Atthu akina anisoma moowaakuveya mwaha ola, anniikoha siiso. Iversiikulu iya, sinnaaromola atthu anli oovirikana yaitthaniwa Mefiboxethi. Nto osoma saana yowiiraneya ela enoonikhaliherya wiixutta itthu sinceene.

Mwene Sawuli a wIsarayeli, aarina anamwane 7 axilopwana, ni anli axithiyana. Mwaana awe ompacerya ari Yonathani. Nuuvira okathi mwaaseta awe aahiiso Sawuli aitthaniwa Rispa, aahimuyara mwaana aitthaniwa Mefiboxethi. Mootikiniha okhala wira Yonathani aahikhalana-tho mwaana aitthaniwa Mefiboxethi. Nto mwene Sawuli, aahikhalana mwanawe ni musulu awe yaarina nsina nimosaru.

Nuuvira okathi, mwene Sawuli aahipacerya waanyokha vanceene axibeyooni, ni aahiimananiha owiivakasa ootheene aya. Vanikhala wira axibeyooni anceene yaahiiviwa. Ele yaari etthu yootakhala. Mwaha wa xeeni? Mwaha woowi okathi wa Yoxuwa, aisarayeli yaahaaleiherya axibeyooni wira khiyaarowa waapwetexa.—Yox. 9:3-27.

Nivarihano nle naanivareleya muteko hata okathi wa mwene Sawuli. Hata vari siiso Saulo khaiwelenle ni aahimananiha waamalamaliha axibeyooni. Nto ehasara ele yaahimphwanyiha ‘mulattu Sawuli ni atthu a etthoko awe’. (2 Sam. 21:1) Nuuvira okathi, Davidi aahithanliwa okhala mwene. Nuumala-vo, axibeyooni yaahanle yaahirowa omuleela etthu ele yootakhala yaapakiwe. Davidi aahaakoha etthu yaakhanle oopakiwa wira emalihiwe etampi ya Sawuli, wira Yehova otthikele oreeliha elapo ele. Ohiya oveka musurukhu, axibeyooni yaavenke wira anamwane 7 a mulopwana ‘aaphavela waapwetexa wira emalamale’, yaahaana wiiviwa. (Moth. 35:30, 31) Davidi aahipaka etthu yaavekenle aya.—2 Sam. 21:2-6.

Okathi ole, iira Sawuli ni Yonathani akhwiiye ene okhottoni. Masi Mefiboxethi mwaana a Yonathani nlelo iira ori mukumi. Owo aari oorakala okhuma enamwane awe, nto khaakhalihenrye atthu yaatuphenle axibeyooni. Ohinatthi Yonathani okhwa, Davidi aahimuleiherya wira aamureerela murima osuulu awe, omuhela muhina mwaana awe. (1 Sam. 18:1; 20:42) Biibiliya onihimya so: “Mwené Davidi ahimopola Mefiboxethi, mwana a Yonathani, osùlu wa Sawuli, okhala wira Davidi ni Yonathani yahilaphelana wa nsina n’Apwiya”.—2 Sam. 21:7.

Masi hata vari siiso, Davidi aahipaka etthu axibeyooni yaavekenle aya. Aahaakuxa anamwane anli a Sawuli, mmosa aitthaniwa Mefiboxethi, ni asisulu awe athanu khwaavahererya axibeyooni. (2 Sam. 21:8, 9) Mwaha woopaka eyo, etala yuulupale yaakhumelenle elapo ele yaahimala.

Yowiiraneya ela enniniixuttiha itthu sinceene. Nlamulo na Muluku naanihimya moowiiwanyeya wira: “Anamwane khanrowa wiviwa mwaha wa sottheka s’axitithi aya”. (Otum. 24:16) Nto vaakhanle wira anamwane ale anli a Sawuli ni asisulu awe 5 khiivo etthu yootakhala yaapanke aya, Yehova khaarowa oweemererya wiiviwa. Nlamulo na Muluku naanihimya-tho wira: “Khula mutthu onimwiveliwa sottheka sawe pahi”. Vanooneya wira anamwane anli a Sawuli ni asisulu awe 5 yaiviwe, yookhala etthu yoohiloka yaapanke aya wira ekhaliherye okathi yaivakasiwa aya axibeyooni. Nto mwaha etthu eyo, ootheene aya yaahiliva ni ekumi aya.

Ela enooniherya wira akhala wira mutthu onnipaka etthu yootakhala, owo ookhalana mulattu, hata uupuwelaka wira aaroorummwa. Wookhala muhapo onihimya so: “Mutthokelele muhinatthi okela ephiro ene: mwetteke iphiro soloka pahi”.—Mir. 4:24-27; aEef. 5:15.