MaKristau makina, annirumeela etekonologia ya niinaano wira avaaneleke ni amusi aya aahiiso anna ni arokora akina. Tthiri okathi onaarumeela awe aredes sociais, muKristau oolipa momunepani onimuupuwela malakiheryo ala anihimya wira: “Mutthu òwipasopa onnòna yowòpiha, anahuluwa: mulolo onnikumana vohupuwela, khutakhaliwa”.—Mir. 27:12.

Ninnisuwela wira Yehova oniphavela onikhapelela. Owo oniphavela wira nisyakeke waataana ni atthu anikumiherya ohiiwanana, okawanyeya, atthu ookumihiwa mmulokoni ni ale animwara-mwarya soowiixuttiha sowoothiwa. (aRom. 16:17; 1 aKor. 5:11; 2 Yoh. 10, 11) Atthu akina anithukumana ni hiyo mmulokoni, pooti wira mweettelo aya khonivarihana ni malamulo a mBiibiliyani. (2 Tim. 2:20, 21) Tthiri vaavo nnaathanla ahu apatthani ahu, nihaana wuupuwela eyo. Nto vannivila waathanla mwa miruku apatthani akhala wira ninvanela paahi ni atthu awo naarumeelaka aredes sociais.

Nave, musuweleke wira vannitepa ovila waathanla apatthani ooloka ni mwa miruku akhala wira ninvanelana ni aredes sociais nirumeelaka ikrupu suulupale. MaKristau makina yaahipacerya ovaneela yaarumeelaka redes socias ikrupu suulupale sa atthu. Masi etthu yaakhumelenle ti yooriipiha murima. Nto munna wala murokora aarowa owerya sai okhalana ephoole ovaanelaka ni atthu anceene aarumeelaka aredes socias? Tthiri khivaarowa oweryaneya osuwela oratteene mukhalelo wa omunepani wa khula mutthu a ekrupu eyo. Esalimo 26:4, enihimya so: “Miyo nkikilanthe n’alavilavi: nkìranne n’atthu a mirima mili”. Eversiikulu ela, ennooniherya oratteene wira ti vooloka ovaanela mwaarumeelaka aredes sociais ni atthu munaasuwela anyu oratteene.

Hata ovaanelaka ni atthu vakhaani aarumeelaka aredes sociais, muKristau ohaana ovarerya okathi oniviriha awe aarumeelaka aredes sociais ni etthu oniphavela awe. Khahiyo ti vooloka omakela omwaakhula khula mutthu onaarumeela aredes sociais moohicikha okathi muniviriha anyu nvaanelaka ni atthu awo. Murummwa Paulo aahimulopola Timootheyo voohimya sa atthu “owaapa atthu ni anniikeliha myaha sihikhanle sawaya”. (1 Tim. 5:13) Olelo-va, vannikhweya owaapa atthu akina ni wiikeliha myaha sa atthu akina naarumeelaka aredes sociais.

Khuuvo muKristau oolipa momunepani onviriha okathi awe owehaka ikomentaariyu soohiloka wala myaha sihinimwiira mpantta sa anna ni arokora. (Esal. 15:3; Mir. 20:19) Nave, aamusyaka soohimmwa soohiloka wala sootepihiwa ni myaha ohinsuwela awe akhala wira ti sekeekhai wala nnaari. (aEef. 4:25) Tthiri, hiyo ninnaakhela myaha sooloka ni soororomeleya va jw.org ni iprokrama sa khula mweeri sa JW Broadcasting^®.

Anamoona a Yehova akina, annaarumeela aredes socias wira etumihe, athume aahiiso wira amulaleye nakosa aya wala waavaha atthu akina muteko. Myaha iyo ti sa nakoso paahi, khasinivarihana ni omukokhorela wahu Yehova. Nto munna onikhootta ophenta musurukhu onnisyaka waarumeela anna ni arokora wira omulaleye nakosa awe.—aHeeb. 13:5.

Nto niireke pooti waarumeela aredes sociais wira nivekele musurukhu wira naakhaliherye anna ni arokora oothoiwa aahiiso yaaphwannye ehasara ya ephattu? Tthiri hiyo ninnaaphenta vanceene anna ni arokora nave nimphavela waakhaliherya ale oothoiwa ni waalipiha. (Yak. 2:15, 16) Masi ophavela waakhaliherya ni waalipiha anna ni arokora naarumeelaka redes socias pooti oxankiha mareheryo apakiwe ni efiliyaali aahiiso muloko. (1 Tim. 5:3, 4, 9, 10, 16) Khuuvo mutthu a hiyo aarowa owiiriha atthu akina wuupuwelaka wira noothanliwa mwa enamuna ya vameekhaaya wira naakhapeleleke atthu a Muluku.

Tthiri nimphavela opaka sotheene ninwerya ahu wira ninvuwiheke Muluku. (1 aKor. 10:31) Nto, akhala wira muniphavela waarumeela aredes socias, wala etekonologia ekina muhaana othokorerya oratteene mixankiho sinrowa wookhumelelani ni wiivaha ephoole.