthu emosaru. Tivonto, atthu “awo yahatthara Apwiya” okathi Yosiya aaryaawe mukumi.​—2 Wahala 34:27, 33.

¹⁹ Akhala wira mwa mmiravo, nyuwo pooti omutakiha Yosiya ni ophavela omusuwela saana Yehova. Waaniheryasa, Yosiya aahiixuttihiwa ni Mwene Manase, taata awe, wira Yehova onniphavela onilevelela. Nave nyuwo pooti wiixuttihiwa ni atthu oowuuluvala a etthoko anyu, aahiiso a muloko anyu. Awo pooti wooleelani itthu sooloka Yehova aakhalihenrye awe. Nave-tho, muupuweleke ele Yosiya aapanke awe nuumala osommwa Soolempwa. Nto okhala wira aahiphavela omusiveliha Yehova, owo aahipacerya opaka marukunuxo. Vaavo munisoma anyu Soolempwa, munoophavelaka omwiiwelela Yehova. Nto wataana wanyu onrowa olipaka, nave munrowa otepaka ohakalala. Munoophavelaka waaleela akina voohimya sa Yehova. (Mmusome 2 Wahala 34:18, 19.) Okathi onimusoma anyu Biibiliya, munimoona wira sookhala itthu sinitthuneya anyu olokiherya wira mmurumeeleke saana Muluku. Akhala wira munimoona etthu enitthuneya olokiherya, mmananihe opaka marukunuxo, ntoko Yosiya iirale awe.

20, 21. (a) Itthu xeeni sinilikana aya mamwene ala maxexe naathokorenrye ahu? (b) Exeeni ninrowa ahu othokorerya mwaha onittharelana?

²⁰ Exeeni yiixuntta ahu ni mamwene ala maxexe a oYuda, yaawo yaamurumenle Yehova ni murima aya wotheene? Awo yaahimananiha omusiveliha Yehova ni omukokhorela okumi aya wotheene. Nave yaahimuroromela Yehova vaavo awanani aya oowerya yaarwiiya aya waatuphela. Nave-tho, etthu yootepa otthuneya, okhala wira yaanimurumeela Yehova mwaha womphenta.

²¹ Nnaamwi mamwene ala maxexe yaari oohimalela ni yaarina soovonya saya, Yehova aahisiveliwa ni atthu awo. Yehova aahisuwela ele yaari vamurimani vaya ni aahisuwela wira yaanimphenta tthiri. Nave-tho, hiyo naatthu oohimalela ni ninnivonya. Masi Yehova onoosiveliwa ni hiyo oona wira nimmurumeela ni murima wotheene. Mwaha onittharelana, ninrowa othokorerya ele eniixutta ahu ni soovonya sa mamwene ala.