1. Etthu xeeni atthu akina aniweha aya okathi anrowa aya omuthukumanoni ekwaha yoopacerya? (Nwehe efootu.)

 NKAHAYA mmuupuwele mulopwana ni mwaarawe aniweha mithukumano Empa ya Omwene ekwaha yoopacerya. Anamathelana awo annitikinihiwa oweha moota yaakheliwe aya saana ni oweha niphento anna ni arokora arina aya. Nuumala otthikela owaani, muthiyana onnimuleela iyawe oriki: “Iyaka, Anamoona a Yehova aavirikana ni atthu a itiini sikina”.

2. Exeeni ewiirinhe atthu akina ohiya omurumeela Yehova?

² Niphento arumeyi a Yehova arina aya, ti na vameekha aya. Masi-tho Anamoona a Yehova anatampi ntoko atthu akina. (1 Yoh. 1:8) Nto hiyo ninniweha soottheka saya, okathi nnaasuwela ahu saana. (aRom. 3:23) Mooriipiha murima, atthu akina aahiya omurumeela Yehova mwaha wa soottheka sa anna ni arokora.

3. Ninrowa waasuwela sai awiixutti eekeekhai a Yesu? (Yohani 13:34, 35.)

³ Nkatthikelani oweha-tho yoolepa okumihiwe aya mwaha ahu ola. (Mmusome Yohani 13:34, 35.) Exeeni enaasuwanyeiha awiixutti eekeekhai a Kristu? Niphento anooniherya aya, ohiya soottheka saya. Maana Yesu khaahimmye wiira: ‘Nyuwo munoosuwela wiira mwa awiixutti aka’. Masi aahimmye wiira: “Atthu otheene anoosuwela wira mwa awiixutti aka”. Ni moolumo ala, Yesu aahooniherya wiira khahiyo paahi awiixutti awe ti yaarowa osuwela wiira anniphentana mukina ni mukhwaawe. Masi atthu ootheene yaamusuwela wiira awiixutti a Yesu anniphentana mukina ni mukhwaawe.

4. Makoho xeeni woonasa wene ale ahikhanle Anamoona a Yehova aniikoha aya?

⁴ Atthu akina ahikhanle Anamoona a Yehova pooti wiikohaka so: ‘Niphento nimmooniherya sai wiira mutthu owo mwiixutti  a Yesu? Yesu aaphentale sai awiixutti awe? Kinrowa otthara sai ntakiheryo na Yesu olelo-va?’ Hata hiyo nri Anamoona a Yehova, nihaana wiikohaka makoho ala. Osuwela waakhuliwa wa makoho awo, onoonikhaliherya waaphenta anna ni arokora hata okathi yoole annitthekela aya. — aEef. 5:2.

5. Moolumo a Yesu ari Yohani 15:12, 13, antaphulela exeeni?

⁵ Yesu aahihimya wiira awiixutti awe yamphentanaka mukina ni mukhwaawe mwa enamuna ya vameekha aya. (Mmusome Yohani 15:12, 13.) Nwehe etthu Yesu aarumme awe awiixutti awe. Owo aahimmye so: “Mphentaneke mukina ni mukhwaawe, siisaale miyo kinoophentaakani”. Moolumo ala antaphulela exeeni? Yesu aaphavela ohimya wiira awiixutti awe yaahaana waaphentaka vanceene akina ovikana moota aniiphenta aya. Eyo enooniherya wiira awiixutti yaahaana oleva okumi aya, mwaha wa annaya vakhala wiira vannireerela. b

6. Biibiliya onooniherya sai wiira niphento nookhalana efaita?

⁶ Biibiliya oniixuttiha wiira niphento nookhalana efaita yinceene. Mwa ntakiheryo, atthu anceene waasivela soolepa iya sinittharelana: “Muluku ti ophenta”. (1 Yoh. 4:8) “Mumphenteke mukhwiinyu ntoko muniiphenta anyu”. (Math. 22:39) “Ophenta onnikhuneela itampi sinceene”. (1 Ped. 4:8) “Ophenta khonikhala-khala omalaka”. (1 aKor. 13:8) Soolepa iya ni sikina sinniniixuttiha wiira ti wa faita wooniherya mukhalelo ola wooreera.

7. Xeeni Satana ohinwerya awe owiiraaniha atthu ni ophentanaka?

⁷ Atthu anceene anniikoha so: ‘Ninrowa osuwela sai etiini ya ekeekhai? Itiini sootheene  sinihimya wiira siniixuttiha ekeekhai, masi khula etiini eniixuttiha itthu soovirikana voohimya sa Muluku’. Satana onnikumiherya itiini sinceene soowootha, nto mwaha waivaavo atthu anceene khanisuwela etiini yeekeekhai. Masi Satana khonikhala-khala oweryaka owuuraanyiha atthu a ilapo soovirikana khukhala emusi emosa paahi eniphentana mukina ni mukhwaawe. Yehova paahi toniwerya opaka eyo. Eyo enniweryaneya okhala wiira niphento neekeekhai ninkhuma wa Yehova. Nto ale arina munepa woowaarya wa Muluku ni anireelihiwa ni Yehova, anniwerya ophentana mweekeekhai. (1 Yoh. 4:7) Eyo ti etthu yaamwiirinhe Yesu ohimya wiira niphento na ekeekhai naamwaasuwanyeiha awiixutti awe.

8-9. Atthu anceene anoonela sai nuumala oweha niphento na Anamoona a Yehova?

⁸ Ntoko Yesu aahimmye awe, anamunceene olelo-va annaasuwela makristau a ekeekhai mwaha wa niphento anooniheryana aya. Mwa ntakiheryo, munna mmosa oniitthaniwa Ian, onnuupuwelela etthu yanvanre murima ekwaha yoopacerya aaronwe awe okongresuni a Anamoona a Yehova. Konkresu owo aapakiwe waattamela owannyawe, nave opuro yoowo Ian, anwenhe awe boola miyeeri vakhaani saavinre. Owo ohimmye so: “Atthu ale yaari oovirikana ni atthu kanwehanaka boola miyeeri vakhaani saavinre. Anamoona a Yehova yaanireerelana murima, yaaniwara saana, nave anaaya yaanikhalana mweettelo wooloka. Etthu yuulupale okhala wiira awo yaahikhalana murettele ni ti etthu kaaphavela aka. Nkinuupuwela myaha saalavuliwe, masi etthu kinuupuwela aka mweettelo Anamoona a Yehova yoonihenrye aya”. c Etthu ekina Ian aawenhe awe okonkereesuni, waari ophentana weekeekhai. Vakhala wiira ninnaaphenta anna ni arokora, nnimwaathokoreryaka mooreera murima ni mwa nttittimiho.

⁹ Munna mmosa oniitthaniwa John aarina moonelo mmosa-ru okathi aapacenrye awe oweha mithukumano Empa ya Omwene. Owo onihimya so: “Etthu yaakivanre murima vanceene waari oweha moota Anamoona a Yehova aniwaakhela aya atthu . . . Ootheene aya yaari ooreera murima. Nto ophenta waya wa ekeekhai, waahikiiriha woona wiira koophwanya etiini yeekeekhai”. d Soowiiraneya iya ni sikina sinnooniherya wiira arumeyi a Yehova makristau a ekeekhai.

10. Okathi xeeni nikhanle ahu oowooniherya wiira ninnaaphenta anna ni arokora? (Nwehe enoota.)

¹⁰ Ntoko niwenhe ahu wanipacerya wa mwaha ola, anna ni arokora ootheene toottheka. Nto ikwaha sikina anna ni arokora awo, pooti olavulaka aahiiso onipakela itthu sihininsivela. e (Yak. 3:2) Nto okathi eyo eniiraneya aya, etthu enrowa wooniherya wiira ninnaaphenta anna awo, itthu nimpaka ahu aahiiso ninlavula ahu. Etthu enrowa onikhaliherya opaka ni olavula itthu mwa enamuna yooloka, wiixutta ntakiheryo na Yesu. — Yoh. 13:15.

11. Mukhalelo xeeni woohiloka oonihenrye awe Yakobo ni Yohani? (Nwehe eteseenyo.)

¹¹ Yesu khaalipelela wiira awiixutti awe akhale atthu ahirina itampi. Ohiya-vo, Yesu aanaakhaliherya opaka itthu sooloka wiira aleveleliwe ni Yehova. Ekwaha emosa, arummwa anli a Yesu, Yakobo ni Yohani, yaahinvekela maama aya wiira olavule ni Yesu wiira yakilaathi  vamosa nuuwo, mukina moono woothiyana, mukina moono woolopwana moomweneni mwawe. (Math. 20:20, 21) Etthu Yakobo ni Yohani yaavekenle aya, yaahooniherya wiira awo yaari oowiixinnuwiha ni yaaphavela wooniwaka okhala a faita waavikana awiixutti akina. — Mir. 16:18.

12. Niireke Yakobo ni Yohani paahi ti yoonihenrye mukhalelo woohiloka? Mutthokiherye.

¹² Yakobo ni Yohani khahiyo paahi ti yooniherye mukhalelo woohiloka okathi ole. Nwehe moota arummwa akina yoonenle aya nuumala wiiwa yooveka ya Yakobo ni Yohani: “Nuumala awiixutti ale 10 wiiwa mwaha ole, yaahinanariwa ni awiixutti ale anli”. (Math. 20:24) Nto Yakobo ni Yohani vamosa ni arummwa akina yaahinyakulihana vanceene. Woonasa wene, yaanilavulelana so: “Nyuwosa munoona wiira mwa aani wiira nvekele opuro siiso moomweneni? Khahiyo nyuwo paahi nvare muteko moororomeleya vamosa ni Yesu. Ni hiyo-tho ninniphwanela okhala opuro owo!” Nto eyo enooniherya wiira okathi ole, awiixutti yaahiliyala efaita erina aya ophentana ni oreerelana murima.

13. Yesu aaphunke sai muxankiho wa arummwa awe? (Matheyo 20:25-28.)

¹³ Yesu aaphunke sai muxankiho ole? Owo khaahiyale waapixerya murima. Nave khuupuwenle waathanla arummwa akina yaaphwanelela, oowiiyeviha vanceene ni oophenta. Moovirikana ni-vo, Yesu aahivaanela ni  arummwa ale moopixa murima, okhala wiira anisuwela wiira yaaniphavela opaka etthu yooloka. (Mmusome Matheyo 20:25-28.) Ele khahiyo yaari ekwaha yoopacerya nnakhala yookiserya arummwa ale yaanyakulihana aya aphavelaka osuwela taani aari muulupale. Hata vari siiso, Yesu anaathokorerya mooreera murima. — Mar. 9:34; Luka 22:24.

14. Makhalelo a opuro arummwa a Yesu yannunwe aya, waari sai?

¹⁴ Yesu aanisuwela wiira arummwa awe yaahuuwale ni yannunwe mapuro oovirikana. (Yoh. 2:24, 25) Awiixutti a Yesu yannunwe mapuro yaale ahooleli a etiini yiixuttiha aya wiira mutthu aahaana okhalana miritti wiira ottittimihiweke. (Math. 23:6; nwehe enoota eri Matheyo 23:6, Biibiliya a estudo.) Nave ahooleli a ayuda yaixoona okhala a faita waavikana atthu akina. f (Luka 18:9-12) Nto Yesu aanisuwela wiira awiixutti awe yaawerya ohapuxiwa ni miyuupuwelo iye. (Mir. 19:11) Nave Yesu aanisuwela wiira awiixutti awe yaahikhalana murima wooloka. Ti nthowa naya aavirinhe awe okathi owiixuttihaka wiira yaahaana okhala oowiiyeviha ni ophentana, ohiya ophavelasa iparakha.

15. Yoowiiraneya ya Yakobo ni Yohani enniixuttiha exeeni?

¹⁵ Nnoowerya wiixutta etthu ni yoowiiraneya ya Yakobo ni Yohani. Ovekela etthu yoottittimiheya moomweneni yaari etthu yoohiloka. Nave awiixutti akina yaahikhalana moonelo woohiloka, maana yaaheemererya wiira yoowiiraneya ele ekumiherye okawanyeya. Masi Yesu aahaareerela murima ni waaphenta awiixutti awe ootheene 12. Yoowiiraneya ele enniixuttiha exeeni? Nniixutta wiira okathi anna annitthekela aya etthu yooloka opaka khahiyo oweha soovonya saya, masi moota nikhanle ahu oophuka muxankiho owo. Exeeni anrowa onikhaliherya ophuka mixankiho saana? Vaavo munna aahiiso murokora onninyoonyiha awe, niikoheke so: ‘Xeeni kihireere aka onyoonyiwa ni etthu ele okiiriha awe? Niireke yookhala etthu kinreerela aka olokiherya? Niireke murokora aahiiso munna ole okinyoonyinhe orina muxankiho? Hata kirina ene mathowa onyoonyiheya, niireke kinoowerya wooniherya ophenta kimulevelelaka?’ Nto vaavo nihinahiya ahu waaphenta anna hata anitthekelaka, ninnooniherya wiira na awiixutti a ekeekhai a Kristu.

16. Ntakiheryo na Yesu ninniixuttiha exeeni?

¹⁶ Ntakiheryo na Yesu ninniixuttiha efaita erina aya waaphenta anna ani arokora. (Mir. 20:5) Yesu aaniwerya osoma aahiiso osuwela mirima sa atthu. Moovirikana ni Yesu hiyo khanniwerya osoma aahiiso osuwela mirima sa arokora, masi hata vari siiso nnoowerya waapixerya murima okathi annitthekela aya. (aEef. 4:1, 2; 1 Ped. 3:8) Nto etthu enrowa onikhaliherya opaka eyo waasuwela saana anna ni arokora. Nwehe yoowiiraneya emosa.

17. Omusuwela saana munna mmosa yaamukhalihenrye sai mutokweene a esirkwiitu?

¹⁷ Mutokweene esirkwiitu mmosa onirumeela wÁfrica Oriental onnimuupuwela munna mmosa yoowo aakhala ntoko khaathokorerya saana anna ni arokora. Nto mutokweene ole a esirkwiitu aapanke exeeni? Owo onihimya so: “Ohiya omusyaka munna ole miyo kaahithanla waataana saana”. Nto okathi yavaanela aya mutokweene ole aahoona  wiira etthu yaamwiiriha munna ole ohaathokoreryaka saana anna ni arokora moota ahuuwale awe. Mutokweene ole a esirkwiitu onnincererya oriki: “Nuumala osuwela wiira kivamukhweelale munna ole opaka marukunuxo mookumini mwawe, eyo yaahikivara murima. Nto naahikhala apatthani aalupale”. Vaavo nniimananiha ahu waasuwela saana anna ni arokora vanninikhweela waaphenta.

18. Makoho xeeni ninreerela ahu wiikoha vakhala wiira munna aahiiso murokora ooniveeha? (Miruku 26:20.)

¹⁸ Ikwaha sikina vannireerela ovaanela ni munna aahiiso murokora oniveehale, wiira niphuke muxankiho. Masi nihinatthi orowa olavulana vaamureerela wiikoha so: ‘Kiireke kinnnisuwela itthu sootheene siiraneyale mwaha ola?’ (Mir. 18:13) ‘Kiireke oroolakelela okinyoonyiha?’ (Mus. 7:20) ‘Kiireke miyo kootoko omunyoonyiha munna mukina?’ (Mus. 7:21, 22) ‘Vakhala wiira kinoolavulana mwaha ola, kiireke wiira khonrowa otepa?’ (Musome Miruku 26:20.) Vakhala wiira nnooviriha okathi wiira nuupuwelele makoho ala, nnimoona wiira etthu yooreerela opaka waaphentaka annihu ni ohiya wuupuwelela etthu aniiriha aya.

19. Exeeni mulakenle anyu opaka?

¹⁹ Anamoona a Yehova annisuwanyeya okhala awiixutti a ekeekhai maana anniphentana. Khula mmosa a hiyo onimooniherya wiira mutthareli a ekeekhai a Yesu vakhala wiira onoowooniherya niphento na ekeekhai anna ni arokora nnaamwi anitthekelaka. Okathi ninrowa ahu opakaka eyo atthu akina enamoonaka wiira okokhorela wahu ti weekeekhai. Nave enamphavelaka omukokhorela Muluku ahu oophenta Yehova. Nto noolakela okhala atthu oophenta, weiwo onnisuwanyeiha okhala makristau a ekeekhai.