1. Moovarihana ni 1 Pedru 3:8, xeeni ninsiveliwa ahu okhala ni atthu anthokorerya moonelo ni okhala wahu saana?

NINNISIVELIWA vanceene okhala ni atthu anthokorerya moonelo ni okhala wahu saana. Awo anneererya wiihela nipuro nahu wira asuwele ele nnuupuwela ahu ni moonelo ahu. Nto annoona ele ennixankiha, ananikhaliherya hata nihaavekenle nikhaliheryo. Tthiri ninnaaxukhurela atthu ale ‘annikhupanyerya’ *.​—Mmusome 1 Pedru 3:8.

2. Xeeni nintthuneya ahu wiimananiha okhala atthu oothunku?

² Okhala wira na maKristau ekeekhai, nimphavela owoonela othunku aahiiso waakhupanyerya atthu akina. Masi ohimya ekeekhai, okathi mukina onnivila opaka eyo. Nthowa xeeni? Nthowa nimosa, okhala wira na atthu oohimalela. (aRom. 3:23) Nto nintthuneya wiimananiha vanceene wira nihiisuupuweleke mmansihu paahi. Mwaha wa mahuweliwo aya aahiiso itthu sikina saakhumelenle mookumini, woonasa wene, atthu akina ahaana wiimananiha vanceene wira awooneleke othunku akhwaaya. Nave, hiyo pooti ohapuxiwa ni muupuwelo ni moonelo wa atthu a moolumwenkuni. Mahiku ala ookiserya, atthu anceene khanthokorerya moonelo wa atthu akina. Eyo enniiraneya mwaha woowi atthu ‘anisupuwela mmansaya pahi’. (2 Tim. 3:1, 2) Exeeni enrowa onikhaliherya waakhupanyerya aahiiso othokorerya moonelo wa atthu akina?

3. (a) Ninrowa wooniherya sai wira ninnithokorerya moonelo wa atthu akina? (b) Mwaha ola, ninrowa othokorerya exeeni?

³ Nnoowerya othokorerya moonelo wa atthu akina, akhala wira ninnimutakiha Yehova Muluku ni Mwanawe, Yesu Kristu.  Yehova, Muluku oophenta ni oonivaha ntakiheryo na othokorerya moonelo wa atthu akina. (1 Yoh. 4:8) Nave Yesu aanimutakiha moomalela Tiithi awe. (Yoh. 14:9) Okathi aari awe valaponi, Yesu aahooniherya moota aawoonela awe othunku apinaatamu. Wanipacerya wa mwaha ola, ninrowa woona moota Yehova ni Yesu anthokorerya aya moonelo wa atthu akina. Nuumala-vo, ninrowa othokorerya moota nikhanle ahu ootthara ntakiheryo naya.

4. Yesaya 63:7-9 onooniherya sai wira Yehova onnaathokorerya atthu awe?

⁴ Biibiliya onihimya wira Yehova onnikhapelela ni othokorerya moonelo wa arumeyi awe. Mwa ntakiheryo, nkahaya nwehe moota Yehova oonela awe okathi aIsarayeli saaphwanya aya mixankiho. Biibiliya onihimya wira “movelavelani mwaya mothene. Khiyàmurumme murumeyi aya walá namuhupi, wira awòpole: yawo anene t’arwiye owòpola”. (Mmusome Yesaya 63:7-9.) Muhoolo mwaya, profeta Zakariya aahihimya wira okathi atthu a Yehova yaahasuliwa aya, vaakhala ntoko Yehova taahasuliwa. Nto Yehova aahaaleela arumeyi awe wira: “Ale anahaxa atthu aka, annikiveha yomi ene”. (Zak. 2:13) Tthiri moolumo ala annooniherya wira Yehova onnaathokorerya atthu awe!

5. Nvahe ntakiheryo nnooniherya wira Yehova onnipaka etthu wira aakhaliherye atthu awe yaahaawaka.

⁵ Yehova khahiyo paahi oniwoonela othunku atthu awe yaahaawaka. Masi onnipaka etthu wira aakhaliherye. Mwa ntakiheryo, okathi aIsarayeli yaahasuliwa aya weepotthani wEjiitu, Yehova aanoona owereya waaphwanya ni aahiwoopola. Nto Yehova aahimuleela Moise wira: “Miyo kihona ohawa w’atthu aka wEjitu. Kihìwa ikuttho saya . . . Kosuwela tthiri ohawa waya. Tivó, kokhuruwela owakiha mmatatani mw’atthu a wEjitu”. (Okhum. 3:7, 8) Okhala wira Yehova aaniwoonela othunku atthu awe, owo aahiwoopola weepotthani. Iseekulu sinceene muhoolo mwaya, aIsarayeli ari ene Elapo Yooleiheriwa yaanihasuliwa ni awanani aya. Yehova oonenle sai? Yehova aaniiwa “wikhupanyerya waya mwaha w’atthu ale yahaxa ni yalupattha, enamorela ikharari”. Yehova aahitthikela-tho owoonela othunku atthu awe ni aahipaka etthu wira aakhaliherye. Okathi ole Yehova aahaaruma makhulupale wira  awoopole aIsarayeli mmatatani mwa awanani aya.​—Makh. 2:16, 18.

6. Nvahe ntakiheryo nnooniherya moota Yehova aamuthokorenrye awe mutthu mmosa aarina muupuwelo woohiloka.

⁶ Yehova onnithokorerya moonelo wa atthu awe hata osuwelaka wira muupuwelo aya ti woohiloka. Nkahaya nthokorerye ntakiheryo na Yona. Muluku aahimuruma Yona orowa waalaleerya muhupi woophukela atthu a oNiinive. Nto okathi yaattharunwe aya, Muluku khaapwetenxe. Masi Yona khaasiveliwe ni yoothanla ele ya Muluku. Nto Yona ‘ahiximwa’ okhala wira muhupi awe woophukela khiwiiraneyale. Yehova aahimpixerya murima Yona ni aahimukhaliherya olokiherya muupuwelo awe. (Yona 3:10–4:11) Muhoolo mwaya, aahiiwexexa etthu Yehova aamwiixuttinhe awe, nave Yona tolempe yowiiraneya awe mmureerelo ahu.​—aRom. 15:4. *

7. Inamuna Yehova onaathokorerya awe arumeyi awe enooniherya exeeni?

⁷ Enamuna Yehova onaathokorerya awe atthu awe ennooniherya wira onniwoonela othunku. Tthiri Owo onnisuwela mixankiho sinimphwanya khula mmosa a hiyo. Yehova ‘onnisuwela mirima s’atthu othene’. (2 Wah. 6:30) Nave onnisuwela muupuwelo ahu, itthu ninwerya ahu ni nihinwerya ahu. Owo “khanihiya wira mwehereriwe ovikana ikuru sanyu”. (1 aKor. 10:13) Tthiri moolumo awo toomaaliha!

8-10. Itthu xeeni saamukhalihenrye Yesu waathokorerya saana atthu akina?

⁸ Okathi aari awe valaponi, Yesu aanaathokorerya atthu akina. Sookhala itthu tthaaru saamukhaliherya Yesu waathokorerya saana atthu akina. Yoopacerya, ntoko nilavunle ahu wanipacerya, Yesu aanimutakiha moomalela Tiithi awe a wiirimu. Omutakihaka Tiithi awe, Yesu aanaaphenta atthu. Nnaamwi aatteeliwa murima ni khula etthu aamukhalihenrye awe Yehova opattuxa, Yesu aanisiveliwa vanceene “okhala vamosá n’atthu”. (Mir. 8:31) Ophenta waahimwiiriha Yesu waathokorerya saana atthu akina.

⁹ Ya nenli, ntoko Yehova, Yesu onniwerya osoma mirima sa atthu. Eyo yaanimukhaliherya osuwela moonelo ni soophavela sa khula mutthu. (Math. 9:4; Yoh. 13:10, 11) Nto okathi yaariipiwa aya murima, waathokorerya saana waanimwiiriha waamaaliha ni waalipiha.​—Yes. 61:1, 2; Luka 4:17-21.

¹⁰ Ya neeraru, Yesu saahimphwanya mixankiho sikina sinaaphwanya apinaatamu. Mwa ntakiheryo, vanikhala ntoko wira Yesu aahuuwale etthoko ya atthu oohaawa. Muteko aavara awe tiithi awe omphwanya iihaniwa Yosefe, waahimukhaliherya Yesu woona wira ovila ovara muteko wooxankiha. (Math. 13:55; Mar. 6:3) Woonasa wene, Yosefe aakhwiiye ohinatthi opacerya muteko woolaleerya wa Yesu. Nave, Yesu aanisuwela owereya onimphwanya mutthu okhweliwe. Nave-tho, aanisuwela oxankiha waya okhala etthoko atthu arina aya itiini soovirikana. (Yoh. 7:5) Nto mixankiho iyo ni sikina saahimukhaliherya Yesu osuwela mixankiho ni moonelo wa apinaatamu.

11. Okathi xeeni Yesu aatempe awe woona othunku? Mutthokiherye. (Nwehe efootu ya ekaapa.)

¹¹ Othokorerya wa Yesu onnooneya okathi aapaka awe miiriirya. Yesu khapaka miiriirya mwaha wookhanyereriwa, masi etthu yuulupale yaamwiiriha opaka miiriirya, okhala wira ‘anamorela ikharari’ atthu ale yaahaawa. (Math. 20:29-34; Mar. 1:40-42) Mwa ntakiheryo, nkahaya muupuwele othunku wa Yesu,  okathi aamukunxe awe mulopwana ahiiwa wira ampenuxe. Nave muupuwele othunku aarina awe okathi aamuhihimunxe awe mwaana mwaamulopwana a naamukhweli. (Mar. 7:32-35; Luka 7:12-15) Tthiri Yesu aaniwoonela othunku atthu ale tivonto aakhalihenrye awe.

12. Yohani 11:32-35, onooniherya sai wira Yesu aanimoonela othunku Martha ni Maria?

¹² Yesu aahimoonela othunku Martha ni Maria. Okathi aawenhe awe yinlaka mwaha wa okhweliwa murokoraya iihaniwa Laazaro, “Yesu ahinla”. (Mmusome Yohani 11:32-35.) Yesu khanlale paahi mwaha wookhweliwa mutthu aamusuwela awe aahiiso mpatthani awe muulupale. Masi, aahinla mwaha woowi apatthani awe a vamurimani yaanihaawa mwaha wa okhwa wa Laazaro. Nto Yesu aahirowa omuhihimuxa Laazaro.

13. Xeeni ninlipa ahu osuwela othunku wa Yesu?

¹³ Ninnittottela mureerelo wiixutta voohimya sa othunku wa Yesu. Tthiri hiyo khanimalenle ntoko Yesu ori awe oomalela. Hata vari siiso, ninnimphenta, mwaha woowi onnithokorerya moonelo wa atthu akina. (1 Ped. 1:8) Nto osuwela wira owo Mwene a Omwene wa Muluku onninlipiha vanceene. Yesu onrowa omaliha ohaawa wotheene. Nave onoowerya omaliha mirala sotheene sa apinaatamu sikumiheriwe ni olamulelo wa Satana, maana Yesu aari pinaatamu. Ohiya-vo, ninnixukhurela okhalana Mwene ‘èhereriwe n’uhawa’ ntoko hiyo.​—aHéb. 2:17, 18; 4:15, 16.

14. Moovarihana ni aÉfeso 5:1, 2, exeeni nintthuneya ahu opaka?

¹⁴ Vaavo nnuupuwela ahu ntakiheryo na Yehova ni Yesu, onninikhaliherya wiimananiha waakhupanyerya atthu akina. (Mmusome aÉfeso 5:1, 2.) Tthiri hiyo khanniwerya osoma mirima ntoko Yehova ni Yesu. Hata vari siiso, nnoowerya osuwela moonelo ni itthu sinaaxankiha atthu akina. (2 aKor. 11:29) Moovirikana ni atthu owiitthuna a olumwenku ola, hiyo ninniimananiha weettela moolumo ari aFilipi 2:4 ani: “Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”.

15. Tani anitthuneya otepa woona othunku?

¹⁵ Axitokweene ahaana okhala atthu oothunku. Awo annisuwela wira anookohiwa mwaha wa enamuna anikhapelela aya ipwittipwitthi avahereriwa aya. (aHéb. 13:17) Wira awerye waakhaliherya anna ni arokora, axitokweene ahaana okhalana othunku. Masi anrowa wooniherya sai wira annithokorerya moonelo wa atthu akina?

16. Mutokweene oothunku onipaka exeeni? Xeeni opaka eyo eri aya etthu yootthuneya?

¹⁶ Mutokweene oothunku onniviriha okathi ori ene ni anna ni arokora. Owo onnipaka makoho ni onnaawiriyana anna ni arokora moopixa murima. Ti vootepa otthuneya opaka eyo, akhala wira munna aahiiso murokora onniphavela omutthukulela murima mutokweene. Nave mutokweene owo ohaana ophavela moolumo oolipiha ni oomaaliha. (Mir. 20:5) Vaavo axitokweene aniviriha aya okathi ari ene ni anna, awo anniphentiwa, ororomeliwa ni waataana ni anna otheene a mmulokoni.​—Mit. 20:37.

17. Mukhalelo xeeni wa axitokweene onaasivela anna ni arokora anceene? Nvahe ntakiheryo.

¹⁷ Anna ni arokora anceene anihimya wira mukhalelo onaasivela vanceene wa axitokweene ori othunku aahiiso othokorerya moonelo wa atthu akina. Nthowa xeeni? Adelaide onihimya so: “Vannikhweya olavulana mutokweene akhala wira onnisuwela ni onnithokorerya moonelo anyu”. Owo onincererya so: “Enamuna onivaanela awe ni nyuwo ennookhaliheryani  woona akhala wira mutokweene owo ookhalana othunku aahiiso onnithokorerya moonelo anyu”. Munna yoowo onixukhurela enamuna aathokoreriwa awe ni mutokweene onihimya so: “Kaanoona maithori a mutokweene ole okathi kaamutthokiherya aka muxankiho aka. Okathi wotheene kinnuupuwela enamuna aakithokorenrye awe”.​—aRom. 12:15.

18. Munrowa wunnuuherya sai waathokorerya wanyu atthu akina?

¹⁸ Ekeekhai wira khahiyo axitokweene paahi tanireerela othokorerya moonelo wa atthu akina. Otheene ahu nihaana waathokorerya atthu akina. Moota xeeni? Mwiimananiheke osuwela mixankiho sa atthu a vatthokoni vanyu ni anna ni arokora a mmulokoni. Mwaathokoreryeke saana amiravo a mmulokoni, atthu oowuuluvala, ale aniwereyasiwa ni ale akhweliwe. Mwaakoheke ihaali saya. Nto okathi anilavula aya mwaawiriyaneke moopixa murima. Nwooniheryeke wira munniwoonela othunku mwaha wa itthu saakhumelenle. Mwaakhaliheryeke mpakha vaniwerya anyu. Vaavo munipaka anyu eyo, munimooniherya wira munnaaphenta ni murima wotheene.​—1 Yoh. 3:18.

19. Xeeni nintthuneya ahu wiixaakuviha okathi nnaakhaliherya ahu atthu akina?

¹⁹ Nihaana okhala oowiixaakuviha okathi nnaakhaliherya ahu atthu akina. Nthowa xeeni? Mwaha woowi okathi wa mixankiho khula mutthu onnikhalana moonelo awe. Atthu akina onnaasivela ovaanela aahiiso ohimya itthu sinaaxankiha, masi akina nnaari. Nto okathi nnaakhaliherya ahu, nihaana osyaka waakoha itthu sinrowa otepa waaxankiha. (1 aTes. 4:11) Hata atthu akina aphavelaka onileela moonelo aya, woonasa wene khanneemererya itthu sotheene anihimya aya. Hata vari siiso, nihaana osuwela wira owo moonelo aya. Nto naakuveleke owiriyana, masi nipiseke olavula.​—Math. 7:1; Yak. 1:19.

20. Mwaha onittharelana, ninrowa waakhula nikoho xeeni?

²⁰ Ohiya paahi othokorerya moonelo wa anna ni arokora mmulokoni, nihaana owooniherya mukhalelo owo atthu nnaalaleerya ahu. Masi ninrowa owoonela sai othunku atthu nnaalaleerya ahu? Nikoho nna ninrowa waakhula mwaha onittharelana.