1-2. Ntakiheryo na murummwa Paulo ninrowa waakhaliherya sai axitokweene olelo-va?

 MURUMMWA PAULO aanaaphenta axinnawe. Aahipaka itthu sinceene wira aakhaliherye. (Mit. 20:31) Ti nthowa naya anna awo ni arokora yaamphenta aya vanceene. Okathi omosa nuumala axitokweene a wEefeso osuwela wira khiyaarowa otthikela onweha Paulo, “otheene aya yaahipacerya wunla vanceene, enamukhupaarela”. (Mit. 20:37) Axitokweene ahu annaaphenta vanceene anna. Nave annipaka sootheene aniwerya aya wira yaakhaliherye. (aFil. 2:16, 17) Masi hata vari siiso, ikwaha sikina sookhala itthu sinaaxankiha axitokweene awo. Nto exeeni enrowa waakhaliherya oxintta mixankiho iyo?

² Osoma ntakiheryo na Paulo pooti waakhaliherya axitokweene awo a nthiti. (1 aKor. 11:1) Murummwa Paulo khaarina owerya sintoko malaikha. Aari mutthu oottheka, nave ikwaha sikina aanipaka itthu soohireerela. (aRom. 7:18-20) Nave-tho aahikhalana mixankiho sinceene. Masi hata vari siiso, aanaakhaliherya anna ni khaahiya otteeliwa murima. Okathi axitokweene anitthara aya ntakiheryo na Paulo, khanihiya omurumeela Yehova moohakalala hata sikhumelelaka mixankiho. Nrowe niwehe moota anrowa aya opaka eyo.

3. Mwaha ola ninrowa othokorerya-ni? Nave exeeni-tho ninrowa ahu wiixutta?

³ Mwaha ola nnoothokorerya mixankiho 4 sinimakela waaphwanya axitokweene: (1) okhalana okathi woolaleerya hata erina ene miritti sinceene, (2) okhalana okathi wowaalipiha anna, (3) ohikhulumuwa mwaha wa itthu sikina ahinwerya aya opaka saana, (4) ovara muteko ni atthu oottheka aahiiso oohimalela. Nnooweha moota Paulo aawenrye awe oxintta mixankiho iya, ni moota axitokweene anrowa aya omutakiha.

4. Xeeni ikwaha sikina axitokweene vanaaxankiha aya ovaha ntakiheryo nooloka ni muteko woolaleerya?

⁴ Xeeni vanaaxankiha aya opaka eyo? Axitokweene aakhalana miteko sinceene anivekeliwa ovara, ohela muhina ohoolela muteko woolaleerya. Mwa ntakiheryo, axitokweene anceene annihoolela mithukumano sa eriyari ya esumana, ni wiiriha Yoosoma ya Biibiliya ya Muloko. Ohiya-vo, annilavula myaha sa atthu otheene ni myaha sikina. Nave anniwiixuttiha arumeyi ookhaliherya moota woovara miteko saya, ni annaalipiha anna ni arokora a mmulokoni. (1 Ped. 5:2) Axitokweene akina annikhaliherya oteka ni olokiherya Inupa sa Omwene ni inupa sikina sa mutthenkeso ahu. Moolikanasa ni atthu ootheene a mmulokoni, muteko muulupalexa axitokweene anivara aya, olaleerya ihapari sooreera.—Math. 28:19, 20.

5. Ntakiheryo xeeni Paulo ovanhe awe ntoko namalaleerya?

⁵ Ntakiheryo na Paulo. AFilipi 1:10, murummwa Paulo onninleela etthu yaamukhaliherya okhala mutthu oosuwela wiixuttiha. Aahimmye so: “Musuweleke othanla itthu sootepa oreerela”. Paulo aaheettela malakiheryo aavaha awe. Yena aahithanliwa wira okhaliheryeke muteko woolaleerya. Mwa iyaakha sinceene, aahiweha wira muteko awe woolaleerya, waahikhalana efaita yuulupale ovikana itthu sikina. Aanilaleerya “ohoolo wa atthu otheene ni mmaitthokoni”. (Mit. 20:20) Paulo aanilaleerya ihapari sooreera okathi wootheene vaaweryaneya aya. Mwa ntakiheryo ewoora aamulipelela awe Sila ni Timootheyo wAthena, aahiwiixuttiha atthu oovuwa. Nuumala-vo akina yaahipacerya waamini. (Mit. 17:16, 17, 34) Hata ‘aatthukweliwe’, Paulo aanaalaleerya makwarta ni atthu akina yaarwa omuxukurya.—aFil. 1:13, 14; Mit. 28:16-24.

6. Itthu xeeni Paulo aawiixuttinhe awe atthu akina?

⁶ Paulo aahirumeela saana okathi awe. Nave ikwaha sikina aanaalattula makristau makina wira elaleeryeke hoothe nuuwo. Mwa ntakiheryo mukwaha awe woopacerya wa omisionaario, aahimukuxa Yohani yoowo aasuweliwa okhala Marko. Nave mukwaha awe wa nenli, aahimukuxa Timootheyo. (Mit. 12:25; 16:1-4) Moohaanyiherya Paulo aahiwiixuttihasa wira esuweleke otthokiha muloko wa ekristau, waalipiha anna, ni okhala aatthu oosuwela wiixuttiha.—1 aKor. 4:17.

7. Axitokweene anrowa otthara sai miruku sa murummwa Paulo siri aEefeso 6:14, 15?

⁷ Etthu nniixutta ahu. Axitokweene anoowerya omutakiha murummwa Paulo, ohiya paahi elaleeryaka mmawaani, masi-tho yiimananihaka olaleerya khula okathi ni khula opuro vaniweryaneya aya. (Mmusome aEefeso 6:14, 15.) Mwa ntakiheryo, awo pooti olaleerya  okathi anrowa aya othuma itthu omerkaatu, wala omutekoni waya. Nave okathi anikhaliherya aya oteka inupa sa mutthenkeso ahu, awo pooti waalaleerya atthu yaattamenle muttetthe owo, ni atthu anitumiha materiyaale. Moolikanasa ni Paulo, axitokweene pooti orumeela okathi aya woolaleerya awiixuttihaka anamalaleerya akina, ni arumeyi ookhaliherya.

8. Ikwaha sikina etthu xeeni mutokweene okhanle awe oopaka?

⁸ Axitokweene ahaana okhalana ephoole wira ehiviriheke okathi munceene evaraka miteko sa mmulokoni ni sa esirkwiitu, mpakha ohikhalana okathi woolaleerya. Wira esuweleke othanlela saana itthu, ikwaha sikina vannireera okhootta miteko sikina. Nuumala ovekela ni ovarerya ni ephoole, mutokweene pooti woonaka wira khonrowa owerya ovara muteko othanleliwe awe. Akhala wira onimweemererya, niireke onooweryaka okhalana okathi woovara miteko sikina sintoko, wiiriha yoosoma ya emusi khula esumana, olaleerya, ni owiixuttiha anaawe moota woolaleerya? Axitokweene akina, khaniwerya okhootta miteko sikina, masi awo ahaana osuwela wira Yehova onnisuwela yoophavela aya ya othanlela saana itthu.

9. Muxankiho xeeni onaaphwanya axitokweene oowaatteliwa miteko?

⁹ Xeeni vanaaxankiha aya opaka eyo? Arumeyi a Yehova, sinnaaphwanya mixankiho sinceene. Mahiku ala ookiserya, ootheene ahu ninnireerela olipihiwa, okhaliheriwa, ni omaalihiwa. Nave okathi mukina nihaana okhaliheriwa okhootta mweettelo woohiloka. (1 aTes. 5:14) Ekeekhai wira, axitokweene khaniwerya omaliha mixankiho sootheene sinaaphwanya axinnaya. Hata vari siiso, Yehova oniphavela wira axitokweene yiimananiheke olipiha ni okhapelela ipwittipwitthi sawe. Axitokweene oowaatteliwa miteko, anrowa okhalana sai okathi wowaakhaliherya anna ni arokora?

10. Sintoko onihimya awe 1 aTesaloonika 2:7, Paulo oonihenrye sai wira aanaathokorerya arumeyi a Yehova?

¹⁰ Ntakiheryo na Paulo. Paulo aanihaavya okathi wooreerela wira aattottopele ni waalipiha axinnawe. Axitokweene annitthara ntakiheryo nawe, yaaphentaka ni waareerela murima anna ootheene ni arokora. (Mmusome 1 aTesalonika 2:7.) Paulo aanaalipiherya makristau ootheene wira aanaaphenta, ni wira Yehova aanaaphenta-tho. (2 aKor. 2:4; aEef. 2:4, 5) Paulo aanaathokorerya atthu awo ntoko apatthani awe, nto aaniviriha okathi ori ene naawo. Aahiwooniherya wira anaaroromela, aaleelaka mixankiho sawe, ni itthu ahaapaka awe saana mwaha wooyariwa ni etampi. (2 aKor. 7:5; 1 Tim. 1:15) Hata vari siiso, Paulo khaawehexexa mixankiho sawe, masi aaniphavela waakhaliherya axinnawe.

11. Xeeni Paulo aavanhe awe miruku anna ani arokora?

¹¹ Ikwaha sikina murummwa Paulo aanaavaha miruku anna ni arokora. Masi khaapaka  eyo wira ooniherye onyoonyiwa wawe. Aavaha miruku mwaha woophavela waakhapelela wira sihaaphwanye mixankiho sinceene. Nave aaniimananiha wira miruku sawe sikhweyeke wiiwexexa ni weemererya. Mwa ntakiheryo, epaphelo aalepenle awe aKorinto, aahihimya mowiiwanyeya etthu yahaalonke. Nuumala-vo, aahimuruma Tito orowa oKorinto. Paulo aaniikoha akhala wira epaphelo ele khiyaarowa waakhulumula anna ni arokora. Nto aahihakalala okathi aaleeliwe awe wira anna awo yaahixukhurela ni yaaneettela miruku aavanhe awe.—2 aKor. 7:6, 7.

12. Axitokweene anrowa waalipiha sai makristau akhwaaya?

¹² Etthu nniixutta ahu. Axitokweene anoowerya otthara ntakiheryo na Paulo, evirihaka okathi eri ene ni axinnaya oowaamini. Enamuna emosa akhanle aya oopaka eyo, ophiya mithukumano sihinatthi opacerya wira ekhalaneke okathi woovaanela ni anna. Nave ahaana wiivaha okathi wira yaalipiheke atthu aniphavela olipihiwa. (aRom. 1:12; aEef. 5:16) Mutokweene onitthara ntakiheryo na Paulo, onnaalipiha makristau akhwaawe orumeelaka Nuulumo na Muluku, nave onnaalipiherya wira Muluku onnaaphenta. Ohiya-vo, onniimananiha owooniherya makristau makina wira onnaaphenta. Owo onniivaha okathi woovaanela ni anna awo ni waavya inamuna sowaattottopela. Okathi onivaha awe miruku, onniimananiha wira miruku sawe sikhumeke mBiibiliyani. Onnilavula moohivitha etthu ni mooreera murima, wira ale onaavaha awe miruku saakhweeleke weemererya.—aGal. 6:1.

13. Itthu xeeni sikhanle oomukhumelela mutokweene mwaha wa sootteettheya aahiiso ifaalya sawe?

¹³ Xeeni vanaaxankiha aya opaka eyo? Axitokweene, nave atthu oottheka. Moolikanasa ni hiyo, ikwaha sikina moohilakela annipaka itthu soohiloka. (aRom. 3:23) Mwaha wooyariwa ni etampi, ewoora ekina anna awo pooti okhulumuwa mwaha wa ifaalya saya. Nave akina pooti wuupuwelaka wira kharina nthowa mwaha wa sootteettheya saya ni khanireerela opaka marukunuxo.

14. Sintoko onihimya awe aFilipi 4:13, wiiyeviha waamukhalihenrye sai Paulo ovilela sootteettheya sawe?

¹⁴ Ntakiheryo na Paulo. Moowiiyeviha, Paulo aanisuwela wira khaarowa owerya oxintta sootteettheya sawe orumeelaka ikuru sawe paahi. Aahaana olipihiwa ni Muluku. Woopaceryani Paulo aanaalupattha makristau. Nuumala wiixutta wira etthu aapaka khiyaalonke, aaheemya orukunuxa murima awe. (1 Tim. 1:12-16) Okhaliheriwaka ni Yehova, Paulo aahikhala makampusi oophenta, oothunku, ni oowiiyeviha. Aanisuwela wira yena aari mutthu aayariwe ni etampi. Masi hata vari siiso, khaamakela  wuupuwela itthu iyo. Ohiya-vo, aanikupali wira Yehova anwerya omulevelela. (aRom. 7:21-25) Paulo aanisuwela wira sookhala itthu ahaawerya awe opaka saana. Hata vari siiso, aahiimananiha wira olokiherye mikhalelo sawe sa ekristau. Nave mowiiyeviha aahiroromela wira Yehova ammukhaliherya ovara muteko aamuthanlenle awe.—1 aKor. 9:27; mmusome aFilipi 4:13.

15. Axitokweene yooneleke sai ifaalya saya?

¹⁵ Etthu nniixutta ahu. Axitokweene khanithanliwa mwaha wookhala atthu oohittheka. Yehova oniphavela wira awo yeemereryeke ifaalya saya, ni yooniheryeke mikhalelo sa ekristau. (aEef. 4:23, 24) Mutokweene ohaana wiivarerya ottharaka nuulumo na Muluku. Nave-tho ohaana opaka marukunuxo vaatthuneyaka. Nuumala-vo, Yehova onoomukhaliherya okhala mutthu oohakalala ni mutokweene ooreera murima.—Yak. 1:25.

16. Exeeni enrowa wiiraneya akhala wira axitokweene anoowehexexa ifaalya sa atthu akina?

¹⁶ Xeeni vanaaxankiha aya opaka eyo? Akhala wira axitokweene anniviriha okathi munceene eri ene ni anna aahiiso arokora, ti vookhweya oweha ifaalya saya. Nto axitokweene yaahikhalane ephoole, pooti omakelaka okhulumuwa, waapwapwela, ni waaphukela. Paulo aahaalopola makristau wira akhala wira eyo enimwiiraneya, Satana vanoomusivela.—2 aKor. 2:10, 11.

17. Paulo aawoonela sai anna ni arokora?

¹⁷ Ntakiheryo na Paulo. Paulo khaakuvela waaphukela axinnawe. Aanisuwela saana wira awo yaanipaka itthu soohiloka aahiiso ofalyari, maana ikwaha sikina itthu yaapaka aya saanimukumiherya mixankiho. Hata vari siiso, aanisuwela wira akhala wira mutthu onnipaka etthu yoohiloka, eyo khentaphulela wira mutthu owo toonanara murima. Paulo aanaaphenta anna ni aaniwehexexa itthu sooreera yaavara aya. Nave akhala wira aahikhala munna wala murokora vaamuxankiha opaka itthu sooloka, Paulo khaaliyala wira hata vari siiso, murima awe mutthu owo waaniphavela opaka itthu sooreera.

18. Moota Paulo aaphunke awe muxankiho wa Evodia ni Sintikhe onniixuttiha-ni? (aFilipi 4:1-3)

¹⁸ Nkahaya nthokorerye ntakiheryo nimosa na moota murummwa Paulo aaphunke awe muxankiho wa arokora anli a muloko wa oFilipi. (Mmusome aFilipi 4:1-3.) Vanikhala wira Evodia ni Sintikhe yaahikhalana muxankiho waawiiriha ohiiwanana. Masi hata vari siiso, Paulo khaapwapwenle ni aahiwehexexa mikhalelo saya sooreera. Arokora ale yaahimurumeela Yehova moororomeleya mwa iyaakha sinceene. Paulo aanisuwela wira Yehova aanaaphenta. Moonelo awe wooloka, waahimwiiriha omutumererya Evodia ni Sintikhe wira ephuke muxankiho ole. Nave waahimukhaliherya ohihiya otteeliwa murima, ni ohihonona opatthani awe ni arokora ale.

19. (a) Axitokweene anrowa omutakiha sai Paulo? (b) Exeeni muniixutta anyu ni efootu enimooniherya mutokweene opakaka elimpesa Empa ya Omwene?

 ¹⁹ Etthu nniixutta ahu. Nyuwo axitokweene, nwehexexeke mikhalelo sooloka sa anna ni arokora. Ekeekhai wira otheene aya toottheka, masi hata vari siiso khula mmosa ookhalana mikhalelo soolipiha. (aFil. 2:3) Ikwaha sikina axitokweene pooti woonaka oreerela waavaha miruku anna ni arokora. Masi hata vari siiso, sintoko Paulo, awo ahaana owehexexa itthu sooreera anna awo anipaka aya. Nave ahaana wiimananiha ohiwehexexa khula etthu anlavula aya anna awo wala anipaka aya. Ohiya-vo, axitokweene ahaana owehexexa moota anna awo animphenta aya Yehova, ovilela waya, ni ikuru arina aya wira evareke itthu sooreera. Akhala wira axitokweene annipaka eyo, annaakhaliherya anna otheene woona wira anniphentiwa ni muloko wootheene.

20. Exeeni axitokweene akhanle aya oopaka wira ahihiye ottottela mureerelo ntakiheryo na Paulo?

²⁰ Akhala wira axitokweene khanrowa ohiya osoma ntakiheryo na Paulo, nlo pooti waakhaliherya. Nyuwo pooti omutthukula Índice das Publicações da Torre de Vigia, opuro oni: “Paulo”. Nuumala-vo, murowe muru mwaamukhaani oni: “Exemplo para os anciãos”. Okathi munsoma anyu myaha siri opuro owo, mwiikoheke so: ‘Ntakiheryo na Paulo ninrowa okikhaliherya sai ohihiya ohakalala okathi kinvara aka miteko saka ntoko mutokweene?’

21. Etthu xeeni axitokweene anireerela aya okupalixa?

²¹ Axitokweene, muhiliyale wira Yehova khonoovekelani okhala atthu oohittheka. Masi oniphavela wira muroromeleyeke. (1 aKor. 4:2) Yehova aanihakalala ni ororomeleya wa Paulo ni okhalela wawe nthiti muteko awe. Nto mukupaliki wira onnihakalala ni itthu munipaka anyu mmutekoni mwawe. Nave muhiliyale wira Yehova “khonrowa oliyala muteko anyu ni ophenta wanyu nsina nawe mwaarumeelaka ni muhihiyaka waarumeela ale oororomeleya”.—aHeeb. 6:10.