1. Musuweli 3:1, 7, onniixuttiha exeeni?

ATTHU akina waasivela olavula vanceene. Masi akina toomaala. Yoolepa ya mwaha ola, ennooniherya wira wookhala okathi woolavula ni okathi woomaala. (Mmusome Musuweli 3:1, 7.) Nave, onninsivela vaavo anna ni arokora akina anilavula aya vanceene. Nave-tho vanninsivela vaavo anna ni arokora akina anilavula aya vakhaani.

2. Tani onireerela ovaha malamulo a okathi ni moota ninreerela ahu olavula?

² Olavula yoovaha enikhuma wa Yehova. (Okhum. 4:10, 11; Wis. 4:11) Orumeelaka nuulumo nawe Biibiliya, Yehova onninikhaliherya osuwela orumeela oratteene yoovaha eyo. Mwaha ola, ninrowa othokorerya matakiheryo a mBiibiliyani anrowa onikhaliherya osuwela okathi woolavula ni okathi woomaala. Nave, ninrowa woona moota Yehova onoonela awe ele nnaaleela ahu atthu akina. Wanipacerya, nrowe nithokorerye okathi ninreerela ahu olavula.

3. ARoma 10:14, onnitumererya opaka exeeni?

³ Okathi wotheene nihaana wiilokiherya wira naalaleerye atthu voohimya sa Yehova ni Omwene awe. (Math. 24:14; mmusome aRoma 10:14.) Vaavo nimpaka ahu eyo, ninnimutakiha Yesu. Maana etthu yuulupale yaamwiirinhe Yesu orwa valaponi waari waalaleerya atthu ekeekhai voohimya sa Tiithi awe. (Yoh. 18:37) Masi muhiliyale wira nihaana ovaha ephoole enamuna ninlavula ahu. Tivonto vaavo nnaalaleerya ahu atthu akina voohimya sa Yehova nihaana ‘owakhula sana ’ni mwa nttittimiho. Niira siiso, nnimooniherya wira ninnithokorerya moonelo ni sookupali sa atthu akina. (1 Ped. 3:15) Nave ohiya paahi olavula ni atthu awo, nnoowerya owiixuttiha mwa enamuna nikhanle ahu oowaavara murima.

4. Ntoko onihimya awe Miruku 9:9, olavula onaakhaliherya sai atthu akina?

 ⁴ Axitokweene ahooveleleke olavula ni anna ni arokora etthu anoona aya wira ahaana olokiherya aahiiso waavaha miruku vaareerelaka. Masi ahaana opaka eyo, okathi wooreerela olavula wira ahimunyoonyihe munna owo aahiiso murokora. Nave ahaana olavulana ahikhanle atthu akina. Okathi wotheene axitokweene anniimananiha olavula mwa enamuna enooniherya wira annaattittimiha ale anilavulana aya. Nave-tho, khanoovelela owooniherya malakiheryo a mBiibiliyani anrowa waakhaliherya anna opaka soothanla mwa miruku. (Musome Miruku 9:9.) Xeeni okathi mukina vanireerela aya olipa murima wira nilavule? Nkahaya nwehe matakiheryo manli oovirikana. Ntakiheryo nimosa ti na paapa oniphavela waapwapwela anaawe. Vano nikina ti na muthiyana oniphavela olavula ni mulopwana onrowa okhala mwene.

5. Okathi xeeni Mukhulupale a Anamukuttho Eli ahaalimpe awe murima wira olavule?

⁵ Mukhulupale a Anamukuttho Eli, aahikhalana anamwane anli aaphenta awe vanceene. Awo yaahikhalana muritti a vameekhaaya, maana yaari anamukuttho otabernaakulu. Hata vaari siiso, anamwane awo khiyaamuttittimiha Yehova. Maana awo yaanipuherya okhulupale aya, mwaha woowi khiyaattittimiha mikuttho aavahiwa Yehova. Nave-tho yaanaarupiha athiyana mutabernaakulu. (1 Sam. 2:12-17, 22) Moovarihana ni Nlamulo na Moise, itthu soohiloka anamwane a Eli yaapaka aya yaaphwanela wiiviwa. Ohiya opaka eyo, Eli aamwaaweha paahi ni aahiweemererya ovikaniha orumeela mutabernaakulu. (Otum. 21:18-21) Moota Eli aathokorenrye awe mwaha ole Yehova oonenle sai? Owo aahimukoha Eli wira: “Exeni mwattittimihaka vanjene an’inyu okivikana miyo?” Yehova aahilakela owiiva anamwane ale anli a Eli ootakhala.—1 Sam. 2:29, 34.

6. Yowiiraneya ya Eli, enniixuttiha exeeni?

⁶ Yowiiraneya ya Eli enniniixuttiha etthu yuulupale. Akhala wira mpatthani aahiiso mmusi ahu khoniiwelela malamulo a Muluku, nihimaaleke paahi, nihaana olavulana ni omuupuxerya malamulo a Yehova. Moottharelana nihaana omukhaliherya wira aavekele nikhaliheryo axitokweene. (Yak. 5:14) Nihikhala-khale nittharaka ntakiheryo na Eli. Nnimooniherya eyo, akhala wira khanintepa waattittimiha apatthani ni amusi ahu onvikana Yehova. Ekeekhai wira vanitthuneya olipa murima wira nilavule ni mutthu opanke etthu yoohiloka, masi olipa murima onnikumiherya mireerelo. Nkahaya nwehe ovirikana okhanle eriyari ya yowiiraneya ya Eli ni ntakiheryo na muthiyana a wIsarayeli iihaniwa Abigayili.

7. Exeeni yaamwiirinhe Abigayili orowa olavula ni Davidi?

 ⁷ Abigayili aatheliwe ni thaaciri iihaniwa Nabali. Okathi Davidi ni anakhotto awe yaamutthyawa aya Mwene Sawuli, awo yaahiviriha okathi vakhaani ari ene ni amakampusi a Nabali ni yaahaakhaliherya wira inama sa Nabali sihiiyiwe. Niireke Nabali aahixukhurela okhaliheriwa ni Davidi? Nnaari. Okathi Davidi anvekenle awe Nabali wira aavahe alopwana awe yoolya vakhaani ni maasi, Nabali aahinanariwa vanceene ni aahaaruwana. (1 Sam. 25:5-8, 10-12, 14) Mwaha wa Nabali opaka eyo, Davidi aahilakela owiiva alopwana otheene etthoko ya Nabali. (1 Sam. 25:13, 22) Yaahaana opakiwa etthu wira eyo ehiiraneye. Masi moota xeeni? Abigayili aahoona wira waahiphiya okathi wira olavule. Nto moolipa murima aahirowa olavula ni Davidi, yoowo aari ni alopwana 400 yaakunxe ikatana, mavaka, yaananariwe vanceene ni yaavoliwe etala.

8. Ntakiheryo na Abigayili ninniixuttiha exeeni?

⁸ Okathi Abigayili amphwannye awe Davidi aahilavula moolipa murima, mwa nttittimiho ni mwa enamuna yaamwiirinhe Davidi okupali ele aahimmye awe. Nnaamwi Abigayili ahaarina nthowa, owo aahivekela wira oleveleliwe ni Davidi. Abigayili aahihimya wira Davidi aahikhalana mikhalelo sooloka, nave Abigayili aanikupali wira aamukhaliheriwa ni Yehova. (1 Sam. 25:24, 26, 28, 33, 34) Nimutakihaka Abigayili, nihaana olipa murima wira nilavule ni mutthu nimmoona ahu wira onnipaka itthu sinrowa omwiiriha opaka etampi. (Esal. 141:5) Okathi nimpaka ahu eyo nihaana omuttittimiha ni omuleela ekeekhai. Vaavo nninvaha ahu miruku moophenta, ninnooniherya wira na apatthani eekeekhai.—Mir. 27:17.

9-10. Axitokweene ahaana wuupuwela exeeni okathi anivaha aya miruku?

⁹ Ti vootthuneya axitokweene olipiha murima wira alavule ni anna anipaka itthu soohiloka mmulokoni. (aGal. 6:1) Moowiiyeviha axitokweene annisuwela wira toohimalela ni pooti ovahiwa miruku. Masi eyo kheniwiiriha axitokweene  ohiya waavaha miruku aahiiso waapwapwela ale anipaka itthu soohiloka. (2 Tim. 4:2; Tito 1:9) Vaavo aninvaha aya miruku mutthu, annirumeela eparakha ya olavula wira amwiixuttihe mwa enamuna yooloka ni moopixa murima. Ophenta onniwiiriha axitokweene omukhaliherya munna owo. (Mir. 13:24) Masi etthu antepa aya ovaha efaita omuttittimiha Yehova, nto annipaka eyo yaakiheryaka malamulo awe ni waakhapelela anna wira ahihapuxiwe ni itthu sootakhala.—Mit. 20:28.

¹⁰ Mpakha-va noothokorerya okathi ninreerela ahu olavula. Masi okathi mukina vannireerela omaala. Mixankiho xeeni sikhanle ookhumelela okathi owo?

11. Nlikanyiho xeeni Yakobo aapanke awe, ni ninvarihana sai ni olavula?

¹¹ Okathi mukina vannixankiha okasoopa nlumi nahu. Mulipa oomulepa Biibiliya Yakobo, aahipaka nlikanyiho nnooniherya oratteene muxankiho owo. Owo aahimmye so: “Akhalá mutthu ohinttheka mwaha wa molumo, mutth’uwo t’òrera murima vomalela: owo onniwerya wettiha erutthu awe yothene. Hiyo ninnihela eyettiheryo mwano mw’akhavalo, wira enìwelele”. (Yak. 3:2, 3) Eyeettiheryo yaaheliwa vamuru ni owanoni wa ekhavalo. Vano orumeelaka mikhoi sa eyeettiheryo, mulipa oneettiha ekhavalo aaniiriha ekhavalo eyo weemela. Akhala wira mulipa oneettiha ekhavalo khaavarela saana mikhoi iyo, ekhavalo eyo yaamutthimaka vanceene mpakha wiikumiherya ehasara ni omukumiherya ehasara ole oneettiha. Mwa enamuna emosaru, wookhala okathi ninreerela ahu ovarela mikhoi sa nlumi nahu wira nihikumiherye mixankiho sinceene. Nrowe niwehe okathi ninreerela ahu okasoopa moolumo ahu aahiiso vahinnreerela aya olavula.

12. Okathi xeeni vanireerela aya ohela “eyettiheryo” vanlumini vahu wira nihilavule?

¹² Munipaka exeeni vaavo munna aahiiso murokora, oniphavela awe olavula myaha munoona  anyu wira esiiri? Mwa ntakiheryo, akhala wira munnimphwanya mutthu onikhala elapo muteko ahu onikhoottihiwa aya, niireke murima onnookhumani munaphavela osuwela moota muteko ahu woolaleerya onivariwa aya elapo ele? Ekeekhai wira munimukoha wira musuwele etthu eniiraneya. Maana ninnaaphenta anna ni arokora anikhala elapo eyo ni muniphavela osuwela itthu siniwiiraneela. Nave okathi nnaavekelela ahu nimphavela ohimya masina aya. Masi okathi mukina, vannireerela ohela “eyettiheryo” vanlumini vahu wira nihilavule. Akhala wira ninnimukhanyererya mutthu wira onileele isiiri, nnooniherya wira khannimphenta mutthu owo. Nave nnooniherya wira khinnaaphenta anna ni arokora amuleelale isiiri iyo. Tthiri khuuvo mmosa a hiyo oniphavela wuncererya mixankiho sa anna ni arokora anikhala ilapo muteko ahu onikhoottihiwa aya ni guvernu. Mwa enamuna emosaru khuuvo munna aahiiso murokora onikhala ilapo iyo okhanle oowaaleela atthu akina moota anna ni arokora a elapo eyo anlaleerya aya ni anivara aya miteko sikina sa eKristau.

13. Ntoko onihimya awe Miruku 11:13, axitokweene ahaana opaka exeeni ni nthowa xeeni?

¹³ Ti vootepa otthuneya axitokweene ovarihela muteko malakiheryo ari Miruku 11:13. (Musome.) Annipaka eyo vaavo ahinaaleela aya isiiri atthu akina ahinreerela osuwela. Vannitepa oxankiha opaka eyo akhala wira mutokweene owo toothela. Ekeekhai wira, wira ekasamento elipe, anamathelana ahaana ovaanela itthu sa isiiri, moonelo aya, muupuwelo ni itthu sinaaxankiha. Masi mutokweene onnisuwela wira khonireerela omuleela mwaarawe isiiri sa anna ni arokora a mmulokoni. Ale avahiwe okhulupale mmulokoni ahaana okhala “èkekhai”. (1 Tim. 3:8) Eyo entaphulela wira ahaana osyaka wootha aahiiso owaapa atthu akina. Akhala wira mutokweene onnimphenta mwaarawe, owo khonrowa omuleela isiiri ohinreerela awe osuwela.

14. Muthiyana otheliwe ni mutokweene onrowa omukhaliherya sai iyawe okhala oottittimiheya?

¹⁴ Muthiyana otheliwe ni mutokweene onoowerya omukhaliherya iyawe okhala oottittimiheya. Moota xeeni? Vaavo ohinimukhanyererya awe iyawe wira omuleele itthu sa isiiri. Vaavo muthiyana ootheliwa onipaka awe eyo, owo khahiyo paahi onooniherya wira onimukhaliherya iyawe, masi onnooniherya wira onnaattittimiha ale amulenle iyawe isiiri iyo. Etthu yootepa otthuneya okhala wira muthiyana owo onnimuhakalaliha Yehova ni onnikhaliherya okhaliha murettele ni wiiraana mmulokoni.—aRom. 14:19.

15. Yehova oonenle sai itthu yaalavunle aya apatthani araru a Yobi, ni nthowa xeeni?

¹⁵ Yowiiraneya enilavuliwa mBiibiliyani ya Yobi enniniixuttiha etthu yuulupale voohimya sa moota ni okathi woolavula. Nuumala Yobi omukhumelela ihasara sinceene sooriipiha murima, alopwana axexe yaahirowa omuxukurya wira ammaalihe ni onvaha miruku. Alopwana awo yaahiviriha okathi munceene amaalale ene. Masi ele aahimmye awe Elifazi, Bildadi ni Sofari yaahooniherya wira, okathi ole wotheene yaavirinhe aya amaalale ene, khahiyo yuupuwela enamuna yoomukhaliherya Yobi. Ohiya-vo, alopwana awo araru yuupuwela enamuna yaakhanle aya oomooniherya Yobi wira aahipaka etthu yoohiloka. Nnaamwi itthu yaalavula aya saakhala ntoko wira ti sekeekhai, itthu sinceene yaalavunle aya voohimya sa Yobi ni Yehova saari sootakhala ni sowoothiwa. Alopwana ale yaahimuhimya Yobi okhala mutthu ootakhala murima. (Yobi 32:1-3) Yehova oonenle sai? Owo aahinanariwa vanceene mwaha wa itthu alopwana ale araru yaahimmye aya. Nave Yehova aahaahimya okhala alolo ni aahinvekela Yobi wira aavekelele.—Yobi 42:7-9.

16. Itthu xeeni nniixutta ahu ni ntakiheryo noohiloka na Elifazi, Bildadi ni Sofari?

 ¹⁶ Sookhala itthu sinceene nniixutta ahu ni ntakiheryo noohiloka na Elifazi, Bildadi ni Sofari. Yoopacerya, nihaana osyaka waaphukela annihu. (Math. 7:1-5) Ohiya opaka eyo, nihaana waawiriyana oratteene nihinatthi olavula. Niira siiso, nnoowerya osuwela itthu sinaaxankiha. (1 Ped. 3:8) Ya nenli, okathi ninlavula ahu, nihaana olavula mooreerela murima ni olavula itthu sekeekhai. (aÉf. 4:25) Ya neeraru, Yehova onnivaha efaita yinceene itthu nnaaleela ahu atthu akina.

17. Ntakiheryo na Elihu ninniixuttiha exeeni?

¹⁷ Mulopwana a neexexe aamuxukunrye Yobi aari Elihu, mmusi awe Abrahamu. Elihu aahaawiriyana oratteene alopwana ale araru ni Yobi okathi yaalavula aya. Vannoneya wira Elihu aanivaha ephoole etthu alopwana ale yaalavula aya, maana aahiwerya ovaha miruku sooloka saamukhalihenrye Yobi olokiherya muupuwelo awe. (Yobi 33:1, 6, 17) Etthu Elihu aatepa awe ovaha efaita, waari onvuwiha Yehova ohiya wiivuwiha aahiiso onvuwiha mutthu mukina. (Yobi 32:21, 22; 37:23, 24) Ntakiheryo na Elihu ninniniixuttiha wira okathi mukina vannireerela omaala nnawiriyana paahi. (Yak. 1:19) Nave ninniixuttiha wira okathi nninvaha ahu miruku mutthu, etthu yootepexa otthuneya onvuwiha Yehova ohiya wiivuwiha.

18. Ninrowa wooniherya sai wira ninnixukhurela yoovaha ya olavula?

¹⁸ Nnimooniherya wira ninnivaha efaita eparakha ya olavula akhala wira ninnitthara malakiheryo a mBiibiliyani voohimya sa okathi ni moota woolavula. Mwene a ankhili Salomoni aahuupuxeriwa olepa wira: ‘Molumo òrera ahimmwe okathi worera anlikana [ni masa a] ewero ahotthiwe mmukalani motutha’. (Mir. 25:11) Okathi nnaawiriyana ahu oratteene atthu akina vaavo anilavula aya ni wuupuwela nihinatthi olavula, moolumo ahu anrowa okhalaka ntoko masa a eweero, eyo piiyo, anookhalana efaita ni anooreera vanceene. Niira siiso, hata nlavulaka vanceene aahiiso vakhaani, moolumo ahu animwaalipihaka akina ni omuhakalaliha Yehova. (Mir. 23:15; aÉf. 4:29) Eyo enamuna yoolokexa nikhanle ahu oowooniherya wira ninnixukhurela yoovaha ya olavula enikhuma wa Muluku!