1. Xeeni Yesu anvekenle awe Yehova waakhapelela awiixutti awe?

OHIYU wookiserya aari awe valaponi, Yesu aanuupuwela mixankiho saarowa waakhumelela atthareli awe. Nto okhala wira aanaaphenta apatthani awe ale, Yesu aahinvekela Tiithi awe wira ‘aakhapeleleke mwaha wa Satana’. (Yoh. 17:14, 15) Yesu aanisuwela wira nuumala otthikela wiirimu, Satana khaarowa ohiya owana ni atthu otheene yaarowa othanla omukokhorela Yehova. Tthiri vannooneya wira arumeyi a Yehova ahaana okhapeleliwa.

2. Etthu xeeni ennikupaliha wira Yehova onimwaakhula mavekelo ahu?

² Okhala wira onnimphenta Mwanawe, Yehova aahaakhula nivekelo na Yesu. Akhala wira ninniimananiha omusiveliha Yehova, owo onooniphentaka ni onimwaakhulaka mavekelo ahu, vaavo nninvekela ahu wira onikhaliherye ni onikhapelela. Ntoko paapa onaakhapelela awe anaawe, Yehova khonrowa ohiya waakhapelela anaawe moophenta. Tthiri akhala wira khaarowa opaka eyo, nsina nawe ni omutthu awe waarowa oveehiwaka!

3. Xeeni olelo-va nintthuneya ahu okhapeleliwa ni Yehova?

³ Olelo-va, nihaana okhapeleliwa ovikana khalai. Mwaha wa xeeni? Mwaha woowi Satana ohoomoliwa wiirimu “onanariwe ene vanceene”. (Wiis. 12:12) Nto Satana owiiriha atthu anceene onilupattha ‘yuupuwelaka wira aninvarela muteko Muluku’. (Yoh. 16:2) Nave atthu akina yaawo ahinimukupali Muluku anninlupattha mwaha woowi khanniirela mpantta myaha sa mulaponi. Nto hata atthu awo yiimananihaka onilupattha, hiyo khannoova. Mwaha wa xeeni? Mwaha woowi Biibiliya onihimya so: “Apwiya toororomeleya, nave awo animoolipihani ni anoowaakiheryani Mutakhali”. (2 aTes. 3:3) Yehova onnikhapelela sai? Nrowe niwehe inamuna piili Yehova onnikhapelela awe.

4. Moovarihana ni aEefeso 6:13-17, etthu xeeni Yehova onivanhe awe wira niikhapeleleke?

⁴ Yehova oonivaha ikaruma sotheene sa ekhotto wira niikhapeleleke  vaavo nintupheliwa ahu ni Satana. (Mmusome aEefeso 6:13-17.) Ikaruma iyo sa ekhotto nivahiwe ahu ni Muluku ti soolipa ni sinnivara saana muteko. Masi naaphavelaka wira ikaruma iyo sinikhapeleleke, nihaana owara sotheene ni okhapelela oratteene. Khula ekaruma enitaphulela exeeni? Nrowe nithokorerye oratteene khula ekaruma.

5. Esintu ya ekeekhai exeeni ni xeeni nintthuneya sahu owara?

⁵ Esintu ya ekeekhai enitaphulela ikeekhai sotheene siri Nuulumo na Muluku, Biibiliya. Xeeni vanireerela aya owara esintu? Mwaha woowi Satana “tithi a wotha”. (Yoh. 8:44) Tthiri Satana ooviriha iyaakha sinceene aawokaka apinaatamu, nto oowerya ‘waahapuxa atthu anikhala elapo yotheene ya vathi’! (Wiis. 12:9) Nto ikeekhai siri mBiibiliyani, sinninikhapelela wira nihiwokiwe. Ninrowa owara sai esintu ela ya nthoonyeryo? Ninniwara esintu eyo ya nthoonyeryo nihihiyaka wiixutta ikeekhai voohimya sa Yehova, omukokhorela ‘neettihiwaka ni munepa ni ekeekhai’ ni niroromeleyaka mwa inamuna sotheene.—Yoh. 4:24; aEef. 4:25; aHeeb. 13:18.

6. Yoowara ya eyuuma eri exariya exeeni ni xeeni nintthuneya ahu owara?

⁶ Yoowara ya eyuuma enikhapelela epeeto, eri exariya enitaphulela malamulo a xariya a Yehova. Xeeni nintthuneya ahu owara yoowara ya eyuuma? Ntoko siisaale yoowara ya eyuuma enikhapelela aya murima wa nakhotto wira ohihommwe, yoowara ya eyuuma ya nthoonyeryo ennikhapelela murima ahu wa nthoonyeryo aahiiso omutthu ahu wira ohihononiwe ni olumwenku ola wootakhala. (Mir. 4:23) Yehova oniphavela wira nimphenteke ni murima ahu wotheene ni nimukokhoreleke yoowo paahi. (Math. 22:36, 37) Masi Satana onniimananiha okawanya murima ahu, onnipaka eyo oniirihaka osiveliwa itthu sa molumwenkuni ni itthu Yehova oninyokha awe. (Yak. 4:4; 1 Yoh. 2:15, 16) Nto oona vale wira inamuna iyo khasinimukhumela saana, owo onniimananiha oniiriha opaka etthu ehinivarihana ni malamulo a xariya a Yehova.

7. Nnooniherya sai wira noowara yoowara ya eyuuma?

⁷ Ninniwara yoowara ya eyuuma niiwelelaka ele Yehova onihimya awe okhala yooloka ni yoohiloka ni nikhalaka moovarihana ni malamulo awe a xariya. (Esal. 97:10) Atthu akina anoona wira malamulo a xariya a Yehova annaakhoottiherya okhala ootaphuwa ni opuha. Nto akhala wira nnoohiya ovarihela muteko malamulo ni malakiheryo a mBiibiliyani mookumini mwahu, naarowa olikanaka ni nakhotto orunle yoowara awe ya eyuuma nlelo ori ene okhottoni uupuwelaka wira ennitepa omulemela. Tthiri opaka eyo yaarowa okhala etthu ya elolo. Ale animphenta Yehova annisuwela wira “sooruma sawe khasinvila weettela” ni sinnoopola okumi.—1 Yoh. 5:3.

8. Ontaphulela exeeni owara ixapattho, eyo piiyo, okhala oolikana ene olaleya ihapari sooreera?

⁸ Murummwa Paulo oonitumererya owara ixapattho, eyo piiyo, okhala oolikana ene olaleya ihapari sooreera sa murettele. Eyo enooniherya wira okathi wotheene nihaana okhala oolikana ene wira nilaleye ihapari sooreera sa Omwene. Nto vaavo nnaalaleerya ahu atthu akina muhupi wa mBiibiliyani, waamini wahu onnitepa olipa. Tthiri ninnihakalala vanceene vaavo nnaaweha ahu atthu a Yehova olumwenku wotheene attottelaka mureerelo khula okathi wira alaleye ihapari sooreera. Mwa ntakiheryo, awo annilaleerya omutekoni, oxikola, empa ni empa, mapuro aneettiwa nakoso, okathi anaaxukurya aya amusi aya ahikhanle Anamoona a Yehova ni olaleerya moohiilokiherya. Vaakhanle wira naamuhiya olaleerya mwaha wa woova, naarowa olikanaka ni nakhotto onirula ixapattho sawe owanaka ekhotto, nto vaamukhweya ovulala. Nave vaamunvila wiikhapelela ni otthara malakiheryo a komantante awe.

9. Xeeni nintthuneya ahu okuxa nikula nahu na wiixaakiha ori waamini?

 ⁹ Nikula nuulupale na wiixaakiha, ori waamini nintaphulela omwaamini wahu Yehova. Hiyo ninnikupali wira Yehova onoopaka itthu sotheene oleihenrye awe. Nto waamini iwo onninikhaliherya “ottipiha mattheere a mooro a Mutakhali”. Xeeni vanireerela aya okuxa nikula nuulupale na wiixaakiha? Mwaha woowi nikula nahu ninninikhaliherya wiikhapelela mwaha wa sowiixuttiha sa anammwareya ni ninninikhaliherya ohoova itthu anihimya aya ale annivaanyiha. Tthiri waamini tonrowa onikhaliherya okhootta vaavo atthu akina annikhanyererya aya ohiiwelela malamulo a xariya a Yehova. Nto okathi wotheene ninkhootta ahu opaka itthu soohiloka sinimunanara Yehova oxikola wala omutekoni, hiyo ninnikhapelela waamini wahu ni ninnooniherya wira nookuxa nikula nahu. (1 Ped. 3:15) Nave vaavo ninkhootta ahu muteko naarowa ahu oliviwaka musurukhu munceene, masi wahaarowa ohineemererya oviriha okathi nivaraka muteko wa Yehova, ninnooniherya wira nookuxa nikula nahu. (aHeeb. 13:5, 6) Nave-tho okathi wotheene nihinhiya ahu omukokhorela Yehova hata nilupathiwaka ninnooniherya wira ninnikhapelela nikula nahu.—1 aTes. 2:2.

10. Ekapaseeti ori woopowa exeeni ni xeeni nintthuneya ahu owara?

¹⁰ Ekapaseeti, ori woopowa, enthoonyerya nlipelelo Yehova onivanhe awe. Nto nlipelelo ninniniiriha  okupali wira Yehova onimwaatthuvela atthu otheene anipaka yootthuna awe ni hata akhwaaka onimwaahihimuxa. (1 aTes. 5:8; 1 Tim. 4:10; Tito 1:1, 2) Ntoko siisaale ekapaseeti enikhapelela aya muru wa nakhotto, nlipelelo nahu na woopoliwa ninnikhapelela muupuwelo ahu. Moota xeeni? Nlipelelo nahu ninninikhaliherya waawehexexa anatiri a Muluku ni ninnikhaliherya ohitepa oxanka okathi wa mixankiho. Ninrowa wooniherya sai wira noowara ekapaseeti? Ninnooniherya wira noowara ekapaseeti, akhala wira moota nnoonela ahu itthu olikanaka ni moonelo wa Yehova. Mwa ntakiheryo, nlipelelo nahu khaninlipa ni mihakhu sowaakuva omala, masi ninlipa ni Muluku ahu.—Esal. 26:2; 104:34; 1 Tim. 6:17.

11. Xoowa a munepa onitaphulela exeeni ni nimmurumeela sai?

¹¹ Xoowa a munepa, onthoonyerya Nuulumo na Muluku, Biibiliya. Xoowa owo ookhalana owerya woopwetexa miyuupuwelo sotheene seiyo siniwiiriha atthu okhala ipottha sa sowiixuttiha ni soolema soohiloka. (2 aKor. 10:4, 5; 2 Tim. 3:16, 17; aHeeb. 4:12) Ninniixutta omurumeela oratteene xoowa owo nipakaka yoosoma ahu ya Biibiliya ni itthu nniixuttihiwa ahu ni mutthenkeso wa Muluku. (2 Tim. 2:15) Ohiya paahi onivaha ikaruma sa ekhotto, Yehova oonivaha etthu ekina wira onikhapelele. Etthu xeeni?

12. Etthu xeeni ekina ninreerela ahu opaka ni nthowa xeeni?

¹² Nakhotto okhumme khalai owana onnisuwela wira khonrowa owerya waaxintta anakhotto akina mekhawe, owo onnisuwela wira ohaana okhaliheriwa ni anakhotto akhwaawe. Mwa enamuna emosaru, mekhihu paahi khaninrowa owerya omuxintta Satana ni ale animukhaliherya. Nto nihaana okhaliheriwa ni anna ni arokora wira nimuxintte Satana. Yehova oonivaha anna ni arokora a “olumwenku wotheene”, yaawo annikhaliherya.—1 Ped. 2:17.

13. Moovarihana ni aHeeberi 10:24, 25, ninrowa ottottela sai mureerelo mithukumano?

¹³ Enamuna emosa ninkhaliheriwa ahu ni anna ni arokora ori orowela mithukumano sotheene. (Mmusome aHeeberi 10:24, 25.) Okathi mukina hiyo ninnikhulumuwa, nto vaavo eyo eniiraneya aya mithukumano sinninlipiha. Maana vaavo anna ni arokora anikomentari aya, hiyo ninnilipa vanceene. Ohiya-vo, myaha soolipiha sinikhuma mBiibiliya ni sowooniherya sinninikhaliherya ohihiya omurumeela Yehova. Nave ninnilipa vaavo ninvaanela ahu ni anna ni arokora sihinatthi ni nuumala mithukumano. (1 aTes. 5:14) Musuweleke wira mithukumano sinninivaha eparakha ya okhaliheryana mukina ni mukhwaawe, nto eyo enninihakalaliha vanceene. (Mit. 20:35; aRom. 1:11, 12) Nave mithukumano sinninikhaliherya mwa inamuna sikina. Maana mithukumano sinninikhaliherya olokiherya inamuna sahu sa olaleerya ni okhala anamalaleerya ooloka. Mwa ntakiheryo, ninniixutta orumeela oratteene ikaruma siri Ekaaxa Ahu Ennikhaliherya Wiixuttiha. Nto nihaana olokiherya oratteene mithukumano. Nave okathi wa mithukumano muhaana owiriyana oratteene. Nuumala-vo, nvariheleke muteko itthu sotheene mwiixuntte anyu. Mwiira siiso, nyuwo munookhala “toropa eekeekhai a Kristu Yesu”.—2 Tim. 2:3.

14. Etthu xeeni ekina ennikhaliherya?

¹⁴ Hiyo ninnikhaliheriwa ni imilyau sinceene sa malaikha. Nkahaya muupuwele etthu nlaikha nimosa paahi ninwerya aya opaka! (Yes. 37:36) Vano-nto, muupuwele etthu malaikha manceene yaarowa aya opaka. Tthiri khuuvo pinaatamu nnakhala minepa sootakhala sinwerya waaxintta anakhotto ootupa a Yehova. Vanihimmwa wira Namoona mmosa oororomeleya vamosa ni Yehova toolipa vanceene ntoko atthu anceene. (Makh. 6:16) Tthiri eyo ekeekhai! Nto muhiliyale eyo okathi wotheene munikhulumuwa anyu mwaha wa etthu anipaka aya wala anihimya  aya amusi anyu ahikhanle Anamoona a Yehova, ale munivarana anyu muteko wala munsomana anyu oxikola. Muhiliyale wira khamuniwana mekhinyu. Maana muri vamosa ni Yehova, ni mutthareke malakiheryo awe.

15. Moovarihana ni Yesaya 54:15, 17, xeeni atthu a Muluku ahinihiya aya olaleerya?

¹⁵ Olumwenku ola onilamulela ni Satana, wookhalana mathowa manceene wira oninyokheke. Masi hata vari siiso, hiyo khaninkhala-khala niirelaka mpantta epoliitika nnakhala orowa okhottoni. Maana hiyo ninlaleya nsina na Muluku ni wira Omwene awe tonrowa oruuha murettele. Nave ninkhaliherya malamulo awe a xariya. Ohiya-vo, ninnaakhaliherya atthu woona wira namalamulela a olumwenku ola Satana, nawoothe muulupale ni nawiive. (Yoh. 8:44) Nave, ninnaaleela atthu wira olumwenku ola wootakhala ohanle vakhaani opwetexiwa. Tthiri Satana ni ale animukhaliherya khanikhala-khala aweryaka onihiiha olaleya Omwene wa Muluku. Maana hiyo khaninhiya onvuwiha Yehova ni orumeela khula enamuna wira nivare muteko owo! Nnaamwi Satana orina ene ikuru, owo khoniwerya onihiiha waalaleerya atthu Omwene wa Muluku olumwenku wotheene. Tthiri ninniwerya opaka eyo, mwaha woowi ninnikhapeleliwa ni Yehova.—Mmusome Yesaya 54:15, 17.

16. Yehova onrowa waakhapelela sai atthu awe okathi wa maxakha maalupale?

¹⁶ Itthu xeeni sinrowa onikhumelela muhoolo? Okathi wa maxakha maalupale, Yehova onoonoopola mwa inamuna piili sootikiniha. Yoopacerya, Yehova onoowoopola arumeyi awe oororomeleya vaavo mamwene a mulaponi anrowa aya ompwetexa Babilonia Muulupale, yoowo onithoonyerya mutthenkeso wa etiini yoowootha. (Wiis. 17:16-18; 18:2, 4) Ya nenli, Yehova onoowoopola atthu awe vaavo onrowa awe opwetexa moomalela olumwenku ola wa Satana okathi wa ekhotto ya Armagedoni.—Wiis. 7:9, 10; 16:14, 16.

17. Xeeni vari aya vooloka ohihiya okhalana waataana wooloka ni Yehova?

¹⁷ Akhala wira khaninrowa ohiya okhalana waataana wooloka ni Yehova, khiivo etthu Satana onrowa awe opaka enrowa onikumiherya mixankiho okumi ahu wotheene. Tthiri Satana tonlipelela omukhumelela muxankiho okumi awe wotheene vaavo onrowa awe opwetexiwa. (aRom. 16:20) Nto nware ikaruma sotheene sa ekhotto ninvahiwa ahu ni Muluku ni muhikhala-khale murulaka. Nave muhiimananiheke owana mekhinyu. Mwaakhaliheryeke anna ni arokora. Mutthareke malakiheryo a mutthenkeso wa Yehova. Akhala wira munoopaka itthu iyo, mukupaliki ni murima wotheene wira Tiithi ihu oophenta a wiirimu onimoolipihani ni onimookhapelelani.—Yes. 41:10.