1. Anamuyari aniphavela wiira anaaya apakeke exeeni?

 NYUWO ANAMUYARI, ninnisuwela wiira munniphavela vanceene waakhaliherya aaniinyu omusuwela ni omphenta Yehova. Masi Muluku khonooneya. Nto munrowa waakhaliherya sai aaniinyu omoona Yehova ntoko Muluku ekeekhai ni omwaattamela? — Yak. 4:8.

2. Anamuyari anrowa oowiixuttiha sai anaaya mikhalelo sa Yehova?

² Enamuna emosa yuulupale anamuyari akhanle aya oowiixuttiha anaaya omwaattamela Yehova, ori omusomaka Biibiliya vamosa ni anamwane awo. (2 Tim. 3:14-17) Nave Biibiliya onnihimya inamuna sikina sikhanle oowaakhaliherya amiravo wiixutta voohimya sa Yehova. Eliivuru ya Miruku, paapa mmosa onnimuleela mwaana awe wiira ohiliyaleke mikhalelo sa Yehova, seiyo sinooniheriwa ni soopattuxiwa. (Mir. 3:19-21) Nto vano, ninrowa oweha inamuna sikina anamuyari akhanle aya oorumeela soopattuxiwa wiira awiixuttihe anaaya voohimya sa Yehova.

3. Anamuyari anrowa waakhaliherya sai anaaya?

³ Biibiliya onihimya wiira: “Mikhalelo sa Muluku nihinwerya ahu woona, ninnisuwela naasomaka moota olumwenku opattuxiwa aya. Hiyo nnoowerya wiixutta moota Muluku orya awe, nitokosaka itthu opanke awe”. (aRom. 1:20) Anamuyari, woonasa wene vannoosivela-ni otthekula ni aaniinyu. Nto murumeeleke okathi owo wiira nwiixuttihe aaniinyu ovarihana okhanle “itthu opanke awe” ni mikhalelo sawe. Nto mwaha ola nnooweha, moota anamuyari akhanle aya oowiixuttiha anaaya attharaka ntakiheryo na Yesu.

4. Yesu aarumeelale sai soopattuxiwa wiira owiixuttihe atthareli awe (Luka 12:24, 27-30.)

 ⁴ Nwehe moota Yesu aarumenle awe soopattuxiwa wiira owiixuttihe atthareli awe. Ekwaha emosa owo aahaavekela wiira yaweheke anakhuku ni ifilori sa mmatta. (Mmusome Luka 12:24, 27-30.) Yesu anwerya orumeela enama ekina aahiiso mwiri mukina, masi owo aathanlale omurumeela mwaapalame mmosa ni efilori emosa paahi, okhala wiira awiixutti awe yaanisuwela saana itthu iyo. Woonasa wene okathi ole, awiixutti awo yiira yaawehaka axipalame yaavava musulu ni ifilori saawaattamenle. Nkahaya mmuupuwele Yesu okathi aalavula awe othoonyaka itthu iyo! Munnisuwela etthu ekina Yesu apanke awe nuumala ohimya matakiheryo awo? Yesu aahiwiixuttiha etthu ya efaita awiixutti awo, eyo piiyo, oovaha ni ooreera murima wa Yehova. Nto Yesu aahiwiixuttiha wiira Yehova onimwaavaha yoolya ni itthu sinaathowa arumeyi awe, ntoko onavaha awe eyoolya anakhuku ni onikhapelela awe ifilori sa mmatta.

5. Soopattuxiwa xeeni anamuyari akhanle aya oorumeela, wiira awiixuttihe anaaya voohimya sa Yehova?

⁵ Nto anamuyari anrowa omutakiha sai Yesu okathi aaniwiixuttiha aya anaaya? Munoowerya omutakiha mulavulaka etthu epattuxiwe enoosivelani vanceene, pooti okhala mwaamunama aahiiso mwiri. Nto okathi munilavula anyu, mmutthokiheryeke moota etthu eyo enooniherya aya mikhalelo sa Yehova. Nuumala-vo, nyuwo pooti omukoha mwaninyu mwiri xeeni aahiiso mwaamunama xeeni onimusivela. Akhala wiira munoorumeela soopattuxiwa sinimusivela mwaana owo, vanookhweya ovaha ephoole okathi munimutthokiherya anyu mikhalelo sa Yehova.

6. Ntakiheryo na maama awe Christopher, ninniixuttiha exeeni?

⁶ Anamuyari khanipirisari oviriha okathi munceene, atokosaka mwiri aahiiso mwaamunama ahinatthi olavula ni anaaya etthu aniixutta aya voohimya sa Yehova. Maana Yesu khaatthokihenrye awiixutti awe moota anakhuku aniphwanya aya eyoolya aahiiso moota ifilori sininnuwa aya. Ekeekhai wiira ikwaha sikina, aniinyu pooti ophavelaka wiixutta itthu sikina voohimya sa soopattuxiwa. Masi orumeela moolumo vakhaani aahiiso opaka nikoho, pooti omukhaliherya mwaninyu wiiwexexa etthu muniphavela anyu omwiixuttiha. Nwehe etthu munna oniitthaniwa Christopher onuupuwela awe okathi aari awe mwaana. Owo onihimya so: “Maama aka aaninihimeerya itthu sookhweya miyo ni axuulupale aka, saanikhaliherya ovaha efaita soopattuxiwa. Mwa ntakiheryo, okathi naavira ahu waattamela saari miyaako owo aahimya so: ‘Mooneke miyaako iye, khasireere orakama ni khasireere oreera! Niireke khasinooniherya wiira Yehova onnipaka itthu sootikiniha?’ Nave okathi naavira ahu waattamela ophareya, owo aahimya so: ‘Nwehe moota mawimpi ale arina aya ikuru! Annooniherya wiira Yehova toowerya’”. Christopher onnincererya oriki: “Itthu maama aka aahimya awe saari sookhweya, ni saaniniiriha wuupuwelela”.

7. Munrowa omwiixuttiha sai mwaninyu wiira osiveliweke ni itthu sipattuxiwe?

⁷ Okathi aaniinyu aninnuwa aya, muhihiye owiixuttiha wiira aweheke soopattuxiwa. Opaka eyo, enimwaakhaliherya ohimya moonelo aya sa ele aniixutta aya voohimya sa mikhalelo sa Yehova. Mwa ntakiheryo, nyuwo pooti othanla etthu emosa epattuxiwe nuumala-vo munaakoha aniinyu wiira: “Etthu ela eniwiixuttihani exeeni voohimya sa Yehova?” Woonasa wene, vanimoosivelani owiiwa aniinyu ahimyaka moonelo aya. — Math. 21:16.

8. Eparakha xeeni anamuyari a wisarayeli yaarina aya okathi yeetta aya mikwaha ni anaaya?

⁸ Aisarayeli yaahana owiixuttiha anaaya malamulo a Yehova okathi ‘yeetta aya mukwaha’. (Otum. 11:19) Wisarayeli wa khalai saahikhala  istaraata sinceene. Nto mustaraatani mmo, vaniweryaneya waaphwanya axinama ovirikana ni ifilori soovirikana. Vaavo aisarayeli yeetta aya mukwaha vamosa ni anaaya, anamuyari yaanikhalana eparakha yoorumeela itthu sipattuxiwe, wiira ewiixuttihe anaaya voohimya sa Yehova. Nto anamuyari annitumereriwa owiixuttiha anaaya arumeelaka itthu sipattuxiwe. Nrowe niwehe moota anamuyari akina aawenrya aya opaka eyo.

9. Ntakiheryo na Punitha ni Katya ninwiixuttihani exeeni?

⁹ Maama mmosa oniitthaniwa Punitha, yoowo onikhala esitate yuulupale ya wÍndia, onihimya so: “Amusi ahu akina khanikhala ositate. Nto okathi ninrowa ahu waaxukurya, ninnirumeela okathi owo wiira niwiixuttihe aniihu itthu sipattuxiwe ni Yehova. Kinniweha wiira anaaka annivaha ephoole yinceene, okathi kiniwiixuttiha aka voohimya sa Yehova kirumeelaka itthu sipattuxiwe, ovikana kiri ene ositate”. Okhala wene, anamwane opisa oliyala mapuro ooreera aavinre aya ni anamuyari aya. Katya murokora mmosa onikhala oMoldávia onihimya so: “Okathi kaari aka mwaana, etthu kihinliyalaka okathi yoole miyo ni anamuyari aka naakhumme ahu ositati nrowaka mapuro oorakamela ositati. Miyo kinnaaxukhurela anamuyari aka okiixuttiha okhuma enamwane aka arumeelaka itthu Yehova opattunxe awe. Maana itthu iyo sookikhaliherya omusuwela saana Yehova”.

10. Exeeni anamuyari akhanle aya opaka, akhala wiira khaniwerya weetta mukwaha arowaka mapuro oorakamela ositati? (Nwehe ekaaxa eni: “ Malakiheryo Anrowa Waakhaliherya Anamuyari”.)

¹⁰ Munrowa opaka exeeni akhala wiira nyuwo ni emusi anyu, khivaniweryaneya weetta mukwaha murowaka mapuro oorakamela ositate? Munna mmosa oniitthaniwa Amol onikhala wÍndia, ohimmye so: “Mapuro anikhala aka anamuyari aka ahaana ovara muteko iwoora sinceene, nave weetta mukwaha nirowaka mapuro orakamela ositate onipirisari musurukhu munceene. Hata vari siiso, ninniwerya oweha itthu sipattuxiwe ni Yehova ni mikhalelo sawe niri ene oparkhi  aahiiso mapuro makina”. Woonasa wene, waattamela owannyu, aakhala mapuro makina mukhanle anyu oophwanya itthu wiira nwooniherye aniinyu. (Esal. 104:24) Nto mapuro awo nyuwo pooti waaphwanyaka axipalame, axikokho,miri ni itthu sikina wiira nwiixuttihe aniinyu. Karina yoowo onikhala wAlemanha ohimmye so: “Maama aka omusivela ifilori nto okathi naapasiyari ahu owo anikooniherya ifilori saamusivela”. Nave mutthenkeso wookhalana iviidiyu ni iliivuru sinooniherya itthu sipattuxiwe nto anamuyari pooti orumeela wiira awiixuttihe anaaya. Nto moohicikha mapuro munikhala anyu, vanniweryaneya nyuwo owiixuttiha aniinyu murumeelaka itthu sipattuxiwe. Vano nrowe niwehe mikhalelo sikina Yehova orina awe mukhanle anyu oowiixuttiha aniinyu murumeelaka itthu opattunxe awe.

11. Anamuyari anrowa owiixuttiha sai anaaya oweha wiira Yehova toophenta?

¹¹ Wiira mwaakhaliherye aniinyu wiiwexexa ophenta wa Yehova, nyuwo muhaana owooniherya aniinyu moota axinama anaakhapelela aya axaana aya. (Math. 23:37) Nave nyuwo pooti owooniherya itthu soovirikana Yehova opattunxe awe sinnihakalaliha. Karina yoowo nimulavunle ahu ettima evinre, onihimya so: “Okathi kaapasiyari aka ni maama aka, owo aanikitumererya wiira kiweheke ohiya paahi oreera wa ifilori, masi wiira ifilori iyo sinooniherya ophenta wa Yehova. Mpakha olelo-va onnikisivela oweha ifilori sa ikoore soovirikana. Okathi kiniwehaka ifilori iyo sinnikuupuxerya wiira Yehova onniniphenta vanceene”.

12. Anamuyari anrowa waakhaliherya sai anaaya woona wiira Yehova ta ankhili? (Esalimo 139:14) (Nwehe efootu.)

¹² Mwaakhaliheryeke aniinyu oweha wiira Yehova, Muluku a ankhili. Yehova ookhalana ankhili waavikana atthu ootheene. (aRom. 11:33) Mwa ntakiheryo, nyuwo pooti waatthokiherya aniinyu moota maasi anrowa aya wiirimu ni enapakeya meeku. (Yob. 38:36, 37) Nave nyuwo pooti waatthokiherya aniinyu moota Yehova opanke awe erutthu ahu mootikiniha. (Musome Esalimo 139:14.) Nrowe niwehe ele paapa mmosa oniitthaniwa Vladimir ohimmye awe. Owo onihimya so: “Naahikhala nihiku mwanihu aamweettiha awe pisikeleeta nuumala-vo omora ni ovulala. Nuuvira okathi nikhwatta nle naahivola. Nto miyo ni mwaaraka naahimutthokiherya mwanihu wiira Yehova oopaka erutthu ahu wiira eweryeke wiipenuxa. Nave naahimutthokiherya wiira eyo kheniiraneya  ni itthu apinaatamu awenrye aya opaka. Mwa ntakiheryo, naahimutthokiherya wiira ekaaro kheniwerya wiilokiherya yanpaka asitenti. Eyo yaahimukhaliherya mwanihu oweha wiira Yehova oopattuxa okumi aarumeelaka ankhili”.

13. Anamuyari anrowa owiixuttiha sai anaaya woona wiira Yehova toowerya? (Yesaya 40:26.)

¹³ Yehova onninlattula wiira niwehe wiirimu ni wuupuwelela ikuru onirumeela awe wiira otthokihe itheneeri. (Mmusome Yesaya 40:26.) Nave nyuwo anamuyari mwaatumereryeke aniinyu owehaka wiirimu ni wuupuwelela itthu anoona aya. Mwa ntakiheryo, murokora mmosa a oTaiwan, oniitthaniwa Tingting, onnuupuwela okathi ari awe mwaana. Owo onihimya so: “Nihiku nimosa miyo ni maama aka naarumpe vate. Okhala wiira naarumpe vate vaaniweryaneya oweha saana itheneeri. Okathi ole kaaniriipiwa murima maana kaahikhalana mixankiho sinceene oxikola, nto kuupuwela wiira nkaarowa ovikaniha omurumeela Yehova. Nto maama aka aahirumeela okathi ole wiira okooniherye owerya Yehova orumenle awe wiira opattuxe itheneeri. Nave owo aahikuupuxerya wiira Yehova onoowerya orumeela owerya wawe wiira okikhaliherye oxintta mixankiho saka. Nuumala oweha soopattuxiwa iye, kaahilakela olipiha ompatthani aka ni Yehova ni ohihiya omurumeela mahiku ootheene”.

14. Anamuyari anrowa orumeela sai soopattuxiwa wiira ewooniherye anaaya wiira Yehova, Muluku oohakalala?

¹⁴ Soopattuxiwa sinooniherya wiira Yehova, Muluku oohakalala ni oniphavela wiira nihakalaleke. Masientista ahoona wiira axinama anceene waasivela othweela waahela muhina axipalame ni ihopa. (Yob. 40:20) Niireke mootoko onweha mwaninyu othweelaka ni mwaamunama? Woonasa wene, aniinyu awo yaahitoko oweha kwaatu othweelaka aahiiso axaana a alapwa elumanaka maaru. Nto okathi munniweha anyu mwaninyu otheya aka vaavo onaaweha awe axinama ethweelaka, murumeele okathi owo wiira mmwiixuttihe wiira Yehova, Muluku oohakalala. — 1 Tim. 1:11.

15. Exeeni enrowa waakhaliherya anamuyari osuwela mixankiho sa anaaya? (Miruku 20:5.) (Nwehe efootu.)

¹⁵ Ikwaha sikina anamuyari pooti woonaka ovila ovaanela ni anaaya. Nto anamuyari ahaana  waavya okathi wiira ewiixuttihe anaaya wiira asuwele itthu sinaaxankiha. (Musome Miruku 20:5.) Anamuyari akina ahoona wiira oviriha okathi awehaka soopattuxiwa ni anaaya, ennaakhaliherya osuwela itthu sinaaxankiha. Mwaha wa xeeni? Mwaha woowi okathi owo anamwane anikhala ootaphuwa wiira ahimye itthu sinaaxankiha. Paapa mmosa onikhala oTaiwan, oniitthaniwa Masahiko, onihimya so: “Vaavo miyo ni mwaaraka vamosa ni aniihu nniviriha ahu okathi niwehaka miyaako ni ephareya aniihu annikhala otaphuwa. Nto vannikhweya hiyo osuwela itthu sinaaxankiha aniihu”. Katya, nimuromonle ahu ittima sivinre, onihimya so: “Ikwaha sinceene, nuumala okhuma oxikola maana aka onikikuxa oparikhi wiira nawehe soopattuxiwa. Owo waari opuro wooreera ni vanikikhweela omuleela maama aka myaha saka ni itthu saakixankiha”.

16. Anamuyari apakeke exeeni wiira aviriheke okathi ari ene ni anaaya awehaka itthu sipattuxiwe?

¹⁶ Okathi anamuyari aniviriha aya okathi ari ene ni anaaya awehaka soopattuxiwa, atthu ootheene anikhala ootaphuwa ni annihakalala. Opaka eyo ennikhaliherya emusi okhala yowiiraana. Ntoko Biibiliya onihimya awe, wookhala “okathi w’otteliwa murima” ni “ukathi wo wina”. (Mus. 3:1, 4.) Yehova oopaka mapuro ooreera valaponi yaawo nikhanle ahu ootthimaka, okata, othweela ni opaka itthu sikina sinnisivela. Imusi sikina waasivela orowa mapuro oottaivela ositati, owela miyaako ni orowa ophareya. Nave anamwane akina waasivela otthimaka, othweela mpaarikhi, oweha inama ni okata mphareya aahiiso mmuro. Nookhalana okathi munceene wiira niwehe itthu Yehova opattunxe awe.

17. Xeeni anamuyari anireerela aya owiixuttihaka anaaya owehaka soopattuxiwa sa Yehova?

¹⁷ Elapo esya, anamuyari ni anaaya anooweryaka owehaka soopattuxiwa sa Yehova ovikana olelo-va. Maana atthu khanrowa woovaka inama, nave inama khasinrowa owoovaka atthu. (Yes. 11:6-9) Nave nnookhalana okathi munceene wiira niweheke soopattuxiwa ni wiixutta etthu voohimya sa Yehova. (Esal. 22:27) Nave-tho ti vooloka anamuyari owiixuttiha anaaya okhuma nenna-va owehaka soopattuxiwa. Akhala wiira anamuyari anoorumeela soopattuxiwa wiira awiixuttiha anaaya voohimya sa Yehova, woonasa wene anaaya anookhalana moonelo mmosa-ru aarina awe mwene Davidi. Yoowo aahimmye so: “Apwiya, [Yehova] . . . khavo onìra sotikiniha sinìranyu”. — Esal. 86:8.