1. Exeeni ekhanle ooniiriha okhalana mweettelo wooloka aahiiso nnaari?

 HATA nipatisiwe ene niinaano aahiiso khalai, ootheene ahu nimphavela okhalana mweettelo onimusivela Yehova. Mwaha wa xeeni? Esiiri enikhaliherya owerya opaka eyo, okhapelela miyuupuwelo sahu. Akhala wira nimmakela wuupuwela itthu siniphavela aya erutthu yoottheka, moohaanyiherya nnoopaka aahiiso olavula etthu yoohiloka. (aEef. 4:17-19) Nto akhala wira nnoosarya muupuwelo ahu ni itthu sooreera, nnimoona okhweya olavula ni opaka itthu mwa enamuna enimusivela Yehova.—aGal. 5:16.

2. Makoho xeeni ninrowa ahu othokorerya mwaha ola?

² Sintoko nithokorenrye ahu mwaha ovinre, khaninwerya ottharuwa moomalela wuupuwela itthu sootheene soohiloka. Masi nookhalana owerya woothanla itthu nimphavela ahu. Nihinatthi opatisiwa, nihaana ottharuwa opaka ni olavula itthu sihinimusivela Yehova. Etthu yoopacerya ni yuulupale nikhanle ahu oopaka, orula omutthu wa khalai. Wira nimuhakalalihe moomalela Yehova, nihaana wiiwelela yooruma enihimya so: “Nware omutthu wa niinaano”. (aKol. 3:10) Mwaha ola, nnimwaakhula makoho manli: “Omutthu wa niinaano” exeeni? Nave, ninrowa owara sai omutthu owo ni ohihiya opaka eyo?

3. Ntoko onihimya awe aGalasia 5:22, 23, “Omutthu wa niinaano” exeeni, nave ninrowa owara sai?

³ “Omutthu wa niinaano”, onihimmwa moota nnuupuwela ahu ni opaka itthu nimutakihaka Yehova. Okathi mutthu oniwara awe omutthu wa niinano, onnikhalana mikhalelo sinikumiheriwa ni munepa wa Muluku. Nave onneemya wira miyuupuwelo sawe ni mweettelo awe, weettihiweke ni munepa woowaarya wa  Muluku. (Mmusome aGalasia 5:22, 23.) Nave mutthu owo onnimphenta Yehova ni onnaaphenta arumeyi awe. (Math. 22:36-39) Owo onnihakalala hata simphwanyaka mixankiho. (Yak. 1:2-4) Onnikumiherya murettele. (Math. 5:9) Yena onnaathokorerya atthu akina moopixa murima ni mooreera murima. (aKol. 3:13) Onnisiveliwa ni onnipaka itthu sooreera. (Luka 6:35) Itthu sootheene onipaka awe, onnooniherya wira onnimwaamini vanceene Yehova. (Yak. 2:18) Okathi atthu akina anipaka aya etthu ehinimusivela, onkhala oomaaleleya.—1 aKor. 9:25, 27; Tito 3:2.

4. Naaphavelaka owara omutthu wa niinano, xeeni ninreerela ahu wooniherya mikhalelo sinromoliwa aGalasia 5:22, 23? Mutthokiherye.

⁴ Naaphavelaka owara omutthu wa niinano, nihaana okhalana mikhalelo sinromoliwa aGalasia 5:22, 23, ni iversiikulu sikina sa mBiibiliyani. * Mikhalelo iyo khasinlikana ni ekuwo, yeeyo khula okathi ninwara ahu emosa-emosa. Ohimya ekeekhai sinnilikana ni mikhalelo sikina. Mwa ntakiheryo, akhala wira munniphenta mukhwiinyu, moohaanyiherya munoomureerelaka ni ompixerya murima. Nave wira nikhale atthu ooreera murima, nihaana okhala atthu oomaala, ni oowiihiiha.

5. Onithoonyerya-ni okhalana “muupuwelo wa Kristu”? Nave xeeni vanreerela aya osoma okumi wa Yesu? (1 aKorinto 2:16)

⁵ Mmusome 1 aKorinto 2:16. Naaphavelaka owara omutthu a niinano, nihaana okhalana “muupuwelo wa Kristu”. Nihimye so, nihaana wuupuwela ntoko Yesu uupuwela awe, ni omutakiha. Yesu aahikhalana mikhalelo sootheene sinikumiheriwa ni munepa woowaarya. Moolikanasa ni espelyo, Yesu ohooniherya mikhalelo sootheene sa Yehova. (aHeeb. 1:3) Nto akhala wira nnimuupuwela ntoko Yesu uupuwela awe, nnimoonaka okhweya opaka itthu ntoko aapaka awe, ni okhalana moonelo awe.—aFil. 2:5.

6. Itthu xeeni ninreerela ahu wuupuwelela okathi nimmananiha ahu owara omutthu wa niinano?

⁶ Niireke vanniweryaneya otthara ntakiheryo na Yesu? Hiyo pooti wuupuwelaka so: ‘Yesu aayariwe ohirina etampi. Nkinrowa owerya omutakiha moomalela’. Akhala wira munuupuwela siiso, sookhala itthu 3 muhikhanle anyu ooliyala. Yoopacerya, hiyo nipattuxiwe wira nilikaneke ni Yehova ni Yesu. Nto  nnoowerya waatakiha nave nnoowerya olikanaka naawo. (Maph. 1:26) Ya nenli, nihiliyale wira munepa woowaarya, ikuru sootepexa owerya sa olumwenku wootheene. Onoonikhaliherya opaka itthu nahaarowa ahu owerya opaka mekhihu. Ya neeraru, Yehova oosuwela wira khamunrowa owerya wooniherya moomalela, mikhalelo sinikumiheriwa ni munepa woowaarya. Tivonto Yehova, oosuka iyaakha 1.000, wira ale arina nlipelelo nookhala valaponi mwa mahiku ootheene, akhale oohittheka. (Wiis. 20:1-3) Tiithi ahu oniphavela wira khula mmosa, ovareke ele eniwerya awe ni ororomeleke wira onoomukhaliherya.

7. Exeeni ninrowa ahu othokorerya vano?

⁷ Itthu ninreerela ahu omutakiha Yesu? Nnooweha mikhalelo 4 sinikumiheriwa ni munepa woowaarya wa Muluku. Nave-tho nnooweha etthu nniixutta ahu ni ntakiheryo na Yesu, ni moota oonihenrye awe khula mukhalelo. Nnoothokorerya matakiheryo anrowa onikhaliherya oweha mikhalelo sooreera, sinikumiheriwa ni omutthu wa niinaano.

8. Yesu oonihenrye sai ophenta?

⁸ Mwaha wa omphenta Yehova, Yesu aahileva okumi awe wira onvuwihe Yena ni oniphwanyihe mureerelo. (Yoh. 14:31; 15:13) Okathi wotheene aanaareerela murima atthu, nave aaniwoonela othunku hata ale yaamulupattha. Anooniherya wira aanaaphenta atthu, owiixuttihaka Omwene wa Muluku. (Luka 4:43, 44) Nave Yesu aahooniherya omphenta wawe Muluku ni atthu, eemyaka ohaaxiwa ni wiiviwa ni anatampi. Eyo ehiiriha oweryaneya khula mmosa a hiyo ophwanya ekumi ehinimala.

9. Ninrowa otakiha sai ophenta Yesu oonihenrye awe?

⁹ Hiyo nihiivahererya wa Tiithi ahu a wiirimu, maana ninnimphenta. Moolikanasa ni Yesu, nihaana wooniherya omphenta wahu Yehova, naathokoreryaka saana atthu akina. Murummwa Yohani aalempe so: “Ole ohinimphenta munnawe, onimoona awe, khoniwerya omphenta Muluku, ohinimoona awe”. (1 Yoh. 4:20) Khula mmosa a hiyo onnireerela wiikohaka so: ‘Kiireke kinnaaphenta atthu akina ni murima aka wootheene? Kinnooniherya othunku, hata atthu akina ahikithokoreryaka saana? Waaphenta waka atthu akina, onnikiiriha orumeela okathi aka ni mireerelo saka wira kaakhaliherye omusuwela Yehova? Kinniimananiha opaka eyo hata atthu anceene ahivaka efaita muteko kinivara aka ni ekinyokhaka? Kiireke kinnivaha okathi wira kivare muteko wowaapaka awiixutti?’—aEef. 5:15, 16.

10. Yesu oonihenrye sai okhala mutthu a murettele?

¹⁰ Yesu aanikumiherya murettele ni wiiwanana. Okathi atthu akina yahaamuthokorerya aya saana, khaattikiherya owiirelaka itthu soohiloka. Masi-tho yookhala etthu ekina aapanke awe. Akhala wira yaanipakiwa etthu yaahamusivela, yena taapacerya okumiherya murettele, nave anaakhaliherya atthu akina okhala oowiiwanana. Mwa ntakiheryo, aahiixuttiha wira ale aniphavela omusiveliha Yehova, ahaana-toko ophuka mixankiho arina aya ni atthu akina. (Math. 5:9, 23, 24) Nave-tho, ikwaha sinceene aahaatumererya awiixutti awe wira ahinyakulihaneke, aphavelaka omusuwela ti pani a yaawo aari muulupale.—Luka 9:46-48; 22:24-27.

11. Ninrowa okumiherya sai murettele?

¹¹ Wira nikumiheryeke wiiwanana, sookhala itthu sikina nikhanle ahu oopaka, ohiya paahi ohiphavela onyakulihana. Nihaana ophuka ohiiwanana nirina ahu ni atthu akina, ni waatumererya anna ni arokora opaka etthu emosaru. (aFil. 4:2, 3; Yak. 3:17, 18) Otheene ahu nihaana wiikoha so: ‘Akhala wira wookhumelela muxankiho, kiireke kinneemya ovaanela ni mutthu wira kimalihe? Akhala wira ookhala munna wala murokora opanke etthu ehireere okiwereya, kiireke kinnisuka mathowa  vamurimani? Kiireke okhala wene kimmakela waalipelela atthu akitthekenle wira akivekele musammaha? Kiireke kinnipacerya ophavelasa ophuka muxankiho, hata kiryeene yoomi kitthekeliwe? Akhala wira aakhala anna ahiniiwanana, kinnaakhaliherya ophuka muxankiho owo’?

12. Yesu oonihenrye sai oreera murima?

¹² Yesu aari mutthu ooreera murima. (Math. 11:28-30) aahooniherya eyo aathokoreryaka saana atthu akina, ni waareerela murima hata okathi waaxankiha aya opaka eyo. Okathi muthiyana mmosa a oFeniisia aamuxonttenle awe wira ompenuxe mwaana awe, Yesu aahimureerela murima. Woopaceryani khapanke etthu muthiyana ole anvekela awe, masi nuumala woona waamini wawe, Yesu aahimpenuxa mwaana awe. (Math. 15:22-28) Yesu khoovelela ovaha miruku, nnaamwi aari mutthu ooreera murima. Mwa ntakiheryo, okathi Pedru aahimmye awe wira Yesu khivaareerela okhwa, Yesu aahimpwapwela ohoolo wa awiixutti akina. (Mar. 8:32, 33) Yesu khaapanke ele wira omuulihihe muru Pedru, masi aaphavela omwiixuttiha ni waalopola arummwa akina wira ehiiroromeleke mootepana. Moohaanyiherya Pedru aahuuliwa muru, masi hata vari siiso aahiixutta etthu.

13. Ninrowa okhala sai atthu ooreera murima?

¹³ Mwaaphavelaka waareerela murima atthu munaaphenta anyu, ikwaha sikina pooti oreerelaka waavaha miruku moohaavitherya etthu. Okathi munipaka anyu eyo, mwiimananiheke omutakiha Yesu, nvahaka miruku sinikhuma mBiibiliyani. Mulavuleke mooreera murima. Mukupali wira atthu animphenta Yehova nave munaaphenta anyu, anniphavela opaka itthu sooloka, ni anoowiriyana miruku sanyu. Mwiikoheke so: ‘Akhala wira okhala mutthu kinimphenta aka onihala vakhaani opaka etampi, kiireke kinnivaha miruku moolipa murima? Okathi kinvaha aka miruku, kiireke kinilavula mooreerela murima, wala kinilavula moonanariwa? Exeeni enkiiriha ovaha miruku iyo? Kiireke kininvaha miruku mwaha woowi etthu epanke awe khereere okinanara, aahiiso kimphavela omukhaliherya?’

14. Xeeni Yesu aawiirela awe atthu akina itthu sooreera?

¹⁴ Yesu khahiyo paahi aatumererya atthu opaka itthu sooreera, nuuwo-tho aanipaka itthu iyo. Okhala wira aanimphenta Tiithi awe, okathi wootheene aanipaka itthu sooreera ni mathowa ooloka. Nave mutthu ooreera murima, onnitthara ntakiheryo nawe ni onniimananiha owiirela itthu sooreera atthu akina. Nto wira mutthu okhale ooreera murima, khivaniphiyerya paahi opaka itthu sooreera, masi-tho ohaana opaka itthu iyo ni mathowa ooloka. Atthu akina pooti okohaka so: ‘Masi niireke vanniweryaneya opaka itthu sooreera ni mathowa oohiloka?’ Aayo vanniweryaneya. Mwa ntakiheryo, Yesu aahaalavula atthu yaavaha esimola amasikhini ohoolo wa atthu anceene, aphavelaka ohimmwa paahi. Masi para Yehova, akhala wira mutthu onnipaka etthu ophavelaka paahi ohimmwa, etthu eyo khahiyo etthu.—Math. 6:1-4.

15. Ninrowa owiirela sai atthu akina itthu sooloka?

¹⁵ Mutthu onrowa owiirela itthu sooreera atthu akina paahi, akhala wira onnipaka itthu moohilipelela ovahiwa etthu. Mwiikoheke so: ‘Kiireke kinniphavela opaka etthu yooreera, masi kihinapaka? Exeeni enkiiriha owiirela itthu sooreera atthu akina?’

16. Etthu xeeni ninreerela ahu opaka khula nihiku, ni mwaha xeeni?

¹⁶ Nihuupuweleke wira nihaana owara omutthu wa niinano mpakha opatisiwa paahi. Hata  nuumala opatisiwa nihaana okhapelela ‘omutthu ahu wa niinaano’. Nnoowerya opaka eyo khula nihiku niphavelasaka inamuna sowooniherya mikhalelo sinikumiheriwa ni munepa wa Muluku. Mwaha wa xeeni? Mwaha woowi Yehova, Muluku ooluttuweliwa, nave onnirumeela munepa awe woowaarya,wira opake itthu. (Maph. 1:2) Nto khula mukhalelo wa munepa woowaarya wa Muluku, ohaana oniirihaka opaka etthu. Mwa ntakiheryo, murummwa Yakobo aalempe so: “Waamini ohirina miteko, ti wookhwa”. (Yak. 2:26) Etthu emosaru pooti wiiraneyaka ni mikhalelo sikina sootheene sa munepa wa Muluku. Khula okathi nnooniherya ahu wira nookhalana mikhalelo sinikumiheriwa ni munepa wa Muluku, nave ninnooniherya-tho wira ninnikhaliheriwa ni munepa owo.

17. Exeeni nikhanle ahu oopaka, akhala wira khaninwerya wooniherya mikhalelo sinikumiheriwa ni munepa woowaarya?

¹⁷ Hata makristau apatisiwe mwa iyaakha sinceene, nlelo toottheka. Ikwaha sikina pooti ohiweryaka wooniherya mikhalelo sinikumiheriwa ni munepa woowaarya. Masi hata vari siiso, vannireerela wooniherya mikhalelo iyo. Nrowe nthokorerye nlikanyiho nimosa. Vaakhanle wira mookhalana ekuwo enoosivelani vanceene, nuumala-vo enathaala vakhaani, niireke mwaamuriha? Nnaari, mwaamuttottha. Moolikanasa, akhala wira munoomwiirela etthu mutthu mukina moohooniherya opixa murima ni ophenta, muhikhulumuwe. Mwiimananiheke ovaanela ni mutthu owo ni onvekela wira ooleveleleni. Eyo enimookhaliheryani otthikela waataana nuuwo. Nave mwiimananiheke wira etthu eyo, ehitthikele wiiraneya muhoolo.

18. Etthu xeeni ninreerela ahu okupaliki?

¹⁸ Tthiri ninnixukhurela vanceene okhalana ntakiheryo na Yesu wira nitthareke. Akhala wira nnimuupuwelaka moota uupuwela awe, nnimoonaka okhweya opaka itthu ntoko aapaka awe. Nave naimananiha omutakiha Yesu, nnootepaka owara omutthu wa niinano. Yoosoma ela noothokorerya mikhalelo mixexe sa munepa woowaarya. Nto mwiivaheke okathi wira nvareryeke mikhalelo sikina sa munepa owo, ni wuupuwelela moota mukhanle anyu oowooniherya. Eliivuru Enaakhaliherya Anamoona a Yehova Otokosa Myaha Sikumiheriwe, enimookhaliheryani ophwanya myaha sinceene. Murowe mpantta onihimya so: “Mweettelo wa Ekristau”, nuumala-vo, “Yoowima ya Munepa”. Akhala wira munoopaka ele muniwerya anyu, mukupaliki wira Yehova onimookhaliheryani owara omutthu wa niinaano.