1. Xeeni atthu akina anireerela aya ottittimihiwa ni ninrowa wiixutta exeeni mwaha ola?

NNOONIHERYA sai wira ninnaalemeliha atthu akina? Ninnooniherya eyo naattittimihaka ni waathokorerya saana atthu awo. Okhala wene, ninnaattittimiha makhulupale, ale apanke etthu yooloka anaphwanela ottittimihiwa ni ale arina muteko wootthuneya. Mwaha ola, ninrowa wiixutta moota wowaattittimiha ale anireerela ottittimihiwa ni mathowa aya.

2, 3. (a) Xeeni Yehova oniphwanela awe ovuwihiwa? (Nwehe elatarato yoopacerya.) (b) Ti pani ori Mwaapwittipwitthi onihimmwa Wisupulula 5:13, ni xeeni vanireerela ahu omuttittimiha?

² Wisupulula 5:13 onihimya wira Ole “okilanthe vehijeni” ni “Mwapwittipwitthi”, anniphwanela ottittimihiwa. Nto Ole “okilanthe vehijeni”, onihimmwa Yehova. Wisupulula ekapitulu 4, malaikha annooniherya nthowa naya Yehova “yowo onkhala mahiku othene”, oniphwanela awe ovuwihiwa. Nave yoolepa ela enihimya so: “Nyuwo mophwanela wakhela ovuwa ni nttittimiho n’uwerya. Tthiri ti nyuwo mpattunxe itthu sothene: mwaha w’otthuna wanyu seiyo sinnikhala, khukhalana ekumi”.​—Wisupulula 4:9-11.

³ Nto “Mwapwittipwitthi” onihimmwa Wisupulula 5:13, ti Yesu Kristu. Ninsuwela sai? Okathi Yesu aaryaawe valaponi, aahihimmwa okhala “Mwapwittipwitthi a Muluku, onttipiha yottheka y’elapo”. (Yohani 1:29) Maana khuuvo mwene oopinaatamu iivaherenrye wira aakhwele atthu onaalamulela awe. Tivonto, vanireerela aya omuttittimiha. Yesu onniphwanela ottittimihiwa okhala wira “Mwené a mamwene, Pwiya a mapwiya othene”. (1 Timótheyo 6:14-16) Waaniheryasa munnoona ntoko malaikha wiirimu yaawo aniipa so: “Mwapwittipwitthi ohitiwe òphwanela wakhela owerya n’uthajiri n’usuwela n’ikuru ni nttittimiho n’uvuwa n’uttottopeliwa”.​—Wisupulula 5:12.

4. Xeeni varyaaya va miruku omuttittimiha Yehova ni Kristu?

⁴ Yohani 5:22, 23, onihimya wira Yehova oomuthanla Kristu wira aaphukele apinaatamu otheene. Nlo ti nthowa nuulupale ninniiriha omuttittimiha Yesu. Nto vaavo nimmuttittimiha ahu Yesu, ninninvuwiha Yehova. Nathanla omuttittimiha Yesu ni Tiithi awe, nnoophwanya okumi woohimala.​—Musome Esalimo 2:11, 12.

5. Xeeni atthu otheene aniphwanela aya ottittimihiwa?

⁵ Muluku ohaapattuxa apinaatamu “aìlattanihaka mwanene”. (Maphattuwelo 1:27) Eyo enitaphulela wira apinaatamu aakhalana owerya wa wooniherya mikhalelo sa Muluku. Mwa ntakiheryo, apinaatamu anoowerya wooniherya ophenta, oreera murima ni othunku. Nave-tho, Muluku ohaapaka apinaatamu khwaavaha yowuupuxerya ya murima, niire so, etthu eri vamurimani enaakhaliherya osuwela etthu yooloka ni yoohiloka, ya xariya ni yoohikhala ya xariya, yookhalela ni yoohikhalela. (aRoma 2:14, 15) Atthu anceene waasivela itthu sooloka, sooreera ni okhala mwa murettele ni akina. Nto khannitikhina okhala wira Yehova ti Muluku ootthokiheya ni a murettele. Mwekeekhai, apinaatamu apattuxiwe mwa enamuna enaakhaliherya omutakiha Yehova. Tivonto, awo anniphwanela olemelihiwa ni ottittimihiwa.​—Esalimo 8:6.

6, 7. Voohimya sa waattittimiha atthu, Anamoona a Yehova avirikanne sai ni atthu akina?

⁶ Nnaamwi nisuwelaka wira nihaana waattittimiha apinaatamu, ikwaha sikina pooti oxankiha osuwela moota wowaattittimiha mookhalela. Ti nthowa naya mwaha woohimalela, atthu anceene annitakiha mweettelo ni moonelo wa olumwenku wa Satana. Atthu anceene annaathokorerya alopwana aahiiso athiyana okhala muluku aya. Ohiya waattittimiha ntoko Yehova oniphavela awe, awo annaavuwiha, yaathokoreryaka ntoko muluku. Nave atthu anceene annitakiha mawarelo, mweettelo, mukhalelo wa anamalamulela, ahooleli a itiini, atthu anitthimaka, aniipa, wiina ni atthu akina oovuwa.

⁷ MaKristau eekeekhai annisuwela wira ti voohiloka waavuwiha apinaatamu ntoko Muluku. Eriyari ya atthu otheene akhanle valaponi, Yesu paahi tovanhe ntakiheryo nooloka otthara. (1 Pedru 2:21) Nihaana wuupuwelaka wira apinaatamu otheene “àttheka, àthoiwa ovuwa wa Muluku”. (aRoma 3:23) Khuuvo pinaatamu oniphwanela okokhoreliwa. Nto waattittimiha apinaatamu mwa enamuna yootepana, khenimusivela Yehova.

8, 9. (a) Anamoona a Yehova aniwoonela sai makhulupale a mulaponi? (b) Okathi xeeni nihiniwiiwelela ahu makhulupale a mulaponi?

⁸ Aakhala atthu yaale aniphwanela ottittimihiwa mwaha wa okhulupale aya. Mwa ntakiheryo, nkahaya muupuwele ele anipaka aya makhulupale a mulaponi. Awo annivara miteko sootthuneya mmuttettheni ni annikhaliha murettele. Ninnittottela mureerelo muteko aya. Murummwa Paulo aahimmye wira nihaana owoona ahooleli a mulaponi ntoko “alupale anettiha elapo”. Nave-tho, aahimmye wira nihaana wiiwelela malamulo aya, oriki: “Mmulive khula mutthu etthu enimphwanela: mwalive mpósito axinene”, ni “mwalemelihe ale amphwanela olemelihiwa”.​—aRoma 13:1, 7.

⁹ Hiyo Anamoona a Yehova, ninnipaka sotheene siniwerya ahu wira naattittimihe makhulupale a mulaponi. Nto malamulo a khula elapo annivirikana, okhala wira khula elapo yookhalana soolema saya. Hata vari siiso, ninniwiiwelela makhulupale a mulaponi vaavo anivara aya muteko aya. Masi, akhala wira anninivekela etthu enivirikanya otthuna wa Yehova, hiyo ninnikhootta opaka eyo. Nto ninnithanla omwiiwelela ni omuttittimiha Yehova, ohiya apinaatamu.​—Mmusome 1 Pedru 2:13-17.

10. Ntakiheryo xeeni nooloka, arumeyi a khalai a Yehova anivanha aya?

¹⁰ Nnoowerya wiixutta etthu ni arumeyi a khalai a Yehova, yaawo yaattittimiha makhulupale a mulaponi. Yosefe ni Maria aavaha ntakiheryo nooloka. Okathi aRoma yaaphavela aya osuwela nummuru na atthu yaakhala elapo ele, Yosefe ni Maria yaahirowa oBethelehemu wira yarepeliwe nnaamwi Maria aahala vakhaani oyara. (Luka 2:1-5) Ntakiheryo nikina ti na murummwa Paulo, maana aanaattittimiha makhulupale anilamulela. Okathi ootheriwa awe wira aahipaka etthu yoohiloka, mwa nttittimiho, Paulo aahiixaakiha ohoolo wa Mwene Herodi Agripa ni Festo, yoowo aari namalamulela a oRoma, eprovinsia ya oYudeya.​—Miteko 25:1-12; 26:1-3.

11, 12. (a) Xeeni nihinaattittimiha ahu mootepana ahooleli a itiini? (b) Exeeni yaamwiiranenle Namoona a Yehova a wAustralia mwaha woomuttittimiha mukhulupale?

¹¹ Ankhi ahooleli a itiini? Niireke nihaana waattittimiha mootepana? Nnaari, maana nihaana waattittimiha ntoko sinaattittimiha ahu atthu akina. Masi khivaarowa oloka waavaha nttittimiho ahiniphwanela aya. Nthowa xeeni? Nthowa noowi itiini sowootha khasiniixuttiha ekeekhai voohimya sa Muluku ni Nuulumo nawe, niire so, Biibiliya. Yesu aahaapwapwela ahooleli a itiini sowootha ni aahaahimya okhala anawoothe ni ahooleli ootakhala. (Matheyo 23:23, 24) Nave, waarowa okhala voohiloka ohaattittimiha makhulupale a mulaponi. Maana waattittimiha onninikhaliherya.

¹² Ntakiheryo nimosa, ti na mukhulupale a epoliitika Dr. Heinrich Gleissner, a wAustralia. Okathi wa Ekhotto ya Nenli ya Olumwenku Wotheene, aahitthukweliwa ni maNazista. Owo aahiriheliwa mukomboini oroihiwaka opuro onivariwa muteko wookhanyereriwa, nto aahimphwanya Namoona ooluttuweliwa iihaniwa Leopold Engleitner, a wAustralia. Mwa nttittimiho, Munna Engleitner, aahimutthokiherya Dr. Gleissner, sookupali sawe, yoowo anwiriyanne saana. Nuumala ekhotto, ikwaha sinceene Gleissner aahirumeela okhulupale  awe wira aakhaliherye Anamoona a wAustralia. Waaniheryasa munnisuwela itthu sooloka saakhumelenle maKristau mwaha wowaattittimiha makhulupale a mulaponi.

13. Tani aniphwanela ottittimihiwa vanceene ni nthowa xeeni?

¹³ Anna ni arokora anniphwanela olemelihiwa ni ottittimihiwa. Nave ti vootthuneya waattittimiha anna aneettiha muloko, niire so, axitokweene a mmulokoni, a esirkwiitu, a Ekomisau ya eFiliyaali, ni anna a Nikhuuru Noolamulela. (Mmusome 1 Timótheyo 5:17.) Otheene aya annaakhapelela atthu a Muluku, nto Biibiliya onnaahimya okhala ‘sovaha sa atthu’. (aÉfeso 4:8) Tivonto, nihaana waalemeliha ni waattittimiha nihiwehaka elapo aya, osoma waya, makhalelo aya, aahiiso yaari oothaaciri wala oohaawa. MaKristau a eseekulu yoopacerya aanivaha ntakiheryo nooloka. Maana awo yaanaattittimiha ahooleli, nto hiyo nimpaka etthu emosaru. Okathi onikhala ahu ni axitokweene, nihaathokoreryeke ntoko malaikha aahiiso ntoko Muluku. Masi naalemeliheke ni waattittimiha mwaha wa muteko aya ni wiiyeviha waya.​—Mmusome 2 aKorinto 1:24; Wisupulula 19:10.

14, 15. Axitokweene maKristau avirikanne sai ni ahooleli anceene a itiini sowootha?

¹⁴ Axitokweene awo ari ntoko amakampusi oowiiyeviha. Nto nihaathokoreryeke ntoko atthu oovuwa. Maana awo aavirikana vanceene ni ahooleli a itiini a olelo-va ni a mahiku a Yesu. Olavulaka sa ahooleli ale, Yesu aahimmye wira: “Awo wasivela okilathi  mapuro òsuwanyeya, vanthukumaneliwa nìra, ni mapuro òttittimiheya mpani mothukumana. Awo wasivela okhomasiwa n’atthu ankumananaya”.​—Matheyo 23:6, 7.

¹⁵ Axitokweene maKristau anniiwelela moolumo a Yesu ani: “Nto nyuwo mukhotteke wireliwa ‘mwixuttihi’, okhala wira mwixuttihi anyu ori mmosa: nyuwo othene mw’àxinna. Ahikhalé ontthunanyu omwirela tithi vathí-va: okhala wira tith’inyu ori mmosá pahi, yowo ori wirimu. Hatá mukhotteke wireliwa muholeli, okhala wira muholeli anyu mmosá pahi: ti Kristu. Ole ori mulupale wa nyuwo, akhalé murumeyi anyu. Ole onisinnuwiha, onoyevihiwa: ole onìyeviha, onottittimihiwa”. (Matheyo 23:8-12) Vaavo mowiiyeviha axitokweene a mmulokoni olumwenku wotheene aniiwelela aya moolumo a Yesu, anna ni arokora annaaphenta, waalemeliha ni waattittimiha.

16. Xeeni vanitthuneya ahu ovikaniha wiimananiha waattittimiha atthu?

¹⁶ Pooti ovira okathi wira niixutte moota wowaattittimiha atthu akina mwa enamuna yooloka. Nave eyo yaahiiraneya ni maKristau a eseekulu yoopacerya. (Miteko 10:22-26; 3 Yohani 9, 10) Masi nihaana wiimananiha vanceene. Maana waattittimiha atthu ntoko Yehova oniphavela awe, onnikumiherya mireerelo sinceene.

17. Mareeliho xeeni aniphwanya ahu mwaha wowaattittimiha makhulupale?

¹⁷ Vaavo vanaattittimiha ahu atthu yaale arina okhulupale mmuttettheni mwahu, ikwaha sikina awo pooti okhaliherya ehakhi ahu yoolaleerya. Nave pooti onaakiherya wira nilaleeryeke mootaphuwa. Eyo etthu yiiraneyale iyaakha sinceene khalai elapo ya wAlemanha, vaavo pioneero oniihaniwa Birgit aaronwe awe oxikola wa mwanawe wiiwelela inoota. Maprusoore ale anihimya wira ti vooloka okhalana oxikola anamwane a Anamoona a Yehova. Maana anamwane a Anamoona annikhaliherya vanceene. Birgit aalenle so: “Aniihu anniixutta weettela malamulo a Muluku voohimya sa mweettelo wooloka, nto eyo enihela muhina waattittimiha maprusoore ni waalemeliha”. Prusoore mmosa aahimmye so: vaakhanle wira anaxikola otheene ari ntoko Anamoona a Yehova, vaamukhweyaka owiixuttiha. Mwaha wooweha wira anamwane a Anamoona aakhalana mweettelo wooloka, nuuvira isumana vakhaani, prusoore mmosa aahirowela muthukumano muulupale.

18, 19. Nihaana wuupuwelaka exeeni okathi nnaattittimiha ahu axitokweene?

¹⁸ Malakiheryo a Nuulumo na Muluku anninikhaliherya osuwela moota wowaattittimiha axitokweene a mmulokoni. (Mmusome aHéberi 13:7, 17.) Nihaana waattottopela mwaha wa muteko  anivara aya mooluttuweliwa. Vaavo nniiwelela ahu malakiheryo annivaha aya, ninnaakhaliherya ovara muteko aya moohakalala. Nave, Biibiliya onihimya wira nihaana otakiha waamini waya. Masi eyo khentaphulela wira nihaana otakiha mawarelo, malavulelo ni moota oniixuttiha awe mutokweene oottittimiheya. Opaka eyo, waarowa okhalaka ntoko wira nnaatthara apinaatamu ohiya omutthara Kristu. Nihiliyaleke wira axitokweene atthu ntoko hiyo.

¹⁹ Okathi nnaalemeliha ahu ni waattittimiha axitokweene nihaathokoreryaka ntoko atthu oovuwa, eyo enimwaakhaliherya vanceene. Moota xeeni? Maana eyo enoowiiriha ovikaniha wiiyeviha ni osyaka wuupuwelaka wira tootepa otthuneya waavikana akina ni wira khula okathi anipaka soothanla sooloka.

20. Mireerelo xeeni siniphwanya ahu mwaha wowaattittimiha akina?

²⁰ Waattittimiha atthu akina onninikhaliherya osyaka wiitthuna, ni onniniiriha ovikaniha wiiyeviha okathi ninttottopeliwa ahu mwa enamuna ya vameekhaaya. Nave-tho, enniniiriha ohikhumuwa, okathi mutthu nimmuttittimiha ahu onninyoonyiha awe. Nave onninikhaliherya ovikaniha wiiraana ni mutthenkeso wa Yehova. Okhala wira mutthenkeso wa Yehova onaathokorerya atthu otheene mwa enamuna emosaru.

21. Etthu xeeni yootepa otthuneya enniiriha waattittimiha atthu?

²¹ Etthu yootepa otthuneya enniiriha waattittimiha atthu, mwaha woowi opaka eyo onnimuhakalaliha Muluku. Ninrowa opakaka ele ennivekela awe wira nivikaniheke ororomeleya wa yena. Nto Yehova onoowerya omwaakhula Satana, onihimya wira khuuvo mutthu oniwerya okhala oororomeleya. (Miruku 27:11) Atthu anceene mulaponi khanisuwela waattittimiha akina mwa enamuna yooloka. Ninnixukhurela vanceene okhala wira ninnisuwela moota wowaattittimiha akina ntoko Yehova oniphavela awe!