Xeeni mulopwana mmosa Biibiliya onimuhimya awe okhala “mmusi” aahimyale awe wiira ʻkharowa wahiyeryaʼ etthu anaawe vakhala wiira ammuthela Ruthi? (Rut. 4:1, 6)

Okathi wa aIsarayeli, akhala wiira mulopwana mmosa oothela aanikhwa, ohinatthi okhalana mwaana yaanikhumelela makoho ntoko ala: Exeeni yaarowa okhumelela ni imatta sawe? Niireke nsina na emusi awe khinaarowa oliyaliwa? Nlamulo na Moise nanaakhula makoho ala.

Exeeni yaarowa wiiraneya ni imatta sawe vakhala wiira mulopwana owo aamookhwa? Aahiiso akhala wiira aamutumiha mwaha woohaawa? Ematta eyo yaahaana othummwa ni muhima awe aahiiso muulupale awe wala mmusi awe mukina. Eyo yaaniiriha imatta iyo nlelo okhala sa emusi awe. — Onam. 25:23-28; Moth. 27:8-11.

Masi waarowa oweryaneya sai nsina na emusi na mulopwana ole okhwiiye ohiliyaliwa? Vanweryaneya vakhala wiira amwaarawe yaamutheliwa ni muhima awe aahiiso muulupale awe. Eyo ti etthu yaamwiiranenle Ruthi. Nto muhima awe aahiiso muulupale awe aahaana omuthela muthiyana ole aari naamukhweli wiira omuyarele mwaana. Mwaana owo, ohiya paahi ohalana imatta sa mulopwana ole okhwiiye, owo aahaana wiitthaneliwaka nsina na emusi ele. Nto nlamulo nno naanooniherya ophenta wa Yehova nave-tho naanaakhapelela anaamukhweli. — Otum. 25:5-7; Math. 22:23-28.

Nrowe nthokorerye yoowiiraneya ya Nowemi. Owo aatheliwe ni mulopwana mmosa iitthaniwa Elimeleki. Nuumala Elimeleki vamosa ni anaawe anli okhwaasa, khaavo aahanle wiira omukhapeleleke Nowemi. (Rut. 1:1-5) Nuumala-vo, Nowemi aahitthikela muttetthe awe wa oYuda. Nto owo aahilavula ni Ruthi yoowo aari mwaara a mwanawe wiira onvekele Bowazi othuma aahiiso woopola imatta sa Elimeleki. Bowazi aari mmusi a Elimeleki. (Rut. 2:1, 19, 20; 3:1-4) Masi Bowazi aahimuupuwela mulopwana mmosa, yoowo Biibiliya onimwiitthana awe okhala “mmusi awe”, tthiri aari mmusi a Elimeleki. Nto eyo enooniherya wiira mulopwana owo aahikhalana ediretu ya woopola imatta sa Elimeleki. — Rut. 3:9, 12, 13.

Wanipacerya, “mmusi” ole aaniphavela woopola aahiiso othuma imatta iye. (Rut. 4:1-4) Okhala wiira aanuupuwela wiira Nowemi khaarowa omuyara-tho mwaana, nto eyo yaahimwiiriha weemererya othuma aahiiso woopola imatta sa Elimeleki. Tthiri eyo yaamumphwanyiha mireerelo, okhala wiira imatta sootheene saarowa okhala sawawe.

Masi nuumala oleeliwa wiira aarowa omuthela Ruthi mmusi ole aahituruka muupuwelo. Owo aahimmye so: “Vakhalaru siso, nkintthuna othuma emattʼeyo, kihiweryaka wahiyerya anʼaka”. (Rut. 4:5, 6) Exeeni yaamwiirinhe mmusi ole oturuka muupuwelo?

Akhala wiira mmusi ole aahiiso mulopwana mukina ammuthela Ruthi ni aamuyarana mwaana, mwaana owo taarowa ohalana imatta sa Elimeleki. Nto mmusi ole aarowa ʻohiweryaʼ sai ʻwaahiyerya anaaweʼ? Biibiliya khonihimya etthu sa mwaha ola. Woonasa wene, mathowa ala anittharelana ti yaamwiirinhe okhootta.

• Nthowa noopacerya, vakhanle wiira mmusi ole aamuthuma ematta ya Elimeleki owo ampweteiwa musurukhu awe. Maana muhoolo mwaya ematta ele yaarowa okhala ya mwanawe Ruthi.

• Nthowa na nenli, mmusi ole aamukhalanaka muritti wa onvaha eyoolya ni omukhapelela Nowemi ni Ruthi.

• Nthowa na neeraru, vakhanle wiira Ruthi aamwaayara anamwane ni mulopwana ole, anamwane ale yaamukhalana ediretu ya waakhela imatta sa mulopwana ole. Nave anamwane yaayanre awe khalai yaamukhalana ediretu emosaru.

• Nthowa na neexexe, vaakhanle wiira mulopwana ole khaamuyanre mwaana, mwaana aarowa awe omuyara ni Ruthi, taarowa okhalana ediretu ya waakhela imatta sa Elimeleki ni sawawe. Nave akhala wiira mulopwana ole aamookhwa, imatta sawe saarowa ohala ni mwaana ahaarowa ohalana nsina nawe, masi aarowa ohalana nsina na Elimeleki. Ala mathowa yaamwiirinhe mulopwana ole okhootta omukhaliherya Nowemi. Masi owo aahithanla wiira mmusi mukina yoowo iitthaniwa Bowazi, ohalane muritti owo. Nto Bowazi aaheemererya muritti owo, maana aaphavela wiira “nsina na marahimu nihiliyaliwe mweemusini mwawe”. — Rut. 4:10, Piipiliya Emakhuwa.

Ntoko niwenhe ahu, woonasa wene mulopwana ole aaphavela okhapelela nsina nawe ni imatta sawe paahi. Tthiri, mulopwana ole aaphavela mureerelo awe paahi. Nnaamwi mulopwana ole aaphavela okhapelela nsina nawe, khahiyo ti yeeyo yiiraneyale maana olelo-va khuuvo onisuwela nsina nawe. Owo aahiyeleela eparakha aavahiwe awe Bowazi. Maana Bowazi, aahikhalana eparakha yookhala muhavinre awe Mesiya, eyo piiyo, Yesu Kristu. Yoowiiraneya ela, ennooniherya etthu eniwiiraneela atthu aniphavela mureerelo aya paahi ni ahimphavela waakhaliherya atthu akina! — Math. 1:5; Luka 3:23, 32.